7–13 nō ’Ātete

Roma 1–6

« Te mana o te Atua ’ia ora te feiā ato’a »

’A tai’o ma te pure i te Roma 1–6 ma te ha’amana’o i tā ’oe mau pīahi. E tauturu ïa te reira ia ’oe ’ia ha’apa’o i te mau muhumuhura’a a te Vārua ’a fa’aineine ai ’oe nō te ha’api’i.

Tītau i te mana’o

E nehenehe e hōro’a i te mau pīahi te tahi minuti nō te ’imi mai i roto i te Roma 1–6 i te hō’ē ’īrava tā te Vārua Maita’i i tauturu ia rātou ’ia māramarama maita’i a’e. E fa’a’ite rātou i muri iho i te ’īrava tā rātou i mā’iti i te pīahi e pārahi ra i pīha’i iho mai.

Ha’api’i i te ha’api’ira’a tumu

Roma 1:16–17

« ’Aore ho’i au i ha’amā i te ’evanelia a te Mesia ».

• E rave rahi ta’ata tei fāri’i i te mau ’itera’a rau i reira rātou i te fa’ao’ō’ora’ahia nō tō rātou mau ti’aturira’a. Nō te tauturu i te mau pīahi ’ia fāri’i ana’e rātou i teie mau huru ’itera’a, e ani ’oe ia rātou ’ia tai’o te Roma 1:16–17 ’e ’ia feruri i te mau hi’ora’a i roto i te buka Te ’Ohipa, ’a fa’a’ite ai Paulo ē ’aita ’oia i ha’amā i te ’evanelia. Penei a’e e hina’aro ato’a te mau pīahi e fa’a’ite mai i te mau tumu e ha’amā ai rātou i te ’evanelia a Iesu Mesia. ’Aore rā e ani i te mau pīahi ’ia fa’a’ite mai i te tahi ’ohipa tei tupu, ’a fa’a’ite ai rātou ’aore rā te tahi atu mau ta’ata ē ’aita rātou i ha’amā i te ’evanelia.

  

  E nehenehe tātou e ’ore e ha’amā ’ia fa’a’ite i tō tātou ’itera’a pāpū nō te ’evanelia.

Roma 2:28–29

E ’itehia te ti’ara’a pipi mau i roto i tā tātou iho fa’a’otira’a, ’eiaha noa i roto i tā tātou mau ’ohipa.

• Nāhea tātou i te fāito i tō tātou iho ti’ara’a pipi ? E tauturu te a’o a Paulo i tō Roma ia tātou ’ia ha’amana’o e rōtahi hau atu i ni’a i « te ’ā’au [’e] te vārua » (Roma 2:29) ’eiaha rā i ni’a i te mau ’ohipa nā rāpae. Nō te tauturu i tā ’oe mau pīahi ’ia ta’a maita’i i te a’o a Paulo, e nehenehe ’oe e pāpa’i i te ’īrava nō roto mai i te Roma 2:28–29 i ni’a i te tāpura ’ere’ere. E mono i te tā’o ’Āti Iuda i te Feiā Mo’a i te mau Mahana Hope’a nei ’e te tā’o peritome i te fafaura’a. E aha tā teie tauira’a e hōro’a mai nei i tō tātou hāro’aro’ara’a nō te mau ha’api’ira’a a Paulo ? E nehenehe ato’a ’outou e tauaparau i te mau hi’ora’a o te mau ’ohipa tā tātou e rave nei ’ei melo nō te ’Ēkālesia, ’o tei hau atu i te faufa’a ’e te pūai ’ia rave-ana’e-hia « ma te ’ā’au, ’e te vārua » (Roma 2:29).

Roma 3–6

« Te vāhi i rahi ai te hara ra, ’ua rahi roa te hāmani maita’i i reira ».

• Nāhea ’oe i te tauturu i te mau pīahi ’ia māramarama i te mau ha’api’ira’a a Paulo nō ni’a i te fa’aro’o, te ’ohipa ’e te aroha mau ? ’A feruri i te hōhora atu i teie nā hi’ora’a e piti nō te tauturu i te mau pīahi ’ia māramarama ē, e’ita e ti’a ia tātou ’ia hi’o i tā tātou mau ’ohipa maita’i ’ei rāve’a nō te fa’a’ite i tō tātou ti’a mā, ’e e’ita ato’a e ti’a ’ia hi’o tātou i te maita’i o te Mesia ’ei tumu nō te fa’ati’a i tā tātou mau hape ’e mau hara. E nehenehe te mau pīahi e mā’i mai i te mau parau mau i roto i te Roma 3:20–31 ; 5:1–2 ; 6:1–2, 21–23 o te tauturu ia Gloria ’e ia Justin. E aha te tahi atu mau parau mau i roto i « Te tahi atu ā mau mātēria tauturu » e tauturu i te mau pīahi ’ia ta’a maita’i i te faufa’a rahi nō te ’ohipa ti’a ’e te aroha mau o te Mesia ?

  Hi’ora’a 1

  Te hepohepo nei hō’ē hoa ’o Gloria te i’oa, i roto i tāna mau tauto’ora’a ’ia riro ’ei pipi itoito. Tē ’ohipa itoito nei ’oia nō te rave i te mau mea ato’a tāna i ’ite e ti’a iāna ’ia rave, tē ha’ape’ape’a pinepine nei rā ’oia ē, ’aita ’oia e manuia. « ’Ua nava’i ānei tō’u maita’i ? » ’ua ui ’oia iāna iho. « E fāri’i ānei te Fatu iā’u ? »

  Hi’ora’a 2

  Hō’ē hoa ’o Justin te i’oa, ’aita roa ha’ape’ape’a rahi nei nō ni’a i te ravera’a i te mau mā’itira’a ti’a. Tē ti’aturi nei ’oia ia Iesu Mesia, tē haere nei ’oia i tāna mau rurura’a a te ’Ēkālesia, ’e e metua tāne ’e e ta’ata tupu maita’i ’oia. Teie rā, ’ua mā’iti ’oia ’eiaha e ha’apa’o i te mau ture ’o te fa’ata’a iāna ’ia fāri’i i te hō’ē parau fa’ati’a nō te hiero. ’Ia tāmata ana’e te ’utuāfare ’e te mau hoa i te fa’aitoito iāna ’ia fa’aineine nō te hiero, e pāhono mai ’oia, « E ta’ata maita’i au. E fa’aro’o tō’u i te Mesia. ’Ua ’aufau a’ena ’oia i te ho’o o tā’u mau hara, ’e ’aita vau e mana’o nei ē e tāpe’a ’oia iā’u i rāpae i te bāsileia tiretiera nō taua mau tumu ha’iha’i roa ».

Te tahi atu ā mau mātēria tauturu

Te fa’aro’o, te maita’i ’e te ’ohipa

Hi’ora’a 1

• Etera 12:27

• Moroni 10:32–33

• J. Devn Cornish, « ’Ua nava’i ānei tō’u maita’i ? E manuia ānei au ? », Liahona, Novema 2016, 32–34

• ’Ua ha’api’i mai peresideni Dieter F. Uchdorf : « E ’ore te fa’aorara’a e ho’ohia i te moni o te ha’apa’o ; e ho’ohia mai rā nā roto i te toto o te Tamaiti a te Atua … E hōro’a nā te Atua te aroha mau, ’e tō tātou hina’aro ’ia ha’apa’o i te mau fa’auera’a tāta’itahi a te Atua, ’o te torora’a ïa i tō tātou rima tāhuti nei nō te fāri’i i teie hōro’a mo’a a tō tātou Metua i te ao ra » (« Te hōro’a o te aroha mau », Liahona, Mē 2015, 109–10).

Hi’ora’a 2

• Iakobo 2:17–26

• Helamana 12:23–24

• D. Todd Christofferson, « E vai herehia atu ā ’outou e au », Liahona, Novema 2016, 48-51

• ’Ua ha’api’i mai peresideni Dieter F. Uchtdorf : « Mai te mea e hōro’a na te Atua te aroha mau, nō te aha ïa te ha’apa’ora’a i te mau fa’auera’a a te Atua i riro ai ’ei ’ohipa faufa’a roa ? Nō te aha ïa e ha’ape’ape’a nō te mau fa’auera’a a te Atua―’aore rā, te tātarahapa, nō te reira ? … E riro tō tātou ha’apa’o i te mau fa’auera’a a te Atua ’ei fa’ahope’ara’a au nō tō tātou here ’e tō tātou ’ā’au mehara hope ’ore i te maita’i rahi o te Atua. Nā teie huru here ’e te ’ā’au mehara rahi e ’āmui, mai te hō’ē semeio te huru, i tā tātou ’ohipa i te aroha mau o te Atua » (« Te hōro’a o te aroha mau », 109).

Ha’amaita’ira’a i tā tātou ha’api’ira’a

E mea fa’auruhia tō ’oe pi’ira’a. ’Ei ’orometua ha’api’i, ’ua pi’ihia ’oe e te Fatu nō te ha’amaita’i i tāna mau tamari’i. Tē hina’aro nei te Fatu ’ia manuia ’outou, nō reira ’a ora ti’a mā ai ’outou nō te fāri’i i tāna tauturu, e hōro’a mai ïa ’oia ia ’outou te heheura’a tā ’outou e tūtava nei. (Hi’o Ha’api’ira’a mai tā te Fa’aora, 5.)