« 14–20 nō ’Ātete. Roma 7–16 : ‘’Ia pohe rā te ’ino ia ’oe i te maita’i’ » Mai pe’e mai—nō te Ha’api’ira’a Sābati : Faufa’a ’Āpī 2023 (2022)
« 14–20 nō ’Ātete. Roma 7–16 », Mai pe’e mai—nō te Ha’api’ira’a Sābati : 2023
14–20 nō ’Ātete
Roma 7–16
« ʼIa pohe rā te ʼino ia ’oe i te maita’i »
’A tai’o i te Roma 7–16, ’e ’a pāpa’i i te mau mana’o tā ’oe i fāri’i e nāhea ’ia tauturu i te mau pīahi ’ia ha’api’i mai nā roto mai i te mau pāpa’ira’a mo’a. ’A feruri ai ’oe i tō ’oe mau fa’aurura’a, e arata’i te reira i te mau ’ohipara’a faufa’a rahi nō te ’apora’a mai.
Tītau i te mana’o
E nehenehe e tai’o i te Roma 10:17 ’e 15:4 ’e e ani i te mau pīahi ’ia fa’a’ite mai i te mau pāpa’ira’a mo’a nō roto mai i te Roma 7–16 ’o tē patu i tō rātou fa’aro’o ia Iesu Mesia ’aore rā ’ia hōro’a ia rātou i te tīa’ira’a.
Ha’api’i i te ha’api’ira’a tumu
E nehenehe tātou e riro « ’ei feiā tufa’a ’e te Mesia ».
-
’Ei feiā mo’a i te mau mahana hope’a nei, tē ti’aturi nei tātou ē te aura’a o te mau pereota mai te « e feiā tufa’a i te Atua ra » ’e « e feiā tufa’a ’e te Mesia », ’o te rirora’a ïa nā roto i te tauturu a Iesu Mesia mai te Metua i te ao ra ’e te fāri’ira’a i te mau mea ato’a i fatuhia e ana (Roma 8:17 ; hi’o ato’a Te Ha’api’ira’a Tumu ’e te mau Fafaura’a 132:20–21). Nō te tauturu i te mau pīahi ’ia hi’o nāhea teie ha’api’ira’a tumu i te ha’api’ihia i roto i te mau pāpa’ira’a mo’a, e ani ’oe ia rātou ’ia ha’apupu ’ei pea ’aore rā ’ei pupu na’ina’i ’e ’ia tuatāpapa i te tahi o te mau pāpa’ira’a mo’a tei tāpurahia i roto i « Te tahi atu ā mau mātēria tauturu ». I muri iho ’ia fa’a’ite mai te mau pīahi i te mea tā rātou i ha’api’i mai ’e ’ia ’āparau mai nō te aha e mea faufa’a rahi roa teie ha’api’ira’a tumu.
-
E nehenehe te fa’aaura’a tei hōro’ahia mai e peresideni Dallin H. Oaks i roto i « Te tahi atu ā mau mātēria tauturu » e tauturu i te mau pīahi ’ia tāu’aparau e nāhea tātou ’ia fa’aineine ’ia riro « ’ei feiā tufa’a i te Atua » (Roma 8:17). E aha te tahi ’o te mau « ture ’e te mau parau tumu » tā peresideni Oaks i fa’ahiti ? E aha te ta’a-’ē-ra’a tā te reira e fa’atupu i roto i tō tātou orara’a ’ia ’ite ē, e nehenehe tātou e riro « ’ei feiā tufa’a i te Atua, ’e ’ei feiā tufa’a i te Mesia » ? (Roma 8:17).
« Nā vai ïa e fa’ata’a ’ē ia tātou i te here o te Mesia ? »
-
E hōro’a mai te tāu’aparau ’āmui i te Roma 8 i te hō’ē tumu nō te tauturu i te mau pīahi ’ia fāri’i i te here o te Fa’aora. ’A fa’a’ite atu i te hō’ē hōho’a nō Iesu Mesia (hi’o fa’anahora’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare) ’a tai’o ai ’outou i te Roma 8:18, 28, 31–39 ’ei piha ha’api’ira’a. E ani i te mau pīahi ’ia fa’a’ite mai i te mau mana’o ’aore rā te mau putapūra’a tā rātou i fāri’i i muri a’e i te tai’ora’a i teie mau ‘īrava. E hina’aro paha te tahi e fa’a’ite mai nāhea te noa’ara’a ia rātou te mau ’itera’a pāpū nō te mau parau mau tā rātou i ’ite mai i roto i teie mau ’īrava.
’Ua hope pā’āto’a te mau fa’auera’a a te Atua i te fa’aotihia i roto i te fa’auera’a ’ia here.
-
Nō te tauturu i te mau pīahi ’ia ’ite e nāhea te tā’āto’ara’a o te mau fa’auera’a i « hope ai i roto i » te fa’auera’a ’ia here atu i tō ta’ata tupu (Roma 13:9), ’a ani atu ia rātou ’ia pāpa’i i ni’a i te tāpura ’ere’ere te mau fa’auera’a ato’a tā rātou e nehenehe e ha’amana’o. ’A tai’o ’āmui i te Roma 13:8–10 ’e te Mataio 22:36–40, ’e ’a ’āparau ’ei piha ha’api’ira’a i te aura’a i rotopū i te herera’a i te Atua ’e tō tātou ta’ata tupu ’e te ha’apa’ora’a i te mau fa’auera’a tāta’itahi tei tāpurahia i ni’a i te tāpura ’ere’ere. Nāhea teie parau mau e taui ai i te huru ’o tō tātou mana’o nō ni’a i te mau fa’auera’a ’e te ha’apa’ora’a ? ’Ei hi’ora’a, e aha tā teie parau mau e parau nei nō ni’a i te fā o te mau fa’auera’a ?
« ’Eiaha rā hoʼi tātou … e faʼahapa i tō taeaʼe ».
-
’Ei ha’amāramaramara’a i te ’ohipa i tupu i roto i te Roma 14, e nehenehe ’oe e fa’a’ite ē, ’ua mārō te tahi feiā mo’a nō Roma i te tahi ’e te tahi nō ni’a i te mau peu ta’a ’ē nō te hīro’a, mai te mau peu nō te tāmā’ara’a ’e te mau mahana fa’afa’aeara’a. E aha te tahi ā mau huru ’ohipa ’o tā tātou e fa’aruru nei i teie mahana ? Penei a’e e nehenehe te mau pīahi e tai’o i te Roma 14 ’e ’ia hōro’a poto mai i te hō’ē parau nō te a’o a Paulo. E aha te a’o tā tātou e nehenehe e fa’a’ite i te tahi ’e te tahi, e nāhea ’ia ’ape i te ha’avā atu ? Penei a’e e nehenehe te mau pīahi e ’ite mai i te mau mana’o i roto i te parau poro’i a te peresideni Dieter F. Uchtdorf « E noa’a te aroha i tei aroha ia vetahi ē ra », Liahona, Mē 2012, 70–77.
Te tahi atu ā mau mātēria tauturu
Fāri’ira’a « i te mau mea ato’a [a] te Metua » (Te Ha’api’ira’a Tumu ’e te mau Fafaura’a 84:38).
-
« Riro mai te Atua te huru » (Mau tumu parau o te ’evanelia, topics.ChurchofJesusChrist.org)
’Ua fa’ati’a te peresideni Dallin H. Oaks i teie nei parabole :
« ’Ua ’ite te hō’ē metua tāne moni roa ē, mai te mea e hōro’a ’oia i tāna faufa’a i te hō’ē tamari’i ’aita ā i ’aravihi roa ’e i pa’ari roa, e riro taua faufa’a ra i te ha’amāu’ahia. ’Ua parau atu ra te metua tāne i tāna tamari’i :
« Tā’u mau faufa’a ato’a tē hina’aro nei au e hōro’a atu nā ’oe—’eiaha tā’u faufa’a ana’e, tō’u ato’a rā tōro’a ’e te ti’ara’a teitei i rotopū i te mau ta’ata. Tā’u mau faufa’a ato’a e ti’a iā’u ’ia hōro’a atu nā ’oe, ’āre’a rā tō’u huru nā ’oe iho ïa te reira e tītau. E manuia ’oe nō te fāri’i i tā ’oe faufa’a nā roto i te ha’api’ira’a mai tā’u i ha’api’i mai, ’e te orara’a mai tā’u i ora. E hōro’a atu vau ia ’oe te mau ture ’e te mau arata’ira’a tumu i fāri’i ai au i te ’aravihi ’e te manuia. ’A pe’e i tō’u hi’ora’a, ’a rave itoito mai tā’u i rave itoito, ’e e riro ’oe mai iā’u nei ’e e fāri’i ’oe i tā’u mau faufa’a ato’a » (« Te tītaura’a ’ia riro », Liahona, Novema 2000, 32).
Ha’amaita’ira’a i tā tātou ha’api’ira’a
’Imi i te rāve’a nō te turu i te mau parau tumu. Ta’a ’ē noa atu i te mau mana’o nō te ha’api’i i roto i teie fa’anahora’a, e nehenehe ’outou e taui i te mau ’ohipara’a i roto i te fanahora’a nō teie hepetoma i roto i te Mai pe’e mai—nō te ta’ata hō’ē ’e te ’utuāfare nō te fa’a’ohipa i roto i tā ’outou piha ha’api’ira’a. (Hi’o ato’a Ha’api’ira’a mai tā te Fa’aora, 17–18.)