14–20 nō ’Ātete

Roma 7–16

« ’Ia pohe rā te ʼino ia ’outou i te maita’i »

E ma’a parau tumu nō te ’evanelia noa i roto i te Roma 7–16 tē nehenehe e tu’u i roto i teie arata’i ha’api’ira’a, nō reira ’eiaha e fa’aea noa i ni’a i te mau mea i’ō nei. E ha’apa’o maita’i i te fa’aurura’a tā ’outou e fāri’i ’a rave noa ai i tā ’outou tuatāpapara’a.

Pāpa’i i te mau mana’o e tae mai

I te ’ōmuara’a Paulo i tāna ’episetole i tō Roma, ’ua fa’atae ’oia i te tāpa’o aroha i te mau melo i Roma ma te pi’i ia rātou ’ei feiā « herehia mai e te Atua […] i ha’apa’ohia ’ei feiā mo’a. » ’Ua nā ’ō ’oia ē, « ’ua parauhia tō [rātou] fa’aro’o ē ’ati noa a’e te fenua ato’a nei » (Roma 1:7–8). Noa atu ā e tuha’a rahi i roto i te ’episetole a Paulo tei fa’a’āfaro i te mau mana’o ’e te mau ravera’a hapehape, e au ē, ’ua hina’aro ato’a ’oia e ha’apāpū i teie nau fa’afāriu keresetiano ’āpī ē, e mau feiā mo’a mau rātou tei herehia e te Atua. Tē ha’amaita’i nei tāna a’o marū ia tātou pā’āto’a ’o tē tāfifi nei i te putapū i te here o te Atua ’e ’o tē mana’o ra paha ē, e’ita e noa’a mai. Ma te ha’eha’a ’e te auma’i, ’ua fā’i Paulo ē, ’ua tae mai tōna mana’o i te tahi taime ē e « ta’ata ’ati rahi » ’oia (Roma 7:24), ’ua hōro’a mai rā te ’evanelia a Iesu Mesia iāna i te mana nō te upo’oti’a i ni’a i te hara (hi’o ’Īritira’a a Iosepha Semita, Roma 7:22–27 [i roto i te parau hi’u a te Bibilia]). Nā roto i taua mana ra, ’oia ho’i te mana tāra’ehara a te Fa’aora, e ti’a ïa ’ia « pohe […] te ’ino ia [tātou] »—te ’ino i roto i te ao nei ’e te ’ino ho’i i roto ia tātou iho—« i te maita’i » (Roma 12:21).

Mau mana’o nō tā’u iho tuatāpapara’a pāpa’ira’a mo’a

Roma 7–8

E nehenehe te feiā e pe’e i te Vārua e riro ’ei « feiā tufa’a […] ’e te Mesia. »

Noa atu ā pa’i ’ua oti te tomora’a i roto i te « haere’a ’āpī » nā roto i te ’ōro’a nō te bāpetizora’a (Roma 6:4), ’ua ’ite paha ’oe i te mau titotitora’a ’o roto tā Paulo i fa’ahiti i roto i te Roma 7—te « mārōra’a » te ta’ata tino nei ’e tō tātou mau hia’ai parauti’a (Roma 7:23). ’Ua parau ato’a rā Paulo i te parau nō te tīa’i i roto i te Roma 8:23–25. E aha te mau tumu nō te tīa’ira’a tā ’oe e ’ite ra i roto i te pene 8 ? E nehenehe ato’a tā ’oe e hi’o i te mau ha’amaita’ira’a e tae mai nō te pārahira’a « te Vārua o te Atua i roto ia [’oe] » (Roma 8:9). Nāhea ’oe e ’imi hope atu ā i te hoara’a o te Vārua Maita’i i roto i tō ’oe orara’a ?

Roma 8:16–39

E rahi a’e te hōro’a nō te hanahana mure ’ore i tō’u mau tāmatara’a i ni’a i te fenua nei.

Ma’a matahiti noa i muri mai tō Paulo pāpa’ira’a i teie ’episetole, ’ua fa’aruru te feiā mo’a i Roma i te mau hāmani-’ino-ra’a ri’ari’a mau. E aha tā ’oe e ’ite ra i roto i te Roma 8:16–39 tei tauturu i teie nei feiā mo’a i te taime ’a tupu ai te hāmani-’ino-ra’a ? Nāhea teie mau parau e tano ai nō ’oe ’e te mau tāmatara’a tā ’oe e fa’aruru nei ?

E hi’o i te mau tū’atira’a i roto i teie mau ’īrava ’e teie parau a’o a te tuahine Linda S. Reeves : « ’Aita vau i ’ite ē, e aha te tumu tātou e fāri’i ai i te mau tāmatara’a e rave rahi, terā rā, tē feruri nei au, ’ia tae i taua mahana ha’amāuruurura’a ra, nō te rahi o te ha’amaita’ira’a, ’e te mure ’ore, ’e te poupou, e ’ore e tae’ahia i tō tātou hāro’aro’ara’a, e riro tātou i te hina’aro i te parau i tō tātou Metua aroha, te ’ā’au maita’i ’e te here ē, ‘’O terā ana’e tei tītauhia ?’ Tē ti’aturi nei au ē, mai te mea ē, e nehenehe tā tātou e ha’amana’o ’e e hi’o i te mau mahana ato’a i tō te Metua i te ao ra ’e tō tātou Fa’aora here rahi ia tātou, e hina’aro ïa tātou ’ia rave i te mau mea ato’a tā rāua e ani mai nō te ho’i fa’ahou i mua i tō rāua aro. [E aha pa’i ïa] te mau mea tā tātou e mamae nei i’ō nei, mai te mea i te hope’a, nā te reira iho mau tāmatara’a e fa’aineine ia tātou nō te ora mure ’ore ’e te fa’ateiteira’a i roto i te bāsileia o te Atua, i pīha’i iho i te Metua ’e te Fa’aora ? » (« Ti’amā nō tō tātou mau ha’amaita’ira’a i fafauhia mai », Liahona, Nov. 2015, 11). E fa’aoti e aha tā ’oe e rave nō tē « ha’amana’o ’e [nō te] hi’o i te mau mahana ato’a » i te here o te Atua ia ’oe.

Roma 8:29–30 ; 9–11

E aha tā Paulo e parau nei nō ni’a i te « ha’apa’o ātea », te « mā’itira’a » ’e te « ’ite i muta’a ihora » ?

’Ua fa’a’ohipa Paulo i te mau parau « ha’apa’o ātea », « mā’itira’a », ’e « ’ite i muta’a ihora » nō te ha’api’i i te ta’ata ē, hou teie orara’a, ’ua mā’iti te Atua i te tahi o tāna mau tamari’i ’ia fānauhia ’ei tamari’i nō ’Īserā’ela, tōna nūna’a fafauhia. Te aura’a ra, e fāri’i rātou i te mau ha’amaita’ira’a ’e te mau hōpoi’a ta’a ’ē ’ia ti’a ia rātou ’ia ha’amaita’i i te mau ta’ata ato’a o te ao nei (hi’o Arata’i nō te mau pāpa’ira’a mo’a, « Mā’itira’a », scriptures.ChurchofJesusChrist.org). Terā rā, ’ua ha’apāpū Paulo i roto i te Roma 9–11 ē, e nehenehe i te mau tamari’i ato’a a te Atua ’ia riro mai ’ei nūna’a fafauhia nāna, ’e nā reira ato’a, hō’ē ā huru tātou e fāri’i ai i te ora mure ’ore—nā roto i te fa’aro’o ia Iesu Mesia ’e te ha’apa’ora’a i tāna mau fa’auera’a.

Hi’o ato’a Ephesia 1:3–4 ; 1 Petero 1:2 ; Alama 13:1–5.

Roma 12–16

Tē ani nei Paulo iā’u ’ia riro mai ’ei ta’ata mo’a mau ’e ’ei ta’ata ’āpe’e ia Iesu Mesia.

I roto i nā pene hope’a e pae o te Roma, e rave rahi roa arata’ira’a ta’a ’ē nō ni’a i te huru orara’a o te hō’ē ta’ata mo’a. Hō’ē rāve’a nō te tuatāpapa i teie mau arata’ira’a, ’o te ’imira’a ïa i te mau tumu parau tei fa’ahiti-fa’ahou-hia. E nāhea ’oe i te ha’apoto i te parau a’o a Paulo ?

E’ita paha e noa’a ia ’oe i te fa’a’ohipa i teie mau parau a’o ato’a i te hō’ē ā taime, e ti’a rā i te Vārua ’ia tauturu ia ’oe ’ia ’ite mai hō’ē ’aore rā e piti parau tumu tā ’oe e nehenehe e ha’amata i te fa’a’ohipa i teienei. E fa’a’ite i tō ’oe hia’ai i tō ’oe Metua i te ao ra nā roto i te pure, ma te ani iāna i te tauturu.

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Roma 8:31–39.E aha tā tātou e ’ite nei i roto i te Roma 8:31–39 ’o tē ha’api’i nei e aha tō te Metua i te ao ra mana’o ’e tō Iesu mana’o nō ni’a ia tātou ? E aha te taime tātou i te ’itera’a i te here o te Atua ?

Nō te fa’ahōho’a i te mau ’īrava 38–39, e nehenehe te mau melo o te utuāfare e hi’o mai i te tahi hi’ora’a nō te mau mea e’ita e nehenehe e fa’ata’a ’ē, mai ia tātou e’ita e nehenehe e fa’ata’a ’ē i te here o te Atua.

’Ua ha’api’i Elder Wilford W. Andersen ē : « Te pehe o te ’evanelia, ’o te [hō’ē] mana’o vārua ’oa’oa ïa ».

Roma 9:31–32.E nehenehe te a’ora’a a Elder Wilford W. Andersen « Te pehe o te ’evanelia » (Liahona, Mē 2015, 54–56 ; hi’o ato’a i te video i ni’a ia ChurchofJesusChrist.org) e fa’ahōho’a i te mea tā Paulo e ha’api’i nei nō ni’a i te ture, te ’ohipa ’e te fa’aro’o. ’Ia oti te ’āparaura’a nō ni’a i te a’ora’a, e nehenehe te ’utuāfare e tāmata i te ’ori ma te pehe ’e ma te pehe ’ore. Nāhea te fa’aro’o e tauturu ai ia tātou ’ia ’ite i te ’oa’oa nō te ’evanelia ?

Roma 10:17.E tu’u i niʼa i te tahi mau hāpaina pape i te mau puna e noa’a ai te parau a te Atua (mai te mau pāpaʼiraʼa moʼa, te heheura’a tā te hō’ē ta’ata e fāri’i ’e te ’āmuira’a rahi). E ’āparau e nāhea te parau a te Atua i te faʼarahi i tō tātou faʼaroʼo ’a maniʼi ai i te hāpaina pape tātaʼitahi i roto i te hōʼē fāriʼi tei pāpa’ihia i ni’a iho « Te faʼaroʼo ».

Roma 12.E aha te aura’a te pūpūra’a ia tātou « ’ei tusia ora, ’e te mo’a, ’e te au ho’i i te Atua ra » ? (’īrava 1).

Roma 14:13–21.E fāna’o paha tō ’outou ’utuāfare i te tuatāpapara’a i te parau a’o a Paulo nō ni’a i te ha’avāra’a ’e te mārōra’a mai te au i tō tātou iho mau hina’aro. Pēnei a’e e nehenehe tā ’outou e ’āparau e nāhea i te parau atu i te ta’ata ’e i te mau melo ato’a ho’i nō te ’utuāfare, ’ia ta’a ’ē ana’e tā rātou mau mā’itira’a i tā ’outou. Nāhea tātou e tītau ai « i te parau hau » ? (’īrava 19).

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Je ressens son amour », Chants pour les enfants, 42–43.

Ha’amaita’i i tā tātou ha’api’ira’a

Vaiiho i te mau tamari’i i te taime nō te fa’a’ite’ite i tō rātou ’aravihi ’ia hāmani. « ’Ia ani ana’e ’outou i te mau tamari’i ’ia hāmani i te tahi mea e tū’ati i te hō’ē parau tumu nō te ’evanelia, tē tauturu ra ïa ’outou ia rātou ’ia ta’a maita’i i teie parau tumu […] ’A vaiiho ia rātou ’ia patu i te hō’ē mea, ’ia pāpa’i i te hōho’a, ’ia pēni, ’ia pāpa’i i te parau ’e ’ia hāmani » (Teaching in the Savior’s Way, 25).

Abide with Me [’Ei iā’u nei], nā Del Parson