31 nō Tiurai–6 nō ’Ātete

Te ’Ohipa 22–28

« ’Ei tahu’a ’e ’ei ’ite »

’A tai’o i Te ’Ohipa 22–28 ma te hō’ē pure i roto i tō ’oe ’ā’au ē, ’ia fa’auru mai te Vārua Maita’i ia ’oe ’ia ’ite e aha te mea e ti’a ia ’oe ’ia fa’atumu atu i ni’a iho, nō te tauturu i tā ’oe mau pīahi. ’A pāpa’i i te mau mana’o ato’a e tae mai i tō ’oe ferurira’a ; e riro paha te reira ’ei ’ōmuara’a nō tā ’oe fa’anahora’a ha’api’ira’a.

Tītau i te mana’o

’A ani i te mau pīahi ’ia pāpa’i mai i te hō’ē fa’ahorora’a pāpa’ira’a mo’a nō roto mai i Te ’Ohipa 22–28 tei ha’aputapū i tō rātou ’ā’au i teie hepetoma. ’A ha’aputu mai i tā rātou mau pāhonora’a ’e ’a tai’o ’āmui i te tahi o te mau ’īrava. E ani i te rahira’a o te mau pīahi ’ia fa’a’ite mai nō te aha e mea faufa’a teie mau ’īrava nō rātou.

Ha’api’i i te ha’api’ira’a tumu

Te ’Ohipa 22:1–21 ; 26:1–29

Te hō’ē ’itera’a pāpū ’o te hō’ē ïa fa’ahitira’a i te parau mau niuhia i ni’a i te ’ite ’aore rā te ti’aturira’a o te ta’ata iho.

• E riro ’ei rāve’a te ’itera’a pāpū a Paulo ia Phesito ’e i te ari’i Ageripa nō te tāu’aparau e aha te aura’a mau ’ia fa’a’ite i te ’itera’a pāpū. E ani ’oe i te mau pīahi ’ia hi’o fa’ahou Te ’Ohipa 22:1-21 ’aore rā 26:1-29. E aha te mea tā tātou e ha’api’i mai nā roto mai i te hi’ora’a o Paulo i te fa’a’itera’a i tōna ’itera’a pāpū ? E aha te tahi atu mau parau tumu tā tātou e ha’api’i mai nō ni’a i te fa’a’itera’a i te ’itera’a pāpū nā roto mai i te fa’ahitira’a parau a peresideni M. Russell Ballard i roto i « Te tahi atu ā mau mātēria tauturu » ? E nehenehe te hīmenera’a ’aore rā te ha’utira’a i te pehe « ’Itera’a pāpū » (Te mau Hīmene, N° 70) e ani manihini i te Vārua i roto i tā ’outou tāu’ara’a parau.

• Noa atu ’aita Paulo i tūtava i te ’itera’a pāpū pae vārua tāna i fāri’i i ni’a i te purūmu nō Damaseko, ’ua hōro’a rā ’oia i te toe’a o tōna orara’a nō te tāpe’a māite ’e nō te pāruru i tōna ’itera’a pāpū (hi’o Te ’Ohipa 22:10, 14–16 ; 26:19). E tauturu te hi’ora’a o Paulo i tā ’oe piha ha’api’ira’a ’ia māramarama ē, e tītau te ’itera’a pāpū i te ’ohipa ’e te tusia. Nō te ha’amata i te ’āparaura’a nō ni’a i te reira, penei a’e e nehenehe te hō’ē pīahi e fa’ata’a mai i tāna tūtavara’a ’ia riro mai ’ei hō’ē ta’ata ’aravihi nō te fa’ata’i i te ’upa, te pēni hōho’a, ’aore rā ’ei mā’ona. Nāhea te fa’ananeara’a i taua huru ’aravihi ra e riro ai mai te noa’ara’a ’e te ha’apūaira’a i te hō’ē ’itera’a pāpū ? E aha te mau tauto’ora’a e ti’a ia tātou ’ia rave ’ia noa’a ’e ’ia pūai atu ā te hō’ē ’itera’a pāpū ? (hi’o ato’a Alama 5:46).

Te ’Ohipa 26:9–23

E hōpoi’a nā tātou i te aupurura’a ia vetahi ’ē.

• ’Ua pi’i te Fatu ia Paulo ’ia riro ’ei « hō’ē tahu’a » [ta’ata aupuru] (Te ’Ohipa 26:16), e aha rā ïa te aura’a ’o te reira ta’o ? Nō te tauturu i te mau pīahi ’ia hi’o haere e nāhea rātou i te aupuru ia vetahi ’ē, e nehenehe ’oe pāpa’i i ni’a i te tāpura ’ere’ere teie uira’a E aha te aura’a te parau aupuru ? ’A ani i te mau pīahi ’ia ’imi i te mau pāhonora’a i roto i te mau mātēria i muri nei : Mataio 20:25–28 ; Te ’Ohipa 26:16–18 ; 3 Nephi 18:29–32 ; Jean B. Bingham, « ’A Aupuru mai tā te Fa’aora e rave nei », Liahona, Mē 2018, 104–7. ’A fa’a’ite mai ai rātou i te mea tā rātou i ’ite mai, e fa’aitoito ia rātou ’ia tāu’a parau mai i te mau rāve’a e nehenehe ai tātou pā’āto’a e aupuru ia vetahi ’ē, e tae noa atu i roto i tō tātou mau pi’ira’a i roto i te ’Ēkālesia. E nehenehe ato’a e fa’a’ite i te video « The Miracle of the Roof [Te temeio o te tāpo’i fare] » (ChurchofJesusChrist.org).

Te ’Ohipa 27

Mai te mea e fa’aro’o tātou i te mau peropheta a te Fatu, e arata’i ’e e pāruru ’oia ia tātou i te ’ino.

• ’A ani i te mau pīahi ’ia paraparau mai nō ni’a i te pāhonora’a a te ra’atira hānere i te taime ’a tohu ai Paulo ē, e « pēpē rahi » te ’ati o te pahī ’e e rave rahi ora e ha’amouhia (hi’o Te ’Ohipa 27:10–11). Nō te aha pa’i te ra’atira hānere i pāhono ai mai te reira ? Penei a’e e nehenehe te mau pīahi e fa’a’ite mai i te mea tā rātou e parau atu i te ra’atira hānere nō te tauturu iāna ’ia roa’a te fa’aro’o i roto i te parau tohu a Paulo. E aha te tahi atu ā ha’api’ira’a tā tātou e ’apo mai nō roto mai i Te ’Ohipa 27 nō ni’a i te pe’era’a i te mau tāvini a te Fatu ? Tē vai ra paha tō te mau pīahi mau ’itera’a rau ’a pe’e ai rātou i te arata’ira’a a te mau peropheta, noa atu te ta’a-’ē-ra’a te mana’o ’o te mau ta’ata e fa’a’ati ra ia rātou. ’A ani i te tahi mau pīahi ’ia fa’a’ite mai i tō rātou mau ’ite rau.

Te tahi atu ā mau mātēria tauturu

Fa’a’itera’a i te ’itera’a pāpū.

’Ua a’o te peresideni M. Russell Ballard nō ni’a i te ’itera’a pāpū o Paulo i mua i te ari’i Ageripa ’e ’ua ha’api’i e aha te aura’a nō tātou ’ia fa’a’ite i te ’itera’a pāpū :

« E mea ti’a i tā tātou mau purera’a ’īritira’a mana’o ’ia fa’atumu-rahi-hia i ni’a i te Fa’aora, i te mau parau ha’api’ira’a nō te ’evanelia, te mau ha’amata’ira’a nō te fa’aho’i-fa’ahou-ra’a mai, ’e te mau ha’api’ira’a o te mau pāpa’ira’a mo’a. E mea ti’a ’ia mono tātou te mau ’ā’amu, te mau tere ori-haere-ra’a, ’e te mau a’ora’a i te mau ’itera’a pāpū mau. Te feiā tei ti’aturihia ’ia a’o ’e ’ia ha’api’i i roto i tā tātou mau putuputura’a, tītauhia ia rātou ’ia nā reira ma te pūai o te ha’api’ira’a tumu ’ia fa’aro’ohia ’e ’ia ha’aputapū te ’ā’au, e fa’ateitei i te mau vārua ’e e fa’auru i tō tātou mau ta’ata …

« …E mea maita’i noa iho ā ’ia fa’a’ite i te here ’e te māuruuru, ’aita rā teie mau parau ra e riro mai ’ei huru ’itera’a pāpū ’o te fa’a’ama i te ti’aturira’a i roto i te orara’a o vetahi ’ē. Te fa’a’itera’a i te ’itera’a pāpū ’o ‘te fa’a’itera’a ïa i te ’itera’a nā roto i te pūai o te Vārua Maita’i, te paraura’a i te hō’ē fa’a’itera’a hanahana nō te parau mau tei fa’atumuhia i ni’a te ’ite ’aore rā te ti’aturira’a o te ta’ata iho’ [Aratai’ra’a i te mau Pāpa’ira’a Mo’a, « Fa’a’ite Pāpū », scriptures.ChurchofJesusChrist.org Nā te fa’a’itera’a māramarama nō te parau mau e hōro’a i te ta’a-’ē-ra’a i roto i te orara’a o te ta’ata. ’O te mea ïa e taui ai te mau ’ā’au. ’O te mea ïa tā te Vārua Maita’i e nehenehe e ha’apāpū i roto i te ’ā’au o te mau tamari’i a te Atua » (« Te ’itera’a pāpū mau », Liahona, Novema 2004, 41).

Ha’amaita’ira’a i tā tātou ha’api’ira’a

Fa’aineine hou te mahana ha’api’ira’a « ’A feruri ai ’outou e nāhea te mau parau tumu o te ’evanelia tā ’outou e ha’api’i ra e ha’amaita’i ai i te mau melo nō tā ’outou piha ha’api’ira’a, e tae mai te mau mana’o ’e te mau fa’a’itera’a i roto i tō ’outou orara’a i te mau mahana ato’a—’a tere ai ’outou nō te haere i te ’ohipa, nō te rave i te mau ’ohipa i te fare, ’aore rā i roto i tō ’outou mau aura’a ’e te ’utuāfare ’e te mau hoa. ’Eiaha e feruri i te fa’aineinera’a pae vārua mai te tahi mea e fa’ata’a ’outou i te hō’ē taime, mai te tahi rā mea tā ’outou e rave noa » (Ha’api’ira’a mai tā te Fa’aora, 12).