24–30 nō Tiurai

Te ’Ohipa 16–21

« Tē parau mai ra te Fatu ia mātou e haere e parau atu i te ’evanelia »

Hou ’a hi’o ai i teie fa’anahora’a, ’a tai’o ma te pure i Te ’Ohipa 16-21 ma te ha’amana’o i tā ’oe mau pīahi. E nehenehe teie mau mana’o i muri nei e tauturu i te fa’aurura’a tā ’oe e fāri’i nō ’ō mai i te Vārua ra.

Tītau i te mana’o

’A feruri i te ani i te mau pīahi ’ia fa’a’ite mai i te hō’ē tufa’a nō roto mai i Te ’Ohipa 16–21 ’o te fa’aha’amana’o ia rātou i te hō’ē ’ohipa tā rātou i rave nō te fa’a’itera’a i te ’evanelia.

Ha’api’i i te ha’api’ira’a tumu

Te ’Ohipa 16–21

’Ei melo nō te ’Ēkālesia a te Fa’aora, tē fa’a’ite pāpū nei tātou nō Iesu Mesia ’e tē fa’a’ite nei i tāna ’evanelia.

• Hō’ē pōro’i faufa’a roa i roto i Te ’Ohipa 16–21 ’o te faufa’a ïa o te Vārua Maita’i i roto i te fa’a’itera’a i te ’evanelia. Hō’ē hi’ora’a, e nehenehe te mau pīahi e tai’o nāhea te Vārua Maita’i i te tauturura’a ia Paulo ’e ia Sila i roto i Te ’Ohipa 16:6–15. Nō te aha tātou e hina’aro ai i te Vārua Maita’i ’ia fa’a’ite ana’e tātou i te ’evanelia ? (hi’o 2 Nephi 33:1 ; Te Ha’api’ira’a Tumu ’e te mau Fafaura’a 33:8–10 ; 42:14 ; 100:5–8). Penei a’e e hina’aro te mau pīahi e fa’a’ite mai i te mau ’ohipa i tupu, ’a arata’i ai te Vārua Maita’i i tā rātou mau tauto’ora’a nō te fa’a’ite i te ’evanelia.

• Nāhea te mau ’ite rau o Paulo i te tauturu i te mau pīahi ’ia roa’a te itoito nō te fa’a’ite i tō rātou ’itera’a pāpū, ’ia tae ana’e mai te fa’aurura’a ? E ani i te pīahi tāta’itahi ’ia hi’o fa’ahou hō’ē o teie mau ’ā’amu i muri nei : Te ’Ohipa 16:16–34 ; 17:16–34 ; 18:1–11. E ani ia rātou ’ia fa’a’ite mai i te ha’apāpūra’a tā rātou i ’ite mai nō ni’a i te itoito ’e te pūai o Paulo. E aha te mau parau mau tā Paulo i ha’api’i (’e i hāro’aro’a) ’o tei hōro’a iāna i te ha’apāpūra’a i roto i tāna pōro’i ? Nō te aha i te tahi mau taime e taiā tātou ’ia fa’a’ite i te ’evanelia, ’e nāhea te Fa’aora i te tauturu ia tātou ? E fa’aitoito i te mau pīahi ’ia feruri i te hō’ē rāve’a e nehenehe ai rātou e pe’e i te hi’ora’a o Paulo ’e ’ia fa’a’ite pinepine atu ā i tō rātou ’itera’a pāpū nō te Mesia (e tauturu te video « I’ll Go Where You Want Me to Go [E haere au i te vāhi tā ’oe e tono iā’u] » [ChurchofJesusChrist.org]).

Te ’Ohipa 17:16–34

E tamari’i tātou nā te Atua.

• I te ’āivi nō Māti, ’ua ha’api’i Paulo nō ni’a i te Metua i te ao ra i te hō’ē pupu ta’ata, e mea iti ho’i tō rātou ’ite nō ni’a i te nātura mau o te Atua. Nō te hi’o haere i teie mau ha’api’ira’a, e tai’o te mau pīahi i Te ’Ohipa 17:24–31 ’e e pāpa’i i ni’a i te tāpura ’ere’ere te mau parau mau tā rātou i ’ite mai nō ni’a i te Metua i te ao ra, tō tātou aura’a e ’ōna, ’e tō tātou mau aura’a te tahi ’e te tahi. I muri iho ’ia fa’a’ite mai rātou i tō rātou mau ’itera’a, nō te taime ’a fāri’i ai rātou i te parau mau nō te fa’ahithira’a parau a Paulo nō te Atua « ’aita rā ’oia i ātea ’ē atu ia tātou ato’a nei » (’īrava 27).

• ’A hi’o ’āmui ai ’outou i teie mau ’īrava, ’a feruri i te ’āparau i te parau mau tei ha’api’ihia i roto i te ’īrava 29 : « E tamari’i tātou nā te Atua ». E nehenehe ’oe e pāpa’i i ni’a i te tāpura ’ere’ere Nō te mea e tamari’i tātou nā te Atua, … ’e Mai te mea ’aita tātou i ’ite ē, e tamari’i tātou nā te Atua, … e ani i te mau pīahi ’ia hōro’a mai i te mana’o nō te fa’ahope i teie nā pereota. ’Ei hi’ora’a, e aha tā te ’itera’a ē e tamari’i tātou nā te Atua e ha’api’i nei ia tātou nō ni’a ia tātou iho, ’e tō tātou huru i ni’a i te tahi ’e te tahi ? Nāhea tō tātou orara’a e ta’a ’ē ai, mai te mea ’aita tātou i ’ite i tō tātou aura’a mau ’e te Atua ? E aha tā te fa’ahitira’a parau a te peresideni Dallin H. Oaks i roto i « Te tahi atu ā mau mātēria tauturu » e hōro’a mai i teie ’āparaura’a.

  

  E mau tamari’i tātou tāta’itahi nā te Atua.

Te tahi atu ā mau mātēria tauturu

E mau tamari’i pā’āto’a tātou nā te Atua.

Tē fa’a’ite mai nei « Te ’Utuāfare : E Pōro’i i tō te Ao nei » i te mau parau mau mure ’ore nō ni’a i tō tātou aura’a e te Atua : « ’Ua hāmanihia te mau ta’ata ato’a—te tāne ’e te vahine—i te hōho’a o te Atua. ’Ua riro tātou tāta’itahi ’ei tamaiti ’e ’ei tamāhine vārua herehia e nā metua i te ra’i ra, ’e nō reira, e huru ’e e hope’a hanahana tō tātou tāta’itahi » (ChurchofJesusChrist.org).

’Ua a’o peresideni Dallin H. Oaks i te faufa’a ’ia hi’o ia tātou iho nā mua roa ’e te mea faufa’a roa atu ’ei mau tamari’i vārua nā te Atua :

« ’A ara i te huru e hi’o ai ’outou ’ia ’outou iho. ’Eiaha e fa’ahi’o ’aore rā e fa’a’ite ia ’outou nā roto i te tahi tāpa’o maita’i ’o te ’ore e vai maoro mai. Hō’ē ana’e maita’i e fa’a’ite nei ’o vai ra tātou ’oia ho’i, e tāmari’i tamāroa ’aore rā e tamari’i tamāhine tātou nā te Atua. ’Ua hau atu ïa taua mau tāpa’o ra i te tahi atu mau tāpa’o mai te nūna’a ta’ata, te ravera’a ’ohipa ānei, te mau tāpa’o pae tino, te mau fa’ahanahanara’a, ’aore rā te pae fa’aro’o. …

« E ti’amāra’a tō tātou, ’e e nehenehe tātou e mā’iti i te mau huru tāpa’o nō te fa’a’ite ’o vai ra tātou. E ti’a rā ia tātou ’ia ’ite ē ’ia mā’iti ana’e tātou i te fa’a’ite ia tātou iho nā roto i te tahi tāpa’o poto noa ’aore rā faufa’a ’ore ’ia au i te hi’ora’a mure ’ore, tē fa’aiti ra ïa tātou i te mea hau roa atu i te faufa’a rahi i roto ia tātou, ’e te ha’afaufa’a rahi ra ïa tātou i te mea e ’ere i te mea faufa’a rahi roa. E nehenehe ïa te reira ’ia arata’i ti’a atu ia tātou i ni’a i te ’ē’a hape ’e ’ia fa’ataupupu i tō tātou haerera’a mure ’ore i mua » (« Be Wise » [Brigham Young University–Idaho devotional, 7 nō Nōvema 2006], byui.edu).

Ha’amaita’ira’a i tā tātou ha’api’ira’a

Ani i te feiā ’āpī ’ia riro ’ei tufa’a nō tā ’outou ha’api’ira’a. Mai te mea e ha’api’i ’outou i te feiā ’āpī, ’a ha’amana’o ē e mea pinepine rātou i te ta’a i te mau mea tā tō rātou mau hoa e fa’aruru ra. ’Ia fa’a’ite ana’e te hō’ē feiā ’āpī i tōna ’itera’a pāpū ’aore rā ’ia ha’api’i ’oia i te ha’api’ira’a tumu, e nehenehe te ’ā’au o te tahi atu feiā ’āpī i te putapūhia nā roto i te hō’ē rāve’a e ’ore e nehenehe ia ’outou ’ia nā reira. Hōro’a i te feiā ’āpī te taime nō te ha’api’i te tahi ’e te tahi. (Hi’o Ha’api’ira’a mai tā te Fa’aora, 28.)