tē paraparau ra Petero ia Korenelio

17–23 nō Tiurai

Te ’Ohipa 10–15

« Tupu atu ra ho’i te parau a te Atua, ’e ’ā’ano roa atu ra »

Hou ’oe e tai’o ai i teie fa’anahora’a e tauturu te tuatāpapara’a nā roto i te pure i Te ’Ohipa 10–15 ia ’oe ’ia fāri’i i te mau mana’o nō ’ō mai i te Fatu ra. E mau tauturura’a noa teie mau mana’o i raro nei.

ītona fa’a’itera’a

Tītau i te mana’o

E ani i te mau pīahi ’ia fa’a’ite i te ta’ata i pīha’i iho iāna i te tahi mea tā te Vārua i ha’api’i ia rātou ’a tai’o ai rātou i Te ’Ohipa 10–15. ’A ani i te tahi mau pīahi ’ia fa’a’ite mai i tō rātou mau mana’o i te tā’āto’ara’a o te piha.

ītona ha’api’ira’a

Ha’api’i i te ha’api’ira’a tumu

Te ’Ohipa 10 ; 11:1–18 ; 15:1–25

’Ua ha’api’i te Metua i te ao ra ia tātou rēni i ni’a i te rēni nā roto i te heheura’a.

• E mau mana’o hape paha tō te tahi mau pīahi nō ni’a i te huru nō te fāri’ira’a i te heheura’a. E tauturu paha teie ia rātou ’ia ’āparau e nāhea te heheura’a i te taera’a ia Petero ra ’e e nāhea e nehenehe ai ia rātou ’ia haere i mua ’e « ’eiaha roa e fē’a’a » (Te ’Ohipa 10:20), mai te mea e ’ere te heheura’a i te mea hope roa ’aore rā i te mea māramarama roa. ’A feruri i te nīno’a i te hō’ē rēni i ni’a i te tāpura ’ere’ere ’e e pāpa’i i ni’a i te hō’ē hope’a o te rēni E porohia te ’evanelia i te mau Edene. ’Ei piha ha’api’ira’a, ’a tai’o fa’ahou i Te ’Ohipa 10 ’e 11:1–18, i muri iho ’a tu’u atu i te tahi mau tāpa’o i ni’a i te rēni ’o tē fa’a’ite ra e nāhea tō te Fatu heheu-ri’i-noa-ra’a ia Petero ē, ’ua tae i te taime nō te poro i te ’evanelia i te mau Edene. ’Ei hi’ora’a, e ha’amata paha ïa ’oe ma te tāpa’o tei pi’ihia « ’ua ’ite Koronelio i te hō’ē ’ōrama » (Te ’Ohipa 10:1–6), ’aore rā e ha’amata ma te fa’auera’a a te Fa’aora i tāna mau pipi ’ia « ha’api’i i te mau fenua ato’a » i roto i te Mataio 28:19. E aha tā tātou e ’apo mai i roto i te ’ohipa tei tupu ia Petero ? E aha tā te mau ha’api’ira’a a Nephi nō ni’a i te heheura’a i roto i te 2 Nephi 28:30 ’e te mau ha’api’ira’a a Elder David A. Bednar i roto i « Te tahi atu ā mau mātēria tauturu » e ’āfa’i mai i tō tātou hāro’aro’ara’a ?

  tamāhine e tai’o ra i te mau pāpa’ira’a mo’a

  E tae pinepine mai te heheura’a a te ta’ata tāta’itahi i te pae hope’a nā roto i te tauto’ora’a tāmau.

• E nehenehe ’outou e tuatāpapa i te mau hi’ora’a i roto i te mau pāpa’ira’a mo’a i reira tō te Fatu ha’api’ira’a i te mau ta’ata rēni i ni’a i te rēni. Ta’a ’ē noa atu i te ’ohipa i tupu ia Petero i roto i Te ’Ohipa 10, ’ia tai’o fa’ahou te mau pīahi i te mau ’ite rau o Nephi (1 Nephi 18:1–3) ; Alama (Alama 7:8 ; 16:20) ; ’e Moromona (3 Nephi 28:17, 36–40). E aha te tahi atu mau hi’ora’a e nehenehe tā te mau pīahi e feruri nō te mau ta’ata tei fāri’i i te arata’ira’a vārua « te tahi vahi iti i’ō nei, ’e te tahi vāhi iti i’ō atu » ? (2 Nephi 28:30). Nō te aha te Fatu e mā’iti ai i te tahi mau taime, ’ia heheu mai i te mau mea mai te reira te huru ’eiaha rā i te hōro’ara’a mai ia tātou te mau pāhonora’a i te reira iho ā taime ? (hi’o Te Ha’api’ira’a Tumu ’e te mau Fafaura’a 50:40 ; 98:12).

• E mau uira’a ’aore rā e mau māna’ona’ora’a tō te mau melo i te tahi mau taime nō ni’a i te mau tauira’a i roto i te mau fa’aturera’a ’e te mau fa’anahora’a i roto i te ’Ēkālesia. E riro paha ’ei tauturura’a nō rātou ’ia tuatāpapa, e nāhea te heheura’a nō te ’ōmuara’a i te porora’a i te ’evanelia i te mau Edene (hi’o Te ’Ohipa 10), i te monora’a i te mau arata’ira’a mātāmua a te Fatu i tāna mau pipi (hi’o Mataio 10:1, 5–6). E nehenehe ’oe e fa’a’ite i te video « The Jerusalem Conference » (ChurchofJesusChrist.org). Nāhea te mau pīahi i te pāhono atu i te tahi ta’ata i te tau o Petero ’o tei ’ore i fāri’i i te arata’ira’a a Petero, nō te mea ’aita te reira i ’āfaro i te mau ravera’a nā mua atu ? Nāhea te heheura’a i roto i Te ’Ohipa 10 i te tauturu ia tātou ’ia fa’aro’o i te heheura’a tāmau a te Fatu nā roto mai i tāna peropheta ?

Te ’Ohipa 10:9–48

« E’ita te Atua e ha’apa’o i te huru o te ta’ata ».

• E fāna’o ānei tā ’oe mau pīahi i te tahi mea nā roto mai i te hō’ē ’āparaura’a nō ni’a i te aura’a « e’ita e ha’apa’o i te huru o te ta’ata » ? E ha’amata ’oe ma te ani i te mau pīahi ’ia tai’o i te mau pāpa’ira’a mo’a ’o te ha’api’i nei, e’ita te Atua e ha’apa’o i te huru o te ta’ata, mai te Roma 2:1–11 ; 1 Nephi 17:34–40 ; 2 Nephi 26:32–33 ; Alama 5:33 ; Moroni 8:12 ; ’e Te Ha’api’ira’a Tumu ’e te mau Fafaura’a 1:34–35. E ani i te mau pīahi ’ia pāpa’i i te mau aura’a ato’a nō te « ha’apa’o ’ore i te huru o te ta’ata », mai te au i tā rātou tai’ora’a, ’e ’ia fa’a’ite mai i te mea tā rātou i pāpa’i. Nāhea te mau tupura’a ’ohipa ’e te mau parau tumu i roto i Te ’Ohipa 10:34–48 e fa’a’ite ai ē, e’ita te Atua e ha’apa’o i te huru o te ta’ata ? Nāhea te feiā parauti’a e « fāri’ihia ai » ’e e « ’itehia mai ai » e te Atua, noa atu e’ita ’oia e ha’apa’o i te huru o te ta’ata ? (hi’o Te ’Ohipa 10:34–35 ; 1 Nephi 17:35).

  E ti’a paha ia ’oe e tauturu i te mau pīahi ’ia ’ite ē « te ha’apa’o ’ore i te huru o te ta’ata », e’ita ïa te Atua e ha’amaita’i ’aifāito noa i te mau ta’ata ato’a noa atu e aha tā tātou mau ’ohipa. Tē hina’aro nei ’oia i te tā’āto’ara’a o tāna mau tamari’i ’ia fāri’i i tāna ’evanelia, ’ua fa’ahereherehia rā te ’īra’a o te mau ha’amaita’ira’a nō te mau ta’ata tei rave ’e tei ha’apa’o i te mau fafaura’a ’e ’ōna.

ītona mātēria tauturu

Te tahi atu ā mau mātēria tauturu

Fāri’ira’a i te heheura’a rēni i ni’a i te rēni.

Teie tā Elder David A. Bednar i parau nō ni’a i te huru ravera’a a te Fatu nō ni’a i te heheura’a : « E rave rahi o tātou ’o tē mana’o noa nei ē e fāri’i tātou i te hō’ē pāhonora’a ’aore rā i te hō’ē fa’a’itera’a i tā tātou mau pure ’e tā tātou mau tāparura’a tu’utu’u ’ore. ’E e mea pinepine tātou i te tīa’i i taua huru pāhonora’a ra ’aore rā fa’a’itera’a ra ’ia tae ’oi’oi mai ’e i te reira iho ā taime. Nō reira, e au ra ē tē ti’aturi nei tātou ē e hōro’a ’oi’oi mai te Fatu ia tātou te hō’ē pāhonora’a rahi ’e te tā’āto’ara’a i te reira iho ā taime. ’Are’a rā, tē fa’a’ite mai nei te hōho’a tei fa’a’ite-tāmau-hia mai i roto i te mau pāpa’ira’a mo’a ē, e fāri’i tātou ’rēni i ni’a i te rēni, te a’o i ni’a i te a’o’, ’oia ho’i, e rave rahi mau pāhonora’a iti i roto i te roara’a o te hō’ē taime maoro. Te ’itera’a ’e te ta’ara’a i teie hōho’a ’o te hō’ē ïa tāviri faufa’a rahi nō te fāri’i i te fa’aurura’a ’e te tauturura’a a te Vārua Maita’i » (« Line upon Line, Precept upon Precept, » New Era,Tetepa 2010, 3–4).

Ha’amaita’ira’a i tā tātou ha’api’ira’a

Ha’amata ’e te mau pāpa’ira’a mo’a. Hou ’a fāriu atu ai i te tahi atu mau rāve’a tauturu, ’a tuatāpapa māite i te mau pāpa’ira’a mo’a tahito ’e te mea ’āpī. E fa’ati’a ïa te tuatāpapara’a i te parau a te Atua nā roto i te pure, i te Vārua ’ia tauturu mai ia ’outou ’ia tūru’i atu i ni’a i te mea tā ’outou i tuatāpapa ’a ha’api’i ai ’outou. (Hi’o Ha’api’ira’a mai tā te Fa’aora, 12.)