’Ua topa Paulo i ni’a i te repo

Te fa’afāriura’a i ni’a i te ’ē’a nō Damaseko, nā Michelangelo Merisi da Caravaggio

10–16 nō Tiurai

Te ’Ohipa 6-9

« E aha vau, e aha tō ’oe hina’aro ? »

’A tuatāpapa i Te ’Ohipa 6–9 ’e ’a pāpa’i i tō ’oe mau mana’o. E tauturu te reira ia ’oe ’ia fāri’i i te heheura’a e nāhea ’ia tauturu i te mau pīahi ’ia ha’afātata atu ā ia Iesu Mesia nā roto i tā rātou tuatāpapara’a i teie mau pene.

ītona fa’a’itera’a

Tītau i te mana’o

’A pāpa’i i ni’a i te tāpura ’ere’ere te mau i’oa o te tahi o te mau ta’ata tei fa’ahitihia i roto i Te ’Ohipa 6–9, mai ia Setephano, Saula, Philipa, Anania, Petero, ’e Tabita ’aore rā Doreka. E ani i te tahi mau pīahi ’ia fa’a’ite mai i te tahi mea tā rātou i ’apo mai nā roto mai i te hō’ē o teie mau ta’ata i roto i tā rātou tuatāpapara’a i teie hepetoma.

ītona ha’api’ira’a

Ha’api’i i te ha’api’ira’a tumu

Te ’Ohipa 7

E nehenehe te pāto’ira’a i te Vārua Maita’i e arata’i atu i te pāto’ira’a i te Fa’aora ’e i tāna mau tāvini.

• E ha’amata ’oe i te hō’ē ’āparaura’a nō ni’a i te ’ohipa i tupu nō Setephano nā roto i te anira’a i te mau pīahi ’ia hi’o fa’ahou i te mau parau a Setephano i roto i Te ’Ohipa 7:37–53. E aha te mau fa’aarara’a tā tāna mau parau nō tātou i teie mahana ? ’Ia fa’atumu ’oe i ni’a i te parau a Setephano i roto i Te ’Ohipa 7:51. E aha te aura’a « ’ia pāto’i i te Vārua Maita’i ? » Nō te māramarama hōhonu atu ā i teie mau parau, e ’āparau mai te mau pīahi i te hō’ē ’aore rā hau atu o teie mau ’īrava : 2 Nephi 28:3–6 ; 33:1–2 ; Mosia 2:36–37 ; Alama 10:5–6 ; ’e Alama 34:37–38. Nō te aha tātou e « pāto’i ai i te Vārua Maita’i » i te tahi mau taime ? E aha te ti’a ia tātou ’ia rave nō te ’ite ’e nō te pe’e maita’i atu ā i te mau fa’a’itera’a a te Vārua Maita’i ?

Te ’Ohipa 8:9–24

« ’Ia ti’a tō tātou ’ā’au i mua i te aro o te Atua » e ti’a ai.

• Nō te tuatāpapa i te ’ā’amu o Simona ’ei piha ha’api’ira’a, e pāpa’i ’oe i ni’a i te tāpura ’ere’ere i te mau uira’a ’O vai ’o Simona ? E aha tāna i hina’aro ? ’e Nāhea tōna tāmatara’a i te fāri’i i te reira ? ’A hōro’a i te pīahi tāta’itahi ’ia tai’o i Te ’Ohipa 8:9–24, ma te ’imi mai i te mau pāhonora’a i teie mau uira’a. E aha te mau parau mau tei ’ore i ta’a-maita’i-hia e Simona ? E aha tā tātou e nehenehe e ’apo mai i roto i te ’ohipa i tupu nō Simona ? Nāhea tātou e pāpū ai e mea « ti’a i mua i te aro o te Atua » tō tātou ’ā’au ? (’īrava 21).

• I roto i tā rātou iho tuatāpapara’a, ’ua tāpa’o paha te tahi mau pīahi i te mau maita’i tā Setephano ’e tā Philipa i fāri’i e ’aita tā Simona (hi’o Te fa’anahora’a nō teie hepetoma i roto i te Mai pe’e mai—nō te ta’ata hō’ē ’e te ’utuāfare). Mai te peu tē vai ra, e ani ia rātou ’ia fa’a’ite mai e aha tā rātou i ’ite mai. E nehenehe ato’a te mau pīahi e fa’a’ite mai i te tahi atu mau hi’ora’a nō roto mai i Te ’Ohipa 6–9 nō te mau ta’ata tei ti’a tō rātou ’ā’au i mua i te Atua, mai ia Philipa ’e te ta’ata nō Etiopia (hi’o Te ’Ohipa 8:26–40), Saulo (hi’o Te ’Ohipa 9:1–22), ’e o Tabita (hi’o Te ’Ohipa 9:36–39).

  Te fa’ati’ara’a Petero ia Tabita mai te pohe mai

  Te ti’afa’ahoura’a o Tabita, nā Sandy Freckleton Gagon

Te ’Ohipa 8:26–39

E tauturu te Vārua Maita’i ia tātou ’ia arata’i ia vetahi ’ē ia Iesu Mesia ra.

• Nō te tauturu i te mau pīahi ’ia ta’a maita’i nāhea rātou e nehenehe ai e arata’i ia vetahi ’ē ia Iesu Mesia ra (hi’o Te ’Ohipa 8:31), e ani ’oe e piti pīahi ’ia pārahi i te aro mata ’e mata ’e ’ia tai’o i te ’āparaura’a i rotopū ia Philipa ’e te ta’ata nō Etiopia i roto i Te ’Ohipa 8:26–39. Te toru o te pīahi e tai’o ’oia i te mau tufa’a e ’ere i te ’āparaura’a. E aha tā tātou i ha’api’i mai nā roto mai i te hi’ora’a o Philipa nō ni’a i te ha’api’ira’a i te ’evanelia ia vetahi ’ē ?

• Nō te hi’ora’a i te mau hōho’a nō teie tau nō ni’a i te ’ā’amu i roto i Te ’Ohipa 8:26-39, ’ia fa’a’ite mai te mau pīahi i te mau ’itera’a rau tā rātou i fāri’i, ’a fa’a’ite ai rātou i te ’evanelia ’aore rā ’a tomo mai ai rātou i roto i te ’Ēkālesia. Nāhea tō te Vārua Maita’i tauturura’a ia rātou ? Nāhea tō te tahi ta’ata arata’ira’a ia rātou ? E ani i te mau pīahi ’ia feruri, ’o vai tā rātou e arata’i atu i te ’evanelia.

Te ’Ohipa 9

’Ia auraro ana’e tātou i te hina’aro o te Fatu, e nehenehe tātou e riro ’ei mau mauha’a i roto i tōna rima.

• E ’apo mai te mau pīahi i te mau parau mau pūai nō ni’a i tō rātou iho fa’afāriura’a ma te tuatāpapara’a i te ’ohipa tei tupu nō Saula, ’oia ato’a te parau mau ē, e nehenehe te mau ta’ata ato’a e tātarahapa ’e ’ia taui mai te mea e hina’aro rātou. E ani ’oe i te mau pīahi ’ia fa’aau i te ’ohipa tei tupu nō Saula ’e te mau ’ohipa i tupu nō Alama (hi’o Mosia 17:1–4 ;18 ; 26:15–21) ’e nō te mau Aniti-Nephi-Lehi (hi’o Alma 24:7–12). E aha tā te Fatu i rave nō te tauturu i teie mau ta’ata ’ia fa’afāriuhia ? Nāhea rātou i te fa’a’itera’a i tō rātou hina’aro ’ia taui ? E aha te mau poro’i i ’itehia mai e tātou nō tō tātou iho orara’a nā roto mai i teie mau ’ā’amu ?

• Nō te fa’atupu i te hō’ē ’āparaura’a nō ni’a i te ’ohipa i tupu nō Saula, e ani i te tahi mau pīahi ’ia haere ineine mai nō te fa’a’ite mai i te mea tā rātou i ’apo mai nā roto mai i nā tufa’a tāta’itahi nō te a’ora’a a te peresideni Dieter F. Uchtdorf « Tīa’ira’a i ni’a i te purūmu nō Damaseko » (Liahona, Mē 2011, 70–77). Nāhea tātou e tīa’i ai i te tahi mau taime i ni’a i tō tātou iho purūmu nō Damaseko ? Mai tā te peresideni Uchtdorf i parau, e aha te mea e tauturu ai ia tātou ’ia fa’aro’o maita’i a’e i te reo o te Atua ? E feruri ato’a i te māta’ita’i i te video « The Road to Damascus [Te purūmu nō Damaseko] » (ChurchofJesusChrist.org Penei a’e e nehenehe te mau pīahi e fa’a’ite mai i tō rātou mau ’itera’a rau nō te ’imira’a ’e te pe’era’a i te hina’aro o te Atua.

Haʼamaitaʼiraʼa i tā tātou haʼapiʼiraʼa

’A faʼaʼite pāpū nō Iesu Mesia. ’Ei ’orometua, e nehenehe tā ’outou e tauturu i tā ’outou mau pīahi ’ia patu i tō rātou fa’aro’o, mai tā Philipa i rave nō te ta’ata nō Etiopia nā roto i te ha’api’ira’a iāna nō ni’a ia Isaia (hi’o Te ’Ohipa 8:26–37). Nō te rave i te reira, e ti’a ia ’outou ’ia fāri’i i tō ’outou iho mau ’itera’a o te patura’a-fa’aro’o nā roto mai i te mau pāpa’ira’a mo’a. E nehenehe te ’itera’a pāpū tā ’outou e fa’a’ite e riro ’ei pūai-fāito-’ore mau i roto i te tauturura’a i te mau pīahi ’ia ha’apūai i tō rātou ’itera’a pāpū nō Iesu Mesia.