Korinetia, Hereni ’Apato’a , te Pū ’Āmuira’a Tīvira, hōho’a pēni nā Balage Balogh/www.ArchaeologyIllustrated.com

21–27 nō ’Ātete

1 Korinetia 1–7

« ’Ia ’ati māite rā ’outou »

’Ua ha’api’i Elder Jeffrey R. Holland ē « tē haere mai nei te rahira’a o te mau ta’ata [i te purera’a] nō te ’imi i te hō’ē ’itera’a rau pae vārua » (« A Teacher Come from God ». Ensign, Mē 1998, 26). ’Ia tai’o ana’e ’oe i te 1 Korinetia 1–7, ’a feruri ma te pure e aha te mea tā ’oe e rave nō te tauturu i te fa’atupu i te mau ’itera’a rau pae vārua i roto i tā ’oe piha ha’api’ira’a.

Tītau i te mana’o

’A feruri i te ani i te mau pīahi ’ia pāpa’i mai te hea tā rātou huru ravera’a i mua i te mau mea tā rātou i ’apo mai nā roto mai i te mau pāpa’ira’a mo’a. E ani i te tahi mau pīahi ’ia fa’a’ite mai i te mea tā rātou i pāpa’i.

Ha’api’i i te ha’api’ira’a tumu

1 Korinetia 1:10–17 ; 3

Tē tūtava nei te mau melo nō te ’Ēkālesia a te Mesia ’ia tāhō’ē.

• E riro paha te ’āparaura’a i te mau pene mātāmua nō te 1 Korinetia ’ei rāve’a nō te paturu rahi i te hō’ēra’a i rotopū i te mau melo nō te pāroita. E ha’amata ’oe ma te ani i te mau pīahi ’ia parau mai nō ni’a i te hō’ē tā’atira’a, pupu, ’aore rā te tahi fa’anahora’a tā rātou i ’āmui atu ē tē vai ra te hō’ēra’a rahi i roto. Nō te aha teie pupu i hō’ē rahi ai ? I muri iho e hi’o haere ’outou i te tahi o te mau ha’api’ira’a a Paulo nō ni’a i te hō’ēra’a i roto i te 1 Korinetia 1:10–13 ; 3:1–11. E aha tā teie mau ’īrava, ’e te mau mea i orahia e ’outou, ’e ha’api’i nei nō ni’a i te mea e fa’atupu i te hō’ēra’a ’e te mea ’o tē ha’afifi nei i te reira ? E aha te mau fa’atūsiara’a tā tātou e rave nō te fa’atupu i te hō’ēra’a ? E aha te mau ha’amaita’ira’a te tae mai i te feiā tei hō’ē ? Hi’o ato’a i te fa’aaura’a a te tuahine Sharon Eubank i roto « Te tahi atu ā mau mātēria tauturu ».

• ’Ua fa’a’ohipa Paulo i te hōho’a nō te hō’ē fare patu nō te fa’aitoito i te hō’ēra’a i roto i te 1 Korinetia 3:9–17. Nāhea teie fa’aaura’a i te tauturu i tā ’oe piha ha’api’ira’a ’ia ta’a maita’i a’e i te aura’a o te hō’ēra’a ? ’Ei hi’ora’a, i muri a’e i te tai’o-’āmui-ra’a i teie mau ’īrava, e hōro’a ’oe i te pīahi tāta’itahi hō’ē ’ōfa’i ’e vaiiho ia rātou ’ia ha’a ’āmui nō te patu i te tahi mea. Nāhea tātou e riro ai « ’ei fare patu nō te Atua » ? (1 Korinetia 3:9). Nāhea te Atua e patu tāta’itahi ai ia tātou ? E aha tā tātou e patu ’āmui nei ’ei feiā mo’a ? E aha tā tātou e nehenehe e rave ’ei pāroita tāhō’ē ’o te ’ore roa ho’i e noa’a ia tātou ’ia rave tāta’itahi ?

1 Korinetia 1:17–31 ; 2 ; 3:18–20

Nō te rave fa’aoti i te ’ohipa a te Atua, e hina’aro tātou i te pa’ari o te Atua.

• Teie te hō’ē mana’o nō te tauturu i tā ’oe piha ha’api’ira’a ’ia tūru’i i ni’a i te Atua : ’A vāhi i te mau pīahi ’ei pupu ’e e ani ia rātou ’ia tai’o i te 1 Korinetia 1:17–31 ; 2 ; ’aore rā 3:18–20 mā te mā’imi i te mau tā’o mai te pa’ari ’e te ma’ama’a. E ’ia fa’a’ite rātou i muri iho i roto i tā rātou pupu e aha tā teie mau ’īrava e ha’api’i nei nō ni’a i te rirora’a ’ei mea pa’ari i roto i te ’ohipa a te Fatu. E aha te mau mea nō ni’a i te ’evanelia ’o tei riro ’ei mea ma’ama’a nō te tahi mau ta’ata ? Nāhea teie mau mea e fa’a’ite ai i te pa’ari o te Atua ? Penei a’e e nehenehe ato’a te mau pīahi e fa’a’ite mai i te mau mea i tupu ’a ti’aturi ai rātou i te pa’ari o te Atua, ’eiaha rā i tō rātou iho pa’ari nō te fa’aoti i tāna ’ohipa.

1 Korinetia 6:9–20

E mea mo’a tō tātou tino tāhuti.

• Nō te ha’amata i te hō’ē ’āparaura’a nō ni’a i teie mau ’īrava, e pāpa’i ’oe i ni’a i te tāpura ’ere’ere i teie mau uira’a i muri nei : E aha tō te Fatu hina’aro ’ia hi’o tātou i tō tātou nei tino ? Nāhea te reira i ta’a ’ē ai i te huru tā Sātane e hina’aro ia tātou ’ia mana’o nō ni’a i tō tātou tino ? E aha te aura’a e mau hiero tō tātou tino nō te Vārua Maita’i ? E ani i te mau pīahi ’ia ’imi mai i te mau pāhonora’a i teie mau uira’a i roto i te 1 Korinetia 6:9–20 (hi’o ato’a Te Ha’api’ira’a Tumu ’e te mau Fafaura’a 88:15 ; Mose 6:8–9).

• E tu’u atu i roto i tā ’outou ’āparaura’a nō ni’a i te mo’ara’a o tō tātou tino, te paraparaura’a nō ni’a i te ture nō te vi’ivi’i ’ore. Penei a’e e nehenehe e ani i tā ’oe mau pīahi e aha tā rātou i ha’api’i mai nā roto mai ia Paulo—mai roto ato’a mai i te tahi atu ā mau mātēria tauturu a te ’Ēkālesia—e tauturu te reira ia rātou ’ia ha’amāramarama atu ia vetahi ’ē te faufa’a rahi nō te vi’ivi’i ’ore. ’Ua tāpurahia te tahi o teie mau mātēria tauturu i roto i « Te tahi atu ā mau mātēria tauturu ».

Te tahi atu ā mau mātēria tauturu

« E nehenehe te mau ta’a-’ē-ra’a e riro ’ei maita’i ».

’Ua fa’ata’a mai te tuahine Sharon Eubank nāhea te mau pupu tata’ura’a e fa’atupu ai i te hō’ēra’a :

« E mea tītauhia ’ia tāpe’ape’a noa te mau ta’ata hō’ē i tō rātou ti’amāra’a hāhape ’e i te hō’ē ā taime ’ia pāpū tō rātou ’aravihi tāta’itahi. ’Aita te mau tata’ura’a i rēhia ā na e te pupu hō’ē noa huru ta’ata. Te pupu maita’i ra, e ’āno’ira’a maita’i ïa—hō’ē te rautī ra te ’arora’a, hō’ē tē fa’aherehere ra, hō’ē te ’aro ra, hō’ē te fa’ahau ra. ’Aita e ta’ata hoe i faufa’a a’e i te tahi, ’ua riro rātou ’ei mea maita’i ana’e nō te va’a, terā rā, mai te mea e hina’aro rātou e hoe ’āmui maita’i, e tītauhia i te ta’ata tāta’itahi ’ia fa’atano i ni’a i te mau hina’aro ’e te ’aravihi o te tahi atu mau pu’era’a—e ti’i te ta’ata rima poto i mua ri’i atu, ’e te ta’ata rima roa i muri ri’i mai.

« E nehenehe te mau ta’a-ē-ra’a e hurihia ’ei maita’i ’eiaha rā ’ei ’ino » (« Nā roto i te tāhō’ēra’a i te ’ā’au e noa’a mai ia tātou te mana i te Atua », Liahona, Novema 2020, 56 ; hi’o Daniel James Brown, The Boys in the Boat : Nine Americans and Their Epic Quest for Gold at the 1936 Berlin Olympics [2013], 161, 179).

Te mau ha’amaita’ira’a nō te vi’ivi’i ’ore

Jeffrey R. Holland, « Personal Purity », Ensign, Novema 1998, 76.

David A. Bednar, « Te ti’aturi nei mātou ē, e mea ti’a i te taʼata ’ia ora ma te viʼiviʼi ʼore », Liahona, Mē 2013, 41.

(Te mau video) « Chastity: What Are the Limits? [Te orara’a ma te vi’ivi’i ’ore : E aha te mau ’ōti’a ?] », « I Choose to Be Pure [E mā’iti au ’ia vai mā noa] » ChurchofJesusChrist.org

Ha’amaita’ira’a i tā tātou ha’api’ira’a

Fa’a’ite i te ’itera’a pāpū nō Iesu Mesia. Paulo : « ’aore ’oia i haere atu ma te parau ahaaha ’e te pa’ari, i te paraura’a atu […] i te ’evanelia a te Atua » (1 Korinetia 2:1). E nehenehe tō ’outou ’itera’a pāpū nō te Fa’aora e riro ’ei ha’amaita’ira’a hōhonu.