« 28 nō ’Ātete–3 nō Tetepa. 1 Korinetia 8–13 : ‘’O te tino ’outou nō te Mesia’ », Mai pe’e mai—nō te Ha’api’ira’a Sābati : Faufa’a ’Āpī 2023 (2022)
« 28 nō ’Ātete–3 nō Tetepa. 1 Korinetia 8-13 », Mai pe’e mai—nō te Ha’api’ira’a Sābati : 2023
« 28 nō ’Ātete–3 nō Tetepa
1 Korinetia 8–13
« ’O te tino ’outou nō te Mesia »
’Ua ha’api’i mai Elder Richard G. Scott ē « e nehenehe tātou e ’ere i te mea faufa’a a’e, te ’arata’i muhu ’ore a te Vārua nō tātou iho » mai te mea ’aita tātou e tāpe’a mai ’e e pāhono i « te mau fa’a’itera’a mātāmua tei tae mai ia [tātou] ra » (« ’Ia noa’a te arata’ira’a a te Vārua », Liahona, Novema 2009, 8).
Tītau i te mana’o
I roto i te 1 Korinetia 8–13, ’ua ha’api’i Paulo i te mau parau mau o te ’evanelia ma te fa’a’ohipa i te mau fa’a’itera’a mai te hō’ē horora’a i roto i te hō’ē fa’atītīāhemora’a, te tino o te ta’ata ’e « te sumebalo māniania ra » (hi’o 1 Korinetia 9:24–25 ; 12:13–26 ; 13:1). E ani i te mau pīahi e aha tā rātou i ha’api’i mai nā roto mai i teie mau fa’aaura’a. Nāhea te mau fa’aaura’a i te tauturu ia tātou ’ia māramarama i te mau parau mau o te ’evanelia ?
Ha’api’i i te ha’api’ira’a tumu
E hōro’a te Atua i te hō’ē rāve’a nō te horo ’ē atu i te fa’ahemara’a.
-
Nāhea ’oe i te tauturu i te mau pīahi ’ia ’ite mai i te mau parau mau pūai i roto i te 1 Korinetia 10:13 ? Hō’ē mana’o ’o te vāhira’a ïa i te ’īrava nā roto i te mau pereota poto, ’e e hōro’a atu i te reira mau pereota poto i te mau pīahi tāta’itahi, ’e ’a ani ia rātou ’ia fa’ahiti fa’ahou i te mau pereota ’ia au i tā rātou iho mau parau. ’Ei hi’ora’a, e aha te tahi atu rāve’a nō te parau « e ta’ata ha’apa’o maita’i te Atua » ’aore rā « e fa’ahema hau atu i tā ’outou e ’ore e fa’a’oroma’i » ? I muri iho, ’ia tai’o fa’ahou ’outou i te ’īrava, ma te fa’a’ohipa i te tahi mau fa’ahitira’a parau a te mau pīahi. E nehenehe te mau pīahi e fa’a’ite mai i te mau mea i orahia mai e rātou, i reira tō rātou ’itera’a ē e mea mau te mau fafaura’a i roto i teie ’īrava. E aha te tahi atu ā mau mana’o tei noa’a mai ia tātou i roto i teie mau ’īrava mai roto mai i te Alama 13:27–28 ?
-
’Eiaha e fa’aea noa i ni’a i te mau fa’ahemara’a ta’a ’ē a te tahi ta’ata, e hina’aro paha ’oe i te fa’atumu i te ’āparaura’a i ni’a i te 1 Korinetia 10:13 nō ni’a i te mau fa’ahemara’a « mai tā te ta’ata nei » ’ia au i te mau parau a Paulo. ’Ia ha’amata te mau pīahi nā roto i te ’imira’a i te mau fa’ahemara’a tā Paulo i fa’aara i roto i te mau ’īrava 1–12. ’Ia hōro’a ato’a mai rātou i te tahi mau hi’ora’a nō teie tau nō te mau fa’ahemara’a mātauhia, mai te mau fa’ahemara’a ’ia ha’avare, ’ia ’āfa’ifa’i parau, ’aore rā ’ia ha’avā ia vetahi ’ē. Nāhea te hō’ē ta’ata, nā roto i te tauturu a te Atua, e « ora mai » i teie mau fa’ahemara’a ?
1 Korinetia 10:16–17 ; 11:23–30
E fa’atāhō’ē te ’ōro’a mo’a ia tātou ’ei mau melo nō te ’Ēkālesia a te Mesia.
-
E fa’auru teie mau ’īrava i te hō’ē ’āparaura’a e nāhea te ’ōro’a mo’a e nehenehe ai e fa’atāhō’ē i tā ’outou pāroita i roto i tā ’outou mau tauto’ora’a ’ia riro atu ā mai te Fa’aora te huru. E ha’amata ’oe nā roto i te tai’ora’a i te 1 Korinetia 10:16–17 ’e te mā’imira’a e aha te aura’a ’o te tā’o auhō’ēra’a i roto i teie ’īrava (e nehenehe tā te tahi pīahi e hi’o i te mau tātarara’a i roto i te fa’atoro parau). Nāhea te rave-’āmui-ra’a i te ’ōro’a mo’a i te tauturu ia tātou ’ia hō’ē roa atu ā ? Nāhea te a’o a Paulo « E hi’opo’a māite te ta’ata iāna iho » e tū’ati ai i teie fā ? (1 Korinetia 11:28).
’Ua hōro’ahia te mau hōro’a pae vārua ’ei maita’i nō te tā’āto’ara’a o te mau tamari’i a te Metua i te ao ra.
-
Nō te tauturu i te mau pīahi ’ia ’ite i te mau hi’ora’a e nāhea te fa’ananeara’a i tō rātou mau hōro’a pae vārua i te tauturu ’ia ha’amaita’i i te ’Ēkālesia, e ani ia rātou ’ia feruri i te mau hōro’a pae vārua tei fāri’ihia e te mau ta’ata i roto i te mau pāpa’ira’a mo’a. Nō te mau mana’o, e fa’aue atu ’oe ia rātou ’ia mā’iti i te hō’ē o te mau pāpa’ira’a mo’a i roto i « Te tahi atu ā mau mātēria tauturu » ’e ’ia fa’a’ite mai te i’oa o te mau hōro’a pae vārua tei fāri’ihia e taua ta’ata ra, i tō rātou mana’o. E nehenehe ato’a rātou e parau mai nō ni’a i te mau hōro’a pae vārua tā rātou e ’ite ra i roto i te tahi ’e te tahi. Nāhea teie mau hōro’a pae vārua o te mau ta’ata i riro ai ’ei ha’amaita’ira’a nō tātou pā’āto’a ? Nāhea tātou ’ia fa’a’ohipa i tā tātou mau hōro’a pae vārua nō te ha’amaita’i ia vetahi ’ē ’e ’ia patu i te tino o te Mesia, ’aore rā te ’Ēkālesia ? (hi’o 1 Korinetia 12:12–31 ; hi’o ato’a 1 Korinetia 14:12).
-
Nō te tauturu i te mau pīahi ’ia māramarama nāhea i te fa’ananea i te mau hōro’a pae vārua, e ani ia rātou ’ia tai’o te 1 Korinetia 12:27–31 ; Moroni 7:48 ; 10:23, 30 ; Te Ha’api’ira’a Tumu ’e te mau Fafaura’a 46:8. E aha tā teie mau pāpa’ira’a mo’a e ha’api’i nei ia tātou, e nāhea e noa’a ai te mau hōro’a pae vārua ? Nāhea te fa’ananeara’a i te mau hōro’a pae vārua, e fa’ariro ai ia tātou mai te Mesia ra te huru ? E ani i te mau pīahi ’ia mā’iti i te hō’ē hōro’a tā rātou e hina’aro e fāri’i ’e ’ia ’imi i te tauturu a te Fatu ’ia noa’a taua hōro’a ra.
Te aroha ’o te hōro’a pae vārua rahi roa a’e ïa.
-
’A ani i te mau pīahi ’ia feruri mū noa i te 1 Korinetia 13 ’e ’ia feruri i te tahi ta’ata tā rātou i matau tei riro ’ei hi’ora’a maita’i nō te hō’ē ’aore rā hau atu ’o te mau tufa’a nō te aroha tā Paulo i fa’ahiti. E nehenehe te tahi mau pīahi e fa’ata’a mai i te ta’ata tā rātou i mana’o ’e hō’ē ’ohipa tā te reira ta’ata i rave ’ei fa’ahōho’ara’a i te aroha. E ti’a ato’a paha ia ’oe e tāpura i te mau tufa’a nō te fa’a’itera’a a Paulo i ni’a i te tāpura ’ere’ere ’e e ani i te mau pīahi ’ia fa’a’ite mai i te mau mana’o nō te aura’a o te hō’ē ta’ata tē mau ra i te aroha « e fa’a’oroma’i roa » ’aore rā « e’ita e riri vave » (1 Korinetia 13:4–5). E mea nāhea tō te Fa’aora fa’ahōho’ara’a i teie mau maita’i o te aroha ? E aha te tahi atu ā mau parau mau tā Moroni 7:46–48 e ha’api’i nei nō ni’a i te aroha ?
Te tahi atu ā mau mātēria tauturu
Mau hi’ora’a i roto i te mau pāpa’ira’a mo’a nō te mau hōro’a pae vārua.
Ha’amaita’ira’a i tā tātou ha’api’ira’a
’A ora i te mau parau tumu tā ’outou e ha’api’i ra. E tauturu te orara’a i te mau parau tumu tā ’outou e ha’api’i ra ia ’outou ’ia fa’a’ite pāpū pūai atu ā nō ni’a i teie mau parau tumu. ’Ua ha’api’i Paulo ē, « ’Oia ato’a te feiā i parau i te ’evanelia nei, ’ua ha’apa’ohia e te Fatu ’ia ora rātou i te ’evanelia » (1 Korinetia 9:14).