11–17 nō Tetepa

2 Korinetia 1–7

« E fa’afaite ’outou i te Atua »

’Ia tai’o ana’e ’oe i te 2 Korinetia 1-7 i teie hepetoma, ’a feruri i te tahi mau pīahi ta’a ’ē—rātou ’o tē haere mai nei ’e rātou ’o tē ’ore e haere mai nei i roto i te piha ha’api’ira’a. Nāhea te mau parau tumu i roto i teie mau pene i te ha’amaita’i ia rātou ?

Tītau i te mana’o

E nehenehe te mau pīahi e fāna’o nā roto i te fa’aro’ora’a i te mau mana’o o te tahi ’e te tahi nō ni’a nāhea i te ha’amaita’i atu ā i tā rātou tuatāpapara’a pāpa’ira’a mo’a. Hōro’a i te tahi nau minuti nō te reira i terā taime ’e terā taime.

Ha’api’i i te ha’api’ira’a tumu

2 Korinetia 1:3–7 ; 4:6–10, 17–18 ; 7:4–7

E nehenehe tō tātou mau tāmatara’a e riro ’ei ha’amaita’ira’a.

• E tauturu te mau ’ite rau tā Paulo i fa’ata’a mai ’e te a’o tāna i hōro’a mai i roto i te 2 Korinetia i te mau pīahi, ’ia feruri i te mau ha’amaita’ira’a e tae mai nā roto mai i tō rātou mau tāmatara’a. Nō te ha’amata i te hō’ē ’āparaura’a, e ani ’oe i te hō’ē pīahi ’ia haere ineine mai nō te paraparau mai e nāhea te hō’ē tāmatara’a i te ha’amaita’ira’a i tōna orara’a, ’aore rā e aha tāna i ’apo mai nā roto mai i te tahi ta’ata tei fa’aruru i te hō’ē tāmatara’a. I muri iho e hōro’a i tā ’oe mau pīahi te tahi nau minuti nō te hi’o fa’ahou i te 2 Korinetia1:3–7 ; 4:6–10, 17–18 ; ’e 7:4–7, ma te hi’o mai e aha tā Paulo i ha’api’i nō ni’a i te mau tumu ’e te mau ha’amaita’ira’a o te mau tāmatara’a. E ani i te mau pīahi ’ia fa’a’ite mai e aha tā rātou i ’ite mai. E nehenehe ’oe e parau ia rātou e tai’o pūai mai i te ’īrava i reira tō rātou ’itera’a mai i te hō’ē ha’apī’ira’a ta’a ’ē, ’e ’ia fa’a’ite mai i muri iho hō’ē ’ohipa i tupu ’aore rā te ’itera’a pāpū e tū’ati atu i taua ha’api’ira’a ra.

• ’Ei tauturu i tā ’outou ’āparaura’a, ’a feruri i te hīmene ’āmui i te mau hīmene auhia e te mau pīahi ’o te fa’a’ite pāpū nei i te tāmahanahanara’a ’e te mau ha’amaita’ira’a tā te Metua i te ao ra ’e tā te Fa’aora e pūpū mai ia tātou i roto i te mau taime tāmatara’a—mai te « Auē te Pa’ari » (Te mau Hīmene, N°41). I muri a’e i te hīmene-’āmui-ra’a, e ani ’oe i te mau pīahi ’ia hi’o mai i te hō’ē pereota i roto i te 2 Korinetia 1 ’e te 4 tā rātou i mana’o e tano i te pōro’i o te hīmene.

2 Korinetia 2:5–11

Te fa’a’orera’a hapa ’o te hō’ē ïa ha’amaita’ira’a tā tātou e hōro’a ’e e fāri’i.

• ’Ua fāri’i pā’āto’a tātou i te mau ’itera’a rau ’a « fa’atupu ai te tahi ta’ata i te ’oto » i roto ia tātou ’aore rā i tō tātou ’utuāfare (’īrava 5). Penei a’e e nehenehe te mau pīahi ’ia ’imi mai i roto i te 2 Korinetia 2:5–11, te a’o a Paulo, nō ni’a i tō tātou huru i ni’a i te ta’ata tei fa’a’oto mai ia tātou. ’A feruri i te ani i te mau pīahi ’ia hi’o fa’ahou i te Mataio 5:43–48 ’e Luka 15:11–32 nō te ha’api’i rahi mai nō ni’a tō tātou huru i ni’a i te feiā tei fa’a’ino mai ia tātou. Nāhea tātou i te ha’amāuiui ia tātou iho ’e ia vetahi ’ē ’ia ’ore ana’e tātou e hina’aro i te fa’a’ore i te hara a te tahi ?

2 Korinetia 5:14–21

Nā roto i te tāra’ehara a Iesu Mesia, e nehenehe tātou e fa’afaite atu i te Atua.

• E rave rahi mau ta’ata e haere mai nei i te purera’a ma te hina’aro i te ha’afātata atu i te Atua, ’e tauturu paha te hō’ē ’āparaura’a nō te 2 Korinetia 5:14–21 ia rātou. Nō te ha’amata, ’ia ’imi mai te mau pīahi i te aura’a o te ta’o fa’afaite, penei a’e nā roto i te hi’ora’a nā mua i te ta’o i roto i te fa’atoro parau. E aha te mau fa’a’itera’a tā te reira e hōro’a mai nō ni’a i te fa’afaitera’a i te Atua ? E aha te tahi atu ā mau ’ite e noa’a mai ia tātou i roto i te ta’o « Tāra’ehara » i roto i te Arata’i nō te mau pāpa’ira’a mo’a ? Nāhea teie mau ’ite i te tauturu ia tātou ’ia māramarama i te 2 Korinetia 5:14–21 ? E ani atu i te mau pīahi ’ia fa’a’ite mai i tō rātou mau mana’o hōhonu nō te Fa’aora, nā tāna ho’i tāra’ehara i fa’ati’a ia tātou ’ia ’āmuihia atu i te Atua.

2 Korinetia 7:8–11

E arata’i te ’oto e au i te Atua i te tātarahapa.

• Tē hōro’a mai nei te 2 Korinetia 7:8–11 i te hō’ē tātarara’a nō te ’oto e au i te Atua ’e tāna tufa’a i roto i te tātarahapara’a. E aha tā tātou i ha’api’i mai nō ni’a i te ’oto e au i te Atua i roto i te 2 Korinetia 7:8–11 ’e te mau parau a te peresideni Dieter F. Uchtdorf i roto i « Te tahi atu ā mau mātēria tauturu ? » Nō te aha te ’oto e au i te Atua i riro ai ’ei mea faufa’a rahi nō te tātarahapara’a ?

• E fa’auruhia paha ’oe ’ia fa’aitoito i te fa’arahi atu ā te ’āparaura’a nō ni’a i te tātarahapara’a. Mai te mea te reira iho ā, e nehenehe ’oe e tāmata i teie mea : E pāpa’i atu i ni’a i te tāpura ’ere’ere Te tātarahapara’a ’o te . ’A ani i te mau pīahi ’ia ’imi i te mau fa’ahopera’a o teie pereota, ma te fa’a’ohipa i te mau mea tā rātou i ha’api’i mai i roto i te 2 Korinetia 7:8–11, i roto ato’a i te mau pāpa’ira’a mo’a ’e te tahi atu mau mātēria tauturu e ’itehia i roto i te parau ve’a Te mau tumu parau o te ’evanelia « Repentance » (topics.ChurchofJesusChrist.org). Nāhea tātou ’ia fa’a’ohipa i teie mau ha’api’ira’a nō te tauturu i te tahi ta’ata ’ia ta’a maita’i e nāhea ’ia tātarahapa mau ?

Te tahi atu ā mau mātēria tauturu

E fa’auru te ’oto e au i te Atua i te tauira’a ’e te tīa’ira’a.

’Ua ha’amāramarama mai te peresideni Dieter F. Uchtdorf :

« E fa’auru te ’oto e au i te Atua i te tauira’a ’e te tīa’ira’a nā roto i te tāra’ehara a Iesu Mesia. ’Are’a te ’oto e au i teie nei ao e huti te reira ia tātou i raro, e fa’a’ore i te tīa’ira’a, ’e e tura’i ia tātou i roto i te tahi atu mau fa’ahemara’a.

« E arata’i te ’oto e au i te Atua i te fa’afāriura’a ’e i te hō’ē tauira’a o te ’ā’au. E tūra’i te reira ia tātou ’ia au ’ore i te hara ’e ’ia here i te maita’i. E fa’aitoito te reira ia tātou ’ia ti’a i ni’a ’e ’ia haere i roto i te māramarama o te here o te Mesia. Te tātarahapara’a mau ’o te tauira’a ïa, e ’ere rā te ha’amāuiuira’a ’aore rā te fa’a’otora’a » (E nehenehe tā ’outou e rave i teienei ! », Liahona, Novema 2013, 56).

Ha’amaita’i i tā tātou ha’api’ira’a

’A fa’a’ohipa ia rātou i roto i te fifi. I te tahi mau taime, te mea noa tā te mau pīahi i roto i te fifi e hina’aro nei ’ia fāri’ihia ’e ’ia herehia rātou. ’A feruri i te hōro’a atu ia rātou i te hō’ē ’ohipa i roto i te hō’ē ha’api’ira’a i mua nei. ’Eiaha e fa’aea, mai te mea e’ita rātou e pāhono i tā ’outou mau tauto’ora’a i te ha’amatara’a. (Hi’o Ha’api’ira’a mai tā te Fa’aora, 8–9.)