18–24 nō Tetepa

2 Korinetia 8–13

« ’O te ta’ata hōro’a noa tā te Atua e hina’aro »

’Ia tai’o ’oe i te 2 Korinetia 8–13, ’a feruri i te mau ta’ata tā ’oe e ha’api’i ra ’e ’a fa’anaho i te mau ’ohipara’a ’o te tauturu ia rātou ’ia ’ite i te mau parau tumu i roto i teie mau pene. ’A hi’o fa’ahou i muri iho i teie fa’anahora’a nō te tahi atu ā mau mana’o.

Tītau i te mana’o

Teie te hō’ē rāve’a nō te ani i te mau pīahi ’ia fa’a’ite mai i te mea tā rātou i ha’api’i mai i roto i te 2 Korinetia 8–13 : e ani i te tahi o rātou ’ia pāpa’i i ni’a i te tāpura ’ere’ere hō’ē pereota auhia nō roto mai i tā rātou tai’ora’a ’e ’ia fa’a’ite mai nō te aha e mea faufa’a teie mau pereota nō rātou.

Ha’api’i i te ha’api’ira’a tumu

2 Korinetia 8:1–15 ; 9:6–15

E hōro’a te feiā mo’a ma te ’ana’anatae i te mea tā rātou e vai ra nō te ha’amaita’i i te feiā veve ’e tei nava’i ’ore.

• ’Ua fa’aue te Atua i tāna feiā mo’a ’ia tauturu i te ’atu’atu i te mau ta’ata i roto i te ’ati, ’e e fa’auru te mau ’īrava i roto i te 2 Korinetia 8–9 i tā ’oe mau pīahi i roto i tā rātou mau tauto’ora’a. Nō te tauturu ia rātou ’ia ’ite mai i teie mau ’īrava, e pāpa’i ’oe i ni’a i te tāpura ’ere’re i teie mau uira’a Nō te aha tātou e hōro’a ai ? ’e Nāhea e ti’a ai ia tātou ’ia hōro’a ? ’Ia ’imi mai te ’āfara’a o te mau pīahi i te mau pāhonora’a i roto i te 2 Korinetia 8:1–15, ’e te tahi atu ’āfa e ’imi mai ïa i roto i te 2 Korinetia 9:6–15. (’A ha’amāramarama atu ē, i roto i te pene 8, mau ’īrava 1–5, ’ua parau Paulo nō te feiā mo’a i Makedonia ’ei mau hi’ora’a maita’i nō te hōro’ara’a rahi.) Nāhea te mau parau tumu tei ha’api’ihia e Paulo i te tauturu ia tātou ’ia ’atu’atu maita’i atu ā i te feiā veve ’e tei nava’i ’ore ?

2 Korinetia 11:1–4

E ti’a ia tātou ’ia fa’atumu i ni’a i « te ’ōhie e au i te Mesia nei ».

• Tē ’ite nei te mau melo o te ’Ēkālesia i te tahi mau taime ē, ’ua rahi roa te mau tītaura’a ’o te orara’a—’oia ho’i te mau tītaura’a mai tā rātou e ’ite nei ’ia riro ’ei feiā mo’a i te mau mahana hope’a nei. E tauturu te a’o a Paulo nō ni’a i « te ’ōhie e au i te Mesia nei » (2 Korinetia 11:3). Penei a’e e nehenehe ’outou e tai’o ’āmui i te 2 Korinetia 11:3 ’e ’ia ’āparau e aha te aura’a o te pereota « te ’ōhie e au i te Mesia ». E ani ato’a i te mau pīahi ’ia feruri ē, ’ua anihia rātou ’ia pāpa’i i te hō’ē fa’a’itera’a nō te ’evanelia a Iesu Mesia nā te hō’ē ve’a, ’e 100 noa tā’o te roa. ’A hōro’a atu i te taime ia rātou nō te pāpa’i i tā rātou parau, ’e ’ia fa’a’ite mai i te tahi ’e te tahi te mea tā rātou i pāpa’i. Mai te mea e hina’aro rātou i te tauturu, ’ia hi’o atu rātou i te Ioane 3:16–17 ; 3 Nephi 27:13–21 ; te parau a te peresideni Dieter F. Uchtdorf i roto i « Te tahi atu ā mau mātēria tauturu ». E nehenehe te mau pīahi e fa’a’ite mai i tō rātou mau mana’o nō ni’a i te « fa’a’ōhie [tō tātou] arata’ira’a i te ti’ara’a pipi ».

2 Korinetia 12:5–10

E nava’i te aroha mau o te Fa’aora nō te tauturu ia tātou ’ia ’ite mai i te pūai i roto i tō tātou paruparu.

• E aha tā ’outou e parau atu i te hō’ē hoa tē pure nei nō te tāmarūra’a i te hō’ē ma’i pae tino ’e tē mana’o nei ē e’ita teie pure e pāhonohia ? ’A feruri i te ani i te mau pīahi ’ia feruri i teie uira’a ’ia tai’o mū noa ana’e rātou i te 2 Korinetia 12:5–10. I muri iho ’ia fa’a’ite mai rātou i te mau mana’o nō roto mai i teie mau ’īrava ’o te tauturu i roto i teie huru tupura’a. ’Ia fa’a’ite ato’a mai rātou i te mau ’ohipa i tupu ’oia ho’i, nā roto i te aroha mau o Iesu Mesia ’aore rā i tōna pūai hanahana ’e tāna tauturu, ’ua roa’a ia rātou te pūai i roto i te paruparu. Nāhea taua ’ohipa i tupu ra i fa’aitoitora’a i tō rātou orara’a ? Nō te aha e mea faufa’a ’ia ti’aturi i ni’a i te taime o te Fatu ?

Te tahi atu ā mau mātēria tauturu

E nehenehe tā tātou e fa’a’ōhie i te huru nō tā tātou orara’a i te ’evanelia.

’Ua ha’api’i te peresideni Dieter F. Uchtdorf :

Te mau taea’e ’e te mau tuahine, ’eiaha te orara’a i te ’evanelia ’ia riro ’ei ’ohipa rave ’atā.

« E mea ’āfaro noa. E nehenehe te reira ’ia fa’ata’ahia mai teie te huru :

• Nā te fa’aro’ora’a i te parau a te Atua ma te mana’o pāpū e fa’ati’aturi ia tātou i te Atua ’e i tāna mau parau fafau.

• Rahi noa atu tātou i te ti’aturira’a i te Atua, rahi noa ato’a atu tō tātou ’ā’au i te ’ī i te here nōna ’e nō te ta’ata ato’a.

• Nō tō tātou here i te Atua tātou e hina’aro ai e pe’e iāna ma te fa’atū’ati i tā tātou mau ’ohipa i ni’a i te rēni o tāna mau parau.

• Nō tō tātou here i te Atua, ’ua hina’aro tātou ’ia tāvini iāna, ’ua hina’aro tātou ’ia ha’amaita’i i te orara’a o vetahi ’ē ’e ’ia tauturu i te feiā veve ’e tei nava’i ore.

• Rahi noa atu tātou i te haerera’a i te ’ē’a o te ti’ara’a pipi, rahi noa ato’a atu tātou i te hina’arora’a i te ha’api’i mai i te parau a te Atua.

« E nā reira ’e nā reira noa, terā ta’ahira’a i muri mai i te tahi, ’e e fa’a’īhia ïa tātou i te fa’aro’o rahi a’e ’e te ti’aturi ’e te aroha.

E mea ’ōhie roa, ’e te tere maita’i roa ra.

« Te mau taea’e ’e te mau tuahine, mai te peu tē mana’o ra ’outou ē, ’aita te ’evanelia e haere maita’i ra nō ’outou, tē ani manihini nei au ia ’outou ’ia ho’i i muri, ’a hi’o i tō ’outou orara’a i te hō’ē vāhi teitei a’e ’e ’a fa’a’ōhie i tō ’outou hi’ora’a i te ti’ara’a pipi. Fa’atumu i ni’a i te mau ha’api’ira’a tumu, te mau parau tumu ’e te fa’a’ohipara’a i te ’evanelia. Tē fafau nei au ē, e arata’i ’e e ha’amaita’i mai te Atua ia ’outou i ni’a i tō ’outou ’ē’a ’ia tae i te orara’a hope roa, ’e e haere maita’i roa te ’evanelia nō ’outou. (« Te haere maita’i roa ra », Liahona, Novema 2015, 22).

Ha’amaita’ira’a i tā tātou ha’api’ira’a

’A ’ohipa ’āmui ’e te mau melo nō te ’utuāfare. « Te feiā e mana rahi tō rātou i ni’a i te hō’ē ta’ata—nō te maita’i ’aore rā te ’ino—i te rahira’a o te taime ’o te feiā ïa i roto i tōna iho ’utuāfare. Nō te mea ho’i ē ’o te ’utuāfare te pū nō te orara’a ’e te ha’api’ira’a i te ’evanelia, e hau atu ïa te manuiara’a o tā ’outou mau tauto’ora’a nō te ha’apūaira’a i te hō’ē melo nō te piha ha’api’ira’a ’ia ha’a ’āmui ana’e ’outou ’e te … mau melo o te ’utuāfare » (Ha’api’ira’a mai tā te Fa’aora, 8).