’Ua haere te Fa’aora tei ti’afa’ahou e fārerei ia Paulo i roto i te fare tāpe’ara’a (hi’o i Te Ohipa 23:11). E nehenehe Iesu Mesia e fa’aora ia tātou i te « zugo tāvini ra »(Galatia 5:1).

25 nō Tetapa–1 nō ’Ātopa.

Galatia

« E ha’apa’o i tā te Vārua ra »

’A tai’o ’e ’a feruri ai ’oe nā roto i te pure i te Galatia, e ha’api’i te Fatu ia ’oe i te mea e ti’a ia ’oe ’ia fa’a’ite atu i tā ’oe mau pīahi. Te pāpa’ira’a i tō ’oe mau mana’o e fa’a’itera’a i te ’ā’au māuruuru i te Atua nō tāna tauturu.

Tītau i te mana’o

E mea pinepine te tuatāpapara’a i te mau pāpa’ira’a mo’a i te arata’i atu i te mau ’āparaura’a faufa’a roa o te ’evanelia ’e te ’utuāfare ’aore rā te mau hoa. ’Ua tupu ānei te reira i tā ’oe mau pīahi i teie hepetoma ? ’A ani ia rātou ’ia fa’a’ite mai i te mau mea tei tupu nō rātou.

Ha’api’i i te ha’api’ira’a tumu

Galatia 1:6–7 ; 3:1–5 ; 4:8–21 ; 5:1, 13–14

Tē pūpū nei te ’evanelia a Iesu Mesia i te ti’amāra’a.

• E mea ’ōhie a’e te tai’ora’a i te hō’ē buka ’ia ’ite ana’e tātou i te tumu i pāpa’ihia ai te reira. Nō reira, e mea maita’i paha ’ia ha’amata i tā ’outou ’āparaura’a nō ni’a i te Galatia mā teie huru uira’a « I tō ’outou mana’o e aha te tumu Paulo i pāpa’i ai i teie ’episetole ? » ’aore rā « E aha ra te fifi tā Paulo e tāmata nei i te tātara ? » ’A ani i te mau pīahi ’ia ’imi mai i te mau tāpa’o fa’a’ite i roto i te Galatia 1:6–7 ; 3:1–5 ; 4:8–21. Nāhea te pōro’i a Paulo e faufa’ahia ai nō tātou i teie mahana ?

• ’Ua mana’o te tahi feiā mo’a Galatia ē, ’ua ti’a ia rātou ’ia tāmau noa i te ora i te ture a Mose. I tō Paulo ra mana’o, e orara’a ïa teie i roto te « zugo tāvini » ’ia fa’aauhia i te « ti’amāra’a » tei pūpūhia mai e Iesu Mesia nō tātou (Galatia 5:1). Nō te tauturu i te mau pīahi ’ia hi’o haere i te mau ha’api’ira’a a Paulo nō ni’a i te ti’amāra’a ’e te tītīra’a, e ani ’oe ia rātou ’ia hōro’a mai te i’oa o te mau peu ’e te mau ’ohipa ’o tē tā’oti’a nei i tō tātou nu’ura’a i te pae vārua (mai te mau peu ta’ere, te mau peu ’ino, te mau ti’aturira’a hape, ’aore rā te fa’atumura’a i ni’a i te mau ’ohipa nō rāpae ’eiaha rā i ni’a i te fa’afāriura’a nō roto mai i te ta’ata iho). ’Ia au i te Galatia 5:1, 13–14, nāhea tātou e ’ite mai ai te ti’amāra’a i roto i teie mau peu ’e mau ’ohipa ? Nāhea tātou i te orara’a i te ti’amāra’a e ’itehia mai nō roto ia Iesu Mesia ? Nāhea tātou i te pāhono i te hō’ē ta’ata tei mana’o ē, e tā’ōti’a te orara’a i te ’evanelia i te ti’amāra’a o te ta’ata ?

Galatia 5:16–26

Mai te mea « e pe’e tātou i tā te Vārua », e fāri’i ïa tātou i te « hotu a te Vārua ».

• E rave rahi mau ta’ata e fifi nei nō te ’ite i te mana a te Vārua. E nehenehe te Galatia 5 e tauturu. Penei a’e e nehenehe ’outou e ha’amata ma tē ani atu i te mau pīahi ’ia ’imi mai i roto i te Galatia 5:22–25 nō te ’ite mai i te mau parau tā Paulo i fa’a’ohipa nō te fa’ata’a mai i te hotu a te Vārua. Nō te aha te hotu i riro ai ’ei parabole maita’i nō te huru e fa’a’itoito ai te Vārua ia tātou ? Penei a’e e nehenehe te mau pīahi e fa’a’ite mai, nāhea teie hotu i ’ite-pāpū-hia ai i roto i tō rātou orara’a ’aore rā te orara’a o te mau ta’ata tā rātou i mātau. Te tahi atu ā mau mātēria tauturu e ti’a ’ia hi’o-haere-hia tei roto te Mataio 7:16–18 ; Ioane 14:26–27 ; Moroni 7:13–17 ; Te Ha’api’ira’a Tumu ’e te mau Fafa’ura’a 11:12–13 ; ’e te mau fa’ahitira’a a te peresideni Gordon B. Hinckley i roto i « Te tahi atu ā mau mātēria tauturu ».

E nehenehe tātou e fāri’i i « te hotu a te Vārua » ’ia ’imi ana’e tātou i te reira.

Galatia 6:7–10

’Ia ueue ana’e tātou « i tā te Vārua », e ’ō’oti mai tātou i te mau ha’amaita’ira’a ’ia tae i te taime ti’a.

• E tauturu te tuatāpapara’a i te Galatia 6:7–10 i te mau pīahi ’ia feruri hōhonu atu ā i ni’a i te mau hope’ara’a tau roa o tā rātou mau mā’itira’a. Nō te tauturu ia rātou, e ’āfa’i mai ’oe i te mau huru huero ato’a, ’e te mau rā’au tupu, te mau mā’a hotu, ’aore rā te mau pota ’o te tupu mai nā roto mai i teie mau huero tāta’itahi (’aore rā, e ’āfa’i mai i te mau hōho’a nō teie mau mā’a hotu). E ha’a ’āmui te mau pīahi nō te fa’atū’ati i te huero tāta’itahi i te hotu tāna e fa’atupu mai. E tai’o rātou i muri iho i te mau ’īrava 7–10 ’e e paraparau nō ni’a i te aura’a ’ia ueue « i tā [te] tino » ’e « i tā te Vārua ». (E tauturu te pōro’i a Elder Ulisses Soares i roto i « Te tahi atu ā mau mātēria tauturu ».) E aha tā tātou e ’ō’oti ’ia ueue ana’e tātou i tā te tino ? E aha tā tātou e ’ō’oti ’ia ueue ana’e tātou i tā te Vārua ? (hi’o Galatia 5:22–23).

• Tē ’ite nei paha te tahi mau pīahi i te « rohirohi i te parau maita’i » (Galatia 6:9)—penei a’e nō te mea ’aita rātou i pāpū ē e hotu mai tā rātou mau tauto’ora’a. E riro te hō’ē ’āparaura’a nō ni’a i te Galatia 6:7–10 i te tauturu mai. Nō te fa’aō mai i teie mau ’īrava, e ani ’oe i te tahi pīahi ’ia parau poto noa mai nō ni’a i te hō’ē taime i hina’aro ai ’oia e fa’a’oroma’i, ’a tāmata ai ’oia i te fa’atupu i te tahi mea. E aha tā te ’ite rau o teie ta’ata, e tae noa atu tā te Galatia 6:7–10, e ha’api’i mai nei ia tātou nō ni’a i tā tātou mau tauto’ora’a ’ia « ha’apa’o i tā te Vārua » ? (Galatia 5:25).

Te tahi atu ā mau mātēria tauturu

Te hotu o te Vārua.

’Ua ha’api’i te peresideni Gordon B. Hinckley : « E ’ite ’outou i te mau muhumuhu a te Vārua nā roto i te mau hotu a te Vārua—te mea ’o te ha’amāramarama, ’o te fa’atupu mai i te au, ’o te ha’amaita’i ’e ’o te ha’apāpū ’e ’o te fa’ateitei ’e ’o te arata’i ia tātou i te mau mana’o maita’i a’e ’e te mau parau maita’i ’e te mau ’ohipa maita’i nā te Vārua ïa o te Atua. » (Te mau Ha’api’ira’a a te mau Peresideni o te ’Ēkālesia : Gordon B. Hinckley [2016], 121).

Ueuera’a i tā te Vārua

’Ua ha’amāramarama mai Elder Ulisses Soares ē : « Nō te ueue i tā te Vārua e ti’a ïa i tō tātou mau mana’o, tā tātou mau parau ’e tā tatou mau ’ohipa ato’a ’ia fa’ateitei ia tātou i te fāito hanahana o tō tātou mau metua i te ra’i ra. Tē fa’ahiti nei rā te mau pāpa’ira’a mo’a i te parau nō te tino mai te nātura tino o te ta’ata tino nei, ’o te fa’ati’a ho’i i te mau ta’ata ’ia fa’ahemahia nā roto te here rahi, te mau hina’aro, te mau hīa’ai, ’e te mau tūra’ira’a a te tino ’eiaha rā i te ’imira’a i te fa’aurura’a nō ’ō mai i te Vārua Maita’i ra ». (« ’A fa’aea noa i te pae o te Fatu ! », Liahona, Mē 2012, 39).

Ha’amaita’ira’a i tā tātou ha’api’ira’a

Tauturu i te mau pīahi ’ia turu i te tahi ’e te tahi. « ’Ua riro te pīahi tāta’itahi i roto i tā ’outou piha ’ei puna rahi nō te ’itera’a pāpū, te mau mana’o, ’e te mau ’itera’a nō te orara’a i te ’evanelia. ’A ani ia rātou ’ia fa’a’ite mai ’e ’ia turu i te tahi ’e te tahi » (Ha’api’ira’a mai tā te Fa’aora, 5).