« 16–22 nō ’Ātopa. 1 ’e 2 Tesalonia : ‘’Ia fa’ati’a ho’i i te toe i tō ’outou fa’aro’o’ », Mai, pe’e mai—nō te Ha’api’ira’a Sābati : Faufa’a Āpī 2023 (2021)
« 16–22 nō ’Ātopa. 1 ’e 2 Tesalonia », Mai pe’e mai—nō te Ha’api’ira’a Sābati : 2023
16–22 nō ’Ātopa
1 ’e 2 Tesalonia
« ’Ia fa’ati’a ho’i i te toe i tō ’outou fa’aro’o »
’Ua ha’api’i Alama ē : « ’Eiaha ho’i e fa’ati’a i te tahi ta’ata ’ei ’orometua ’e ’ei ha’api’i nō ’outou, maori rā e ta’ata ’oia nō te Atua, i te haerera’a nā tōna ra mau ’ē’a, ’e i te ha’apa’ora’a i tāna mau fa’aue » (Mosia 23:14). E aha tā teie pāpa’ira’a mo’a e parau mai nei, e nāhea e ti’a ai ia ’oe ’ia fa’aineine ia ’oe iho nō te ha’api’i ?
Tītau i te mana’o
’A hōro’a i te mau pīahi te tahi nau minuti nō te hi’o ’oi’oi noa i te 1 ’e te 2 Tesalonia ’e ’ia ’imi mai i te hō’ē ’īrava ’o tei ha’aputapū i tō rātou ’ā’au. E ani ia rātou ’ia fa’a’ite mai i tā rātou mau ’īrava i te tahi atu pīahi i roto i te piha, ’e e ani i muri iho i te tahi mau pea ’ia fa’a’ite mai i te mea tā rātou i ha’api’i mai nā roto mai i te tahi ’e te tahi.
Ha’api’i i te ha’api’ira’a tumu
E ti’a i te mau tāvini o te Fatu ’ia poro i te ’evanelia ma te ’ā’au tae ’e te aroha.
-
’Ua ha’amata Paulo i tāna ’Episetole i tō Tesalonia ma te fa’aha’amana’ora’a i te feiā mo’a i te huru i fa’a’ite ai ’oia ’e te tahi atu mau ta’ata i te ’evanelia ia rātou. E riro te reira ’ei rāve’a maita’i nā tā ’oe mau pīahi ’ia hi’opo’a i te huru e manuia ai rātou i te ha’api’i ’e i te ’apora’a mai nā roto mai i te tahi ’e te tahi. E ani i te mau pīahi ’ia tai’o i te 1 Tesalonia 1:5–8 ; 2:1–13 ’e ’ia hi’o mai i te mau parau tumu i fa’ahitihia nō te fa’a’ite-maita’i-ra’a i te ’evanelia. ’Ia pāpa’i rātou i muri iho i te mau uira’a tei niuhia i ni’a i teie mau ’īrava ’o te tauturu ia rātou ’ia hi’opo’a i tā rātou mau tauto’ora’a nō te ha’api’i i te ’evanelia ia vetahi ’ē. ’Ei hi’ora’a, teie te hō’ē uira’a « E hi’ora’a maita’i ānei au nō te mau mea tā’u i ’ite ? » (hi’o 1 Tesalonia 1:7). Nāhea te pe’era’a i te mau parau tumu i roto i teie tuha’a parau i te tauturu ia tātou ’ia aupuru maita’i a’e i te mau ta’ata tā tātou e ha’api’i nei ?
’A pe’e ai tātou ia Iesu Mesia, e nehenehe ’oia e fa’ariro ia tātou ’ei mea mo’a.
-
’Ua ha’api’i Paulo i te feiā mo’a nō Tesalonia ē « ’aore ho’i te Atua i nomino mai ia tātou nō te parau faufau, ’ia maita’i rā » (1 Tesalonia 4:7). Nō te ha’amata i te hō’ē ’āparaura’a nō ni’a i te mo’ara’a, ’ia hīmene mai tā ’oe piha ’aore rā hō’ē ta’ata i te hīmene « E te Fatu Here » (Te mau Hīmene, N°65). ’A ani i te mau pīahi ’ia ’āparau mai nō ni’a i te mau tāpa’o nō te mo’ara’a tei fa’ahitihia i roto i te hīmene tei riro ’ei mea faufa’a nō rātou. E pāpa’i i ni’a i te tāpura ’ere’ere Fa’arahi mai nā i tō’u maita’i…, ’e e ani i te mau pīahi ’ia hi’o i te mau tā’o ’aore rā te mau pereota i roto i te 1 Tesalonia 3:9–13 ; 4:1–12 nō te fa’ahope i te pereota. Nāhea tātou i te fa’ananea i teie mau tāpa’o ?
-
E mea ataata paha te anira’a ’ia riro ’ei mea mo’a. E riro paha ’ei tauturu ’ia māramarama maita’i te mau pīahi ē, te fa’ananeara’a i te mo’ara’a ’o te hō’ē ïa ’ohipa e tupu ri’iri’i noa ’o te tītau ia tātou ’ia « fa’arahi atu ā » i te roara’a o te tau (1 Tesalonia 4:10). Nō te fa’ahōho’a i teie ravera’a, e ani i te hō’ē pīahi ’ia paraparau mai nō ni’a i te hō’ē tāreni ’aore rā i te hō’ē ’ohipa tei fa’aotihia ’o tei tītau i te tauto’ora’a tāmau i te roara’a o te tau, mai te hāmanira’a i te hō’ē tīfaifai ’aore rā te fa’ata’ira’a i te hō’ē ’upa’upa. Nāhea te reira e riro ai ’ei hō’ē ā huru ravera’a nō te ’ohipa nō te rirora’a ’ei mea mo’a ? E ani i te mau pīahi ’ia hi’o fa’ahou i te 1 Tesalonia 3:9–13 ; 4:1–12 ’e ’ia fa’a’ite mai nō ni’a i te tūtavara’a e tītauhia ’ia riro ’ei mea mo’a mai tā Paulo i fa’ata’a mai. E aha te mea e tauturu ia tātou ’ia nu’u atu i te mo’ara’a ?
1 Tesalonia 4:11–12 ; 2 Tesalonia 3:7–13
E ti’a ia tātou ’ia rave i te ’ohipa nō te fa’a’amu ia tātou iho ’e te feiā nava’i ’ore.
-
E fa’auru teie mau huru uira’a i te hō’ē tāu’ara’a parau nō ni’a i te a’o a Paulo nō te ’ohipa : E aha te mau fa’ahope’ara’a o te fa’atau ? E aha te mau ha’amaita’ira’a nō te ravera’a i te ’ohipa ? I tō ’outou mana’o e aha tā Paulo e parau ra nā roto i te mau tā’o « hau » ’e « māite » ? (1 Tesalonia 4:11 ; 2 Tesalonia 3:12). E hina’aro paha ’oe e pāpa’i i teie mau huru uira’a i ni’a i te tāpura ’ere’ere ’ia feruri te mau pīahi ’e ’ia ’āparau mai ’a tai’o ai rātou i te 1 Tesalonia 4:11–12 ’e 2 Tesalonia 3:7–13. E aha te tahi atu mau pāpa’ira’a mo’a e tauturu ia tātou ’ia hāro’aro’a i te faufa’a rahi o te ’ohipa ’e te mau ’ati o te fa’atau ? (hi’o i te mau mana’o i roto « Te tahi atu ā mau mātēria tauturu »).
’Ua ti’a ’ia tupu te hō’ē tāivara’a hou te tae-piti-ra’a mai o Iesu Mesia.
-
E riro paha ’ei tauturu ’ia tuatāpapa i te tahi ’o te mau fa’aaura’a tā te mau peropheta i fa’a’ohipa nō te fa’ata’a mai i te tāivara’a, mai te hō’ē hi’ara’a (hi’o 2 Tesalonia 2:3), hō’ē o’e (hi’o Amosa 8:11–12), mau ’ūrī taehae e fa’aō mai i roto i te nana (hi’o Te ’Ohipa 20:28–30), ’e te mau tari’a ānoenoe (demangeaison) (hi’o 2 Timoteo 4:3–4). ’A feruri e vāhi te mau pīahi ’ei mau pea ’e e ani ia rātou ’ia tai’o i te hō’ē ’aore rā hau atu o teie mau pāpa’ira’a mo’a (’aore rā te tahi atu tā ’oe i mā’iti) ’e ’ia fa’a’ite mai e aha te mau ’īrava e ha’api’i nei nō ni’a i te Tāivara’a Rahi. E aha tā te mau peropheta i ha’api’i nō ni’a i te tāivara’a ’e te hope’a tā te reira e fa’atupu ?
-
Noa atu e’ita te ’Ēkālesia e ’ite fa’ahou i te tahi atu « tāivara’a » (2 Tesalonia 2:3) mai tei tupu i mūta’a iho ra, e tāiva noa ā tātou te ta’ata hō’ē. E aha tā te 2 Tesalonia 2 e parau nei e nāhea teie tāivara’a e tupu ai (hi’o mau ’īrava 9–10) ’e nāhea e ti’a ai ia tātou ’ia ’ape i te reira ? (hi’o mau ’īrava 15–17).
Te tahi atu ā mau mātēria tauturu
Mau pāpai’ra’a mo’a nō ni’a i te ’ohipa ’e te fa’atau.
Ha’amaita’ira’a i tā tātou ha’api’ira’a
’A fa’a’ohipa i te mau rāve’a huru rau. E mea ’ōhie ’ia ha’amātau noa i te hō’ē ā fa’a’ohipara’a i te hō’ē huru rāve’a ha’api’ira’a, terā rā te fa’a’ohipara’a i te mau rāve’a ha’api’ira’a huru rau e ha’aputapū e rave rau mau pīahi o te piha ha’api’ira’a. ’A ’imi i te mau rāve’a huru rau nō tā ’outou huru ha’api’ira’a, ’ei hi’ora’a te fa’a’ohipara’a i te mau video, te mau hōho’a, ’aore rā te pehe ’aore rā te hōro’ara’a i te mau pīahi te rāve’a nō te ha’api’i.(hi’o Ha’api’ira’a mai tā te Fa’aora, 22).