Te haʼapāpaʼi ra Paulo i te hō’ē rata i roto i te fare tāpe’ara’a

9–15 nō ’Ātopa

Philipi ; Kolosa

« E ti’a iā’u te mau mea ato’a nei i te Mesia, tei tauturu mai iā’u ra »

’A ha’amata nā roto i te tai’ora’a i te Philipi ’e te Kolosa, ’e te ferurira’a nā roto i te pure i te ha’api’ira’a tumu tā te Fatu e hina’aro ia ’oe ’ia ha’api’i. ’A vaiiho i te Vārua ’ia arata’i ia ’oe, ’a feruri ai ’oe i te mau uira’a ’e te mau mātēria tauturu e fa’a’ohipa nō te ha’api’i i teie ha’api’ira’a tumu.

ītona fa’a’itera’a

Tītau i te mana’o

E ani i te mau pīahi ’ia fa’a’ite mai i te hō’ē ta’o ’aore rā te hō’ē pereota ’o tē ha’apoto i te mea tā rātou i ha’api’i mai nā roto mai i te Philipi ’e te Kolosa ’e ’ia fa’ata’a mai nō te aha rātou i mā’iti ai i te reira ta’o ’aore rā pereota. E fa’aitoito ia rātou ’ia fa’a’ite mai i te mau ’īrava ’ei tufa’a nō tā rātou ha’amāramaramara’a.

ītona ha’api’ira’a

Ha’api’i i te ha’api’ira’a tumu

Philipi 2:1–5, 14–18 ; 4:1–9 ; Kolosa 3:1–17

E riro mai tātou ’ei « ta’ata ’āpī » ’ia ora ana’e tātou i te ’evanelia a Iesu Mesia.

• E hina’aro paha ’oe i te tauturu i tā ’oe mau pīahi ’ia fa’ahōho’a i te aura’a ’ia « ha’apae i te ta’ata tahito » ’e ’ia « fa’ata’ata ’āpī » nā roto ia Iesu Mesia (Kolosa 3:9–10). Nō te rave i te reira, e nehenehe ’oe e pia nā mua a’e ’e i muri a’e i te tahi mau hōho’a nō te hō’ē mea tahito tei tauihia ’ei hō’ē ’ohipa ’āpī (mai te hō’ē tao’a ’āpī, hō’ē fare, ’aore rā hō’ē pere’o’o ta’ata’ahi). ’Ia ’āparau mai te mau pīahi, e nāhea tātou ’ia riro ’ei ta’ata « ’āpī » nā roto i tō tātou fa’aro’o ia Iesu Mesia ’e tō tātou hina’aro ’ia ora i tāna ’evanelia. ’Ei tufa’a nō teie ’āparaura’a, e ani atu i te ’āfara’a o te mau pīahi ’ia tai’o i te Philipi 2:1–5, 14–18 ; 4:1–9 ’e te tahi atu ’āfara’a te Kolosa 3:1-7, ma te ’imi mai i te mau tāpa’o nō te « ta’ata tahito » ’e te « ta’ata ’āpī ». E ani ato’a i te tahi mau pīahi ’ia fa’a’ite mai e mea nāhea te fa’aro’o ia Iesu Mesia ’e te orara’a i te ’evanelia i te tauturura’a ia rātou ’ia riro ’ei mau ta’ata ’āpī.

Philipi 4:1–13

E nehenehe tātou e ’ite mai i te ’oa’oa i roto i te Mesia, noa atu tō tātou huru orara’a.

• Noa atu e mea ta’a ’ē tō tātou huru orara’a i tō Paulo, e ha’api’i pā’āto’a mai tātou i tōna hina’aro ’ia poupou ’e ’ia ’oa’oa i roto i te mau huru ato’a o tōna orara’a. Nō te ha’amata i te hō’ē tāu’ara’a parau nō ni’a i teie parau tumu, ’ia hi’o fa’ahou ā ’outou i te mau tāmatara’a tā Paulo i fa’aruru (hi’o, ’ei hi’ora’a 2 Korinetia 11:23–28). E ani atu i muri iho i te mau pīahi ’ia hi’o fa’ahou te Philipi 4:1–13 nō te ’imi mai i te a’o tā Paulo i hōro’a ’o te nehenehe e tauturu ia tātou ’ia ’oa’oa, e tae noa atu i roto i te mau tau tāmatara’a.

• Penei a’e e fa’a’ite mai rātou te mau ’ohipa i tupu ’a ’ite ai rātou i te « hau a te Atua, ’o tei hau ’ē atu i te ’ite ta’ata nei » (Philipi 4:7) ’aore rā i te taime ’a fāri’i ai rātou i te pūai « nā roto i te Mesia » (’īrava 13) nō te rave fa’aoti i te tahi mea e ’ore roa e noa’a i te rave nā roto i te tahi atu rāve’a.

• Mai te mea e hina’aro ’oe e hi’o haere i teie tumu parau, e ani i te hō’ē pīahi ’ia fa’a’ite mai i te tahi mau ’ā’amu ’aore rā mau fa’ahitira’a parau fa’auru nō roto mai i te a’ora’a a te peresideni Russell M. Nelson « Te ’oa’oa ’e te oraora pae vārua » (Liahona, Novema 2016, 81–84). ’E ’aore rā, e nehenehe te mau pīahi e māta’ita’i i te video « Trial of Adversity [Tāmatara’a o te ’ati] » (ChurchofJesusChrist.org). Nāhea te mau ta’ata i roto i te a’ora’a a te peresideni Nelson ’aore rā te vahine i roto i te video i ’ite ai i te ’oa’oa, noa atu tō rātou huru orara’a fifi ?

• Nō te mea te rahi noa atu ra te ’ino i roto i te ao nai i teie mahana, e fāna’o tā ’oe mau pīahi nā roto i te a’o a Paulo ’ia « ha’amana’o » i te mau mea o te ’ā’au mā, te au maita’i, te mea ti’a, te poupouhia, ’aore rā te ro’o maitata’i (Philipi 4:8). Penei a’e e fa’ata’a ’oe i te pīahi tāta’itahi (’aore rā te mau pupu na’ina’i o te mau pīahi) te hō’ē ’o te mau maita’i i tāpurahia i roto i te Philipi 4:8 ’aore rā Te mau Hīro’a Fa’aro’o 1:13. E fa’a’ohipa rātou tāta’itahi i te Arata’i nō te mau pāpa’ira’a mo’a nō te ’ite mai i te mau pāpa’ira’a mo’a nō ni’a i te maita’i tei fa’ata’ahia ia rātou ’e ’ia fa’a’ite mai i tō te piha ha’api’ira’a te mea tā rātou i ’ite mai. E nehenehe ato’a rātou e fa’a’ite mai i te mau hi’ora’a nō taua maita’i ra i roto i te orara’a o te mau ta’ata. Nāhea tātou i te « ’imi i teie mau mea » ?

Kolosa 1:12–23 ; 2:2–8

’Ia « a’a-ana’e-hia » tō tātou fa’aro’o i ni’a ia Iesu Mesia, e ha’apa’ari-pūai-hia tātou i te mau umera’a a tō te ao nei.

• E hōro’a mai te ’itera’a pāpu o Paulo nō te Fa’aora e ’itehia i roto i te Kolosa 1:12–23 ; 2:2–8 i te hō’ē rāve’a maita’i nō te mau pīahi ’ia feruri ’e ’ia ha’apa’ari pūai i tō rātou iho fa’aro’o. ’Ia ’imi mai te mau pīahi i teie mau ’īrava nō te ’ite mai i te mau mea e ha’apa’ari ai i tō rātou fa’aro’o ia Iesu Mesia. E aha te aura’a te parau « ’ia a’ahia ’e ’ia patuhia i ni’a ’ia [Iesu Mesia] » ? (Kolosa 2:7). E tauturu te hōho’a nō te hō’ē tumu rā’au i roto i te fa’anahora’a nō teie hepetoma i roto i te Mai pe’e mai—nō te ta’ata hō’ē ’e te ’utuāfare ’e te video « Spiritual Whirlwinds » (ChurchofJesusChrist.org) i te mau pīahi ’ia tāu’aparau i teie ’īrava. E aha te nehenehe e ha’apa’ari ’aore rā e ha’aparuparu i te mau a’a o te hō’ē tumu rā’au ? Nāhea te tumu « ’ia a’ahia ’e ’ia pātuhia i ni’a ia [Iesu Mesia] » i te ha’apūai ia tātou i mua i te mau fa’aurura’a a tō te ao nei ? (hi’o Kolosa 2:7–8 ; hi’o ato’a Helamana 5:12 ; Etera 12:4).

• E ani i te mau pīahi ’ia tāpura mai i te mau mea tā te Kolosa 1:12–23 ; 2:2–8 e ha’api’i nei, ’o tā tātou e ti’a e rave nō te ’ape i te « ha’avare faufa’a ore » ’o te nehenehe e « ha’ape’ape’a » i tō tātou fa’aro’o i te Mesia (Kolosa 2:8). Nāhea tātou ’ia pāturu i te tahi ’e te tahi i roto i tā tātou mau tauto’ora’a nō te pe’e i te Fa’aora ’eiaha rā i te mau peu hape a Sātane ?

Ha’amaita’ira’a i tā tātou ha’api’ira’a

Fa’a’ohipa i te pehe E fa’ahaere mai te pehe mo’a i te mana o te Vārua Maita’i. E fa’atupu te reira i te hō’ē vāhi mana’o tura ’e e fa’auru i te tītaura’a ’e te ’ohipara’a. ’A feruri e nāhea « te ha’api’ira’a ’e te a’ora’a i te tahi ’e te tahi nā roto mai i te mau Salamo ’e te mau hīmene » e riro ai ’ei tufa’a nō tā ’outou piha ha’api’ira’a (Kolosa 3:16 ; hi’o ato’a Ha’api’ira’a mai tā te Fa’aora, 22).