23–29 nō ’Ātopa

1 ’e 2 Timoteo ; Tito ; Philemona

« ʼEi ha’apa’ora’a rā ʼoe nā tei faʼaroʼo ra »

Tai’o 1 ’e 2 Timoteo ; Tito ; ’e Philemona ma te ha’amana’o i tā ’oe mau pīahi. E tauturu te mau mana’o ’e te mau fa’a’itera’a ’o te tae mai ia ’oe ’ia arata’i i te mau pīahi i te mau pāpa’ira’a mo’a faufa’a rahi ’e e fa’ahaere mai i te Vārua i roto i tā ’oe piha ha’api’ira’a.

Tītau i te mana’o

E riro ’ei tauturura’a nō te mau pīahi ’ia fa’aro’o i te tahi ’e te tahi ’ia paraparau mai nō ni’a i tō rātou mau manuia ’e tō rātou mau tāmatara’a nō te tuatāpapara’a i te mau pāpa’ira’a mo’a, ’ei ta’ata hō’ē ’e ’ei ’utuāfare. ’A feruri i te ha’amata i te piha ha’api’ira’a ma te ani i te mau pīahi ’ia paraparau mai nō ni’a i te tupura’a maita’i i roto i tā rātou tuatāpapara’a i te mau pāpa’ira’a mo’a.

Ha’api’i i te ha’api’ira’a tumu

1’e 2 Timoteo ; Tito

E tauturu te ta’a-maita’i-ra’a i te ha’api’ira’a tumu mau ia tātou ’ia ’ore ’ia ha’avarehia.

• Tē ora nei tā ’oe mau pīahi i te hō’ē tau e mea fifi roa i te fa’ata’a e aha te parau mau ’e e aha te mea ha’avare. ’Ua ora ato’a Timoteo ’e o Tito i taua huru tau ra, pēnei a’e e nehenehe te a’o a Paulo e riro ’ei mea faufa’a roa nō rātou i teie mahana. Teie te tahi mau tuha’a tei roto te a’o a Paulo : 1 Timoteo 1:1–7 ; 4:1–2, 6 ; 6:3–5, 20–21 ; 2 Timoteo 3:13–17 ; 4:2–4 ; Tito 1:7–9 ; 2:1, 7–8. E hōro’a i te pīahi tāta’itahi ’ia tai’o mai hō’ē o teie mau ’īrava ’e ’ia fa’a’ite mai i te mea tāna i ha’api’i mai nō ni’a i te faufa’a rahi o te ha’api’ira’a tumu mau (hi’o ato’a Alama 31:5). Nāhea te ha’api’ira’a tumu a te Fa’aora i te tauturu ia tātou ’ia ’ape i te ha’avare ? ’Ia fa’a’ite mai ato’a te mau pīahi i te mau ’itera’a rau i reira te mana o te ha’api’ira’a tumu mau i te ha’amaita’ira’a ia rātou.

« ’Eiaha roa te hō’ē ta’ata e vahavaha mai i tō ’āpīra’a na ; ’ei ha’apa’ora’a rā ’oe nā tei fa’aro’o ra » (1 Timoteo 4:12).

1 Timoteo 4:10–16

« ’Ei ha’apa’ora’a rā ’oe nā tei fa’aro’o ra ».

• Penei a’e ’aita tā ’oe mau pīahi e ’ite nei i te mana nō te hō’ē hi’ora’a maita’i tā rātou e hōro’a nei. ’A feruri i te ani ia rātou ’ia paraparau mai nō ni’a i te mau ta’ata tā rātou i mātau, tae noa atu te mau hoa pīahi, tei riro ’ei mau hi’ora’a nō te mau pipi a te Mesia. E riro paha ’ei tauturura’a i te ’āparaura’a, mai te mea e pāpa’i ’oe i ni’a i te tāpura ’ere’ere te mau tā’o i roto i te ’īrava 12 ’o tē fa’ata’a nei e nāhea e ti’a ai ia tātou ’ia riro ’ei hi’ora’a—parau, ’āparaura’a (’oia ato’a ho’i te huru ’aore rā te peu), aroha, vārua, fa’aro’o, ’e vi’ivi’i ’ore. ’Ia ’āparau mai te mau pīahi e nāhea tātou e nehenehe ai e riro ’ei mau hi’ora’a nō te feiā ha’apa’o i roto i teie mau huru tāta’itahi.

2 Timoteo 1

« E ’ere ho’i i te ’ā’au taiā tā te Atua i hōro’a mai nō tātou, i te ’ā’au itoito rā, ’e te aroha, ’e te ha’apa’o maita’i ».

• Tē parau nei te te fa’anahora’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare ’ia ’imi i roto i te 2 Timoteo i te a’o tā Paulo i hōro’a nō te fa’aitoito ia Timoteo i roto i tāna tāvinira’a. E ani i te mau pīahi ’ia fa’a’ite mai i te mau mana’o tā rātou i ’ite mai. ’Aore rā e hōro’a ia rātou te tahi nau minuti i roto i te piha ha’api’ira’a nō te ’imi mai ’e nō te fa’a’ite mai i te tahi o te mau parau a’o a Paulo (pene 1 tē vai ra te tahi mau hi’ora’a maita’i). ’Ia fa’a’ite ato’a mai rātou i te hō’ē ’ohipa i tupu ia rātou, ’a tauturu ai te Atua ia rātou ’ia upo’oti’a i ni’a i tō rātou mau ri’ari’a ’e ’ua hōro’a mai ia rātou « te ’ā’au … itoito, ’e te aroha, ’e te ha’apa’o maita’i » (2 Timoteo 1:7).

2 Timoteo 3

E tauturu te tuatāpapara’a i te mau pāpa’ira’a mo’a ia tātou ’ia upo’oti’a i ni’a i te mau ’ati nō te mau mahana hope’a nei.

• I muri a’e i tōna fa’aarara’a ia Timoteo nō ni’a i te « ’ati rahi » ’o te tae mai, ’ua fa’a’ite pāpū Paulo nō te mana ’e te faufa’a o te mau pāpa’ira’a mo’a (hi’o 2 Timoteo 3:1, 14–17). Nō te ha’amata i te hō’ē ’āparaura’a e nāhea te mau pāpa’ira’a mo’a i te ha’apūai ia tātou i roto i te mau tau fifi, e ani i te mau pīahi ’ia hi’o fa’ahou i te fa’ata’ara’a a Paulo nō te mau ’ati i te mau mahana hope’a nei, e ’itehia i roto i te 2 Timoteo 3:1–7. I muri iho e ’imi mai rātou ’e e fa’a’ite mai i te mau pāpa’ira’a mo’a tei tauturu ia rātou ’ia pāruru atu i te mau ’ati mai teie te huru (’ua tāpurahia te tahi mau hi’ora’a i roto i « Te tahi atu ā mau mātēria tauturu »). Nāhea te tuatāpapara’a i te mau pāpa’ira’a mo’a i te pāruru ia tātou i te mau pe’ape’a o te ao nei i teie mahana ?

• E riro te tuatāpapara’a i te a’o a Paulo nō te mana o te mau pāpa’ira’a mo’a ’ei rāve’a maita’i nō te mau pīahi ’ia fa’aitoito i te tahi ’e te tahi i roto i tā rātou mau tauto’ora’a nō te tuatāpapa i te parau a te Atua. Penei a’e e nehenehe te mau pīahi e tai’o i te 2 Timothy 3:14–17 ’e ’ia hi’o mai i te mau ha’amaita’ira’a ’e te mau pārurura’a e tae mai nā roto i te tuatāpapara’a i te mau pāpa’ira’a mo’a. I muri iho ’ia fa’a’ite mai rātou i te mau ’itera’a rau, ’a fāri’i ai rātou i teie mau ha’amaita’ira’a maoti tā rātou tuatāpapara’a pāpa’ira’a mo’a. ’A hōro’a ato’a i te mau pīahi te tahi taime nō te feruri i te mea tā rātou e rave nō te fāri’i i te tahi atu ā mau ’itera’a faufa’a rahi nā roto i te mau pāpa’ira’a mo’a, nō rātou iho ’e nō tō rātou ’utuāfare.

Te tahi atu ā mau mātēria tauturu

Te mau parau mau o te mau pāpa’ira’a mo’a ’o te pāruru ia tātou i te mau ’ati nō te mau mahana hope’a nei (hi’o 2 Timoteo 3:2).

Te mau ’ati i te mau mahana hope’a nei	Te mau parau mau ’o te pāruru ia tātou
Te mau ’ati i te mau mahana hope’a nei Te herera’a ia rātou iho	Te mau parau mau ’o te pāruru ia tātou Ioane 15:12–13
Te mau ’ati i te mau mahana hope’a nei Nounou	Te mau parau mau ’o te pāruru ia tātou Te Ha’api’ira’a Tumu ’e te mau Fafaura’a 88:123
Te mau ’ati i te mau mahana hope’a nei Fa’aahaaha	Te mau parau mau ’o te pāruru ia tātou Mosia 2:24–25
Te mau ’ati i te mau mahana hope’a nei Te’ote’o	Te mau parau mau ’o te pāruru ia tātou Alama 5:27–28
Te mau ’ati i te mau mahana hope’a nei Fa’a’ino	Te mau parau mau ’o te pāruru ia tātou Te Ha’api’ira’a Tumu ’e te mau Fafaura’a 63: 64
Te mau ’ati i te mau mahana hope’a nei Fa’aro’o ’ore i te mau metua	Te mau parau mau ’o te pāruru ia tātou Ephesia 6:1–3
Te mau ’ati i te mau mahana hope’a nei Māuruuru ’ore	Te mau parau mau ’o te pāruru ia tātou Te Ha’api’ira’a Tumu ’e te mau Fafaura’a 78:19
Te mau ’ati i te mau mahana hope’a nei Vi’ivi’i	Te mau parau mau ’o te pāruru ia tātou Deuteronomi 7:6

Ha’amaita’ira’a i tā tātou ha’api’ira’a

E tupu te tupura’a pae vārua i roto i te ’utuāfare. Tei piha’i iho ’outou i tā ’outou mau pīahi nō te tahi noa taime poto piti a’e taime i te ’āva’e hō’ē. E rave rahi o rātou tei fāri’i i te mau ’itera’a vārua faufa’a rahi i rāpae’au i te piha ha’api’ira’a, ’e e nehenehe teie mau ’ohipa i tupu e ha’apūai i te tahi atu ā mau pīahi o te piha ha’api’ira’a. ’A ui i te mau uira’a ’o te fa’aitoito i te mau pīahi ’ia fa’a’ite mai i te mea tā rātou i ’apo mai ’a tuatāpapa ai rātou i te ’evanelia i te fare. (Hi’o Ha’api’ira’a mai tā te Fa’aora, 18.)