Te Mesia e ti’a ra ’e te hō’ē tamāhine ’āpī

Rā’au i Gileada, nā Annie Henrie

30 nō ’Ātopa–5 nō Novema

Hebera 1–6

Iesu Mesia, « te tumu nō te ora mure ʼore »

E feruri i te fa’a’ite atu i te mau melo o te piha te tahi o te mau ’āehuehu tā ’oe i fāri’i nō ’ō mai i te Vārua Maita’i nō ni’a i te Hebera 1–6. E fa’auru te reira ia rātou ’ia ’imi i tō rātou iho mau ’āehuehu ’a tuatāpapa ai rātou i te mau pāpa’ira’a mo’a.

ītona fa’a’itera’a

Tītau i te mana’o

E hina’a’ro paha vetahi mau melo o te piha, ’o tē ’ore nei e fa’a’ite pinepine mai i tō rātou mau mana’o i roto i te piha ha’api’ira’a, i te hō’ē anira’a ta’a ’ē ’e te tahi ma’a taime nō te fa’a’ineine. ’A fārerei atu i te tahi o rātou hō’ē ’aore rā e piti mahana nā mua roa ’e e ani ia rātou ’ia fa’aineine mai nō te fa’a’ite i te hō’ē ’īrava i roto i te Hebera 1–6 tei riro ’ei mea faufa’a rahi nō rātou.

ītona ha’api’ira’a

Ha’api’i i te ha’api’ira’a tumu

Hebera 1:5

Iesu Mesia, « te tumu nō te ora mure ’ore ».

• Nāhea ’oe i te fa’aitoito i te mau melo o te piha ’ia fa’a’ite mai i te mau pāpa’ira’a mo’a faufa’a rahi nō ni’a ia Iesu Mesia, tei ’itehia mai e rātou i roto i tā rātou iho ’e tā te ’utuāfare tuatāpapara’a i teie hepetoma ? ’A feruri i te rēni e pae ’ana’ira’a ti’a i ni’a i te tāpura ’ere’ere, hō’ē nō nā e pae pene mātāmua tāta’itahi o te Hebera. ’A ani i te mau pīahi ’ia pāpa’i i roto i te ’āna’ira’a tano te mau pereota nō roto mai i teie mau pene, ’o tē ha’api’i nei ia rātou nō ni’a ia Iesu Mesia ’e te nūmera o te ’īrava i reira te reira mau pereota i te ’itera’ahia mai. Nāhea te ’itera’a i teie mau mea nō te Fa’aora e fa’aputu mai i ni’a i tō tātou fa’aro’o iāna ’e tō tātou hina’aro ’ia pe’e atu iāna ?

Hebera 2:9–18 ; 4:12–16 ; 5:7–8

’Ua māuiui Iesu Mesia i te mau mea ato’a ’ia nehenehe iāna ’ia ta’a ’e ’ia tauturu ia tātou e māuiui nei.

• E tauturu te Hebera 2:9–18 ; 4:12–16 ; 5:7–8 i te mau ta’ata ’o tē hi’o nei i te māuiui i roto i te ao nei ’e ’o tē uiui nei ē, tē ’ite mai ra ānei te Atua ’aore rā tē tāu’a mai ra ānei ’oia. Penei a’e e nehenehe te mau melo o te piha e ’imi mai i teie mau ’īrava nō te ’ite mai i te mau parau mau ’o te tauturu i teie mau huru uira’a. E aha tā teie mau ’īrava e ha’api’i nei nō ni’a e nāhea te Fa’aorai te pāhono i te māuiui o te ta’ata nei ? E riro ato’a paha ’ei tauturu ’ia ani i te mau pīahi ’ia fa’a’ite mai i te mau hi’ora’a i roto i te mau pāpa’ira’a mo’a, i reira Iesu Mesia i te fa’aitoitora’a ’e i te tāmāhanahanara’a i te mau ta’ata i roto i tō rātou mau ’ati (hi’o « Te tahi atu ā mau mātēria tauturu ») (ChurchofJesusChrist.org). E nehenehe te mau pīahi e ’āparau i te mea tā rātou i ha’api’i mai, e nāhea te Fa’aora i te tauturu mai ia tātou ’ia fa’aruru ana’e tātou i te mau tāmatara’a fifi.

Hebera 3:7–4:2

E noa’a te mau ha’amaita’ira’a a te Atua i te mau ta’ata ’o te ’ore « e fa’a’eta’eta i tō [rātou] ’ā’au ».

• Tē vai nei i roto i te Hebera 3 ’e 4 te hō’ē pi’ira’a i te feiā mo’a ’eiaha e fa’a’eta’eta i tō rātou ’ā’au ’e ’ia pāto’i i te mau ha’amaita’ira’a tā te Atua i hina’aro e hōro’a atu nō rātou. ’Ia tai’o ana’e ’outou ’e tā ’oe piha i te Hebera 3:7–4:2, ’a tāu’aparau i te huru o te mau ’itera’a rau o te mau ’āti ’Īserā’ela i muta’a iho ra e tano ai nō tātou i teie mahana, mai te reira ato’a nō te mau Hebera i roto i te ’Ēkālesia i te ha’amatara’a (hi’o te mātēria tuatāpapara’a nō ni’a i teie mau ’īrava i roto i te fa’anahora’a nō teie hepetoma i roto i te Mai, pe’e mai—nō te mau ta’ata hō’ē ’e te mau ’utuāfare). E aha tā tātou e rave ’ia vai marū noa tō tātou ’ā’au ’e ’ia pāhono i te hina’aro o te Fatu ? (hi’o Maseli 3:5–6 ; Alama 5:14–15 ; Etera 4:15). E nehenehe te mau pīahi e fa’a’ite mai nāhea rātou ’aore rā te feiā tā rātou i mātau, i te ha’amaita’ira’ahia nō te mea ’ua roa’a ia rātou te ’ā’au tātarahapa ’e te ’ā’au marū.

Hebera 5:1–5

E ti’a i te feiā e tāvini nei i roto i te bāsileia o te Atua ’ia pi’ihia e te Atua.

• Te parau poro’i i roto i te Hebera 5 nō ni’a i te mau ta’ata e mau i te autahu’ara’a tei pi’ihia e te Atua, e tano ïa nō te mau ta’ata ato’a tei fa’ata’ahia e te ha’amanara’a autahu’ara’a nō te tāvini i roto i te mau pi’ira’a o te ’Ēkālesia. Nō te tauturu i tā ’oe piha ’ia ha’api’i mai e aha te aura’a « tei parauhia e te Atua mai ia Aarona ra », ’a feruri i te ani ia rātou ’ia tai’o fa’ahou i te ’ā’amu o Aarona e fāri’ira’a i tōna pi’ira’a i roto i te Exodo 4:10–16, 27–31 ; 28:1. E aha te mau fa’a’itera’a i roto i teie ’ā’amu ’o te tauturu ia tātou ’ia ta’a i te Hebera 5:1–5 ? ’Ia fa’a’ite mai te mau pīahi nāhea tō rātou fāri’ira’a i te ha’apāpūra’a ē, ’ua pi’ihia te hō’ē ta’ata e te Atua nō te rave i te hō’ē pi’ira’a ta’a ’ē—’oia ato’a, penei a’e, rātou iho. Nāhea taua ha’apāpūra’a ra i te tauturu ia rātou ’ia pāturu maita’i a’e i te ta’ata i roto i tōna pi’ira’a ?

Mose e fa’atōro’a ra ia Aarona

« ’Aore roa e ta’ata e rave i teie nei tura iāna iho, maori rā o tei parauhia rā e te Atua, mai ia Aarona ra » (Hebera 5:4). Mose e pi’i rā ia Aarona i roto i te ’ohipa utuutura’a, nā Harry Anderson

’ītona mātēria tauturu

Te tahi atu ā mau mātēria tauturu

Te mau hi’ora’a i roto i te mau pāpa’ira’a mo’a nō te mau ta’ata tei tāmāhanahanahia e Iesu Mesia.

• Ioane 8:1–11 : ’Ua tāmāhanahana te Fatu i te vahine tei ro’ohia i te hara fa’aturi.

• Ioane 11:1–46 : ’Ua tāmāhanahana te Fatu ia Maria ’e ia Mareta i muri a’e i te pohera’a o tō rāua taea’e, ’o Lazaro.

• Enosa 1:4–6 : ’Ua fa’a’ore te Fatu i te mau hara a Enosa ’e ’ua ’īriti ’ē atu i tōna mana’o pe’ape’a.

• Mosia 21:5–15 : ’Ua tāmarū te Fatu i te ’ā’au o te mau ’āti Lamana, ’ia ha’amāmā rātou i te mau utu’a a te nūna’a o Limehi.

• Mosia 24:14–15 : ’Ua ha’apūai te Fatu i te nūna’a o Alama ’ia nehenehe ia rātou ’ia amo i tā rātou mau hōpoi’a.

• Etera 12:23–29 : ’Ua tāmāhanahana te mau parau a te Fatu ia Moroni.

• 3 Nephi 17:6–7 : ’Ua fa’aora te Fa’aora i te mau ma’i o te ’āti Nephi.

• Te Ha’api’ira’a Tumu ’e te mau Fafaura’a 121:7–10 : ’Ua tāmāhanahana te Fatu ia Iosepha Semita (hi’o ato’a Te Ha’api’ira’a Tumu ’e te mau Fafaura’a 123:17).

Haʼamaitaʼiraʼa i tā tātou haʼapiʼiraʼa

E fa’atupu i te hō’ē vāhi e au i te vārua. ’Ia fa’atupu ana’e ’outou i te vārua here ’e te hau i roto i tā ’outou piha ha’api’ira’a, e nehenehe te Vārua e ha’aputapū ’oi’oi i te ’ā’au o te mau ta’ata tā ’outou e ha’api’i ra. E aha tā ’outou e nehenehe e rave nō te fa’ahaere mai i te fa’aurura’a o te Vārua i roto i tā ’outou piha ha’api’ira’a? E nehenehe ’outou e fa’anahonaho fa’ahou i te mau pārahira’a ’aore rā e fa’a’ohipa i te mau hōho’a ’aore rā te pehe nō te tītau i te Vārua ? (Hi’o Ha’api’ira’a mai tā te Fa’aora, 15.)