« 13–19 nō Novema. Iakobo : ‘’Ei feiā rave ho’i ’outou i te parau nei, ’eiaha ’ei feiā fa’aro’o noa’ », Mai, pe’e mai—nō te Ha’api’ira’a Sābati : Faufa’a ’Āpī 2023 (2023)
« 13–19 nō Novema. Iakobo », Mai, pe’e mai—nō te Ha’api’ira’a Sābati : 2023
13–19 nō Novema
Iakobo
« ’Ei feiā rave ho’i ’outou i te parau nei, ’eiaha ’ei feiā fa’aro’o noa »
Hou ’a tai’o ai i teie fa’anahora’a, ’a tai’o i te ’episetole a Iakobo ’e ’a ha’apa’o maita’i i te mau muhumuhura’a tā ’oe e fāri’i. E aha te mau parau tumu tā ’oe i ’ite mai ’o te ha’amaita’i ’e ’o te fa’aitoito i tā ’oe mau pīahi.
Tītau i te mana’o
E ani i te mau pīahi ’ia fa’a’ite mai i te mau ’īrava nō roto mai i te Iakobo tei fa’auru ia rātou ’ia riro ’ei « feiā rave ho’i i te parau nei » (Iakobo 1:22). Mai te mea ’aita e ti’a ia rātou ’ia nā reira, ’ia fa’a’ite mai rātou e aha tō rātou mana’o i te taime ’ua ti’a ia rātou ’ia rave i te parau, ’ei ta’ata hō’ē ’aore rā ’ei mau ’utuāfare.
Ha’api’i i te ha’api’ira’a tumu
’Ia ani ana’e tātou ma te fa’aro’o, e hōro’a hua mai ïa te Atua.
-
’Ua arata’i te mau parau tumu i ha’api’ihia i roto i te Iakobo 1:5–6 ia Iosepha Semita i te hō’ē tupura’a ’ohipa pae vārua tei taui i tōna orara’a, ’e e riro te reira ’ei ha’amaita’ira’a ia tātou tāta’itahi. Penei a’e e nehenehe ’oe e pāpa’i i teie mau uira’a i ni’a i te tāpura ’ere’ere ’e e ani i te mau pīahi ’ia feruri māmū noa i te reira : E aha tā Iakobo 1:5–6 i fa’auru i roto i tō ’outou orara’a ? E aha tā te ’ohipa i tupu ia Iosepha Semita ’e teie mau ’īrava i ha’api’i mai ia ’outou nō ni’a i te ’imira’a i te pa’ari nō ni’a i tā ’outou iho mau uira’a ? (hi’o Iosepha Semita—’Ā’amu 1:10–17). E aha te mau ’itera’a rau tei ha’api’i ia ’outou ē « e parau mau te ’itera’a pāpū o Iakobo » ? (Iosepha Semita—’Ā’amu 1:26). E ani i te mau pīahi ’ia fa’a’ite mai i tō rātou mau mana’o i muri a’e i tō rātou ferurira’a i teie mau uira’a.
-
Penei a’e e tu’u mai te mau pīahi i te Iakobo 1:5–6 i roto i tā rātou iho mau parau. Nāhea te reira i te tauturu ia rātou ’ia ta’a maita’i a’e i teie mau ’īrava ? E hina’aro paha ’outou e ’āparau ’āmui e aha te aura’a o te tahi mau ta’o i roto i teie mau ’īrava.
Mai te mea e fa’a’oroma’i māite tātou, e arata’i te Fatu ia tātou i te maita’i-roa-ra’a.
-
Nō te ha’amata i te hō’ē tāu’ara’a parau i ni’a i te mau ha’api’ira’a a Iakobo nō ni’a i te fa’a’oroma’i i roto i teie mau ’īrava, e ani i te mau pīahi ’ia fa’a’ite mai i te mau mea i tupu ia rātou, ’a tītauhia ai rātou ’ia fa’a’oroma’i ’e e aha tā rātou i ’āpo mai nā roto mai i taua ’ohipa i tupu ra. ’Ia ’imi ato’a mai rātou i roto i te Iakobo1:2–4 ; 5:7–11 i te mau parau tumu e hōhora ra i tō rātou ’itera’a rau. E nehenehe ato’a rātou e ’ite mai i te mau parau tumu e au i roto i te video « Continue in Patience [Tāmau noa ma te fa’a’oroma’i] » (ChurchofJesusChrist.org) ’aore rā te pōro’i a te peresideni Dieter F. Uchtdorf « Tāmau noa ma te fa’a’oroma’i » (Liahona, Mē 2010, 56–59). ’Ia fa’a’ite mai te mau pīahi e aha tā rātou i ha’api’i mai nō ni’a i te fa’a’oroma’i, ’a ha’api’i mai ai rātou i te ’ite maita’i i te Metua i te ao ra ’e i te Fa’aora. E aha tei tauturu ia tātou ’ia fa’ananea i te fa’a’oroma’i ?
« Te fa’aro’o ’aore e ’ohipa e mea pohe ïa ».
-
Hō’ē rāve’a nō te tāu’a parau i te mau ha’api’ira’a a Iakobo nō ni’a i te fa’aro’o ’e te ’ohipa, ’o te vāhira’a ïa i te mau pīahi nā roto e piti pupu—hō’ē nō te hi’o mai nō te aha te fa’aro’o e tītau ai i te ’ohipa ’e te tahi ’ia hi’o mai nō te aha tā tātou ’ohipa e tītau ai i te fa’aro’o. Nō te rave i te reira, ’ia tai’o rātou i te Mataio 7:21–23 ; Iakobo 1:6–8, 21–25 ; 2:14–26 ; ’e Iosepha Semita—’Ā’amu 1:19. I muri iho e fa’a’ite mai te pupu tāta’itahi i te mea tā rātou i ’ite mai ’e ’ia tāu’a parau nō te aha e mea tītauhia te fa’aro’o ’e te ’ohipa.
« ’Ua fa’aro’o Aberahama i te Atua, ’e i ha’apa’ohia atu ra ’ei parauti’a nāna » (Iakobo 2:23). Aberahama i ni’a i te ’āfa’a nō Mamera, nā Grant Romney Clawson
-
Nō te tauturu i te mau pīahi ’ia feruri hōhonu atu ā i te parau tuiro’o « te fa’aro’o ’aore e ’ohipa e mea pohe ïa » (Iakobo 2:26), ’a pāpa’i i teie pereota i ni’a i te tāpura ’ere’ere : Fa’aro’o ’aore e ’ohipa mai te mea ïa e ’aita . E ani i te mau pīahi ’ia feruri i te mau rāve’a ’āpī nō te fa’ahope i te pereota, ’e e vaiiho ia rātou e pāpa’i i tō rātou mau mana’o i ni’a i te tāpura ’ere’ere. E aha tā tātou e rave nō te rave tāmau noa i te ’ohipa ’ia au i tō tātou fa’aro’o ia Iesu Mesia ?
’Ei mau pipi na Iesu Mesia, e ti’a ïa ia tātou ’ia here i te mau ta’ata ato’a, noa atu e aha te huru o tō rātou orara’a.
-
Nō te tauturu ’ia fa’auruhia te mau pīahi ’ia fa’a’ite mai i te aroha o te Mesia i te mau ta’ata ato’a, noa atu e aha tō rātou huru ’aore rā hi’ora’a rāpae, e ani i te mau pīahi tāta’itahi ’ia tai’o mai i te mau ’īrava i roto i te Iakobo 1:9–11 ; 2:1–9 ; 5:1–6. ’A ’āparau i te mau uira’a mai teie i muri nei : E aha te aura’a ’ia « ha’apa’o i te huru o te ta’ata » ? (Iakobo 2:9). Nō te aha tātou i te tahi taime e hi’o ’ē ai i te feiā moni, te tu’iro’o, ’aore rā te feiā mana, i te feiā ’aita tā rātou te reira ? Nāhea tātou i te ’ape ’ia hi’o ’ē atu ia vetahi ’ē ’ia au i tō rātou huru orara’a ? Nāhea te feiā e pe’e nei i te Fa’aora i riro ai ’ei feiā tao’a rahi a’e ? (hi’o Iakobo 2:5).
E mana tō te mau parau tā tātou e fa’a’ohipa nei nō te ha’amāuiui ’aore rā nō te ha’amaita’i ia vetahi ’ē.
-
E fa’aha’amana’o te mau hōho’a pūai tā Iakobo i fa’a’ohipa ia tātou ’e e tūra’i ia tātou ’ia fa’a’ohipa i te mau parau—tei parau-vaha-hia ’e tei pāpa’ihia—nō te fa’aitoito ia vetahi ’ē. ’A feruri i te ani i te mau pīahi ’ia hi’o haere mai i roto i te Iakobo 3, i te mau fa’aaura’a tei fa’a’ohipahia e Iakobo nō te fa’ata’a e nāhea te mau ta’o i te ha’amāuiui ’aore rā i te ha’apēpē ’ia vetahi ’ē ; e au paha te tahi mau pīahi e nīno’a mai i te mea tei ’itehia mai ia rātou. Nāhea teie mau fa’aaura’a i te fa’ahōho’a i te mau arata’ira’a a Iakobo i roto i teie pene ? ’Ei hi’ora’a, nāhea tā tātou mau parau e riro ai mai te hō’ē auahi ? Penei a’e e fa’a’ite mai te mau pīahi i te mau ’itera’a ’o tē fa’ata’a nei i te mana tā te parau e fa’atupu. E ani i te mau pīahi ’ia feruri e nāhea rātou ’ia fa’a’ohipa i te a’o a Iakobo.
Ha’amaita’ira’a i tā tātou ha’api’ira’a
E fa’aitoito ’ia vai te tura i roto i te piha ha’apira’a. « E tauturu i tā ’outou mau pīahi ’ia māramarama ē, e fa’ataui rātou tāta’itahi i te vārua i roto i te piha. E fa’aitoito ia rātou, ’ia tauturu mai ia ’outou i te ha’amaura’a i te hō’ē vāhi ’ia fa’a’ite mai te ta’ata ato’a i tō rātou mau mana’o, e ’itehia te here ’e te fa’atura, ’ia ti’a ho’i i te mau ta’ata ato’a ’ia fa’a’ite i te ’ohipa i tupu ia rātou, tā rātou mau uira’a ’e tō rātou ’itera’a pāpū » (Ha’api’ira’a mai tā te Fa’a’ora, 15).