Tē poro ra Iesu Mesia i te ’evanelia i roto i te ao vārua

Te Mesia e poro ra i roto i te ao vārua, nā Robert T. Barrett

20–26 nō Novema

1 ’e 2 Petero

« E ’oa’oa nā i te ’oa’oa e’ita e ti’a ’ia parau ra, ’e te ’ī ho’i i te maita’i »

’A ha’amana’o ē tā ’outou fā ’o te ha’api’i ïa i te ta’ata, e ’ere i te hōhora noa i te hō’ē ha’api’ira’a. ’Ia tai’o ana’e ’oe i te mau ’episetole a Petero, ’a feruri i te ta’ata tāta’itahi i roto i te piha ha’api’ira’a. E aha te mau parau tumu e tauturu ia rātou ’ia pātu i tō rātou fa’aro’o ?

ītona fa’a’itera’a

Tītau i te mana’o

’A pāpa’i te mau upo’o parau 1 Petero ’e 2 Petero i ni’a i te tāpura ’ere’ere. ’A hōro’a te taime i te mau pīahi ’ia hi’o fa’ahou i teie mau pene, ’e e ani ia rātou ’ia pāpa’i i raro a’e i teie mau upo’o parau i te mau parau ’aore rā i te mau pereota ’o tā rātou i ’ite e mea faufa’a. I muri iho ’a fa’a’ohipa i te mau tāpura nō te ani i te mau pīahi ’ia fa’a’ite mai i tō rātou mana’o.

ītona ha’api’ira’a

Ha’api’i i te ha’api’ira’a tumu

1 Petero 1:3–9 ; 2:19–24 ; 3:14–17 ; 4:12–19

E nehenehe au e ’ite i te ’oa’oa i te taime tāmatara’a ’e te māuiui.

• Hō’ē rāve’a nō te hi’o fa’ahou i te a’o a Petero i roto i te 1 Petero 1:3–9 ; 2:19–24 ; 3:14–17 ; ’e 4:12–19 ’o te anira’a ïa i te mau pīahi ’ia feruri i te tahi ta’ata tā rātou i mātau ’o tei fa’aruru i te hō’ē tāmatara’a. ’A hōro’a ia rātou i te taime i roto i te piha ha’api’ira’a nō te pāpa’i i te hō’ē rata i taua ta’ata ra, ma te tu’u atu i te mau parau mau nō roto mai i teie mau ’īrava ’o te fa’aitoito i taua ta’ata ra (hi’o ato’a Te Ha’api’ira’a Tumu ’e te mau Fafaura’a 121:1–8 ; 123:17). I muri iho e paraparau mai te mau pīahi nō ni’a i te mau parau mau tā rātou i mā’iti.

1 Petero 1:13–20 ; 2:1–12

’Ua pi’ihia tātou ’ei « ta’ata nō te Atua ».

• E riro paha te mau ha’api’ira’a a Petero i roto i te 1 Petero 1:13–20 ’e te 2:1–12 ’ei fa’aha’amana’ora’a fa’auru e nāhea tō te Fatu hi’ora’a mai ia tātou—tōna mau ta’ata—’e te mea tāna e tīa’i nei ia tātou. Penei a’e e ani ’oe i te mau pīahi ’ia mā’imi mai i teie mau ’īrava nō te hi’o mai i te mau fa’a’itera’a nō te aura’a ’ia riro « ’ei ta’ata nō te Atua » (1 Petero 2:10) ’e ’ia tāu’aparau i muri iho i te mea tā rātou i ’ite mai. ’Ia ha’amāramarama atu ’oe i te aura’a o te ta’o « ho’ohia » i roto i te 1 Petero 2:9 e « tapiho’ohia » ’aore rā « fa’ahereherehia » (hi’o te fa’ahorora’a f). E aha tā te reira e ha’api’i nei ia tātou nō ni’a i te mana’o o te Atua nō tātou ’e nāhea ’oia e hina’aro ai ia tātou ’ia ora ?

1 Petero 3:18–20 ; 4:6

Tē porohia nei te ’evanelia i te feiā i pohe ’ia ti’a ia rātou ’ia ha’avā-ti’a-hia.

• Tei roto i te ’episetole mātāmua a Petero te hō’ē o te tahi noa mau fa’ahitira’a i roto i te Bibilia nō tō Iesu Mesia tere i roto i te ao vārua i muri a’e i tōna pohera’a—te hō’ē ’ohipa tā te heheura’a ’āpī i tauturu ia tātou ’ia māramarama atu ā. Nō te tauturu i te mau pīahi ’ia fa’ahōhonu atu ā i tō rātou māramarama nō ni’a i te ao vārua, e ani ia rātou ’ia tai’o i teie mau pāpa’ira’a i muri nei ’e ’ia pāpa’i i ni’a i te tāpura ’ere’ere e aha tā rātou i ha’api’i mai : Ioane 5:25 ; 1 Petero 3:18–20 ; 4:6 ; Alama 40:7–14, 21 ; Te Ha’api’ira’a Tumu ’e te mau Fafaura’a 138:11–32 (hi’o « Te tahi atu ā mau mātēria tauturu »). Nō te aha e mea faufa’a ’ia ’ite maita’i nō ni’a i te tere o te Fa’aora i roto i te ao vārua ? E aha tā teie ’itera’a e fa’atupu i ni’a i tō tātou mana’o nō ni’a i te Atua ’e tāna fa’anahora’a nō te fa’aorara’a ?

2 Petero 1:1–11

Nā roto i te mana o Iesu Mesia, e nehenehe tā tātou e fa’ananea i tō tātou natura hanahana.

• Nō te fa’aitoito i feiā tā ’oe e ha’api’i ra i roto i tā rātou mau tauto’ora’a ’ia riro mai ia Iesu Mesia te huru, e ani ia rātou ’ia hi’o mai i te mau maita’i o te HuruMesia tei fa’ata’ahia i roto i te 2 Petero 1:1–11. ’A feruri i te pāpa’i i teie mau maita’i i ni’a i te tāpura ’ere’ere ’e e ani i te mau pīahi ’ia tātara mai i te reira. ’Ia tau’aparau te mau pīahi i muri iho e nāhea te fa’ananeara’a i te hō’ē maita’i i te arata’i atu i te fa’ananeara’a i te tahi atu mau maita’i. ’A hōro’a i te taime ’ia feruri rātou i te maita’i tā rātou e hina’aro i te fa’ananea rahi atu ā.

e tīfaifai tei ha’une-māite-hia

Te maita’i tāta’itahi o te HuruMesia tā tātou e fa’ananea, e tauturu te reira ia tātou ’ia nati i te hō’ē vauvau pae vārua nō te ti’ara’a pipi.

’ītona mātēria tauturu

Te tahi atu ā mau mātēria tauturu

Tē fa’a’ite pāpū nei te ’ohipa nō te fa’aorara’a nō te feiā pohe i te misiōni a te Mesia.

’Ua ha’api’i Elder D. Todd Christofferson ē :

« E aha te hope’ara’a o te rahira’a miria ta’ata e rave rahi tei ora na ’e tei pohe ma te ’ite ’ore nō ni’a ia Iesu ? Nā roto i te fa’aho’ira’ahia mai o te ’evanelia a Iesu Mesia, ’ua tae mai te ’itera’a ē e nāhea te feiā pohe tei ’ore i bāpetizohia e fa’aorahia ai ’e e nāhea e nehenehe ai i te Atua ’ia riro ‘’ei Atua maita’i roa, ’e te ti’a ’e te aroha ato’a’ [Alama 42:15].

« ’A ora noa ai ’oia, ’ua tohu Iesu ē, e poro ato’a ’oia i te feiā pohe [hi’o Ioane 5:25]. Tē parau mai nei Petero ia tātou ē, ’ua tupu ïa te reira i roto i te ārea nō te fa’asātaurora’a ’e te ti’afa’ahoura’a o te Fa’aora [hi’o 1 Petero 3:18–19]. ’Ua ’ite te peresideni Joseph F. Smith i roto i te ’ōrama ē, ’ua tere atu te Fa’aora i roto i te ao vārua [hi’o Te Ha’api’ira’a Tumu ’e te mau Fafaura’a 138:30, 33]. …

« Tō tātou mana’o pe’ape’a nō te fa’aora i tei pohe, ’e te taime ’e te mau rāve’a tā tātou e hōro’a nō taua fa’aotira’a ra, ’ua riro ïa, hau atu i te mau mea ato’a ’ei fa’a’itera’a nō tō tātou ’ite nō ni’a ia Iesu Mesia. ’Ua riro ïa te reira ’ei fa’ahitira’a pūai e nehenehe ia tātou ’ia rave nō ni’a i tōna huru atua ’e tāna misiōni. Tē fa’a’ite pāpū nei te reira, ’a tahi, i te ti’afa’ahoura’a o te Mesia ; te piti, i te ’ā’anora’a hope’a ’ore nō tāna ra tāra’ehara ; te toru, ’o ’oia ana’e te tumu nō te ora ; te maha, ’ua ha’amau ’oia i te mau tītaura’a nō te fa’aorara’a ; ’e te pae, e ho’i fa’ahou mai ’oia (« Te Fa’aorara’a ’o te Feiā pohe ’e te ’Itera’a pāpū nō Iesu », Liahona, Novema 2000, 9–10).

Ha’amaita’ira’a i tā tātou ha’api’ira’a

Ha’api’i i te « nō te aha ». I te tahi mau taime e uiui te mana’o o te mau pīahi—te feiā ’āpī iho ā rā—e aha te tū’atira’a o te mau tumu parau o te ’evanelia i ni’a ia rātou ’aore rā nō te aha e tītauhia ai ’ia ha’apa’o rātou i te mau fa’auera’a. Terā rā, mai te mea e māramarama rātou i te ’ōpuara’a mure ’ore a te Metua i te ao ra nō te ’oa’oa o tāna mau tamari’i, e pāpū maita’i ïa ia rātou te mau tumu o te mau parau tumu o te ’evanelia ’e o te mau fa’auera’a ’e e rahi ïa tō rātou hina’aro ’ia ha’apa’o » (Ha’api’ira’a mai tā te Fa’aora, 20).