Iesu Mesia mata ’ata’ata, e pārahi ra ’e te hō’ē tama mata ’ata’ata

Te aroha parauti’a, nā Del Parson

27 nō Novema–3 nō Tītema

1–3 Ioane ; Iuda

« E aroha hoʼi te Atua »

E aha te upo’o parau ’e te mau parau tumu e matara mai nā roto mai i tā ’oe tai’ora’a i te 1–3 Ioane ’e Iuda ? Nāhea ’oe ’ia fa’a’ohipa i te reira nō te tauturu i tā ’oe mau pīahi ?

ītona fa’a’itera’a

Tītau i te mana’o

E ani e rave rahi pīahi ’ia fa’a’ite mai i te mau upo’o parau ’aore rā mau parau mau ta’a ’ē tā rātou i tāmau maita’i ’a tuatāpapa ’ai rātou i te mau ’epitetore a Ioane ’e a Iuda. E aha te mau poro’i nō roto mai i teie mau ’episetore e mea faufa’a rahi roa nō rātou ’e tō rātou ’utuāfare ?

ītona ha’api’ira’a

Ha’api’i i te ha’api’ira’a tumu

1 Ioane 1:5–10 ; 2:3–11 ; 3:1–3 ; 4:7–21 ; 5:1–3

E mau hi’ora’a parauti’a mau tō te Metua i te ao ra ’e tō Iesu Mesia, nō te māramarama ’e te here.

• Nāhea ’oe i te tauturu i te feiā tā ’oe e ha’api’i ra ’ia ’ite mau i te māramarama ’e te here o te Atua i roto i tō rātou orara’a ? ’A ha’amata ma te pāpa’i i te mau tā’o māramarama ’e here i ni’a i te tāpura ’ere’ere. E ani i te mau pīahi ’ia fa’a’ite mai i te tahi atu mau tā’o e tae mai i tō rātou ferurira’a, ’ia mana’o ana’e rātou i teie nā tā’o e piti. I muri iho e tuatāpapa tāta’itahi te mau pīahi hō’ē o teie mau tuha’a pāpa’ira’a mo’a i muri nei, ma te ’imi mai i te hō’ē mea tā te mau ’īrava e ha’api’i nei nō ni’a i te māramarama ’aore rā te here : 1 Ioane 1:5–10 ; 2:3–11 ; 3:1–3 ; 4:7–12 ; 4:16–21 ; 5:1–3. ’A ani i te tahi o rātou ’ia fa’a’ite mai i te piha, e aha tā rātou i ’ite mai. E nehenehe ato’a ’oe e ani i te mau pīahi ’ia fa’a’ite mai i te mau ’itera’a, ’a fāri’i ai rātou i te māramarama ’e te here o te Atua.

• E ani i te mau pīahi ’ia hi’o i te hō’ē mōrī aroaro ’aore rā te mōrī e tomo mai ra nā roto i te hō’ē ha’amāramarama ’e ’ia fa’a’ite mai e aha tā rātou i ’ite nō ni’a i te mōrī pae tino. Nāhea te mōrī pae tino e riro ai mai te māramarama pae vārua ? E tuatāpapa mai te mau pīahi i teie mau pāpa’ira’a mo’a i muri nei, nō te ’ite mai i te mau mana’o hau atu nō ni’a i te huru te Atua ’e tāna Tamaiti e tūrama ai i tō tātou orara’a : Salamo 27:1 ; Ioane 1:4–5 ; 1 Ioane 1:5–7 ; 3 Nephi 11:11 ; Te Ha’api’ira’a Tumu ’e te mau Fafaura’a 88:6–13 ; ’e hō’ē hīmene nō ni’a i te māramarama, mai te « ’O te Fatu ra tō’u māramarama » (Te mau Hīmene, N°43). E nehenehe ato’a i te mau pīahi ’ia fa’a’ite mai i te ’ohipa i tupu ’a ’imi ai ’e ’a fāri’i ai rātou i te māramarama pae vārua i roto i tō rātou orara’a.

1 Ioane 2:18–23, 26–28 ; 4:3 ; 2 Ioane 1:7–11 ; 3 Ioane 1:9–11 ; Iuda

E ti’a ia tātou ’ia « [ha’apa’o] i te ha’api’ira’a tumu a te Mesia ».

• E tauturu te mau ha’api’ira’a a Ioane ’e a Iuda nō ni’a i te tāivara’a i te mau pīahi ’ia feruri, e nāhea ’ia tāpe’a pūai noa i tō rātou fa’aro’o ia Iesu Mesia. ’A feruri i te ani i te ’āfara’a o te mau pīahi ’ia mā’imi mai i te mau fa’a’itera’a nō ni’a i te mau ha’api’ira’a hape ’aore rā te tāivara’a i roto i te 1 Ioane 2:18–23, 26–28 ; 4:3 ; 2 Ioane 1:7–11 ; 3 Ioane 1:9–11 ’e te tahi ’āfara’a o te piha ’ia mā’imi mai i taua ā mau fa’a’itera’a ra i roto i te Iuda. ’Aore rā ’ia ’imi mai rātou i te mau pāhonora’a i te mau uira’a mai teie : Nāhea Ioane ’e Iuda i te fa’ata’ara’a mai i te parau nō te hō’ē ’āneti Mesia ? (hi’o ato’a Arata’i nō te mau pāpa’ira’a mo’a, « Antéchrist [’āneti Mesia] », scriptures.ChurchofJesusChrist.org. Tē vai ra ānei i roto i teie mau ’īrava te tahi mea e nehenehe e fa’a’auhia i te mau tāmatara’a tā tātou e fa’aruru nei i teie mahana ? E aha te aura’a « [ha’apa’o] i te ha’api’ira’a tumu a te Mesia » ? (2 Ioane 1:9).

• ’Ua fa’a’ohipa Iuda i te hō’ē fa’ahōho’ara’a nō te fa’a’ite i te mau ’orometua ha’avare, ’aore rā te feiā « e fa’a’ino nei i te mau mea ’ite-’ore-hia e rātou ra » (Iuda 1:10). E ani i te tahi mau pīahi ’ia nīno’a mai i ni’a i te tāpura ’ere’ere te tahi o te mau hōho’a tei fa’a’itehia i roto i te Iuda 1:12–13, ’a ’imi mai ai vetahi mau pīahi e aha te pereota tā te pīahi e nīno’a ra. Nāhea teie mau hōho’a e fa’a’ite mai ai i te mau ’orometua ha’avare ’e te mau ’āneti Mesia ? ’Ei hi’ora’a, nāhea te mau peu vi’ivi’i e fa’atupu ai i te mau « pora’o i tā [tātou] mau ’ōro’a nō te aroha » ? E aha tā tātou e rave nō te ha’apa’ari atu ā ia tātou i mua i te « feiā tahitohito » ? (hi’o Iuda 1:18–21). Nō te aha Iuda i parau ai ē, ’ia « aroha » atu (Iuda 1:22) tātou i te feiā e tahitohito nei i te ’evanelia ?

vahine e tauturu ra i te tamari’i ’ia tai’o i te mau pāpa’ira’a mo’a

« ’Aita atu ō’u ’oa’oa rahi maori rā ’ia ’ite au ē, tē ha’apa’o rā tā’u mau tamari’i i te parau mau » (3 Ioane 1:4).

3 Ioane 1:1–4

E tae mai te ’oa’oa ’ia tauturu ana’e tātou ia vetahi ’ē ’ia « ha’apa’o i te parau mau ».

• Tē vai ra paha te mau ta’ata i roto i tā ’oe piha e ta’a nei i te mea tā Ioane e fāri’i nei, ’a parau ai ’oia ē « ’aita atu e ’oa’oa rahi » maori rā ’ia fa’aro’o e ’ia ha’apa’o ’o Gaio (hō’ē ’o tāna mau « tamari’i ») i te parau mau. E fāna’o te mau pīahi ’ia fa’aro’o mai i te mau ’itera’a o te tahi atu mau pīahi. Penei a’e e nehenehe ’outou e ha’amata ma te tai’o ’āmui i te 3 Ioane 1:1–4 ’e te mau pāpa’ira’a mo’a i roto i « Te tahi atu ā mau mātēria tauturu ». E aha tā teie mau pāpa’ira’a mo’a e ha’api’i nei ia tātou nō ni’a i te puna nō te ’oa’oa mau ? E paraparau mai te mau pīahi, e aha ra tā rātou i fāri’i ’ei mau metua, mau misiōnare, feiā fa’atere ’o te ’Ēkālesia, ’aore rā ’ei ’orometua ha’api’i, ’ia ’ite ana’e rātou ē tē ha’apa’o ra te mau ta’ata tā rātou i ha’api’i i te parau mau. ’A fārerei atu i te tahi mau pīahi hou te ha’amatara’a o te piha ha’api’ira’a ’e e ani ia rātou ’ia ’āfa’i mai i te mau hōho’a nō te mau ta’ata tā rātou i tauturu i te ’āfa’i atu i te Mesia ra ’e ’ia fa’a’ite mai i tō rātou mau ’itera’a rau.

ītona mātēria tauturu

Te tahi atu ā mau mātēria tauturu

Te mau pāpa’ira’a mo’a nō ni’a i te tauturura’a ia vetahi ’ē ’ia ha’apa’o i te parau mau.

• Deuteronomi 6:6–7

• Maseli 22:6

• Ioane 4:36

• 1 Tesalonia 3:9

• Mosia 4:14–15

• Alama 17:1–2 ; 26:11–37

• Te Ha’api’ira’a Tumu ’e te mau Fafaura’a 18:10–16 ; 50:22

Ha’amaita’i i tā tātou ha’api’ira’a

’A pure nō tā ’outou mau pīahi. Mai tā te Fa’aora i pure nō Petero (hi’o Luka 22:32), e ti’a ia ’outou ’ia pure ma te fa’ahiti i te i’oa o tā ’outou mau pīahi, mā tē tūtava ’ia ta’a i tō rātou mau hina’aro ta’a ’ē. ’A nā reira ai ’outou, e fa’aineine ïa te Metua i te ao ra « i tō rātou ’ā’au » (Alama 16:16) ’e e tauturu ïa ’oia ia ’outou ’ia ’ite i te mea e ha’api’i nō te pāhono atu i tō rātou mau hina’aro (hi’o Ha’api’ira’a mai tā te Fa’aora, 6).