« 11–17 nō Tītema. Apokalupo 6–14 : ‘’Ua upo’oti’a rātou … nā roto i te toto o te ’Ārenio’ », Mai, pe’e mai—nō te Ha’api’ira’a Sābati : Faufa’a Āpī 2023 (2021)
« 11–17 nō Tītema. Apokalupo 6–14 », Mai, pe’e mai—nō te Ha’api’ira’a Sābati : Faufa’a ’Āpī 2023
Hōho’a peni nā Eric Johnson : Te ’Āpo’ora’a Rahi, nā Robert T. Barrett ; star cluster hōro’ahia e te piha ’ohipa Space Agency nō Europa
11–17 nō Titema
Apokalupo 6–14
« ’Ua upo’oti’a rātou … nā roto i te toto o te ’Ārenio »
’Ua parau Iosepha Semita ē, te buka a Apokalupo « ’o te hō’ē ïa o te mau buka pāpū roa a’e tā te Atua i tītau ’ia pāpa’ihia » (i roto buka ’ā’amu, nō Tītema 1842–Tiunu 1844 ; Buka 2, 10 nō Māti 1843–14 nō Tiurai 1843,98, JosephSmithPapers.org). Nāhea ’oe i te tauturu i te mau pīahi ’ia ’ite mai i te mau parau mau māramarama i roto i teie mau pene ?
Tītau i te mana’o
Nō te tauturu i te mau pīahi ’ia hi’o fa’ahou i te tahi mau mana’o tā rātou i ’apo mai ’a tuatāpapa ai rātou i te Apokalupo 6–14, ’a pāpa’i i te mau nūmera 6 ē tae atu i te 14 i ni’a i te tāpura ’ere’ere. E nehenehe te mau pīahi e pāpa’i i pīha’i iho i te hō’ē nūmera i te mau mana’o tā rātou i ’ite mai i roto i te pene, e tano nō te hō’ē ta’ata e ora ra i te mau mahana hope’a nei.
Ha’api’i i te ha’api’ira’a tumu
’Ua ’īriti Iesu Mesia i te mau tītiro o te buka.
-
Nō te tauturu i te mau pīahi ’ia hi’o haere i te buka ’e nā tāpa’o tītiro e hitu (hi’o Apokalupo 5:1), ’a fa’ata’a atu ē, e mea pinepine te mau pōtaro tahito i te tītirohia i te hō’ē tāpū vari ’araea ’aore rā i te hō’ē uēfa. E tāumihia te hō’ē tāpe’a rima ’aore rā te hō’ē tītiro i ni’a i te ’araea ’aore rā te uēfa nā mua ’oia ’a pa’ari ai, ’ei fa’a’itera’a i te mana o te ta’ata tei ha’amau i te pōtaro ’e nō te pāruru ’ia ’ore te ta’ata mana ’ore e ’īriti i te reira. I muri iho, ’ia fa’a’ite mai te mau pīahi i tō rātou mau mana’o ’aore rā te mea tā rātou i ’āehuehu ’a tai’o ai rātou nō ni’a i teie buka i roto i te Apokalupo 6 ; Te Ha’api’ira’a Tumu ’e te mau Fafaura’a 77:6–7 ; ’e te fanahora’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare. I tō ’outou mana’o, nō te aha e mea faufa’a ’ia ’ite i te aura’a o te tāpa’o mau o teie buka ? I tō ’outou mana’o, nō te aha e mea faufa’a ’ia ’ite ē, ’o te Fa’aora te ta’ata e ’īriti i te mau tītiro tāta’itahi o te buka ? (hi’o Apokalupo 5:1–9).
« ’Ua riro te mau bāsileia o teie nei ao ’ei mau bāsileia nō tō tātou Fatu ».
-
E riro te Apokalupo 7–11 ’ei mea fifi ’ia māramarama. Hō’ē ha’amaita’ira’a nō te hō’ē piha Ha’api’ira’a Sābati, ’o te tauturura’a ïa te mau pīahi i te tahi ’e te tahi ’ia māramarama i te mau pāpa’ira’a mo’a. E hāmani i te hō’ē tāpura nō te mau uira’a tā te mau pīahi e uiui nei nō ni’a i teie mau pene, ’e e ani ia rātou ’ia fa’a’ite mai i te mau mana’o te tahi i te tahi. ’A fa’aitoito i te mau pīahi ato’a—’o rātou e mana’o nei e mea ’ite pāpū a’e rātou ’e ’o rātou e mana’o nei ’aita rātou i ’ite rahi atu—’ia fa’a’ite mai i tō rātou mau mana’o nō ni’a i teie mau pene.
-
’A ha’amata i te hō’ē tāu’ara’a parau nā roto i te anira’a i te mau pīahi, e aha te mau tumu parau e ho’i pinepine mai nei tā rātou i ’ite i roto i te Apokalupo 7–11. ’Ia fa’a’ite mai rātou i te mau ’īrava i reira teie mau tumu parau e ’itehia ai ’e ’ia fa’ata’a mai nō te aha e mea faufa’a te mau tumu parau. Mai te mea e hina’aro rātou i te tauturu, e parau atu ia rātou e tai’o i te Apokalupo 11:15–17. E aha te mau tumu parau tā rātou i ’ite mai i roto i teie mau ’īrava, ’e e nāhea teie tumu parau i te fa’ahitihia i roto i te tahi atu mau ’īrava i roto i te Apokalupo 7–11 ? Noa atu ā tē fa’ata’a nei teie mau pene i te mau tama’i ’e te mau ’ati, e aha tā tātou e ’ite nei ’o tē hōro’a mai ia tātou i te tīa’ira’a ’e te ti’aturira’a ia Iesu Mesia ?
’Ua upo’oti’a tātou i ni’a ia Sātane « i te toto o te ’Ārenio, ’e i te parau tā [tātou] e fa’a’ite ra ».
-
E tauturu te ha’api’ira’a mai nō ni’a i te tama’i i te ra’i ia tātou ’ia māramarama maita’i atu ā i te orara’a i te fenua nei. E tai’o te mau pīahi i Te ’īritira’a a Iosepha Semita, Apokalupo 12:7–11 (i roto Parau hi’u Bibilia) ’e ’ia ’hi’o mai nāhea tātou ’ia upo’oti’a i ni’a ia Sātane ’e tāna nu’u. E aha te tahi atu mau mana’o i noa’a mai ia tātou nā roto mai i te mau fa’a’itera’a nō ni’a i te tama’i i te ra’i i roto i te Arata’i nō te pāpa’ira’a mo’a ’aore rā Te mau Parau Tumu o te ’evanelia ? (topics.ChurchofJesusChrist.org). E aha tā tātou e ’apo mai ’o te nehenehe e tauturu ia tātou ’ia upo’oti’a i ni’a i te ’enemi ?
-
’Ua fa’ata’ahia mai te tama’i i rotopū i te maita’i ’e te ’ino i roto i te Apokalupo 13–14. E aha tā te pene 13 e ha’api’i nei ia tātou nō ni’a i te ’arora’a a te teni i teie tama’i ? ’Ia au i te pene 14, nāhea tō te ’Ārenio ’arora’a i te reira ? E mea au paha ’ia hāmani i te hō’ē tāpura nō te mau rāve’a ’arora’a a te mau pae tāta’itahi i teie tama’i, mai te au i teie nā pene e piti. E aha te mau tū’atira’a ’e te mau ta’a-’ē-ra’a tā tātou e ’ite nei ?
-
E aha te aura’a ē, ’ua « taparahihia [te ’Ārenio] mai te mātāmua mai ā o teie nei ao » ? (Apokalupo 13:8 ; hi’o ato’a Apokalupo 5:6). ’A feruri i te tauturu i tā ’oe mau pīahi ’ia ’imi mai i te mau pāhonora’a i teie uira’a nā roto i te tai’ora’a i te Mosia 3:13 ’e Mose 7:47 ’ei piha ha’api’ira’a. E aha te aura’a o te parau ’ia upo’otia i ni’a ia Sātane « i te toto o te ’Ārenio » ? (Apokalupo 12:11).
« ’Ua ’ite atu ra vau i te hō’ē melahi … ma te ’evanelia e ti’a i te vaira’a ».
-
Tē parau nei te fa’anahora’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare ’ia ’apo mai nō ni’a i te mau melahi e rave rahi tei fa’aho’i-fa’ahou-hia mai « te ’evanelia e ti’a i te vaira’a i … te feiā e pārahi i ni’a i te ao nei » (Apokalupo 14:6). E ani i te mau pīahi ’ia fa’a’ite mai e aha tā rātou i ’apo mai. E aha tā Te Ha’api’ira’a Tumu ’e te mau Fafaura’a 133:36–40 e ha’api’i nei ia tātou nō ni’a i te Apokalupo 14:6–7 ? Nāhea tātou i te ’āmui atu i roto i te ’ohipa a te melahi tei fa’ahitihia i roto i te Apokalupo 14:6–7 ? E nehenehe ato’a e ha’amāta’ita’i i te video « The work of these last days » (ChurchofJesusChrist.org).
Ha’amaita’ira’a i tā tātou ha’api’ira’a
E mea maita’i ’ia parau ē « ’Aita vau i ’ite ». « E nātura ta’ata ’ia hina’aro i te pāhono i te mau uira’a ato’a, i te tahi rā mau taime e mea maita’i a’e ’ia parau noa atu ē, ’aita vau i ’ite. E tuatāpapa na tātou iho i taua uira’a ra i teie hepetoma, ’e e nehenehe tā tātou e ’āparau i te reira i te taime i mua nei’ » (Ha’api’ira’a mai tā te Fa’aora, 24). E ani i muri iho i te mau pīahi ’ia ’imi i te mau pāpa’ira’a mo’a ’e te tahi atu mau rāve’a tauturu a te ’Ēkālesia nō te mau pāhonora’a.