’ārenio e pārahi ra i ni’a i te ’aihere

4–10 nō Titema

Apokalupo 1-5

« Te hanahana, ’e te mana, ’e ’ei iāna … te ’Ārenio ’e a muri noa atu »

E tauturu te fāri’ira’a i te mau fa’a’itera’a pae vārua ia ’oe ’ia ’ite ē, tē hina’aro nei te Vārua Maita’i e ha’api’i ia ’oe. Tē fa’ata’a nei te pāpa’ira’a ’e te pe’era’a i taua mau fa’a’itera’a ra ē, tē ha’afaufa’a nei ’oe i te reira ’e tē hina’aro nei ’oe e fāri’i hau atu ā.

ītona fa’a’itera’a

Tītau i te mana’o

’A ha’amata ai ’oe i te hō’ē ’āparaura’a, e riro paha ’ei tauturura’a i te ani i te mau pīahi ’ia fa’a’ite mai i te tahi mau poro’i tā rātou i ’ite mai nō ni’a i te buka a Apokalupo i roto i tā rātou iho tai’ora’a ’aore rā te tai’ora’a a te ’utuāfare. ’Ei hi’ora’a, e aha tā rātou i ha’api’i mai nō ni’a i te fa’anahora’a a te Metua i te ao ra nō te fa’aora i tāna mau tamari’i ? E aha tā rātou i ha’api’i mai nō ni’a i te Fa’aora ’e tāna ’ohipa i roto i teie fa’anahora’a ? E fa’aitoito i te mau pīahi ’ia ’imi tāmau noa i te mau parau poro’i faufa’a rahi nō ni’a ia Iesu Mesia ’e te fa’anahora’a nō te fa’aorara’a, ’a tāmau noa ai rātou i te tai’o i te Apokalupo i te fare. E hōro’a ia rātou i te rāve’a i roto i te piha ha’api’ira’a i muri nei, ’ia fa’a’ite mai e aha tā rātou i ’ite mai.

ītona ha’api’ira’a

Ha’api’i i te ha’api’ira’a tumu

Apokalupo 1

’O Iesu Mesia te Tamaiti Ora a te Atua Ora.

• Tē fa’a’ite pāpū nei te hōho’a ’e te mau tāpa’o i roto i te Apokalupo 1 ē, tē ora nei Iesu Mesia ’e tē arata’i nei ’oia i tāna ’Ēkālesia. Penei a’e e nehenehe te mau pīahi e pāpa’i i ni’a i te tāpura ’ere’ere i te mau pereota nō roto mai i te Apokalupo 1, tei roto i te reira te mau hōho’a ’aore rā te mau tāpa’o ’e ’ia fa’a’ite mai e aha tā teie mau pereota tāta’itahi e ha’api’i nei ia rātou nō ni’a ia Iesu Mesia. ’Ei hi’ora’a, e aha tā ’outou i ’apo mai nā roto mai i teie mau tāpa’o nō ni’a i te huru te Mesia e arata’i ai i tāna ’Ēkālesia i teie mahana ? Nāhea te fa’ata’ara’a a Ioane nō te Fa’aora i te fa’aauhia i te hō’ē i roto i Te Ha’api’ira’a Tumu ’e te mau Fafaura’a 110:1–4 ?

Apokalupo 2–3

’Ua ’ite maita’i Iesu Mesia ia tātou tāta’itahi ’e e tauturu mai ’oia ia tātou ’ia upo’oti’a i ni’a i tā tātou mau tāmatara’a.

• E tauturu te tai’ora’a i te mau parau poro’i a te Fatu i te mau ’āma’a rau o te ’Ēkālesia i roto i te Apokalupo 2–3 ’ia ha’apāpū i te pīahi ē, ’ua ’ite maita’i te Fa’aora ia rātou. Penei a’e e ani ia rātou ’ia hi’o i teie mau pene nō te ’imi mai i te fa’a’itera’a ē, ’ua ’ite maita’i Iesu Mesia i te mau tāmatara’a ’e te mau pūai o te ’āma’a tāta’itahi. ’Ia fa’a’ite ato’a mai rātou i te mau ’ohipa tei tupu ’a fāri’i ai rātou ē, ’ua ’ite maita’i te Fa’aora i tō rātou huru orara’a ta’a ’ē. E aha te a’o tā te Fatu i hōro’a atu i te feiā mo’a ’o te nehenehe ato’a e tauturu ia tātou ’ia upo’oti’a i ni’a i tō tātou mau ’arora’a ?

• I roto i teie ā mau pene, ’ua rave te Fatu i te mau fafaura’a maita’i nō te feiā e upo’oti’a nei. E ani i te mau pīahi ’ia ha’a ’ei pea nō te tuatāpapa i te Apokalupo 2–3 ’ia ’itehia mai te mau fafaura’a a te Fatu. Penei a’e e nehenehe rātou e nīno’a i te mau hōho’a o te tahi o teie mau fafaura’a, ’e ’ia fa’a’ite atu i te mau pīahi te mea tā rātou i ’ite mai. Nāhea teie mau fafaura’a i te fa’auru ia rātou, ’ia tāmau noa i te tūtava ’ia upo’oti’a i ni’a i tō rātou iho mau tāmatara’a ’e tō rātou iho mau paruparu ?

Apokalupo 5

’O Iesu Mesia ana’e tē nehenehe e rave fa’aoti i te fa’anahora’a a te Metua i te ao ra.

• E tauturu te hō’ē ha’api’ira’a tao’a i tā ’oe mau pīahi ’ia hāro’aro’a i te mau tāpa’o i roto i te Apokalupo 5 nō ni’a i te ’īritira’a te Fa’aora i te buka tei tītirohia ? ’A ’āfa’i mai i te tahi mā’a ’amu’amu i roto i te hō’ē ’āfata tei pōnaohia nō te ’ōpere nā te piha ha’api’ira’a. Hou te ha’api’ira’a, ’a hōro’a huna noa i te hō’ē pīahi, te tāviri nō te pōnao. ’A fa’ata’a atu i te mau pīahi e aha tō roto i te ’āfata, ’e ’a fa’ati’a i te mau pīahi e tāmata i te tātara i te ’āfata, hou te ta’ata e mau ra i te tāviri ’a ’īriti ai i te reira. I muri iho ’ia fa’aau i te mau pīahi i teie ha’api’ira’a tao’a i te Apokalupo 5. E tauturu teie mau huru uira’a : Nāhea i riro ai te fa’aorara’a o te mau tamari’i a te Atua mai te ’āfata tei pōnaohia ’aore te buka tei tītirohia ? Nō te aha ’o Iesu Mesia ana’e te nehenehe e ’īriti i te mau tītiro ? (hi’o i te fa’ahitira’a parau i roto « Te tahi atu ā mau mātēria tauturu »).

• Mai te nūna’a e ’oa’oa ra tei fa’ahitihia i roto i te Apokalupo 5, i teie mahana te fa’ateitei ato’a nei tātou i tō tātou reo nō te fa’ahanahana i te Fa’aora, mai te hō’ē ta’ata ti’a mā nō te hōro’a mai ia tātou te fa’aorara’a. E nehenehe paha ïa te mau pīahi e hīmene ’āmui i te hō’ē hīmene ’āruera’a au-roa-hia nō ni’a i te Fa’aora, mai te « E ’ārue tātou nei » (Te mau Hīmene, N°39). ’Ia hi’o mai te mau pīahi i te mau parau mau tā te hīmene e ha’api’i nei nō ni’a ia Iesu Mesia. E aha te hō’ē ā mau mea tā tātou e ’ite nei i rotopū i te mau pōro’i o tā tātou mau hīmene ’āruera’a ’e te mau fa’ahitira’a parau i roto i te Apokalupo 5:9–14 ?

’ītona mātēria tauturu

Te tahi atu ā mau mātēria tauturu

’O Iesu Mesia ana’e te nehenehe e fa’a’ora ia tātou.

Nō ni’a i te mau tupura’a ’ohipa i roto i te orara’a hou te tāhuti nei, ’ua ha’api’i Elder Jeffrey R. Holland :

« ’Ua pūpū te Mesia iāna iho nō te fa’atura i te ti’amāra’a mōrare o te ta’ata ato’a e tae noa atu i tōna ’aufaura’a i tā rātou mau hara. Nā roto i teie nei ravera’a, e ho’i ïa ’oia i te Metua ra o te mau hanahana ato’a nō taua huru aroha fa’aora ra.

« ’Ua ti’a teie nei tāra’ehara hope’a ’ore a te Mesia nō te mea (1) ’o ’oia ana’e te ta’ata hara ’ore tei ora i ni’a i teie nei fenua ’e nō reira ’aita ’oia i vai i raro a’e i te pohe vārua tei tupu nā roto mai i te hara, (2) ’o ’oia te Fānau Tahi a te Metua ’e nō reira ’ua mau ’oia i te mau tāpa’o nō te atuara’a tei hōro’a iāna te mana i ni’a i te pohe tino, ’e (3) e au ra ’o ’oia ana’e te ta’ata tei nava’i i te ha’eha’a ’e tei hina’aro mau i roto i te ’āpo’ora’a, hou teie nei orara’a tāhuti, ’ia fa’atōro’ahia nō taua tāvinira’a ra » (« Te tāra’ehara a Iesu Mesia », Liahona, Māti 2008, 35).

Ha’amaita’ira’a i tā tātou ha’api’ira’a

Fa’a’ohipa i te mau pāpa’ira’a mo’a ’e i te mau parau a te mau peropheta o te mau mahana hope’a nei. ’Ua fa’aue te Fatu ia tātou ’ia « ha’api’i atu te tahi i te tahi ra i te ha’api’ira’a ’evanelia nō te bāsileia » [Te Ha’api’ira’a Tumu ’e te mau Fafaura’a 88:77] ’e ’ia fa’a’ohipa i te mau pāpa’ira’a mo’a nō te « ha’api’i i te mau parau tumu nō [tāna] ’evanelia » [Te Ha’api’ira’a Tumu ’e te mau Fafaura’a 42:12]. Te mau pāpa’ira’a mo’a ’e te mau parau a te mau peropheta ’e a te mau ’āpōsetolo o teie mau mahana hope’a nei, ’o te puna ïa nō te mau parau mau tā tātou e ha’api’i nei » (Ha’api’ira’a mai tā te Fa’a’ora, 21).