Te ’Ārenio iti, nā Jenedy Paige

18–24 nō Titema

Noera

« E parau maita’i ’o te riro ’ei ’oa’oara’a rahi »

E mea pūai pae vārua te mau ’āparaura’a nō ni’a i te ’evanelia, ’ia fa’atumu-ana’e-hia te reira i ni’a ia Iesu Mesia. ’A tuatāpapa ai ’outou i te fānaura’a ’e te misiōni a Iesu Mesia i teie hepetoma, ’a ’imi i te fa’aurura’a a te Vārua Maita’i ’ia ’ite e nāhea ’ia fa’atumu maita’i i tā ’outou ’āparaura’a pīha i ni’a i te Fa’aora.

Tītau i te mana’o

E ani i te mau pīahi ’ia fa’a’ite mai i te mea tā rātou e rave ra ’aore rā tā rātou i rave nā mua atu ’ei ta’ata hō’ē ’aore rā ’ei ’utuāfare nō te fa’ahanahana i te fānaura’a o te Fa’aora nā roto i te mau rāve’a ’o te ha’afātata atu ia rātou iāna.

Ha’api’i i te ha’api’ira’a tumu

Mataio 1:18-25 ; Luka 1:26-38 ; 2:1-20

’Ua fa’aha’eha’a Iesu Mesia iāna iho ’ia fānauhia i ni’a i te fenua nei.

• Te Noera o te hō’ē ïa taime maita’i nō te feruri ’e nō te fa’ahanahana i te aroha o te Mesia—Tōna hina’a’ro ’ia vaiiho i te « mau aorai teitei o tōna ra Metua, ’ia ora te ta’ata, ’ia pohe nō te ta’ata » (« ’Ua ’āmui fa’ahou tātou nei », Te mau Hīmene, N°103). Nō te fa’auru i te hō’ē ’āparaura’a nō ni’a i teie tumu parau, e ani i te mau pīahi e aha tā rātou i ’apo mai i roto i tā rātou iho ’aore rā tā te ’utuāfare tuatāpapara’a i teie hepetoma nō ni’a ia Iesu Mesia hou ’oia ’a fānauhia mai ai (hi’o Ioane 17:5 ; Mosia 7:27 ; Te Ha’api’ira’a Tumu ’e te mau Fafaura’a 76:12–14, 20–24 ; Mose 4:2). I muri iho ’a fa’a’ite atu i te hōho’a i roto i te fa’anahora’a nō teie hepetoma i roto i te Mai pe’e mai—nō te ta’ata hō’ē ’e te ’utuāfare ’a tai’o ai te mau pīahi nō ni’a i te fānaura’a o te Fa’aora (hi’o Mataio 1:18–25 ; Luka 1:26–38 ; 2:1–20). E fa’aitoito ia rātou ’ia fa’a’ite mai i tō rātou mana’o ’e tō rātou mau ’āehuehu ’a fa’aau ai rātou i te hanahana mātāmua o te Fa’aora i tōna fānaura’a ha’eha’a.

• E riro te hō’ē uira’a mai tā te melahi i ui ia Nephi i roto i te 1 Nephi 11:16 ’ei rāve’a maita’i nō te ha’amata i te hō’ē ’āparaura’a i roto i te piha ha’api’ira’a, noa atu e taui ri’i ’oe i te mau parau. Penei a’e e nehenehe ’oe e pāpa’i i ni’a i te tāpura ’ere’ere E aha ïa te aroha mau o te Atua ? ’e e ani i te mau pīahi ’ia feruri i teie uira’a ’a tai’o ai rātou i te 1 Nephi 11:17–33. E ani ia rātou ’ia fa’a’ite mai i te mau mana’o ato’a nō ni’a i te Fa’aora tā teie mau ’īrava e fa’auru nei. E aha ïa te mau hōho’a tā ’oe e fa’a’ite atu i te mau pīahi ’o tē fa’ata’a nei i te tupura’a o te orara’a o te Fa’aora tā Nephi i hōhora mai ? E nehenehe ato’a te mau pīahi e feruri i te aroha mau o te Fa’aora, ’a māta’ita’i ai rātou i te video nō ni’a i tōna fānaura’a, mai te « A Gift to the World [Hō’ē hōro’a i tō te ao nei] », « The Nativity [Te fānaura’a] », ’aore rā « He Is the Gift [’O ’oia te hōro’a] » (ChurchofJesusChrist.org).

• ’Ua riro te pehe ’ei rāve’a fa’ahiahia nō te tītau i te Vārua i roto i tā ’oe piha ha’api’ira’a. ’A feruri e ani i te hō’ē ta’ata ’ia hi’o mai i te hō’ē hīmene Noela, ’aore rā e tai’o ’aore rā e hīmene ’āmui i te tahi mau hīmene ’ei piha ha’api’ira’a (hi’o Te mau Hīmene, N°118–128). ’Ia hi’o mai te mau pīahi i te mau pereota i roto i teie mau hīmene ’e te mau pāpa’ira’a mo’a tei tāpurahia ’e te mau hīmene ’o te fa’arahi i tō rātou māuruuru nō te Fa’aora ’e tōna hina’aro ’ia haere mai i ni’a i te fenua nei.

Getesemane, nā J. Kirk Richards

Luka 4:16–21 ; Ioane 3:16

’Ua rave fa’aoti Iesu Mesia i tāna misiōni, ’ia nehenehe tātou e fāri’i i te ora mure ’ore.

• Nō te tauturu i te mau pīahi ’ia tāu’aparau i te mau tumu i fānauhia mai ai Iesu Mesia, e ani ia rātou ’ia hi’o mai ’e ’ia fa’a’ite mai i te mau pāpa’ira’a mo’a ’o te pū’ohu i tāna misiōni (hi’o te fa’anahora’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare nō te tahi mau hi’ora’a). Penei a’e e nehenehe te mau pīahi e ’imi mai ’e e tai’o i te mau ’īrava ’ei pea ’aore rā ’ei pupu na’ina’i. E aha tā rātou i ha’api’i mai nō ni’a i te misiōni a te Mesia nā roto mai i te mau ’īrava tā rātou i ’ite mai ? E aha tā tātou e ha’api’i mai nō ni’a i tāna misiōni nā roto mai i te tahi o te mau upo’o parau tei hōro’ahia nōna i roto i te mau pāpa’ira’a mo’a ? (hi’o Aratai nō te pāpa’ira’a mo’a, « Mesia, te mau i’oa o »).

• E ha’api’i mai te mau pīahi nō ni’a i te misiōni a te Fa’aora nā roto i te tai’ora’a i « Te Mesia Ora : Te ’Itera’a Pāpū o te mau ’Āpōsetolo » (ChurchofJesusChrist.org) ’e te fa’a’itera’a mai i te mau fa’ahitira’a parau tā rātou i ’ite mai, ’o tē fa’ata’a nei nō te aha ’oia i haere mai ai i ni’a i te fenua nei. ’A hōro’a te taime i te mau pīahi ’ia feruri i ni’a i tō rātou ’itera’a pāpū nō ni’a ia Iesu Mesia ’e tāna misiōni. E hina’aro ānei rātou e fa’a’ite mai i te tahi mau ’ohipa tei tupu ia rātou ’aore rā te mau ’ā’amu nō te orara’a o te Fa’aora, tei fa’arahi i tō rātou fa’aro’o ’aore rā tō rātou here nōna ? Nāhea te tuatāpapara’a i te Faufa’a ’Āpī i teie matahiti i te hōro’a mai i te hō’ē tau Noera faufa’a rahi atu ā ? Nō te hi’o fa’ahou i te tahi o te mau ’ā’amu o te Faufa’a ’Āpī tā te mau pīahi i ha’api’i mai i teie matahiti, ’a fa’a’ite atu i te mau video « For God So Loved the World [I aroha mai te Atua i tō te ao] » ’aore rā « To This End Was I Born [Te tumu vau i fānauhia ai] » (ChurchofJesusChrist.org).

Ha’amaita’ira’a i tā tātou ha’api’ira’a

’A fa’ata’a i te taime nō te mau pīahi ’ia fa’a’ite mai. « ’Ia fa’a’ite ana’e mai te mau pīahi i te mea tā rātou i ha’api’i mai, e’ita ïa rātou e putapū noa i te Vārua ’e e ha’apūai noa i tō rātou iho ’itera’a pāpū, e fa’aitoito ato’a rā rātou i te tahi atu mau melo o te piha ha’api’ira’a ’ia ’ite i te mau parau mau nō rātou iho. … ’A fa’ata’a i te taime nō te mau pīahi ’ia fa’a’ite mai i tō rātou mana’o i roto i te mau ha’api’ira’a ato’a—i te tahi mau taime e ’ite paha ’outou ē, teie mau ’āparaura’a ’o te ha’api’ira’a ïa » (Ha’api’ira’a mai tā te Fa’aora, 30).