’utuāfare e hi’o ra i te mau hōho’a

2–8 nō ’Ātopa

Ephesia

« ’Ei fa’aau i te feiā mo’a i te ’ohipa ra »

E tae mai te mau mana’o ’e te mau fa’a’itera’a nō ni’a e aha ’e nāhea ’ia ha’api’i, ’a tuatāpapa ai ’oe ma te pure i te Ephesia, te mau a’ora’a nō te ’āmuira’a rahi tei tupu iho nei, teie fa’anahora’a, ’e te Mai, pe’e mai—nō te ta’ata hō’ē ’e te ’utuāfare.

ītona fa’a’itera’a

Tītau i te mana’o

’A feruri i te ani i te mau pīahi ’ia pāpa’i i ni’a i te tāpura ’ere’ere i te hō’ē ha’apotora’a parau nō te hō’ē mea tā rātou i ha’api’i mai i roto i tā rātou tuatāpapara’a i teie hepetoma. ’A mā’iti haere i te tahi mau ha’apotora’a, ’e e ani i te mau pīahi tei pāpa’i i te reira ’ia fa’a’ite mai i tō rātou mau mana’o.

ītona ha’api’ira’a

Ha’api’i i te ha’api’ira’a tumu

Ephesia 2:19–22 ; 4:4–8, 11–16

Nā te mau peropheta ’e te mau ’āpōsetolo—’e tātou pā’āto’a—e ha’apūai ’e e tāhō’ē i te ’Ēkālesia.

• E nehenehe ’oe ’e te mau pīahi e patu ’āmui i te tahi mea nō te fa’ahōho’a e nāhea te ’Ēkālesia i te « pātura’ahia i ni’a iho i te niu o te mau ’āpōsetolo ’e te mau peropheta » ’e e nāhea te Fa’aora e riro ai ’ei « tihi rahi » ? (Ephesia 2:20). Penei a’e e nehenehe te mau pīahi e tāpa’o i te mau ’ōfa’i ’aore rā i te mau ’āu’a parau ’e e ha’aputu i te reira nō te hāmani i te hō’ē patu ’aore rā te pīrāmī, ’e ’o Iesu Mesia ’e te mau ’āpōsetolo ’e te mau peropheta te niu. I muri iho e fa’a’ite’ite atu ’oe, e aha te ’ohipa e tupu mai te mea e ’īriti-’ē-hia atu te Mesia ’aore rā te mau ’āpōsetolo ’e te mau peropheta. Nō te aha te tihi rahi i riro ai ’ei fa’ahōho’ara’a maita’i nō Iesu Mesia ’e tōna ti’ara’a i roto i te ’Ēkālesia ? (Nō te hō’ē fa’ata’ara’a o te hō’ē tihi rahi, hi’o « Te tahi atu ā mau mātēria tauturu ».) E ’imi mai te mau pīahi i roto i te Ephesia 2:19–22 ; 4:11–16 i te mau ha’amaita’ira’a tā tātou e fāri’i māoti te mau ’āpōsetolo, te mau peropheta, ’e te tahi atu mau ta’ata fa’atere o te ’Ēkālesia. E aha tā tātou e nehenehe e rave nō te patu i tō tātou orara’a i ni’a i tā rātou mau ha’api’ira’a ?

’ōfa’i tihi o te hō’ē fare

’O Iesu Mesia te tihi rahi o te ’Ēkālesia.

• Mai te mea ’ua fa’aro’o tā ’oe mau pīahi i te ’āmuira’a rahi mai te taime hope’a ’a fārerei ai ’outou, e ani ia rātou ’ia fa’a’ite mai ē nāhea te mau mea i ha’api’ihia i roto i te ’āmuira’a i te tauturura’a ’ia fa’aoti i te mau fā tei fa’ahitihia i roto i te Ephesia 4:11–16

• Penei a’e e hōro’a i te taime i te mau pīahi ’ia tāpura mai i te tahi o te mau « ’ohipa » ’aore rā mau hōpoi’a tā tātou e vai ra i roto i te ’Ēkālesia a te Mesia (hi’o Ephesia 4:1)—’ei hi’ora’a, e taea’e ’aore rā e tuahine aupuru, e metua parauti’a, e pipi nā te Mesia, ’e te tahi atu ā. I muri iho e taui haere rātou i te mau tāpura ’e te tahi atu pīahi, e tai’o i te Ephesia 4:4–8, 11–16, ’e ’ia fa’a’ite mai nāhea te mau pi’ira’a ’e te mau ’ohipa i ni’a i tā rātou mau tāpura e tauturu ai i te ha’amaita’i i te tino o te Mesia. Nāhea tātou i te ha’a ’āmui nō te riro ’ei hō’ē i raro a’e i te « hō’ē Fatu, hō’ē fa’aro’o, hō’ē bāpetizo » ?

Ephesia 5:25–6:4

E nehenehe te pe’era’a i te hi’ora’a o te Fa’aora e ha’apa’ari i te mau aura’a ’utuāfare.

• Nō te tauturu i te mau pīahi ’ia fa’a’ohipa i te parau a’o a Paulo nō ni’a i te mau aura’a ’utuāfare, ’a pāpa’i i teie mau uira’a i muri nei i ni’a i te tāpura ’ere’ere : Nāhea tātou i te pe’e i te hi’ora’a o te Fa’aora ’ia au i tā tātou huru ravera’a i te mau melo o tō tātou ’utuāfare ? (hi’o Ephesia 5:25).). E aha te aura a nō ’outou e « fa’atura atu i tō metua tāne ’e tō metua vahine » ? (Ephesia 6:1–3). Nāhea tātou i te aupuru i te mau tamari’i i roto i « te pa’ari ma te a’o a te Fatu ra» ? (Ephesia 6:4). E nehenehe te mau pīahi e ’āparau i teie mau uira’a, ’ei pupu ’aore rā ’ei piha ha’api’ira’a, ’a tai’o ai rātou i te mau pāpa’ira’a mo’a e tū’ati atu. E ani i te mau pīahi ’ia fa’a’ite mai i te mau hi’ora’a tā rātou i ’ite nō ni’a i te mau ta’ata e ora ra nā roto i te mau rāve’a tā Paulo i fa’ata’a mai.

Ephesia 6:10–18

E taututu te ha’ana tama’i a te Atua ’ia pāruru ia tātou i te ’ino.

• E aha te mea e tūra’i i te mau pīahi e tūtava ’ia ’ahuhia i te tā’āto’ara’a o te ha’ana tama’i a te Atua i te mau mahana ato’a ? E fa’aineine i te hō’ē ’ātivite i reira te mau pīahi e fa’atano ai i te mau tufa’a o te ha’ana i te mau parau tumu ’aore rā te mau viretu tā te reira e fa’ahōho’a nei, mai tei fa’ata’ahia i roto te Ephesia 6:14–17. Nāhea te tufa’a tāta’itahi o te ha’ana tama’i e tauturu ai i te pāruru ia tātou i te ’ino ? (Nō te tahi tauturu, hi’o « Te tahi atu ā mau mātēria tauturu ».) Nāhea tātou ’ia ’ō’omo i teie ha’ana tama’i ? E aha tā tātou e rave nō te ’ite ’e nō te ha’apa’ari i te mau paruparu o tō tātou ha’ana ?

’ītona mātēria tauturu

Te tahi atu ā mau mātēria tauturu

E aha te hō’ē tihi rahi ?

Te tihi rahi ’o te ’ōfa’i mātāmua ïa tei tu’uhia i roto i te hō’ē niu. E riro te reira ’ei hō’ē tāpa’o fa’a’ite nō te fāitora’a ’e te tu’ura’a i te tahi atu mau ’ōfa’i, ’o te ti’a i te pāna’ihia atu i ni’a i te tihi rahi. Nō te mea ho’i tei ni’a i te reira te teiahara’a o te toe’a o te fare, e ti’a ïa i te tihi rahi ’ia pa’ari maita’i, ’ia pāpū, ’e ’ia ti’aturihia (hi’o « The Cornerstone », Ensign,Tēnuare 2016, 74–75).

Te ha’ana tama’i a te Atua

Tātuahia te mau tau’upu i te parau mau :Teie tufa’a o te ha’ana tama’i mai te hātua ïa i tātuahia i te ’ari’arira’a tino. Te aura’a o te tā’o tātuahia ’o tei ha’apūaihia ïa, ha’apa’arihia, ’aore rā ha’apāutuutuhia.

Te pāruru ’ōuma nō te parauti’a :E pāruru te hō’ē tāpo’i ’ōuma i te māfatu ’e te tahi atu mau tufa’a faufa’a o te tino.

Tīa’ahia te ’āvae i te fa’aineinera’a nō te ’evanelia o te hau ra :E fa’ahiti ra te reira i te ’ahu pāruru i te ’āvae o te hō’ē fa’ehau.

Te pāruru nō te fa’aro’o :E nehenehe te hō’ē pāruru e pāruru fātata i te mau tufa’a ato’a o te tino i te mau ’arora’a huru rau.

Te tāupo’o pāruru o te ora :E pāruru te fa’a’upo’o i te upo’o.

Te ’o’e a te Vārua :E fa’ati’a te hō’ē ’o’e e ’ia ’aro atu tātou i te ’enemi.

Ha’amaita’ira’a i tā tātou ha’api’ira’a

Tūtava i te here mai te Mesia ra. E ti’a i tō ’outou mau aura’a ’e te mau pīahi ’ia fa’aitoitohia e te here. E ha’amaita’ihia ïa ’outou ’e tā ’outou mau pīahi ’ia pure ana’e ’outou nō te fa’atupu i te aroha mai tō te Mesia ’e ’ia ’imi i te mau rāve’a ’ia fa’a’ite atu i te reira (hi’o Ha’api’ira’a mai tā te Fa’aora, 6 ; Moroni 7:48).