Jisas Kraes

11–17 Septemba

Seken Korin 1–7

Yufala I Stretem Yufala Wetem God

?Taem yu rid long Seken Korin 1–7 long wik ia, tingbaot wanwan memba blong klas—olgeta we oli kam long klas mo olgeta we oli no kam. ?Olsem wanem nao ol prinsipol long japta ia i blesem laef blong olgeta?

serem pikja aekon

Invaetem Ol Memba blong Serem Wanem Oli Gat

Ol memba blong klas oli save harem ol aedia long wanwan long olgeta abaot olsem wanem oli save mekem skripja stadi blong olgeta i kam moa gud. Givim smol taem blong oli mekem hemia samsam taem.

tijing aekon

Stap Tijim Doktrin

2 Korin 1:3–7; 4:6–10, 17–18; 7:4–7

Ol hadtaem blong yumi oli save stap olsem ol blesing blong yumi.

• Ol eksperiens we Pol i tokbaot mo ol kaonsel we i bin givim long 2 Korin i save helpem ol memba blong klas blong tingbaot ol blesing we i save kam long olgeta tru long ol hadtaem blong olgeta. Blong statem wan toktok raon, yu maet askem ol memba blong klas blong oli rere bifo oli kam blong save tokbaot olsem wanem wan hadtaem i blesem laef blong olgeta o wanem nao oli lanem aot long ol nara pipol we oli fesem hadtaem mo oli stanap strong. Afta yu save givim sam taem long ol memba blong klas blong oli save luklukbak long 2 Korin 1:3–7; 4:6–10, 17–18; mo 7:4–7, lukaotem wanem Pol i bin tijim abaot stamba tingting blong ol blesing mo ol hadtaem. Askem ol memba blong klas blong serem wanem oli faenem. Yu save givim tingting long olgeta se bae oli ridim laod ol ves we oli faenem we i tokbaot tijing ia mo afta serem wan eksperiens o testemoni we i go wetem tijing ia.

• Blong ademap long storian blong yufala, tingting blong singsing tugeta ol fevret hym blong ol memba blong klas we i testifae long kamfot mo blesing we Papa long Heven mo Sevya i givim long yumi long taem blong hadtaem—olsem “Tijing Blong Jisas Oli Stamba blong Yumi” (Singsing Tabu Mo Singsing Blong Ol Pikinini, namba 6). Afta we yufala i singsing tugeta, yu save invaetem ol memba blong klas blong lukaotem wan sentens long 2 Korin 1 mo 4 we oli filim se i go wetem mesej blong hym.

2 Korin 2:5–11

Fogivnes i wan blesing we i gat tugeta saed yumi givim mo yumi kasem.

• Yumi evriwan i gat ol eksperiens taem wan i bin “mekem nogud” long yumi o long famli blong yumi (ves 5). Maet ol memba blong klas oli save lukaotem long 2 Korin 2:5–11, mo faenemaot kaonsel blong Pol abaot olsem wanem yumi save tritim wan we i mekem yumi stap harem nogud. Tingting blong invaetem ol memba blong klas blong luklukbak long Matiu 5:43–48 mo Luk 15:11–32 blong lanem moa abaot olsem wanem yumi save tritim olgeta we oli mekem nogud long yumi. ?Olsem wanem nao yumi mekem i nogud long yumiwan mo long ol narawan taem yumi jusum blong no save fogiv?

2 Korin 5:14–21

Tru long Atonmen blong Jisas Kraes, yumi save stretem yumi wetem God.

• Plante pipol oli kam long jos wetem wan strong tingting long hat blong filim se oli kam moa kolosap long God, mo wan storian blong 2 Korin 5:14–21 i save helpem olgeta. Blong statem storian ia, ol memba blong klas oli save toktok raon blong faenemaot wanem mining blong Inglis toktok ia reconcile, blong statem, oli save lukaotem toktok ia long diksonari. ?Wanem ol niu tingting we hemia i givim blong helpem yumi andastanem abaot, blong stretem yumi wetem God? ?Wanem sam moa niu tingting we yumi kasem long toktok ia “Atonement” insaed long Bible Dictionary? ?Olsem wanem nao ol tingting ia oli helpem yumi andastanem 2 Korin 5:14–21? Maet yu wantem blong invaetem ol memba blong klas blong serem ol filing blong olgeta abaot Sevya, we Atonmen blong Hem i mekem i posibol blong yumi kam yunaet wetem God.

2 Korin 7:8–11

Taem man i harem nogud mo i luk long God i lidim hem i go long fasin blong sakem sin.

• 2 Korin 7:8–11 i givim wan eksplenesen blong taem man i harem nogud mo i luk long God mo wok blong hem long fasin blong sakem sin. ?Wanem yumi lanem long fasin ia blong harem nogud mo luk long God we i stap long 2 Korin 7:8–11 mo tu long ol toktok blong Presiden Dieter F. Uchtdorf we i stap long “Sam Moa Risos”? ?From wanem taem man i harem nogud, i gud blong hem i luk long God, blong mekem se i save sakem sin?

• Maet yu save filim gud blong yufala i save toktok moa long saed blong fasin blong sakem sin. Sapos i tru, yu save traem samting olsem: Raetem long bod Fasin blong sakem sin hem i . Askem ol memba blong klas blong yusum wanem oli lanem aot long 2 Korin 7:8–11, blong finisim sentens we i stap ia mo oli save yusum tu wanem oli save faenem long ol skripja mo ol nara risos we i stap long Gospel Topics article “Repentance” (topics.ChurchofJesusChrist.org). ?Olsem wanem nao yumi save yusum ol tijing blong save helpem sam man i andastanem olsem wanem blong sakem sin wetem tru hat?

risos pikja bokis

Sam Moa Risos

Taem man i harem nogud mo i luk long God, i givim hop mo i mekem man i wantem jenis.

Presiden Dieter F. Uchtdorf i eksplenem:

“Taem yumi harem nogud mo luk long God hemia i givim hop mo i mekem yumi wantem jenis tru long Atonmen blong Jisas Kraes. Taem yumi harem nogud mo i luk long wol i pulum yumi go daon, i kilimded hop, mo i lidim yumi go moa long temtesen.

“Taem yumi harem nogud mo i luk long God i lid yumi i go long fasin blong konvet mo wan jenis blong hat. I mekem yumi no laekem sin mo lavem ol samting we oli gud. I leftemap tingting blong yumi blong stanap mo wokbaot long laet blong lav blong Kraes. Tru fasin blong sakem sin i abaot fasin blong jenis, i no fasin blong givim panis” (“You Can Do It Now!,” Liahona, Nov. 2013, 56).

Stap Kam Antap long Fasin blong Yumi blong Stap Tij

Yusum olgeta we oli stap traehad. Samtaem, ol memba blong klas we oli stap traehad, oli nid blong yumi yusum olgeta blong oli filim se yumi lavem olgeta. Tingting blong askem olgeta blong tekpat long wan lesen we bae i kam. No givap sapos oli no mekem eni samting afta long ol traehad we yu bin mekem fastaem. (Luk long Teaching in the Savior’s Way, 8–9.)