sakramen miting

28 Ogis–3 Septemba

Fas Korin 8–13

“Yufala I Bodi blong Kraes”

Elda Richard G. Scott i bin tijim se “yumi save lego daereksen blong Spirit we i gud tumas, we i blong yumiwan, i go stap nating nomo sapos yumi no raetemdaon mo mekem folem fasfala kwaet toktok we i kam long yumi” (“To Acquire Spiritual Guidance,” Liahona, Nov. 2009, 8).

serem pikja aekon

Invaetem Ol Memba blong Serem Wanem Oli Gat

Long Fas Korin 8–13, Pol i bin tijim trutok blong gospel wetem ol pikja toktok, olsem wan man we i stap long wan resis, bodi blong man, mo “bigfala tamtam we i stap krae nomo” (luk long Fas Korin 9:24–25; 12:13–26; 13:1). Maet yu save askem ol memba blong klas wanem nao oli lanem aot long ol samting ia we oli stap komperem. ?Olsem ol samting ia we oli stap komperem i helpem yumi blong andastanem ol trutok blong gospel?

tijing aekon

Stap Tijim Doktrin

Fas Korin 10:1-13

God i givim wan rod blong stap ronwe long temtesen.

• ?Olsem wanem yu save helpem ol memba blong klas blong faenemaot ol trutok we oli gat paoa, insaed long Fas Korin 10:13? Wan aedia i blong serem ves ia long ol sot sentens, mo givim wanwan sot sentens ia long wanwan defren memba blong klas, mo askem ol memba blong klas blong talembak sentens ia long toktok blong olgetawan. Eksampol: ?Wanem i wan nara wei blong talem se “God i fetful,” o “kasem temtesen i bitim paoa we yu yu gat? Afta, yu save ridimbak ves ia, mo yusum sam long ol toktok we oli kam long ol memba blong klas. Ol memba blong klas oli save serem eksperiens blong olgeta, we insaed long olgeta, oli bin faenem se ol promes insaed long ves ia i tru. ?Wanem moa niu tingting nao yumi save kasem aot long ol ves ia long Alma 13:27–28?

• Bae yu no stap tokbaot ol spesifik temtesen blong wan man o woman, be yu wantem blong mekem storian i lukluk nomo long Fas Korin 10:13 long saed blong ol temtesen we, folem toktok blong Pol: “Ol samting ya we oli stap traem yumi, oli semmak nomo long ol samting we oli stap traem ol narafala man” Ol memba blong klas oli save stat blong faenemaot ol temtesen we Pol i stap givim woning agensem, we i stap long ves 1–12. Maet bae oli save givim sam eksampol blong ol temtesen we evriwan i stap fesem tedei, olsem ol temtesen ia blong no stap ones, stap tokbaot man, o jajem ol nara man. ?Olsem wanem wan man i save ronwe long ol temtesen olsem ia wetem help blong God?

Fas Korin 10:16–17; 11:23–30

Sakramen i karem yumi kam wan olsem ol memba blong Jos ia blong Kraes.

• Ol ves ia oli save givim insperesen blong holem wan storian raon long wei we sakramen i save mekem wod blong yu i kam wan long ol hadwok blong kam moa olsem Sevya. Maet blong stat, yu save ridim Fas Korin 10:16–17 mo lukluk tru long wanem nao, toktok ia komunion, long situesen ia, i minim (wan i save lukaotem mining blong toktok ia long diksonari). ?Olsem wanem nao, blong stap tekem mo kakae sakramen tugeta, i helpem yumi filim se yumi yunaet moa? ?Olsem wanem nao kaonsel blong Pol, blong wan “i mas luklukgud long laef blong hem fastaem,” i go wetem gol ia? (Fas Korin 11:28).

Fas Korin 12

Ol presen long saed blong spirit, oli givim blong gud blong evri pikinini blong Papa long Heven.

• Blong helpem ol memba blong klas blong luk sam eksampol blong, olsem wanem nao, blong stap developem ol presen blong olgeta long saed blong spirit, i save mekem Jos i kam antap, tingting blong invaetem olgeta blong tingting long sam pipol insaed long skripja, we oli bin gat ol presen long saed blong spirit. Blong gat sam aedia, yu save givim wok long olgeta blong lukaotem wan skripja long “Sam Moa Risos” mo givim nem blong presen blong spirit ia we oli ting se man o woman ia i gat. Mo tu, oli save tokbaot ol presen blong spirit we oli luk long wanwan long olgeta. ?Olsem wanem nao ol presen blong spirit blong ol pipol ia, oli wan blesing long yumi evriwan? ?Olsem wanem nao yumi save yusum presen blong spirit blong blesem ol narawan, mo sapotem bodi blong Kraes, o Jos? (luk long Fas Korin 12:12–31; luk tu long Fas Korin 14:12).

• Blong helpem ol memba blong klas oli andastanem olsem wanem blong developem ol presen blong spirit ia, invaetem olgeta blong ridim Fas Korin 12:27–31; Moronae 7:48; 10:23, 30; Doktrin mo Ol Kavenan 46:8. ?Wanem nao ol skripja ia oli stap tijim yumi long wei blong kasem ol presen long saed blong spirit? ?Olsem wanem nao, blong stap developem ol presen blong spirit, i mekem se yumi kam moa olsem Kraes? Invaetem ol memba blong klas blong jusum wan presen we oli wantem blong kasem, mo lukaotem help blong Lod blong save kasem presen ia.

Fas Korin 13

Jareti i presen ia we i moa hae long evri nara presen.

• Maet bae yu save askem ol memba blong klas blong tingting hevi long saelen, long Fas Korin 13 mo tingting long wan we oli save, we i wan gud eksampol blong wan saed o moa long wan saed blong jareti, we Pol i stap tokbaot. Sam long ol memba blong klas oli save tokbaot man o woman ia we oli tingting long hem, mo talem wan eksperiens we man o woman ia i bin soem eksampol blong jareti. Maet yu save mekem wan lis long bod abaot ol defren wei we Pol i tokbaot jareti, mo invaetem ol memba blong klas blong serem ol aedia blong wanem nao i minim blong wan we i gat jareti, “i save wet longtaem tru long hadtaem, o “i no kros kwiktaem” (Fas Korin 13:4–5). ?Olsem wanem Sevya i soem eksampol blong ol kwaliti fasin ia blong gat jareti? ?Wanem ol nara trutok we Moronae 7:46–48 i bin tijim abaot jareti?

risos pikja bokis

Sam Moa Risos

Ol eksampol long skripja, abaot ol presen blong spirit.

• Jenesis 40–41

• Rut 1

• Fas King 3:5–15

• Matiu 1:18–24; 2:13–15, 19–22

• Luk 1:26–38

• Jon 11:20–27

• Ol Wok 3:1–8; 5:12–16

• Momon 1:1–5

• Ita 2:14–25; 3:1–20

• Doktrin mo Ol Kavenan 6:5, 10–12

• Moses 6:22–27, 31–43; 7:2–4, 13, 17–21

Kam Antap long Fasin blong Yumi blong Stap Tij

Laef folem prinsipol we yu stap tijim. Blong stap laef folem ol prinsipol we yu stap tijim, bae i helpem yu blong yu testifae abaot olgeta wetem moa paoa. Pol i tijim: “Mo long sem fasin, Masta blong yumi i putum tok blong hem, se olgeta we oli stap talemaot gud nius, bambae oli mas kasem pei blong olgeta from gud nius ya.” (Fas Korin 9:14).