“4–10 Septemba . Fas Korin 14–16: ‘From we God I No Stamba blong Fasin Ya we Olgeta Samting Oli Paspas, Hem I Stamba blong Pis,’” Kam Folem Mi—Blong Sandei Skul: Niu Testeman 2023 (2022)
“4–10 Septemba . Fas Korin 14–16,” Kam Folem Mi—Blong Sandei Skul: 2023
4–10 Septemba
Fas Korin 14–16
“From we God I No Stamba blong Fasin Ya we Olgeta Samting Oli Paspas, Hem I Stamba blong Pis”
Bifo yu lukluk long aotlaen ia, rid long 1 Korin 14–16. Raetemdaon ol fas tingting mo filing blong yu abaot wanem nao ol trutok ia i save helpem ol memba blong klas blong yu, mo gohed blong lukaotem blong Spirit i lidim taem yu stap mekem rere blong tij.
Invaetem Ol Memba blong Serem Wanem Oli Gat
Givim smol minit long ol memba blong klas blong save luklukbak long 1 Korin 14–16 mo speseli, fanem wan ves we oli ting se i gat moa mining. Invaetem olgeta blong serem wetem wan long klas, mo eksplenem from wanem oli jusum skripja ia.
Stap Tijim Doktrin
Taem yumi kam tugeta, yumi mas lukaotem blong leftemap tingting yumi wanwan mo stap glad tugeta.
-
Tingting blong yusum tijing blong Pol long 1 Korin 14 blong rimaenem ol memba blong klas se evriwan long yumi i save sapotem mo leftemap wanwan long yumi mo stap glad tugeta long jos. Wan simpol wei blong lukluk bak long japta ia, i blong raetem wan kwestin long bod, olsem ?Wanem i mas stap olsem gol blong yumi taem yumi kam tugeta? Invaetem ol memba blong klas blong lukaotem ol posibol ansa long 1 Korin 14. Ol nara aedia yu save faenem long Moronae 6:4–5 mo Doktrin mo Ol Kavenan 50:17–23. Taem ol memba blong oli stap serem wanem oli faenem, askem olgeta, wanem filing blong olgeta long wanem yumi stap mekem olsem klas blong mekem se ol gol ia i hapen. Oli save serem tu ol eksperiens we i leftemap tingting blong olgeta long wanem we oli bin serem.
From se Jisas Kraes i laef bakegen long ded, yumi evriwan bae i laef bakegen long ded.
-
?Olsem wanem nao bae yu yusum testemoni blong Pol long 1 Korin 15 blong mekem testemoni blong klas blong yu i kam moa strong long saed blong laef bakegen long ded? Wan wei i blong serem klas long tu grup mo askem wan grup blong lukaotem insaed long 1 Korin 15 ol problem we bae yumi kasem sapos Jisas Kraes i no bin laef bakegen long ded. Narafala grup oli save lukaotem ol blesing we yumi kasem from Laef Bakegen Long Ded blong Hem. Wanwan grup oli save raetem wanem we oli lanem antap long bod. ?Wanem oli save ademap long lis blong olgeta afta we oli ridim toktok we i kam long Elda D. Todd Christofferson we i stap long “Sam Moa Risos”? Blong helpem ol memba blong klas oli filim Spirit long taem blong toktok raon, soemaot wan pikja blong Sevya we laef bakegen long ded (luk long Aotlaen blong wik ia long Kam Folem Mi—blong Wanwan Man mo Famli) o plei long wan hym o singsing abaot Laef Bakegen long Ded.
-
From Pol i stap toktok long ol man we oli no bilif long laef bakegen long ded, i save helpem klas blong yu blong save mekem wan drama abaot semmak situesen ia. ?Eksampol, ?olsem wanem nao oli mekem fet blong wan we oli lavem i kam strong moa long Laef Bakegen long Ded? ?Wanem nao yumi faenem long 1 Korin 15 we i helpem yumi eksplenem nid blong Laef Bakegen long Ded, mo from wanem yumi rili nidim Jisas Kraes? ?Wanem ol nara skripja yumi save yusum? (Olsem eksampol, luk long, Luk 24:1–12, 36–46; Alma 11:42–45.)
Pikjasan i girapPol i tij abaot Laef Bakegen long Ded mo yusum eksampol blong “ol bodi [selestial] ol samting we oli stap long skae” olsem san (1 Korin 15:40).
-
1 Korin 15 i wan long ol ples insaed long skripja we oli tokbaot baptaes blong olgeta we oli ded finis (luk long ves 29; luk tu long Doktrin mo Ol Kavenan 128:18). Maet ol memba blong klas oli save serem glad we oli bin eksperiensem, taem oli mekem baptaes o nara odinens blong bubu blong olgeta. ?From wanem Pol maet i tokbaot baptaes blong ol ded olsem wan pruf blong Laef Bakegen long Ded? Sapos i help blong tokbaot from wanem i gat nid blong mekem baptaes blong ol ded man, luk long Gospel Topics article “Baptisms for the Dead” (topics.ChurchofJesusChrist.org). Vidio ia “Glad Tidings: The History of Baptisms for the Dead” (ChurchofJesusChrist.org) i eksplenem olsem wanem prinsipol ia i kambak long dei blong yumi tedei.
Sam Moa Risos
Ol Witnes blong Laef Bakegen long Ded
Elda Todd Christofferson i testifae:
“Tingbaot blong wan smol taem hamas i impoten blong Laef Bakegen long Ded i ansarem tru aedentiti blong Jisas blong Nasaret mo ol toktok blong agens we i kam long save blong man mo ol kwestin blong laef. Sapos i tru we, Jisas i bin laef bakegen long ded, i stret nomo se Hem i wan man we i hae, i tabu. I no gat man olbaot we i gat paoa insaed long hemwan blong laef bakegen afta we hem i ded. From se Hem i bin laef bakegen long ded, Jisas i no save stap nomo olsem wan kapenta, wan tija, wan rabae o wan profet. From se Hem i bin laef bakegen long ded, bifo i kam, Jisas i mas stap olsem wan God, iven Hem i Wan Stret Pikinini Ia Nomo blong Papa.
From hemia, wanem we Hem i bin tijim, i tru; God i no save giaman.
From hemia, Hem i bin Krieta blong wol olsem we Hem i bin talem.
From hemia, heven mo hel oli ril, olsem we Hem i bin tijim.
From hemia, i gat wan wol blong ol spirit, we Hem i bin visitim afta long ded blong Hem.
From hemia, bambae Hem i kam bakegen, olsem ol enjel oli bin talem, “Hemwan, Hem i kam, i rul long wol ia”
“From hemia, i gat laef bakegen long ded mo wan las jajmen blong evriwan” (“The Resurrection of Jesus Christ,” Liahona, May 2014, 113).
Stap Kam Antap long Fasin blong Yumi blong Stap Tij
Kam blong save gud olgeta we yu stap tijim. I no gat tu ol pipol we oli semmak evriwan; wanwan man o woman yu tijim oli kamaot long ol defren ples, gat ol lukluk, mo sam namba blong talen. Prea blong save olsem wanem yu save yusum ol defren samting ia blong helpem ol memba blong klas blong oli lanem samting. Taem yu stap andastanem gud moa olgeta ia we yu stap tijim olgeta, yu save krietem sam taem blong tij we bae oli gat mining mo oli no save fogetem (luk long Teaching in the Savior’s Way, 7).