Septyembre 11–17

2 Mga Taga-Corinto 1–7

“Pagpasig-uli Kamo ngadto sa Dios”

Samtang magbasa ka sa 2 Mga Taga-Corinto 1–7 karong semanaha, hunahunaa ang piho nga mga sakop sa klase—kadtong motungha sa klase ug kadtong dili. Sa unsang paagi nga ang mga baroganan niining mga kapitulo makapanalangin kanila?

Dapita ang Pagpaambit

Ang mga sakop sa klase makabenepisyo gikan sa pagkadungog sa mga ideya gikan sa usag usa mahitungod kon unsaon sa paghimong mas epektibo ang ilang pagtuon sa kasulatan. Paghatag og pipila ka minuto alang niini sa matag karon ug unya.

Itudlo ang Doktrina

2 Mga Taga-Corinto 1:3–7; 4:6–10, 17–18; 7:4–7

Ang atong mga pagsulay mahimong usa ka panalangin.

• Ang mga kasinatian nga gihulagway ni Pablo ug ang tambag nga iyang gihatag diha sa 2 Mga Taga-Corinto makatabang sa mga sakop sa klase nga maghunahuna mahitungod sa mga panalangin nga mahimong moabot gikan sa ilang mga pagsulay. Sa pagsugod og panaghisgotan, mahimo nimong hangyoon ang usa ka sakop sa klase nga motungha nga andam nga maghisgot mahitungod kon sa unsang paagi nga ang usa ka pagsulay nakapanalangin sa iyang kinabuhi o unsay iyang nakat-onan gikan sa usa ka tawo nga nakalahutay og usa ka pagsulay. Dayon mahimo nimong hatagan og pipila ka minuto ang mga sakop sa klase sa pagrebyo sa 2 Mga Taga-Corinto 1:3–7; 4:6–10, 17–18; ug 7:4–7, mangita kon unsay gitudlo ni Pablo mahitungod sa mga katuyoan ug mga panalangin sa mga pagsulay. Hangyoa ang mga sakop sa klase sa pagpaambit kon unsay ilang nakit-an. Mahimo nimong isugyot nga ilang basahon og kusog ang bersikulo diin ilang nasuta ang usa ka piho nga pagtulon-an ug dayon mopaambit og kasinatian o pagpamatuod nga may kalabotan niana nga pagtulon-an.

• Sa pagdugang sa inyong panaghisgotan, ikonsiderar ang pagkanta og dungan sa paboritong mga himno sa mga sakop sa klase nga nagpamatuod sa kahupayan ug mga panalangin nga gitanyag sa Langitnong Amahan ug sa Manluluwas ngari kanato panahon sa pagsulay—sama sa“Unsa Kalig-on ang Tukuranan” (Mga Himno ug mga Awit sa mga Bata, nu.44). Human sa pagpanganta og dungan, mahimo nimong dapiton ang mga sakop sa klase sa pagpangita og mga pulong diha sa 2 Mga Taga-Corinto 1 ug 4 nga ilang gibati nga mohaom sa mensahe sa himno.

2 Mga Taga-Corinto 2:5–11

Ang pagpasaylo mao ang usa ka panalangin nga atong mahatag ug madawat.

• Kitang tanan adunay mga kasinatian sa dihang ang usa ka tawo “nakapasakit” ngari kanato o sa atong pamilya (bersikulo 5). Tingali ang mga sakop sa klase mahimong mosiksik sa 2 Mga Taga-Corinto 2:5–11nga mangita sa tambag gikan ni Pablo kon unsaon pagtratar sa usa ka tawo nga nakapasilo kanato. Ikonsiderar ang pagdapit og mga sakop sa klase sa pagrebyo sa Mateo 5:43–48 ug Lucas 15:11–32 aron makakat-on og dugang pa mahitungod kon unsaon nato sa pagtagad kadtong nakasilo kanato. Sa unsang paagi nga kita makapasakit sa atong kaugalingon ug sa uban kon dili kita andam nga mopasaylo?

2 Mga Taga-Corinto 5:14–21

Pinaagi sa Pag-ula ni Jesukristo, mapasig-uli kita ngadto sa Dios.

• Daghang tawo ang moadto sa simbahan nga adunay tinguha nga mobati nga mas mahiduol sa Dios, ug ang panaghisgot bahin sa 2 Mga Taga-Corinto 5:14–21 makatabang kanila. Sa pagsugod, ang mga sakop sa klase mahimong mosuhid sa kahulogan sa pulong nga magpasig-uli [reconcile], tingali magsugod pinaagi sa pagtan-aw sa pulong diha sa diksyonaryo. Unsa ang mga ideya nga nahatag niini mahitungod sa pagpasig-uli ngadto sa Dios? Unsa ang dugang nga mga ideya nga atong maangkon gikan sa nabutang nga “Pag-ula” diha sa Ang Giya ngadto sa mga Kasulatan? Sa unsang paagi nga kining mga ideya makatabang kanato nga makasabot sa 2 Mga Taga-Corinto 5:14–21? Mahimo nimong dapiton ang mga sakop sa klase nga ipaambit ang ilang mga gibati mahitungod sa Manluluwas, kansang Pag-ula makapahimo niining posible nga mahiusa kita pag-usab ngadto sa Dios.

2 Mga Taga-Corinto 7:8–11

Ang diosnong kasubo moresulta ngadto sa paghinulsol.

• Ang 2 Mga Taga-Corinto 7:8–11 naghatag og makatabang nga pagpasabot bahin sa diosnong kasubo ug sa tahas niini diha sa paghinulsol. Unsa may atong makat-onan bahin sa diosnong kasubo gikan sa 2 Mga Taga-Corinto 7:8–11 ug sa mga pulong ni Presidente Dieter F. Uchtdorf diha sa “Dugang nga mga Kapanguhaan”? Nganong ang diosnong kasubo mahinungdanon man sa paghinulsol?

• Mahimong maaghat ka sa pag-awhag og mas lapad nga panaghisgotan mahitungod sa paghinulsol. Kon mao, mahimo nimong sulayan ang susama niini: Isulat diha sa pisara Ang paghinulsol mao ang . Hangyoa ang mga sakop sa klase sa pagpangita og mga paagi sa pagkompleto niining mga pulong, gamit ang ilang nakat-onan gikan sa 2 Mga Taga-Corinto 7:8–11, ingon man usab ang gikan sa mga kasulatan ug ubang mga kapanguhaan nga makit-an diha sa artikulo sa Gospel Topics “Repentance” (topics.ChurchofJesusChrist.org). Sa unsa kaha nga paagi nga kita makagamit niining mga pagtulon-an aron matabangan ang usa ka tawo nga makasabot kon unsaon ang sinsero nga paghinulsol?

Dugang nga mga Kapanguhaan

Ang diosnong kasubo modasig og kausaban ug paglaom.

Si Presidente Dieter F. Uchtdorf mipasabot:

“Ang diosnong kasubo modasig og kausaban ug paglaom pinaagi sa Pag-ula ni Jesukristo. Ang kasubo nga kalibotanon mobira kanato, mowagtang sa paglaom, ug moagni kanato nga mopadayon sa pagtugyan ngadto sa tintasyon.

“Ang diosnong kasubo mosangpot sa pagkakabig ug kausaban sa kasingkasing. Tungod niini masilag kita sa sala ug mahigugma sa maayo. Kini modasig kanato sa pagbarog ug paglakaw diha sa kahayag sa gugma ni Kristo. Ang tinuod nga paghinulsol nagpasab[o]t nga pag-usab, dili pagpanakit o pagpaant[o]s” (“Kamo Makahimo Niini Karon!,” Liahona, Nob. 2013, 56).

Pagpalambo sa Atong Pagtudlo

Iapil kadtong kinsa nanglimbasog. Usahay ang nanglimbasog nga mga sakop sa klase nagkinahanglan lamang nga maapil aron mobati nga gihigugma. Ikonsiderar ang paghatag kanila og buluhaton nga moapil sa umaabot nga leksiyon. Ayaw paghunong kon sila dili manumbaling sa imong mga paningkamot sa sinugdanan. (Tan-awa sa Pagtudlo sumala sa Pamaagi sa Manluluwas, 8–9.)