“Agosto 28–Septyembre 3. 1 Mga Taga-Corinto 8–13: ‘Kamo Mao ang Lawas ni Kristo’” Dali, Sunod Kanako—Alang sa Sunday School: Bag-ong Tugon 2023 (2022)
“Agosto 28–Septyembre 3. 1 Mga Taga-Corinto 8–13,” Dali, Sunod Kanako—Alang sa Sunday School: 2023
Agosto 28–Septyembre 3
1 Mga Taga-Corinto 8–13
“Kamo ang Lawas ni Kristo”
Si Elder Richard G. Scott nagtudlo nga atong “mapasagdan ang labing bililhon, personal nga direks[i]yon sa Espiritu nga wala mapaminaw” kon mapakyas kita sa pagrekord ug pagtubag “sa unang mga pag-aghat nga miab[o]t [kanato]” (Aron Makabaton og Espirituhanong Giya,” Liahona, Nob. 2009, 8).
Dapita ang Pagpaambit
Sa 1 Mga Taga-Corinto 8–13, si Pablo nagtudlo sa mga kamatuoran sa ebanghelyo gamit ang mga sambingay sama sa usa ka runner diha sa lumba, ang lawas sa tawo ug “usa ka bagting sa pyangpyang [cymbal]” (tan-awa sa 1 Mga Taga-Corinto 9:24–25; 12:13–26; 13:1). Mahimo nimong pangutan-on ang mga sakop sa klase kon unsay ilang nakat-onan gikan sa pagtuon niining mga pagtandi. Sa unsang paagi ang mga pagtandi makatabang kanato nga makasabot sa mga kamatuoran sa ebanghelyo?
Itudlo ang Doktrina
Ang Dios mohatag og paagi aron pagbuntog sa tintasyon.
-
Unsaon nimo sa pagtabang ang mga sakop sa klase nga makadiskobre og gamhanang mga kamatuoran diha sa 1 Mga Taga-Corinto 10:13? Usa ka ideya mao ang pagbahin sa bersikulo ngadto sa mugbo nga hugpong sa mga pulong, hatagi ang matag usa ngadto sa lain-lain nga sakop sa klase, ug hangyoa ang mga sakop sa klase sa pagsulti og usab sa mugbo nga hugpong sa mga pulong sa ilang kaugalingong mga pulong. Pananglitan, unsa ang laing paagi sa pagsulti sa “Ang Dios kasaligan” o “ tintalon kamo labaw sa inyong madaog”? Mahimo dayon nimong basahon pag-usab ang bersikulo, gamit ang pipila sa mga pamahayag sa mga sakop sa klase. Ang mga sakop sa klase mahimong mopaambit og mga kasinatian diin ilang nakita nga tinuod ang mga saad niining bersikulo. Unsa nga dugang nga mga ideya ang atong mabatonan niining mga bersikulo gikan sa Alma 13:27–28?
-
Imbis nga maghisgot og piho nga tintasyon ni bisan kinsa, tingali ganahan nimo nga tutokan ang panaghisgotan sa 1 Mga Taga-Corinto 10:13 bahin sa mga tintasyon nga, sa mga pulong ni Pablo, “agian usab sa kadaghanan.” Ang mga sakop sa klase mahimong magsugod pinaagi sa pag-ila sa mga tintasyon nga gipasidaan ni Pablo diha sa mga bersikulo 1–12. Mahimo usab silang mosugyot og modernong mga ehemplo sa kasagaran nga mga tintasyon, sama sa mga tintasyon nga mahimong dili matinuoron, panglibak, o paghukom sa uban. Sa unsa kaha nga paagi nga ang usa ka tawo, uban sa tabang sa Dios, “makalikay” niining mga tintasyon?
1 Mga Taga-Corinto 10:16–17; 11:23–30
Ang sakramento makapahiusa kanato isip mga miyembro sa Simbahan ni Kristo.
-
Kining mga bersikulo makapadasig og panaghisgotan kon sa unsang paagi nga ang sakramento makapahiusa sa inyong ward diha sa inyong mga paningkamot nga mas mahisama sa Manluluwas. Mahimo nimong sugdan pinaagi sa pagbasa sa 1 Mga Taga-Corinto 10:16–17 ug sa pagsusi kon unsa kaha ang kahulogan sa pulong nga nakig-ambit dinhi niini nga konteksto (ang usa ka tawo mahimong mangita sa posible nga mga kahulogan diha sa diksyonaryo). Sa unsang paagi nga ang pag-ambit sa sakramento nakatabang kanato nga mobati nga mas nagkahiusa? Sa unsang paagi nga ang tambag ni Pablo nga “ipasusi sa matag usa ka tawo ang iyang kaugalingon” adunay kalabotan niini nga tumong? (1 Mga Taga-Corinto 11:28).
Ang espirituhanong mga gasa gihatag aron makabenepisyo ang tanang anak sa Langitnong Amahan.
-
Aron matabangan ang mga sakop sa klase nga makita ang mga ehemplo kon sa unsang paagi nga ang pagpalambo sa ilang espirituhanong mga gasa makatabang sa paglig-on sa Simbahan, ikonsiderar ang pagdapit kanila sa paghunahuna bahin sa espirituhanong mga gasa nga anaa sa mga tawo diha sa mga kasulatan. Alang sa mga ideya, mahimo nimo silang tahasan sa pagpangita og usa sa mga pakisayran sa kasulatan diha sa “Dugang nga mga Kapanguhaan” ug hinganlan ang espirituhanong mga gasa nga sa ilang hunahuna anaa niana nga tawo. Mahimo usab sila nga makahisgot mahitungod sa espirituwal nga mga gasa nga ilang nakita sa usag usa. Sa unsang paagi nga kining mga espirituwal nga mga gasa usa ka panalangin kanatong tanan? Unsaon man nato paggamit sa atong espirituhanong mga gasa aron mapanalanginan ang uban ug mapalig-on ang lawas ni Kristo, o ang Simbahan?(tan-awa sa 1 Mga Taga-Corinto 12:12–31; tan-awa usab sa 1 Mga Taga-Corinto 14:12).
-
Aron matabangan ang mga sakop sa klase nga makasabot kon unsaon sa pagpalambo ang espirituhanong mga gasa, dapita sila sa pagbasa sa 1 Mga Taga-Corinto 12:27–31; Moroni 7:48; 10:23, 30; Doktrina ug mga Pakigsaad 46:8. Unsa ang gitudlo kanato niining mga kasulatan kon unsaon sa pagbaton og espirituhanong mga gasa? Sa unsa nga paagi nga ang pag-ugmad og espirituhanong mga gasa makapahimo kanato nga mas mahisama kang Kristo? Dapita ang mga sakop sa klase sa pagpili og usa ka gasa nga gusto nilang mabatonan ug sa pagtinguha sa tabang sa Ginoo sa pag-angkon niana nga gasa.
Ang gugmang putli mao ang labing importante nga espirituhanong gasa.
-
Aron matabangan ang mga sakop sa klase nga maanalisar kini, mahimo nimo silang hangyoon nga mamalandong sa hilom sa 1 Mga Taga-Corinto 13 ug sa paghunahuna og usa ka tawo nga ilang nailhan kinsa maayong ehemplo sa usa o dugang pa sa mga aspeto sa gugmang putli nga gihisgotan ni Pablo. Ang ubang mga sakop sa klase mahimong mohulagway sa tawo nga ilang nahunahunaan ug sa usa ka kasinatian diin kini nga tawo nakapakita og gugmang putli. Mahimo gani ka nga maglista sa mga bahin sa gihulagway ni Pablo diha sa pisara ug dapita ang mga sakop sa klase sa pagpaambit og mga ideya kon unsay gipasabot sa “mapailubon” o “dili masuk-anon” (1 Mga Taga-Corinto 13:4–5). Giunsa pagpakita sa Manluluwas kining mga kinaiya sa gugmang putli? Unsa pa dugang kamatuoran ang gitudlo diha sa Moroni 7:46–48 mahitungod sa gugmang putli?
Dugang nga mga Kapanguhaan
Mga ehemplo sa kasulatan bahin sa espirituhanong mga gasa.
Pagpalambo sa Atong Pagtudlo
Sunda ang mga baroganan nga imong gitudlo. Ang pagsunod sa mga baroganan nga imong gitudlo makatabang nimo sa paghatag og mas gamhanang pagsaksi. Si Pablo nagtudlo, “Sa mao usab nga paagi, ang Ginoo nagbuot nga kadtong nagwali sa Maayong Balita magkuha sa ilang panginabuhi gikan niini.” (1 Mga Taga-Corinto 9:14).