Septyembre 4–10

1 Mga Taga-Corinto 14–16

“Ang Dios dili Dios sa Kaguliyang kondili sa Kalinaw”

Sa dili pa magrebyo niining latid, basaha ang 1 Mga Taga-Corinto 14–16. Irekord ang imong inisyal nga mga impresyon kon unsa nga mga kamatuoran nga makatabang sa mga sakop sa imong klase, ug padayong magtinguha og dugang nga giya gikan sa Espiritu samtang ikaw mangandam sa pagtudlo.

Dapita ang Pagpaambit

Hatagi og pipila ka minuto ang mga sakop sa klase aron makarebyo sa 1 Mga Taga-Corinto 14–16 ug sa pagpangita og bersikulo nga ilang gibati nga makahuloganon gayod. Dapita sila sa pagpangita og usa ka tawo diha sa klase kang kinsa ilang mapaambit ang ilang bersikulo ug ipasabot kon nganong kini ang ilang gipili.

Itudlo ang Doktrina

1 Mga Taga-Corinto 14

Kon kita magkapundok, kita kinahanglan magtinguha sa paglig-on sa usag usa.

• Ikonsiderar ang paggamit sa mga pagtulon-an ni Pablo diha sa 1 Mga Taga-Corinto 14 sa pagpahinumdom sa mga sakop sa klase nga kitang tanan makahimo sa paglig-on—o pagsuporta ug pagdasig—sa usag usa diha sa simbahan. Usa ka yano nga paagi sa pagrebyo niining kapitulo tingali mao ang pagsulat og pangutana diha sa pisara, sama sa Unsa ang kinahanglan natong tumong kon magpundok kita? Dapita ang mga sakop sa klase sa pagsiksik sa posible nga mga tubag diha sa 1 Mga Taga-Corinto 14. Ang ubang mga ideya mahimong makita diha sa Moroni 6:4–5 ug Doktrina ug mga Pakigsaad 50:17–23. Samtang mopaambit ang mga sakop sa klase sa unsay ilang makita, ikonsiderar ang pagpangutana kanila kon unsay ilang gibati sa gibuhat sa imong klase sa pagtuman niining mga tumong. Mahimo usab silang mopaambit og mga kasinatian diin sila mibati nga nalig-on pinaagi sa butang nga gipaambit sa usa ka sakop sa klase.

1 Mga Taga-Corinto 15

Tungod kay si Jesukristo nabanhaw, kitang tanan mabanhaw.

• Unsaon nimo paggamit sa pagpamatuod ni Pablo diha sa 1 Mga Taga-Corinto 15 sa pagpalig-on sa mga pagpamatuod sa mga sakop sa imong klase bahin sa Pagkabanhaw? Usa ka paagi mao ang pagbahin sa klase ngadto sa duha ka grupo ug hangyoa ang usa ka grupo sa pagpangita diha sa 1 Mga Taga-Corinto 15 sa mga sangpotanan nga atong atubangon kon wala pa mabanhaw si Jesukristo. Ang laing grupo mahimong mangita sa mga panalangin nga atong madawat tungod sa Iyang Pagkabanhaw. Ang matag grupo mahimong mosulat dayon diha sa pisara kon unsa ang ilang nakat-onan. Unsay ilang madugang sa ilang mga lista human mabasa ang pamahayag ni Elder D. Todd Christofferson diha sa “Dugang nga mga Kapanguhaan”? Aron matabangan ang mga sakop sa klase nga mobati sa Espiritu atol niining panaghisgotan, ikonsiderar ang pag-display og hulagway sa nabanhaw nga Manluluwas (tan-awa sa latid karong semanaha diha sa Dali, Sunod Kanako—Alang sa mga Indibidwal ug mga Pamilya) o pagpatukar o pagpanganta og himno mahitungod sa Pagkabanhaw.

• Tungod kay si Pablo mitubag sa mga tawo nga wala motuo sa pagkabanhaw, ang imong klase mahimong makabenepisyo sa pag-role-play sa susama nga sitwasyon. Pananglitan, unsaon kaha nila sa pagpalig-on ang pagtuo sa usa ka minahal bahin sa Pagkabanhaw? Unsay makita nato sa 1 Mga Taga-Corinto 15 nga makatabang kanila sa pagpasabot sa panginahanglan ug sa ebidensya sa Pagkabanhaw ni Jesukristo? Unsa ang laing mga kasulatan mahimo natong gamiton? (Tan-awa, pananglit, sa Lucas 24:1–12, 36–46; Alma 11:42–45.)

  

  Si Pablo nagtudlo mahitungod sa Pagkabanhaw pinaagi sa pagpasabot nga ang “mga lawas nga langitnon” sama sa adlaw (1 Mga Taga-Corinto 15:40).

• Ang 1 Mga Taga-Corinto 15 usa sa pipila ka dapit diha sa mga kasulatan diin ang mga bunyag alang sa mga patay nahisgotan (tan-awa sa bersikulo 29 tan-awa usab sa Doktrina ug mga Pakigsaad 128:18). Tingali ang mga sakop sa klase mahimong mopaambit sa kalipay nga ilang nasinati samtang naghimo sa mga bunyag o sa ubang mga ordinansa alang sa ilang mga katigulangan. Ngano kaha nga nagpasabot man si Pablo sa mga bunyag alang sa mga patay isip ebidensya sa Pagkabanhaw?

Dugang nga mga Kapanguhaan

Kamahinungdanon sa Pagkabanhaw.

Si Elder D. Todd Christofferson nagtudlo:

“Hunahunaa sa makadiyot ang kamahinungdanon sa Pagkabanhaw sa pagsulbad gay[o]d sa tinuod nga pagkatawo ni Jesus sa Nazaret ug sa dagkong pilosopikanhong panagbangi ug mga pangutana sa kinabuhi. Kon si Jesus tinuod gay[o]d nga nabanhaw, mosunod dayon niini nga Siya usa ka balaanong binuhat. Walay mortal nga tawo nga dunay gah[o]m sa iyang kaugalingon nga mabuhi og balik human mamatay. Tungod kay Siya nabanhaw, si Jesus dili mahimong usa lang ka panday, magtutudlo, rabbi, o propeta. Tungod kay Siya nabanhaw, si Jesus usa gay[o]d ka Dios, gani ang Bugtong Anak sa Amahan.

“Busa, unsay Iyang gitudlo tinuod; ang Dios dili magbakak.

“Busa, Siya ang Tiglalang sa yuta, sama sa Iyang gisulti.

“Busa, ang langit ug ang impyerno tinuod, sama sa Iyang gitudlo.

“Busa, dunay usa ka kalib[o]tan sa mga espiritu, nga Iyang gibisita human sa Iyang kamatayon.

“Busa, moanhi Siya pag-usab, sama sa giingon sa mga anghel, ug ‘mohari dinhi sa yuta.’

“Busa, dunay pagkabanhaw ug katap[o]sang paghukom alang sa tanan” (Ang Pagkabanhaw ni Jesukristo,” Liahona, Mayo 2014, 113).

Pagpalambo sa Atong Pagtudlo

Paningkamoti nga makaila niadtong imong gitudloan. Walay duha ka tawo nga susama gay[o]d; ang matag tawo nga imong gitudloan adunay talagsaong background, panglantaw, ug mga talento. Pag-ampo nga makamao kon unsaon nimo paggamit niini aron mapaapil ang imong mga tigkat-on. Kon mas masabtan nimo kadtong imong gitudloan, makamugna ka og makahuluganon ug halandumon nga mga gutlo sa pagtudlo alang kanila (tan-awa sa Pagtudlo sumala sa Pamaagi sa Manluluwas, 7).