Si Jesus nakig-istorya sa gamayng bata

Septyembre 18–24

2 Mga Taga-Corinto 8–13

“Ang Dios Nagahigugma sa Malipayong Maghahatag”

Samtang magbasa ka sa 2 Mga Taga-Corinto 8–13, hunahunaa ang mga tawo nga imong gitudloan ug pagplano og mga kalihokan nga makatabang kanila nga madiskobrehan ang mga baroganan diha niining mga kapitulo. Dayon rebyoha kining latid alang sa dugang nga mga ideya.

pagpaambit nga icon

Dapita ang Pagpaambit

Ania ang usa ka paagi sa pagdapit sa mga sakop sa klase sa pagpaambit kon unsa ang ilang nakat-onan gikan sa 2 Mga Taga-Corinto 8–13: paghangyo og pipila kanila sa pagsulat diha sa pisara og usa ka paborito nga hugpong sa mga pulong gikan sa ilang gibasa ug mopaambit kon nganong kining hugpong sa mga pulong makahuloganon ngadto kanila.

icon sa pagtudlo

Itudlo ang Doktrina

2 Mga Taga-Corinto 8:1–15; 9:6–15

Ang mga Santos malipayong mopaambit kon unsay anaa kanila aron mapanalanginan ang mga kabos ug timawa.

• Gisugo sa Dios ang Iyang mga Santos nga motabang sa pag-atiman niadtong nanginahanglan, ug ang mga tudling diha sa 2 Mga Taga-Corinto 8–9 makapadasig sa mga sakop sa imong klase sa ilang mga paningkamot. Aron matabangan sila nga makakita niining mga tudling, mahimo nimong isulat diha sa pisara ang mga pangutana sama sa Nganong mohatag man kita? ug Unsaon man nato sa paghatag? Katunga sa klase mahimong mosiksik sa mga tubag diha sa 2 Mga Taga-Corinto 8:1–15, ug ang laing katunga mahimong mosiksik diha sa 2 Mga Taga-Corinto 9:6–15. (Mahimo nimong ipasabot nga sa kapitulo 8, mga bersikulo 1–5, si Pablo namulong bahin sa mga Santos nga taga-Macedonia isip mga ehemplo sa madagayaong paghatag.) Sa unsa kaha nga paagi nga ang mga baroganan nga gitudlo ni Pablo makatabang kanato nga mas makaatiman sa mga kabos ug timawa?

2 Mga Taga-Corinto 11:1–4

Motutok gayod kita sa “lunsay nga paghigugma kang Kristo”

• Usahay ang mga miyembro sa Simbahan mobati nga nabug-atan sa mga gikinahanglan sa kinabuhi—lakip na sa unsay ilang makita isip mga gikinahanglan sa pagkahimong usa ka Santos sa Ulahing mga Adlaw. Ang tambag ni Pablo mahitungod sa “lunsay nga paghigugma kang Kristo” (2 Mga Taga-Corinto 11:3) makatabang. Tingali mahimo ninyong basahon og dungan ang 2 Mga Taga-Corinto 11:3 ug hisgotan kon unsa kaha ang kahulogan sa mga pulong nga “lunsay nga paghigugma kang Kristo. Mahimo usab nimong hangyoon ang mga sakop sa klase sa paghunahuna nga sila gidapit sa pagsulat og usa ka paghulagway sa ebanghelyo ni Jesukristo alang sa usa ka pamantalaan, nga dunay limit nga 100 ka pulong. Hatagi sila og panahon sa pagsulat sa ilang mga paghulagway, ug tugoti sila sa pagpaambit sa usag usa kon unsay ilang nasulat. Kon nagkinahanglan sila og tabang, mahimo silang mo-refer sa Juan 3:16–17; 3 Nephi 27:13–21; pamahayag ni Presidente Dieter F. Uchtdorf sa “Dugang nga Kapanguhaan.” Ang mga sakop sa klase makapaambit og mga ideya mahitungod kon unsaon sa “pagpasayon sa [atong] pamaagi sa pagkadisipulo.”

2 Mga Taga-Corinto 12:5–10

Ang grasya sa Manluluwas igo nga makatabang kanato nga makakita og kalig-on diha sa atong mga kahuyang.

• Unsa may inyong isulti ngadto sa usa ka higala kinsa nag-ampo alang sa kahupayan gikan sa kasakit apan mibati nga kining pag-ampo wala matubag? Ikonsiderar ang pagdapit sa mga sakop sa klase sa pagpamalandong niining pangutana samtang hilom silang magbasa sa 2 Mga Taga-Corinto 12:5–10. Dayon mahimo silang mopaambit og mga ideya gikan niining mga bersikulo nga mahimong makatabang niini nga sitwasyon. Mahimo usab silang mopaambit og mga kasinatian kon kanus-a nga, pinaagi sa grasya ni Jesukristo, ilang nakita ang kalig-on diha sa kahuyang. Sa unsang paagi nga kana nga kasinatian nakaimpluwensiya sa ilang kinabuhi? Nganong importante man ang pagsalig sa tukmang panahon sa Ginoo?

mga kapanguhaan nga icon

Dugang nga mga Kapanguhaan

Atong mapayano ang atong pamaagi sa pagsunod sa ebanghelyo.

Si Presidente Dieter F. Uchtdorf nagtudlo:

“Mga kaigsoonan, ang pagsunod sa ebanghelyo dili kinahanglang komplikado.

“Yano ra kaayo kini. Kini mahulagway nga sama niini:

• Ang pagpaminaw sa pulong sa Dios uban sa kinasingkasing nga tinguha mogiya kanato sa pagtuo sa Dios ug mosalig sa Iyang mga saad.

• Kon mas mosalig kita sa Dios, mas mapuno sa gugma ang atong mga kasingkasing alang Kaniya ug sa usag usa.

• Tungod sa atong gugma sa Dios, kita magtinguha sa pagsunod Kaniya ug molihok nga pinasubay sa Iyang pulong.

• Tungod kay kita nahigugma sa Dios, gusto natong moserbisyo Kaniya; gusto natong mopanalangin sa kinabuhi sa uban ug motabang sa kab[o]s ug timawa.

• Kon mas maglakaw kita niining dalan sa pagkadisipulo, mas gusto natong makat-on sa pulong sa Dios.

“Ug kini magpadayon, matag lakang padulong sa sunod ug mopuno kanato sa nagtubo nga pagtuo, pagla[o]m ug gugmang putli.

“Matah[o]m ang kasayon niini, ug makabenepisyo gay[o]d kini.

“Mga kaigsoonan, kon kamo naghunahuna nga ang ebanghelyo wala kaayo makahatag og benepisyo kaninyo, ako modapit kaninyo sa pag-atras, pagtan-aw sa inyong kinabuhi gikan sa mas taas nga ang-ang, ug ipasayon ang inyong pamaagi ngadto sa pagkadisipulo. Pag-focus sa sukaranang mga doktrina, mga bar[o]ganan, ug sa paggamit sa ebanghelyo. Mosaad ko nga ang Dios mogiya ug mopanalangin kaninyo sa inyong dalan padulong sa makatagbaw nga kinabuhi, ug ang ebanghelyo siguradong mas makahatag og benepisyo kaninyo” (Nakabenepisyo Kaayo Kini,” Liahona, Nob. 2015, 22).

Pagpalambo sa Atong Pagtudlo

Pakigtambayayong uban sa mga sakop sa pamilya. “Ang mga tawo nga adunay labing gamhanan nga impluwens[i]ya sa usa ka indibidwal—alang sa maayo o da[o]tan—sa kasagaran mao kadtong anaa sa iyang panimalay. Tungod kay ang panimalay mao ang sentro sa pagpuyo ug pagkat-on sa ebanghelyo, ang imong mga paningkamot sa paglig-on sa usa ka sakop sa klase mahimong labing epektibo kon makigtambayayong ka sa … mga sakop sa pamilya” (Pagtudlo sumala sa Pamaagi sa Manluluwas, 8).