Si Kristo nagpakita kang Pablo diha sa bilanggoan

Ang nabanhaw nga Manluluwas mibisita ni Pablo diha sa bilanggoan (tan-awa sa Mga Buhat 23:11). Si Jesukristo makapalingkawas kanato gikan sa “[pag]kaulipon” (Mga Taga-Galacia 5:1).

Septyembre 25–Oktubre 1

Mga Taga-Galacia

“Panaggawi Kamo diha sa Espiritu”

Samtang mainampoon kang magbasa ug mamalandong sa Mga Taga-Galacia, ang Ginoo motudlo nimo kon unsa ang kinahanglan nimong ipaambit sa imong klase. Ang pagrekord sa imong mga impresyon nagpakita og pasalamat ngadto sa Dios alang sa Iyang tabang.

pagpaambit nga icon

Dapita ang Pagpaambit

Ang pagtuon sa kasulatan kasagaran moresulta sa makahuloganong mga panaghisgotan sa ebanghelyo uban sa pamilya o mga higala. Nahitabo ba kini sa mga sakop sa imong klase karong semanaha? Dapita sila sa pagpaambit sa ilang mga kasinatian.

icon sa pagtudlo

Itudlo ang Doktrina

Mga Taga-Galacia 1:6–7; 3:1–5; 4:8–21; 5:1, 13–14

Ang ebanghelyo ni Jesukristo nagtanyag og kalingkawasan.

• Ang pagtuon sa bisan unsang basahon sa kasulatan mas sayon kon nasayod kita nganong gisulat kini. Tungod niini nga rason, maayong sugdan ang inyong panaghisgotan mahitungod sa Mga Taga-Galacia uban sa pangutana sama sa “Unsa kaha ang katuyoan ni Pablo sa pagsulat niini nga sulat?” o “Unsa nga problema ang gisulayan ni Pablo sa pagsulbad?” Dapita ang mga sakop sa klase sa pagpangita og mga ilhanan diha sa Mga Taga-Galacia 1:6–7; 3:1–5; 4:8–21. Sa unsang paagi nga ang mensahe ni Pablo importante kanato karon?

• Ang ubang mga Santos nga taga-Galacia nagtuo nga kinahanglan nilang ipadayon ang pagsunod sa balaod ni Moises. Ngadto kang Pablo, sama kini sa pagpuyo nga adunay “yugo sa pagkaulipon” kon itandi sa kalingkawasan nga gitanyag sa balaod ni Kristo (Mga Taga-Galacia 5:1). Aron matabangan ang mga sakop sa imong klase sa pagsuhid sa mga pagtulon-an ni Pablo mahitungod sa kagawasan ug pagkaulipon, mahimo nimo silang hangyoon sa paghingalan og mga kinaiya ug mga lihok nga naghatag og limitasyon sa atong espirituwal nga paglambo ug pag-uswag (sama sa kultural nga mga buhat, dili maayo nga mga pamatasan, sayop nga mga tinuohan, o pag-focus sa mga lihok sa gawas kay sa pagkakabig sa kaugalingon). Sumala sa Mga Taga-Galacia 5:1, 13–14, unsaon man nato pagpangita og kagawasan gikan niini nga mga kinaiya ug mga aksiyon? Sa unsang paagi nga kita nakasinati sa kalingkawasan nga makita pinaagi ni Jesukristo? Unsaon nato sa pagtubag ngadto sa usa ka tawo nga gibati nga ang pagsunod sa ebanghelyo nagpugong sa personal nga kagawasan?

Mga Taga-Galacia 5:16–26

Kon kita “managgawi diha sa Espiritu,” makadawat kita sa “bunga sa Espiritu.”

• Daghang tawo ang nanglimbasog sa pag-ila sa impluwensiya sa Espiritu. Ang Mga Taga-Galacia 5 makatabang. Siguro mahimo nimong hangyoon ang imong mga sakop sa klase sa pagsiksik sa Mga Taga-Galacia 5:22–25 sa pagpangita sa mga pulong nga gigamit ni Pablo sa paghulagway sa bunga sa Espiritu. Nganong ang bunga usa man ka maayong simbolo alang sa paagi nga ang Espiritu nag-impluwensiya kanato? Tingali ang mga sakop sa klase makapaambit kon sa unsang paagi nga kining bunga nakita diha sa ilang kinabuhi o sa kinabuhi sa mga tawo nga ilang nailhan. Ang ubang mga kapanguhaan nga masuhid naglakip sa Mateo 7:16–18; Juan 14:26–27; Moroni 7:13–17; Doktrina ug mga Pakigsaad 11:12–13; ug ang mga pamahayag ni Presidente Gordon B. Hinckley diha sa “Dugang nga mga Kapanguhaan.”

mga mansanas diha sa punoan

Makadawat kita sa “bunga sa Espiritu” kon tinguhaon nato kini.

Mga Taga-Galacia 6:7–10

Kon kita magpugas “alang sa Espiritu,” moani kita og mga panalangin sa tukmang panahon.

• Ang pagtuon sa Mga Taga-Galacia 6:7–10 mahimong makatabang sa mga sakop sa klase nga makahunahuna og maayo mahitungod sa mga sangpotanan sa ilang mga pagpili nga molungtad og dugay nga panahon. Aron matabangan sila, mahimo kang magdala og mga liso sa lain-laing matang, lakip sa mga tanom, mga prutas, o mga utanon nga nanubo gikan sa matag usa niining mga liso (o mahimo kang magdala og mga litrato bahin niining mga butanga). Ang mga sakop sa klase mahimong magtambayayong sa pagpares sa matag liso ngadto sa butang nga namugna niini. Dayon mahimo silang magbasa sa mga bersikulo 7–10 ug maghisgot kon unsay gipasabot sa magpugas “alang [sa] unod” ug “alang sa Espiritu.” (Ang mensahe ni Elder Ulisses Soares diha sa “Dugang nga mga Kapanguhaan.” mahimong makatabang.) Unsa ang atong maani kon magpugas kita alang sa unod? Unsa ang atong maani kon magpugas kita alang sa Espiritu? (tan-awa sa Mga Taga-Galacia 5:22–23).

• Ang ubang mga sakop sa klase mahimong mobati og “[kaluya] sa pagbuhat og maayo” (Mga Taga-Galacia 6:9)—tingali tungod kay dili sila sigurado nga ang ilang mga paningkamot mamunga. Ang panaghisgotan bahin sa Mga Taga-Galacia 6:7–10 mahimong makatabang. Sa pagpaila niining mga bersikulo, mahimo ka nga magdapit og usa ka tawo diha sa klase nga maghisgot og kadali mahitungod sa usa ka higayon sa dihang nagkinahanglan siya og pailob sa dihang misulay sa pagpatubo og usa ka butang. Unsa may matudlo kanato sa kasinatian niining tawhana, kauban sa Mga Taga-Galacia 6:7–10, mahitungod sa atong mga paningkamot nga “managgawi diha sa Espiritu”? (Mga Taga-Galacia 5:25).

mga kapanguhaan nga icon

Dugang nga mga Kapanguhaan

Ang Bunga sa Espiritu.

Si Presidente Gordon B. Hickley nagtudlo: “Mailhan ninyo ang mga pag-aghat sa Espiritu pinaagi sa mga bunga sa Espiritu—kanang molamdag, kanang molig-on, kanang positibo ug apirmatibo ug makapadasig ug modala kanato sa mas maayong panghunahuna ug mas maayong mga pulong ug mas maayong mga binuhatan iya sa Espiritu sa Dios” (Mga Pagtul[o]n-an sa mga Presidente sa Simbahan. Gordon B. Hinckley [2016], 142).

Pagpugas alang sa Espiritu.

Si Elder Ulisses Soares mipasabot: “Ang pagpugas alang sa Espiritu nagpasab[o]t nga tanan natong hunahuna, pulong, ug buhat kinahanglang mobayaw kanato sa balaanon nga kahimtang sa atong langitnong mga ginikanan. Bisan pa, ang mga kasulatan, nagpasab[o]t sa unod isip pisikal o kalib[o]tanong kinaiya sa kinaiyanhon nga tawo, nga nagtugot sa mga tawo nga maimpluwens[i]yahan sa kahinam, tinguha, gana, ug lawasnong tinguha kay sa mag-agad sa inspirasyon sa Espiritu Santo” (“Magpabilin diha sa Teritoryo sa Ginoo!,” Liahona, Mayo 2012, 39).

Pagpalambo sa Atong Pagtudlo

Tabangi ang mga tigkat-on sa pagbayaw sa usag usa. “Ang matag indibidwal sa imong klase usa ka abunda nga tinubdan sa pagpamatuod, mga panab[o]t, ug mga kasinatian sa pagsunod sa ebanghelyo. Dapita sila sa pagpaambit ug pagbayaw sa usag usa” (Pagtudlo sumala sa Pamaagi sa Manluluwas, 5).