pamilya nga nagtan-aw sa mga litrato

Oktubre 2–8

Mga Taga-Efeso

“Alang sa Pagkasangkap sa mga Balaan”

Ang mga hunahuna ug mga impresyon kon unsa ug unsaon sa pagtudlo moabot samtang mainampoon kang magtuon sa Mga Taga-Efeso, sa bag-ohay nga mga pakigpulong sa kinatibuk-ang komperensiya, kining latid, ug sa Dali, Sunod Kanako—Alang sa mga Indibidwal ug mga Pamilya.

pagpaambit nga icon

Dapita ang Pagpaambit

Ikonsiderar ang pagdapit sa mga sakop sa klase sa pagsulat diha sa pisara og usa ka kapahayag [sentence] nga minubo sa butang nga ilang nakat-onan diha sa ilang pagtuon karong semanaha. Pagpili og pipila ka minubo, ug dapita ang mga sakop sa klase nga misulat niini sa pagpaambit sa ilang mga hunahuna.

icon sa pagtudlo

Itudlo ang Doktrina

Mga Taga-Efeso 2:19–22; 4:4–8, 11–16

Ang mga propeta ug mga apostoles—ug kitang tanan—molig-on ug mohiusa sa Simbahan.

• Mahimo ba nga ikaw ug ang imong klase makatukod og usa ka butang aron sa paghulagway kon sa unsang paagi nga ang Simbahan “gitukod diha sa sukaranan nga gipahimutang sa mga apostoles ug sa mga propeta” ug sa unsang paagi nga ang Manluluwas mao “ulohang bato sa pamag-ang”? (Mga Taga-Efeso 2:20). Tingali ang mga sakop sa klase mahimong mobutang og label sa mga bloke o mga papel nga kupa ug itumpi tumpi kini ngadto sa usa ka tore o piramide, nga si Jesukristo ug ang mga apostoles ug mga propeta ang moporma sa sukaranan [base]. Dayon mahimo nimong ipakita kon unsay mahitabo kon si Kristo o ang mga apostoles ug mga propeta tangtangon. Nganong ang ulohang bato sa pamag-ang [chief cornerstone] usa man ka simbolo alang kang Jesukristo ug sa Iyang tahas diha sa Simbahan? (Alang sa paghulagway sa usa ka ulohang bato sa pamag-ang, tan-awa sa “Dugang nga mga Kapanguhaan.”) Ang mga sakop sa klase mahimong mosiksik sa Mga Taga-Efeso 2:19–22; 4:11–16 alang sa mga panalangin nga atong madawat tungod sa mga apostoles, mga propeta, ug ubang mga lider sa Simbahan. Unsay atong mahimo aron matukod ang atong kinabuhi diha sa ilang mga pagtulon-an?

ulohang bato sa pamag-ang

Si Jesukristo mao ang ulohang bato sa pamag-ang sa Simbahan.

• Kon ang mga sakop sa imong klase naminaw sa kinatibuk-ang komperensiya sukad sa kataposang higayon nga nagkita kamo, dapita sila sa pagpaambit kon sa unsang paagi nga ang mga butang nga gitudlo atol sa komperensiya nakatabang sa pagtuman sa mga katuyoan nga gipamahayag diha sa Mga Taga-Efeso 4:11–16.

• Tingali mahimo nimong hatagan og panahon ang mga sakop sa klase sa paglista sa ubang mga “bokasyon [tawag]” o atong mga responsibilidad isip mga miyembro sa simbahan (tan-awa sa Mga Taga-Efeso 4:1)—pananglitan, usa ka brother o sister nga tigpangalagad, usa ka ginikanan, usa ka disipulo ni Kristo, ug dugang pa. Dayon mahimo silang makigbaylo og mga lista sa laing sakop sa klase, mobasa sa Mga Taga-Efeso 4:4–8, 11–16, ug mopaambit kon sa unsang paagi ang pagtuman sa mga responsibilidad diha sa ilang lista makatabang sa paglig-on sa lawas ni Kristo. Unsaon man nato sa pagtambayayong aron mahiusa ubos sa “usa ka Ginoo, usa ka pagtuo, usa ka bautismo”?

Mga Taga-Efeso 5:25–6:4

Ang pagsunod sa ehemplo sa Manluluwas makapalig-on sa atong mga relasyon sa pamilya.

• Sa pagtabang sa mga sakop sa klase nga magamit ang tambag ni Pablo mahitungod sa mga relasyon sa pamilya, mahimo nimong isulat sa pisara ang mosunod: Unsaon nato sa pagsunod sa ehemplo sa Manluluwas sa paagi nga kita motratar sa mga sakop sa atong pamilya? (tan-awa sa Mga Taga-Efeso 5:25). Unsay ipasabot alang kaninyo sa “sunda ninyo ang inyong mga ginikanan”? (Mga Taga-Efeso 6:1–3). Unsaon nato sa pagpadako ang mga anak diha sa “[pag-amuma kanila] sa Kristohanong disiplina ug maayong pagtulon-an”? (Mga Taga-Efeso 6:4). Ang mga sakop sa klase mahimong makahisgot niining mga pangutana, sa mga grupo o isip klase, samtang sila mobasa sa kauban nga mga kasulatan. Mahimo nimong dapiton ang mga sakop sa klase sa pagpaambit og mga ehemplo nga ilang nakita sa mga tawo nga nagpakabuhi sa paagi nga gihulagway ni Pablo.

Mga Taga-Efeso 6:10–18

Ang panagang sa Dios motabang sa pagpanalipod kanato gikan sa daotan.

• Unsa man ang makatabang sa pagdasig sa mga sakop sa klase nga maningkamot sa pagsul-ob sa tibuok nga panagang sa Dios matag adlaw? Mahimo nga mag-andam ka og kalihokan diin ang mga sakop sa klase makapares-pares sa mga piraso sa panagang ngadto sa mga baroganan o mga hiyas nga girepresentar, sama sa gihulagway sa Mga Taga-Efeso 6:14–17. Sa unsang paagi nga ang matag piraso sa panagang makatabang aron mapanalipdan kita gikan sa pagkadaotan? (Alang sa uban nga tabang, tan-awa sa “Dugang nga mga Kapanguhaan.”) Unsaon nato sa pagsul-ob kining panagang? Unsay atong mahimo aron mailhan ug mapalig-on ang bisan unsang mga kahuyang diha sa atong panagang?

mga kapanguhaan nga icon

Dugang nga mga Kapanguhaan

Unsa man ang ulohang bato sa pamag-ang?

Ang ulohang bato sa pamag-ang mao ang unang bato nga gipahimutang sa usa ka pundasyon. Nagsilbi kini isip sukaranan nga punto alang sa pagsukod ug pagpahimutang sa ubang mga bato, nga kinahanglan gayod nga mapahiangay sa ulohang bato sa pamag-ang. Tungod kay nagdala kini sa gibug-aton sa tibuok nga gambalay, ang ulohang bato sa pamag-ang kinahanglan nga solido, lig-on, ug kasaligan (tan-awa sa “The Cornerstone,” Ensign, Ene. 2016, 74–75).

Ang hinagiban sa Dios.

Mabinaksan ang inyong mga hawak sa kamatuoran:Kining piraso sa panagang susama sa usa ka bakos nga gihigot sa tibuok hawakan. Ang pulong nga mabinaksan nagpasabot usab og gilig-on, o gisuportahan.

Taming sa katarong:Ang panagang sa dughan nanalipod sa kasingkasing ug sa ubang mahinungdanong mga bahin sa lawas.

Tiil hinapinan sa pagpangandam sa ebanghelyo sa kalinaw:Nagpasabot kini sa makapanalipod nga tabon alang sa mga tiil sa sundalo.

Taming sa hugot nga pagtuo:Ang taming makapanalipod sa hapit bisan unsa nga bahin sa lawas gikan sa nagkadaiyang pagpangataki.

Kalo nga puthaw sa kaluwasan:Ang usa ka kalo nga puthaw [helmet] manalipod sa ulo.

Espada sa Espiritu:Ang espada nagtugot kanato nga molihok batok sa kaaway.

Pagpalambo sa Atong Pagtudlo

Paningkamot alang sa Kristohanon nga paghigugma. Ang imong mga inter-aks[i]yon uban niadtong imong gitudloan kinahanglang naaghat pinaagi sa gugma. Ikaw ug ang imong mga tigkat-on mapanalanginan samtang mag-ampo kamo aron mapalambo ang Kristohanon nga paghigugma ug magtinguha og mga paagi sa pagpakita niini (tan-awa sa Pagtudlo sumala sa Pamaagi sa Manluluwas, 6; Moroni 7:48).