Si Pablo nagdiktar og usa ka sulat gikan sa bilanggoan

Oktubre 9–15

Mga Taga-Filipos; Mga Taga-Colosas

“May Kalig-on Ako sa Pagsagubang sa Tanan Tungod sa Gahom nga Gihatag Kanako ni Kristo”

Sugdi pinaagi sa pagbasa sa Mga Taga-Filipos ug Mga Taga Colosas, ug mainampoong mamalandong sa doktrina nga gusto sa Ginoo nga imong itudlo. Tugoti ang Espiritu nga mogiya kanimo samtang gikonsiderar nimo ang mga pangutana ug mga kapanguhaan nga imong magamit sa pagtudlo niining doktrina.

pagpaambit nga icon

Dapita ang Pagpaambit

Dapita ang mga sakop sa klase nga mopaambit og usa ka pulong o mga pulong nga gisummarize sa unsay ilang nakat-onan gikan sa Mga Taga-Filipos ug Mga Taga-Colosas ug dayon ipasabot kon nganong gipili nila kana nga pulong o mga pulong. Awhaga sila sa pagpaambit og mga bersikulo sa kasulatan isip kabahin sa ilang pagpasabot.

icon sa pagtudlo

Itudlo ang Doktrina

Mga Taga-Filipos 2:1–5, 14–18; 4:1–9; Mga Taga-Colosas 3:1–17

Kita mamahimong “bag-o” kon kita mosunod sa ebanghelyo ni Jesukristo.

• Mahimong gusto nimong tabangan ang imong klase sa pag-visualize kon unsay gipasabot sa “gihubo na man ninyo ang inyong daang pagkatawo uban sa iyang mga buhat” ug “gisul-ob na ninyo ang bag-ong pagkatawo” pinaagi ni Jesukristo (Mga Taga-Colosas 3:9–10). Sa pagbuhat niini, kamo mahimong mopakita og mga litrato sa kaniadto ug karon nga mga litrato sa butang nga karaan nga nabag-o na (sama sa usa ka piraso sa muebles [furniture], usa ka panimalay, o usa ka bisikleta). Ang mga sakop sa klase mahimong maghisgot kon sa unsang paagi nga mahimong “bag-o” pinaagi sa atong hugot nga pagtuo diha kang Jesukristo ug sa atong kaandam nga mosunod sa Iyang ebanghelyo. Isip kabahin niining panaghisgotan, mahimo nimong hangyoon ang katunga sa klase nga tun-an ang Mga Taga-Filipos 2:1–5, 14–18; 4:1–9 ug ang laing katunga tun-an ang Mga Taga-Colosas 3:1–17, nga motino sa mga kinaiya sa “daan nga kinaiya” ug sa “bag-ong kinaiya.” Mahimo usab nimong dapiton ang pipila ka sakop sa klase sa pagpaambit kon sa unsang paagi nga ang pagbaton og hugot nga pagtuo diha kang Jesukristo ug ang pagsunod sa Iyang ebanghelyo nakatabang kanila nga mahimong bag-ong mga tawo.

Mga Taga-Filipos 4:1–13

Makakita kita og hingpit nga kalipay diha kang Kristo, bisan unsa pa ang atong mga kahimtang.

• Bisan kon ang atong mga kahimtang lahi sa kang Pablo, makakat-on kitang tanan gikan sa iyang kaandam nga mahimong kontento ug magmaya sa tanang kahimtang sa iyang kinabuhi. Sa pagsugod og panaghisgotan bahin niining hilisgotan, mahimo nimong marebyo ang pipila sa mga pagsulay nga nasinati ni Pablo (tan-awa, pananglitan, 2 Mga Taga-Corinto 11:23–28). Mahimo dayon nimong hangyoon ang mga sakop sa klase sa pagrebyo sa Mga Taga-Filipos 4:1–13 aron makit-an ang tambag nga gihatag ni Pablo nga makatabang kanato aron magmaya, bisan pa sa mga panahon sa pagsulay.

• Tingali mahimo silang mopaambit og mga kasinatian sa dihang gibati nila “ang kalinaw sa Dios, nga lapaw sa tanang pagpanab[o]t” (Mga Taga-Filipos 4:7) o sa dihang mibati sila nga nalig-on “pinaagi kang Kristo” sa (`bersikulo 13) aron matuman ang butang nga dili unta nila mahimo sa laing paagi.

• Kon gusto nimong nga mopadayon nga suhiron kining hilisgotan, mahimo nimong hangyoon ang usa ka sakop sa klase nga mopaambit og pipila ka makapadasig nga mga istorya o mga pamahayag gikan sa pakigpulong ni Presidente RussellM. Nelson nga “Hingpit nga Kalipay ug Espirituhanon nga Pagsugakod” (Liahona, Nob. 2016, 81–84).

• Tungod kay nagkagrabe ang daotan sa kalibotan karon, ang mga sakop sa imong klase makabenepisyo gikan sa tambag ni Pablo nga “pun-a” ang inyong hunahuna sa mga butang nga maayo ug angayng daygon, sa mga butang nga matuod, ligdong, matarong, putli, matahom ug halangdon (Mga Taga-Filipos 4:8). Tingali mahimo nimong tahasan ang matag sakop sa klase (o ginagmay nga mga grupo sa mga sakop sa klase) og usa sa mga kinaiya nga nalista sa Mga Taga-Filipos 4:8 o Ang mga Artikulo sa Hugot nga Pagtuo 1:13. Makagamit ang matag usa nila sa Ang Giya ngadto sa Kasulatan sa pagpangita sa mga kasulatan mahitungod sa ilang gitahas nga kalidad ug mopaambit sa klase unsa ang ilang makit-an. Mahimo usab silang mopaambit og mga ehemplo niana nga kinaiya diha sa kinabuhi sa mga tawo. Sa unsang paagi nga kita “naninguha sa pagpangita niining mga butanga”?

Mga Taga-Colosas 1:12–23; 2:2–8

Kon ang atong hugot nga pagtuo “nakagam[o]t” diha ni Jesukristo, mapalig-on kita batok sa kalibotanong mga impluwensya.

• Ang pagpamatuod ni Pablo bahin sa Manluluwas nga makita diha sa Mga Taga-Colosas 1:12–23; 2:2–8 naghatag og maayong oportunidad alang sa mga sakop sa klase aron makapamalandong ug makapalig-on sa ilang kaugalingong hugot nga pagtuo. Ang mga sakop sa klase mahimong mosiksik niining mga bersikulo aron makit-an ang mga butang nga makapalig-on sa ilang hugot nga pagtuo diha kang Jesukristo. Unsa man ang buot ipasabot sa “nakagamot ug nakabarog diha kang [Jesukristo]”? (Mga Taga-Colosas 2:7). Ang hulagway sa usa ka kahoy diha sa latid karong semanaha sa Dali, Sunod Kanako—Alang sa mga Indibidwal ug mga Pamilya makatabang sa mga sakop sa klase sa paghisgot niini nga bersikulo. Unsa may makapalig-on o makapahuyang sa mga gamot sa kahoy? Sa unsang paagi nga ang “nakagamot ug nakabarog diha [kang Jesukristo]” makapalig-on kanato batok sa kalibotanong mga impluwensya? (tan-awa sa Mga Taga-Colosas 2:7–8; Tan-awa usab sa Helaman 5:12; Ether 12:4).

• Mahimo nimong dapiton ang mga sakop sa klase sa paglista og mga butang diha sa Mga Taga-Colosas 1:12–23; 2:2–8 nga nagtudlo sa atong mahimo aron malikayan ang “[pag]tonto” nga “makalipat-lipat” sa atong hugot nga pagtuo diha ni Kristo (Mga Taga-Colosas 2:8). Unsaon nato sa pagsuporta sa usag usa diha sa atong mga paningkamot sa pagsunod sa Manluluwas ug paglikay sa pagpanglimbong ni Satanas?

Pagpalambo sa Atong Pagtudlo

Paggamit og musika. Ang sagradong musika nagdapit sa impluwensya sa Espiritu Santo. Makamugna kini og kahimtang sa balaang pagtahod ug makadasig og pasalig ug aksyon. Ikonsiderar kon sa unsang paagi nga ang “ pagtinudloay ug pagpahimangnoay kamo uban sa tanang kaalam. Pag-awit kamog mga salmo ug balaang mga alawiton” mahimong kabahin sa inyong klase (Mga Taga-Colosas 3:16; tan-awa usab sa Pagtudlo sumala sa Pamaagi sa Manluluwas, 22).