11–17 ni Sepiteba

2 Korinica 1–7

“Mo Dou Veivinakati kei na Kalou”

Nio wilika na 2 Korinica 1–7 ena macawa oqo, vakasamataki ira eso na lewe ni kalasi—ira era gole mai na kalasi kei ira e sega. Ena vakalougatataki ira vakacava na ivakavuvuli ena wase oqo?

Sureta na Veiwasei

E rawa ni yaga vei ira na lewe ni kalasi na nodra rogoca na veivakasama eso ena sala me mana kina na nodra vulica na ivolanikalou. Vakarautaka e vica na miniti me baleta na ka oqo ena veigauna.

Vakavulica na iVunau

2 Korinica 1:3–7; 4:6–10, 17–18; 7:4–7

Noda veivakatovolei sa rawa ni vurevure ni veivakalougatataki.

• Sa rawa me vukei ira na kalasi na veika a sotavi a vakamacalataka o Paula kei na ivakasala e solia tiko ena 2 Korinica mera vakasamataka kina na kalougata e lako mai na nodra vakatovolei. Mo tekivuna na veivosaki, sa rawa mo kerea e dua na lewe ni kalasi me vakarau ka mai wasea me baleta na veivakatovolei kei na veivakalougatataki a yaco ena nona bula se kila beka e dua a vosota tu mai na veivakatovolei ka o vuli sara kina vakalevu. Mo qai solia kina kalasi e vica na miniti mera taleva lesu na 2 Korinica 1:3–7; 4:6–10, 17–18; kei na 7:4–7, mera raica kina na ka a vakavulica o Paula me baleta na inaki kei na veivakalougatataki ni veivakatovolei. Kerei ira na lewe ni kalasi mera wasea na veika era sa kunea. Sa rawa mo vakatura mera wilika e cake na tikina era raica kina e dua na ivakavuvuli ka qai wasea na ka a sotava se ivakadinadina e baleta na ivakavuvuli o ya.

• Me ikuri ni veivosaki, sa rawa mo ni lagata vata na serenilotu taleitaki ni kalasi e vakadinadinataka na veivakacegui kei na veivakalougatataki e solia na Tamada Vakalomalagi kei na iVakabula ena gauna ni noda vakatovolei—me vaka na “Na Yavu Tudei” (Sere ni Lotu,naba 43). Ni oti na lagasere, sureta na lewe ni kalasi mera raica e dua na malanivosa ena 2 Korinica 1 kei na4 era nanuma ni veidonui kei na itukutuku ena serenilotu.

2 Korinica 2:5–11

Na veivosoti e dua na veivakalougatataki eda solia ka ciqoma.

• Eda sotava kece na gauna ni dua a “veivakararawataki” ki na noda bula se noda matavuvale (tikina e 5). De rawa ni ra vaqaqara na lewe ni kalasi ena 2 Korinica 2:5–11, me ra kunea na ivakasala nei Paula me baleta na ka meda cakava vua e dua e vakacudrui keda. Sureti ira na lewe ni kalasi me ra railesuva na Maciu 5:43–48 kei na Luke 15:11–32 me ra vulica eso tale na ka me baleta na veika e dodonu me da cakava vei ira era vakacudrui keda. Eda sa vakamavoataki keda tiko vakacava kei ira tale eso ni da sega ni via veivosoti?

2 Korinica 5:14–21

Ena Veisorovaki i Jisu Karisito, sa rawa meda veivinakati tale kei na Kalou.

• E vuqa na tamata era gole mai i lotu ena gagadre mera toro voleka vua na Kalou, ka me veivosakitaki 2 Korinica 5:14–21 rawa ni vukei ira. Me tekivutaki, sa rawa kina lewe ni kalasi mera dikeva na ibalebale ni vosa veivinakati tale, e vinaka beka me da tekivu ena noda raica mada na vosa oqo ena ivolavosa. Na veivakararamataki cava e vakarautaka oqo baleta na veivinakati tale kei na Kalou? Na ikuri ni veivakararamataki cava eda na rawata mai na vosa “Atonement” ena Bible Dictionary? E vukei keda vakacava na veivakararamataki oqo meda kila vinaka kina na 2 Korinica 5:14–21? Sa rawa mo sureta na lewe ni kalasi mera wasea na nodra nanuma baleta na iVakabula, a rawa kina na nona Veisorovaki meda lai duavata tale kei na Kalou.

2 Korinica 7:8–11

Na rarawa va-Kalou e muataki keda kina veivutuni.

• E tiko ena2 Korinica 7:8–11 e dua na ivakamacala veivukei baleta na rarawa vakalou kei na kena itavi ena veivutuni. Na cava eda vulica baleta na rarawa vakalou mai na 2 Korinica 7:8–11 kei na vosa nei Peresitedi Dieter F. Uchtdorf ena “iKuri ni iVurevure”? Na cava e bibi kina na rarawa vakalou kina veivutuni?

• Ena ka marautaki me vakayaloqaqataki e dua na veivosaki raraba baleta na veivutuni. Ke sa vakakina, sa rawa mo cakava oqo: Vola ena papa Na veivutuni sai koya na . Kerei ira na lewe ni kalasi mera vakasaqara na sala me vakacavari kina na malanivosa oqo, ni ra vakayagataka na veika era vulica mai na 2 Korinica 7:8–11, vakakina mai na ivolanikalou kei na ivurevure tale eso e tiko ena itukutuku ni Ulutaga Vakosipeli “Repentance” (topics.ChurchofJesusChrist.org). Me da vakayagataka beka vakacava na ivakavuvuli oqo me vukea kina e dua me kila vinaka na ivakarau ni veivutuni dina?

iKuri ni iVurevure

Na rarawa vakalou e vakauqeta na veisau kei na inuinui.

E vakamacalataka o Peresitedi Dieter F. Uchtdorf:

“Na rarawa sa vaka na loma ni Kalou e vakauqeta na veisau kei na inuinui ena kaukauwa ni Veisorovaki i Jisu Karisito. Na rarawa vakavuravura ena dreti keda sobu, bokoca na inuinui, ka vakauqeti keda meda soli keda yani meda temaki tikoga.

“Na rarawa sa vaka na loma ni Kalou e veimuataki ki na saumaki mai kei na veisau ni yalo. E vakavurea meda cata sara na ivalavala ca ka taleitaka na valavala dodonu. E vakauqeti keda meda tucake ka lako voli ena rarama ni loloma i Karisito. Na veivutuni dina sai koya na veisau, e sega ni rarawa vakayago se rarawa ni vakasama” (“O sa na Rawata ena Gaauna Oqo!,” Liaona, Nove. 2013, 56).

Vakatoroicaketaki na Noda Veivakavulici

Okati ira era sasaga tiko. Eso na gauna era gadreva na lewe ni kalasi era sasaga bula tiko mera bau lomani talega. Sa rawa mo lesi ira mera na vakaitavi ena lesoni e tarava. Kakua ni yalolailai kera sega ni kauwai taumada mai kina nomu sasaga. (Raica na Veivakavulici ena iVakarau ni iVakabula, 8–9.)