tobu ni papitaiso ni valetabu

4–10 ni Sepiteba

1 Korinica 14–16

“Sa Sega ni Vu ni Veisei na Kalou, ia na Vakacegu Ga”

Ni bera ni talevi lesu na ituvatuva oqo, wilika na 1 Korinica 14–16. Vola na veika o vakauqeti taumada kina baleta na dina ena vukei ira nomu lewe ni kalasi, ka tomana nomu vakasaqara na ikuri ni veidusimaki ni Yalo nio vakavakarau mo veivakavulici.

ivakatakilakila ni veiwasei

Sureta na Veiwasei

Solia e vica na miniti kina lewe ni kalasi mera taleva lesu na 1 Korinica 14–16 ka raica e dua na tikina era nanuma ni vakaibalebale cake. Sureti ira mera raica e dua ena kalasi mera na wasea kina na nodra tikina ka vakamacalataka na vuna era digitaka kina.

ivakatakilakila ni veivakavulici

Vakavulica na iVunau

1 Korinica 14

Ni da soqoni vata, sa dodonu me da segata me da veivaqaqacotaki cake.

• Sa rawa mo vakayagataka na ivakavuvuli i Paula ena 1 Korinica 14 me veivakananumi ira na lewe ni kalasi ni rawa meda veivakatatataki cake vakataucoko—se veitokoni ka veilaveti—vakai keda ena gauna ni lotu. Dua na sala rawarawa me talevi lesu kina na wase oqo oya me volai ena vava e dua na taro, e vakaoqo Na cava meda lalawataka ni da dau soqoni vata? Sureta na lewe ni kalasi mera vakasaqara na isaunitaro ena 1 Korinica 14. Ena rawa me kunei na vakasama tale eso ena Moronai 6:4–5 kei na Vunau kei na Veiyalayalati 50:17–23. Ni ra wasea na kalasi na veika era kunea, sa rawa mo taroga na nodra nanuma baleta na sasaga ni kalasi mera rawata na lalawa oqo. Sa rawa mera wasea talega na gauna era vakila nira vakatatataki cake ena dua na ka a wasea e dua na lewe ni kalasi.

1 Korinica 15

Baleta ni sa tucaketale o Jisu Karisito, eda na tucaketale vakakina.

• Ena sala cava mo na vakayagataka kina na ivakadinadina i Paula ena 1 Korinica 15 me vaqaqacotaki kina na nodra ivakadinadina na lewe ni kalasi baleta na Tucaketale? Dua na sala oya me wasei rua na kalasi vaka ilawalawa ka kerea e dua na ilawalawa me raica na 1 Korinica 15 me baleta na revurevu ni ka eda na sotava kevaka a sega ni tucaketale o Jisu Karisito. Na ikarua ni ilawalawa me ra raica na veivakalougatataki eda sa ciqoma baleta ni sa Tucaketale o Koya. Mera qai vola na ilawalawa yadua ena vava na veika era sa vulica. Na cava era rawa ni vakuria ena nodra lisi ni ra wilika oti na itukutuku nei Elder D. Todd Christofferson ena “iKuri ni iVurevure”? Me vukei ira na lewe ni kalasi mera vakila na Yalo ena gauna ni veivosaki oqo, sa rawa mo vakaraitaka toka e dua na iyaloyalo ni iVakabula sa tucaketale (raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale) se vakatagitaka se lagata e dua na sere ni lotu baleta na Tucaketale.

• Me baleta ni a vosa o Paula vei ira na tamata era sega ni vakabauta na tucaketale, ena yaga kina nomu kalasi mera dramataka na ituvaki vata vakaoqo. Me vakataka, era na vaqaqacotaka vakacava edua na tamata era lomana ena nona vakabauta kina na Tucaketale? Na cava eda sa kunea ena 1 Korinica 15 ena vukei ira mera vakamacalataka na kena gadrevi kei na ivakadinadina ni Tucaketale i Jisu Karisito? Na ivolanikalou cava tale e rawa ni da vakayagataka? (Raica, me vakataka na, Luke 24:1–12, 36–46; Alama 11:42–45.)

  cadra ni matanisiga

  E vakavulica o Paula me baleta na Tucaketale ena nona tukuna tiko na “yago vakasilesitieli” me vaka na matanisiga (1 Korinica 15:40).

• Na1 Korinica 15 sa dua vei ira na vica wale na tikina ena ivolanikalou e tukuni tiko kina na papitaiso ena vukudra na mate (raica na tikina e 29; raica talega na Vunau kei na Veiyalayalati 128:18). De rawa ni ra wasea na lewe ni kalasi na reki era sa sotava ni ra qarava ttiko na papitaiso kei na cakacaka vakalotu eso me baleti ira nodra qase e liu. Cava na vuna e tukuna tiko kina o Paula na nodra papitaisotaki na mate me ivakadinadina ni Tucaketale? Ke ena veivuke ni veivosakitaki na vuna e dodonu mera papitaiso kina na mate, raica na itukutuku ena Gospel Topics ni “Baptisms for the Dead” (topics.ChurchofJesusChrist.org). Na vidio “Glad Tidings: The History of Baptisms for the Dead” (ChurchofJesusChrist.org) e vakamacalataka na iwalewale a vakalesui mai kina na ivakavuvuli oqo ena noda gauna.

ivakatakilakila ni ivurevure

iKuri ni iVurevure

Na Bibi ni Tucaketale

E vakavulica o Elder D. Todd Christofferson:

“Vakasamataka mada vakamalua na vakasakiti ni Tucaketale ena kena vakameautaka vakaoti sara na ivakatakilakila dina i Jisu na kai Nasereci kei na veiqati kei na taro vakavuku eso lelevu ni bula. Kevaka a tucake tale vakaidina saraga o Jisu, e vakamuria koto vakadodonu nio Koya e sa dua na tamata bula vakalou. E sega tale ni dua na tamata e tu vua na kaukauwa vakaikoya me mai bula tale ni sa mate oti. Baleta ni tucaketale o Koya, o Jisu a sega ni rawa walega ni mai matai, qasenivuli, ivakavuvuli, se dua na parofita. Baleta ni a tucaketale o Koya, sa dua na Kalou o Jisu, io na Luvena Duabauga sa Vakatubura na Tamada.

“Ia, na ka a vakatavulica o Koya e sa dina; Sa sega ni rawa ni lasu na Kalou.

“Ia, o Koya na Dauveibuli kei vuravura, me vaka a tukuna o Koya.

“Ia, sa ka dina o lomalagi kei eli, me vaka a vakatavulica o Koya.

“Ia, sa dua tiko na vuravura ni yalo, ka a sikova o Koya ni oti na Nona mate.

“Ia, ena lako tale mai o Koya, me vaka erau tukuna na agilosi, ka ‘vakatulewa vakatakikoya e vuravura taucoko.’

“Ia sa dua tiko na tucaketale kei na icavacava ni veilewai me baleti keda taucoko” (“Na Tucaketale i Jisu Karisito,” Liaona, Me 2014, 113).

Vakatoroicaketaki na Noda Veivakavulici

Mo na kilai ira o vakavulica tiko. E sega ni rau tautauvata e rua na tamata; na tamata yadua e duatani nodra tubucake mai, inakinaki, kei na taledi eso. Masulaka mo kila na sala cava mo vakayagataka kina oqo mo cokonaki ira o vakavulica. Ni ko kilai ira vinaka o vakavulica, o na tauyavutaka kina na veigauna ni veivakavulici e vakaibalebale cake ka taleitaki ena vukudra (raica na Veivakavulici ena iVakarau ni iVakabula, 7).