soqoni ni sakaramede

28 ni Okosita–3 ni Sepiteba

1 Korinica 8–13

“Ia Koi Kemudou na Yago i Karisito”

E vakavulica o Elder Richard G. Scott ni “rawa mo sega ni rogoca na veidusimaki taleitaki duadua, vakayadua ni Yalotabu” kevaka eda sega ni vola ka cakava “na imatai ni veivakauqeti e lako mai vei [keda]” (Na Rawati ni Veidusimaki Vakayalo,”,” Liaona, Nove. 2009, 8).

ivakatakilakila ni veiwasei

Sureta na Veiwasei

Ena 1 Korinica 8–13, vakatavulica o Paula na dina ni kosipeli ena vakayagataki ni vosa vakatautauvata me vaka e dua na daucici ena dua na veitau cici, na yago ni tamata, kei na “lali sa tataqiriqiri” (raica na 1 Korinica 9:24–25; 12:13–26; 13:1). Sa rawa mo tarogi ira na lewe ni kalasi ena veika era sa vulica mai na veivakatauvatani oqo. E vukei keda vakacava na veivakatauvatani meda kila vinaka kina na dina ni kosipeli?

ivakatakilakila ni veivakavulici

Vakavulica na iVunau

1 Korinica 10:1–13

E dau vakarautaka na Kalou na sala meda drotani kina mai na veitemaki.

• O na vukea vakacava na kalasi mera kunea na dina kaukauwa ena 1 Korinica 10:13? Dua na kena vakasama me wasei na tikina ena malanivosa leleka, ka solia e dua kina lewe ni kalasi duidui, ka kerea na lewe ni kalasi mera cavuta na malanivosa ena nodra vosa ga. Me vakataka, na cava e dua tale na sala meda cavuta kina “ia sa yalodina na Kalou” se “Ni o na temaki o na rawa nio lako sivita”? Sa rawa mo wilika tale na tikina oqo, ena nomu vakayagataka eso na nodra itukutuku na lewe ni kalasi. Sa rawa kina kalasi mera wasea na gauna era a kunea kina ni sa dina na veiyalayala e tiko ena tikina oqo. Na ikuri ni veivakararamataki cava eda sa rawata mai na veitikina oqo ena Alama 13:27–28?

• Kakua walega ni raica tiko vakatabakidua na nona temaki e dua, ia mo raica matua mada na kena veivosakitaki na veitemaki e tiko ena 1 Korinica 10:13 ni a cavuta kina o Paula me, “koya ga sa vorata rawa na tamata.” Mera tekivu na lewe ni kalasi ena nodra raica na veitemaki sa veivakaroti tiko kina o Paula ena tikina 1–12. Sa rawa talega mera tukuna eso na ivakaraitaki ni veitemaki ni gauna oqo, me vaka na veitemaki mo lawaki ca, kakase, se vakalewai ira na tamata. Ena rawa vakacava vua e dua, ena veivuke kina na Kalou me, “drotaka” mai na veitemaki oqo?

1 Korinica 10:16–17; 11:23–30

Na sakaramede ena vakaduavatataki keda na lewe ni Lotu i Karisito.

• Na veitikina oqo ena vakauqeta na veivosakitaki ni sakaramede ena rawa ni vakaduavatataka na nomuni tabanalevu ena sasaga mo ni vaka na iVakabula. Sa rawa mo ni tekivu ena kena wiliki na 1 Korinica 10:16–17 ka dikeva na ibalebale ni vosa sa noda vata ena itukutuku oqo (me dua e raica na kena ibalebale ena dikisenari). E vukei keda vakacava na taurivaki ni sakaramede meda duavata kina? E veisemati vakacava kina lalawa oqo na ivakasala i Paula “me dikevi koya mada na tamata vakai koya? (1 Korinica 11:28).

1 Korinica 12

Na isolisoli vakayalo e soli me yaga vei ira na luvena na Tamada Vakalomalagi.

• Mera vukei na lewe ni kalasi mera raica na ivakaraitaki ni kena tarai cake na isolisoli oqo me vukea na tutaki ni Lotu, sureti ira mera vakasamataka na isolisoli vakayalo sa tu vei ira e tukuni tiko ena volanikalou. Baleta na vakasama eso, sa rawa mo lesi ira mera vakasaqara e dua na ivolanikalou e tiko ena “iKuri ni iVurevure” ka cavuta na isolisoli vakayalo era nanuma ni tiko vua na tamata oya. E rawa talega ni ra veitalanoataka na isolisoli vakayalo era raica vei ira vakataki ira. E veivakalougatataki vakacava vei keda na nodra isolisoli vakayalo na tamata oqo? Eda na vakayagataka vakacava na isolisoli vakayalo mera vakalougatataki kina na tamata ka vakatataki cake kina na yago i Karisito, se na Lotu? (raica na 1 Korinica 12:12–31; raica talega na 1 Korinica 14:12).

• Me vukei ira na lewe ni kalasi me ra kila na ivakarau me ra tara cake kina na isolisoli vakayalo, sureti ira me ra wilika na 1 Korinica 12:27–31; Moronai 7:48; 10:23, 30; Vunau kei na Veiyalayalati 46:8. Na cava e vakavulica vei keda na ivolanikalou oqo ena sala mera rawati kina na isolisoli vakayalo? E tara cake vakacava na isolisoli vakayalo meda vakataka Karisito? Sureti ira na lewe ni kalasi mera digitaka e dua na isolisoli era gadreva mera rawata ka vakasaqara na veivuke ni Turaga ciqomi kina.

1 Korinica 13

Na loloma sai koya na isolisoli vakayalo cecere duadua.

• Mera vukei na kalasi mera vakananuma vakatitobu na 1 Korinica 13 ka vakasamataka e dua na tamata era kila sa ivakaraitaki vinaka ni dua se sivia na ituvaki ni loloma e vakamacalataka tiko o Paula. Sa rawa me vica na lewe ni kalasi mera vakamacalataka na tamata era sa vakasamataka kei na gauna a vakaraitaka kina na tamata oqo na loloma. Sa rawa mo vola vakatikina eso na tiki ni ivakamacala nei Paula ena vava ka sureta na kalasi mera wasea na vakasama me baleta na ibalebale ni “dauvosota vakadede” se “sega [ni] dau cudrucudru rawarawa” (1 Korinica 13:4–5). E vakaraitaki vakacava na iVakabula ena itovo oqo na loloma? Na ikuri ni dina cava e vakavulica na Moronai 7:46–48 me baleta na loloma cecere?

ivakatakilakila ni ivurevure

iKuri ni iVurevure

Na ivakaraitaki vakaivolanikalou ni isolisoli vakayalo.

• Na Vakatekivu 40–41

• Ruci 1

• 1 Tui 3:5–15

• Maciu 1:18–24; 2:13–15, 19–22

• Luke 1: 26–38

• Joni 11:20–27

• Cakacaka 3:1–8; 5:12–16

• Momani 1:1–5

• Ica 2:14–25; 3:1–20

• Vunau kei na Veiyalayalati 6:5, 10–12

• Mosese 6:22–27, 31–43; 7:2–4, 13, 17–21

Vakatorocaketaki Noda Veivakavulici

Mo bulataka na ivakavuvuli o vakatavulica. Nio bulataka na ivakavuvuli o vakavulica tiko ena vukea me kaukauwa na nomu ivakaidinadina. E vakavulica o Paula, “Sa lesia vakakina na Turaga me ra bula e na itukutuku vinaka ko ira era sa tukuna na itukutuku vinaka” (1 Korinica 9:14).