E vosa tiko o Jisu vua e dua na gonelailai

18–24 ni Sepiteba

2 Korinica 8–13

“Ko Koya sa Solia ena Marau sa Vinakata na Kalou”

Nio wilika na 2 Korinica 8–13, vakasamataki ira o vakavulica tiko ka tuvanaka na itaviqaravi ena vukea mera kunea na ivakavuvuli ena veiwase oqo. Mo taleva lesu na ituvatuva oqo baleta na ikuri ni vakasama.

ivakatakilakila ni veiwasei

Sureta na Veiwasei

Oqo e dua na sala mera sureti kina na lewe ni kalasi mera wasea na veika era vulica mai na 2 Korinica 8–13: kerea e vica vei ira mera vola ena vava ni volavola e dua na malanivosa taleitaki mai na nodra wiliwili ka wasea na vuna e vakaibalebale kina vei ira na veimalanivosa oqo.

ivakatakilakila ni veivakavulici

Vakavulica na iVunau

2 Korinica 8:1–15; 9:6–15

Era marautaka na yalododonu mera wasea na cava era vakalougatataki ira kina na dravudravu kei na vakaleqai.

• Sa vakarota na Kalou vei ira na Nona Yalododonu mera veivuke ena nodra qaravi na vakaleqai, ka sa rawa ki na itukutuku oqo ena 2 Korinica 8–9 me vakauqeta nodra sasaga na lewe ni nomu kalasi. Me vukea mera kunea na itukutuku oqo, mo vola ena vava na taro vakaoqo Cava na vuna meda soli-ka kina? kei na Sala cava meda soli-ka kina? Me veimama ni kalasi mera vakasaqara na isaunitaro ena 2 Korinica 8:1–15, kei na ikarua ni veimama mera vakasaqara ena 2 Korinica 9:6–15. (Rawa nio vakamacalataka ni wase 8, tikina e 1–5, a vakamacalataka kina o Paula na nodra ivakaraitaki ni yalo lomasoli na Yalododonu mai Masitonia.) Ena vukei keda vakacava na ivakavuvuli i Paula meda qaravi ira vakavinaka cake kina na dravudravua kei na vakaleqai?

2 Korinica 11:1–4

E dodonu meda vakanamata kna “rawarawa sa tu vei Karisito.”

• Eso na gauna era sa uabaleti na lewe ni Lotu ena sasaga ni bula—oka kina na veika era rawa ni raica ni ra sasaga tiko ni dua na Yalododonu Edaidai. Na ivakasala nei Paula me baleta na “rawarawa e tu vei Karisito” (2 Korinica 11:3)e rawa ni veivuke. Sa rawa mo ni wilika vata ka 2 Korinica 11:3 ka veivosakitaka na ibalebale ni malanivosa “na rawarawa duadua kei na kena savasava vei Karisito. Sa rawa mo kerei ira na lewe ni kalasi mera raitayaloyalotaka nira sureti mera vola ena dua na niusipepa e dua na ivakamacala ni kosipeli i Jisu Karisito, ka me 100 na vosa. Solia vei ira na gauna mera vola na nodra ivakamacala, ka mera wasea vakai ira yadua na veika era sa vola. Kevaka era gadreva na veivuke, e rawa ni ra raica na Joni 3:16–17; 3 Nifai 27:13–21; Na itukutuku nei Peresitedi Dieter F. Uchtdorf ena “iKuri ni iVurevure.” Sa rawa vei ira na lewe ni kalasi mera wasea na vakasama me baleta na sala me “vakarawarawataka kina na noda] bula vakatisaipeli.”

2 Korinica 12:5–10

Sa rauti keda vinaka na loloma soliwale ni iVakabula me vukea noda kunea na kaukauwa ni da sa malumalumu.

• Na cava o rawa ni kaya vua e dua na itokani a masulaka tiko me vakacegui mai na dua na malumalumu vakayago ia e nanuma ni masu oya e sega ni saumi mai? Sa rawa mo sureta na lewe ni kalasi mera tugana na taro oqo ni ra wilika vakanomodi 2 Korinica 12:5–10. Mera qai wasea na veivakararamataki mai na veitikina oqo ena rawa ni vukea na leqa oqo. Mera na wasea talega na gauna, ena loloma soliwale i Jisu Karisito,se na Nona Kaukauwa kei na veivuke, era kunea kina na kaukauwa ena nodra malumalumu. A vakauqeti vakacava na nodra bula mai na ka era sotava o ya? Na cava na vuna e bibi kina me da tokona na gauna ni Turaga?

ivakatakilakila ni ivurevure

iKuri ni iVurevure

Eda rawa ni vakarawarawataka noda kila meda bulataka na kosipeli.

E vakavulica o Peresitedi Dieter F. Uchtdorf:

“Kemuni na taciqu kei na ganequ, na bulataki ni kosipeli e sega ni gadrevi me dredre.

“E vakadodonu sara tu ga. E rawa ni vakamacalataki ga vaqo:

• Ni rogoci na vosa ni Kalou ena inaki gumatua ena vakavuna noda vakabauta na Kalou ka nuitaka na Nona yalayala.

• Na levu ga ni noda vakanuinui vua na Kalou, na levu ni kena vakasinaiti na yaloda ena loloma ena Vukuna kei keda.

• Ena vuku ni noda lomana na Kalou, eda gadreva me da muri Koya ka veitaudonuitaka na noda ivalavala kei na Nona vosa.

• Baleta ni da lomana na Kalou, eda vinakata me da qaravi Koya; eda vinakata me da vakalougatataka na nodra bula na tani ka vukei ira na dravudravua kei na vakaleqai.

• Na levu ni noda lakova na sala ni bula vakatisaipeli oqo, na levu ni noda gadreva me da vulica na vosa ni Kalou.

“Ka na vaka tiko oya, na ikalawa yadua e kauti keda ki na kena e tarava ka vakasinaiti keda ena vakabauta vakalevutaki tikoga, inuinui, kei na loloma cecere.

“E totoka na kena rawarawa, ka totoka na kena yaga.

“Kemuni na taciqu kei na ganequ, kevaka o vakasamataka tiko ni kosipeli oqo e sega tiko ni vinaka vei iko, au sa sureti iko mo kalawa e muri, raica na nomu bula mai na vanua cecere cake, ka vakarawarawataka nomu cakava na bula vakatisaipeli. Vakanamata kina ivunau, ivakavuvuli, kei na ivakavakayagataki taumada ni kosipeli. Au yalataka ni na tuberi iko ka vakalougatataki iko na Kalou ena nomu sala ki na bula vakasinaiti, ka na yaga vakavinaka cake vei iko na kosipeli” (“E Yaga,” Liaona, Nove. 2015, 22).

Vakatoroicaketaki na Noda Veivakavulici

Cakacaka vata kei na lewe ni matavuvale. “O ira na tamata era kaukauwa duadua na nodra veivakauqeti vua e dua na tamata—me baleta na ka vinaka se ca—vakalevu o ira era tiko vata ena nodra itikotiko. Baleta ni vanua ni bulataki kei na vuli kosipeli na itikotiko, na nomu sasaga mo vaqaqacotaka e dua na lewe ni kalasi ena mana sara ni ko cakacaka vata … na lewe ni matavuvale eso” (Veivakavulici ena iVakarau ni iVakabula, 8).