A sikovi Paula e valeniveivesu na iVakabula sa tucaketale (raica na Cakacaka 23:11). Sa rawa ni sereki keda o Jisu Karisito mai na “ivua ni veivakabobulataki” (Kalatia 5:1).

25 ni Sepiteba–1 ni Okotova

Kalatia

“Dou Lako Voli e na Yalo Tabu”

Nio wilika ena masumasu ka tugana na Kalatia, ena vakavulici iko na Turaga ena ka mo vakavulica ki na nomu kalasi. Na volai ni nomu nanuma e vakaraitaka na vakavinavinaka vua na Kalou me baleta na Nona veivuke.

Sureta na Veiwasei

Na vulici ni ivolanikalou e muataki kina veivosaki e vakaibalebale cake vata kei na matavuvale se itokani. A yaco beka oqo vei ira na lewe ni nomu kalasi ena macawa oqo? Sureti ira me ra wasea na veika era sa sotava.

Vakavulica na iVunau

Kalatia 1:6–7; 3:1–5; 4:8–21; 5:1, 13–14

Na kosipeli i Jisu Karisito e solia na bula sereki.

• Na vulici ni dua na ivolanikalou ena rawarawa cake ni da kila tiko na vuna a volai kina. Ena vuku ni ka oqo, ena rairai vinaka mo tekivuna nomuni veivosaki baleta na Kalatia ena taro vakaoqo “Na cava o nanuma a inaki nei Paula me vola kina na ivola oqo?” se “Na leqa cava a saga tiko o Paula me walia?” Sureta na lewe ni kalasi mera vakasaqara na ivakatakilakila ena Kalatia 1:6–7; 3:1–5; 4:8–21. E baleti keda vakacava na itukutuku nei Paula nikua?

• Era nanuma eso na Yalododonu e Kalatia ni sa gadrevi mera bulataka tikoga na lawa i Mosese. Kivei Paula, oqo sa vaka na bula voli ena “ivua ni bobula” ni vakatauvatani ki na bula sereki e solia na lawa i Karisito (Kalatia 5:1). Mera vukei na lewe ni nomu kalasi mera vakadikeva na ivakavuvuli i Paula me baleta na bula galala kei na bobula, sa rawa mo tarogi ira mera tukuna eso na itovo kei na ivakarau ena yalana na noda tubu vakayalo kei na toso (me vakataka na itovo vakavanua, itovo ca, vakabauta lasu, se vakanamata ki na itovo vakayago ka segai na veisau ni yalo). E tukuna na Kalatia 5:1, 13–14, meda na kunea vakacava na bula galala mai na bobula vakayalo? Eda vakila vakacava na veisereki e kunei vei Jisu Karisito? Eda na sauma vakacava vua e dua e nanuma ni bulataki ni kosipeli e yalana na bulataki ni galala yadua?

Kalatia 5:16–26

Ke da sa “lako voli ena Yalo Tabu,” eda na ciqoma na “vua ni Yalo Tabu.”

• E vuqa na tamata era sasaga tiko mera kila na veivakauqeti ni Yalo. NaKalatia 5 e rawa ni veivuke. Sa rawa mo tekivu ena nomu kerei ira mera vakasaqara ena Kalatia 5:22–25 na vosa a vakayagataka o Paula me vakamacalataka kina na vua ni Yalo. Na cava na vuna e vosa vakaibalebale vinaka kina na vuanikau me tukuna na veivakauqeti ni Yalo kivei keda? Sa rawa talega kina lewe ni kalasi mera wasea na kena dina na vuanikau oqo ki na nodra bula se vei ira na tamata era kila. Eso tale na ivurevure me ra dikeva e oka kina na Maciu 7:16–18; Joni 14:26–27; Moronai 7:13–17; Vunau kei na Veiyalayalati 11:12–13; kei na itukutuku nei Peresitedi GordonB. Hinckley ena “iKuri ni iVurevure.”

Sa rawa meda ciqoma na “vua ni Yalo Tabu” ni da vakasaqara.

Kalatia 6:7–10

Ni da kaburaka “na ka ni Yalo Tabu,” eda na tamusuka na kena veivakalougatataki ena kena gauna.

• Na vulici ni Kalatia 6:7–10 ena vukei ira na lewe ni kalasi mera vakasama vakatitobu me baleta na revurevu balavu ni nodra digidigi. Ni gadrevi mera vukei, mo kauta mai eso na veimataqali sorenivuata, vata kei na vuna, vuata, se kakana draudrau era tubu mai na sorenivuata yadua oqo (se kauta mai na kedra iyaloyalo). Sa rawa mera cakacaka vata na lewe ni kalasi mera veisataka donu na sorenivuata kei na ka e vuataka. Sa qai rawa mera wilika na tikina e 7–10 ka veivosakitaka vata na ibalebale ni kakaburaki “ki na [ka] vakayago” vakakina “ki na Yalo Tabu.” (Ena rawa ni veivuke na itukutuku nei Elder Ulisses Soares ena “Additional Resources” Na cava eda na tamusuka ni da kakaburaki vakayago? Na cava eda na tamusuka ni da kakaburaki ena Yalo? (raica na Kalatia 5:22–23).

• Eso na lewe ni kalasi era vakila beka na “ceguoca ena caka vinaka” (Kalatia 6:9)—e rairai beka ni ra sega ni vakadeitaka na vua ni nodra cakacaka. Rawa ni veivosakitaki na Kalatia 6:7–10 me vukea na veiwasei. Me vakatakilai na veitikina oqo, sa rawa mo sureta e dua ena kalasi me tukuna vakalekaleka na gauna a gadrevi kina vua me vosota ni saga tiko me vakatubura e dua na itei. Na cava e vakavulica vei keda na ka a sotava na tamata oqo, vata kei na Kalatia 6:7–10, me baleta na noda sasaga meda “lako voli ena Yalo Tabu”? (Kalatia 5:25).

iKuri ni iVurevure

Na vua ni Yalo.

E vakavuvulitaka o Peresitedi Gordon B. Hinckley: “Ko na kila na veivakauqeti ni Yalotabu mai na vua ni Yalotabu—sai koya e veivakararamataki, e buli keda cake, na veika e nuideitaki ka dodonu ka veilaveti ka veimuataki keda meda vakanananu vinaka cake ka vosa vinaka cake ka veiqaravi vinaka cake sa qai mai vua na Kalou” (Nodra iVakavuvuli na Peresitedi ni Lotu: Gordon B. Hinckley [2016], 121).

Kakaburaki ena Yalo.

E vakamacalataka o Elder Ulisses Soares: “Na kakaburaki ena Yalotabu sa kena ibalebale me na laveti keda cake na noda vakasama, vosa, kei na itovo kina nodrau ivakatagedegede vakalou na noda itubutubu vakalomalagi. Ia, na ivolanikalou e tukuna tiko ni veika vakayago sa ituvaki vakatamata se itovo ni tamata sa vakavuravura, ka yaco kina vei ira na tamata mera vakauqeti ena gagano, gagadre, dodomo, kei na ibili ni yago ka sega ni via vakauqeti ena Yalo Tabu” (“Maroroi Iko ena iYalava ni Turaga!,” Liaona, Me 2012, 39).

Vakatoroicaketaki na Noda Veivakavulici

Vukei ira na vuli voli mera veilaveti vakai ira. “O ira yadua ena nomu kalasi era ivurevure bulabula ni ivakadinadina, raititobu, kei na veika sotavi ena bulataki ni kosipeli. Sureti ira mera veiwasei ka veilaveti cake vakai ira” (Veivakavulici ena iVakarau ni iVakabula,, 5).