16–22 ni Okotova

1 kei na 2 Cesalonaika

“Vakataucokotaka na Veika e Lailai Tiko ena Nomu Vakabauta”

E vakavulica o Alama: “Mo dou kakua talega ni vakararavi vua e dua me nomudou ivakavuvuli se nomudou italatala, ko koya ga sa lesia na Kalou ka sa lako ena nona sala ka muria tiko na nona ivakaro” (Mosaia 23:14). Na cava e vakatura tiko na ivolanikalou oqo baleta na sala mo vakarautaki iko kina mo veivakavulici?

Sureta na Veiwasei

Solia vei ira na lewe ni kalasi e vica na miniti me ra raica mada vakatotolo na 1 kei na 2 Cesalonaika ka raica e dua na tikina e vakauqeti ira. Sureti ira mera wasea na nodra tikina vua e dua tale ena kalasi, ka kerea e dua vei ira na veisa oqo mera wasea na ka era vulica mai vei ira yadua.

Vakavulica na iVunau

1 Cesalonaika 1:5–8; 2:1–13

E dodonu vei ira na italai ni Turaga me ra vunau ena yalodina kei na loloma.

• A tekivuna o Paula na nona iVola vei Ira mai Cesalonaika ena nona veivakananumi vei ira na Yalododonu ena ivalavala e wasea kina o koya kei na so tale na kosipeli vei ira. Oqo ena rawa me madigi vinaka vei ira na lewe ni nomu kalasi mera vakadikeva na ivalavala ni nodra veivakavulici kei na vuli vakai ira. Sa rawa mo sureta na lewe ni kalasi mera wilika na 1 Cesalonaika 1:5–8; 2:1–13 ka raica na ivakavuvuli e baleta tiko na wasei mana ni kosipeli. Sa qai rawa mera vola na taro e yavutaki ena veitikina oqo ena vukea mera dikeva na nodra sasaga ni kena vakavulici na kosipeli vei ira na tamata. Taura mada, e dua na ka e rawa ni tarogi “Au sa ivakaraitaki tiko beka ni veika au kila tu?” (raica na 1 Cesalonaika 1:7). Ena vukei keda vakacava na noda muria na ivakavuvuli ena itukutuku oqo me vakavinakataka cake noda qaravi ira eda vakavulica?

1 Cesalonaika 3:9-13; 4:1-12

Ni da muri Jisu Karisito, e rawa ni vakasavasavataki keda o Koya.

• E vakavulica o Paula vei ira na Yalododonu e Cesalonaika ni “Sa sega ni kacivi keda na Kalou me da dukadukali, me da yalosavasava ga” (1 Cesalonaika 4:7). Me tekivuna e dua na veivosaki baleta na yalo savasava, sa rawa kina nomu kalasi se dua ga me lagata na“Meu Savasava Tu” (Sere ni Lotu,, naba 73). Kerea na lewe ni kalasi mera veivosakitaka na ivakarau ni yalo savasava e tukuni tiko ena serenilotu era taleitaka. Vola ena papa Meu savasava tu, me vakalevu … , ka sureta na lewe ni kalasi me ra raica na vosa se malanivosa mai na 1 Cesalonaika 3:9–13; 4:1–12 me vakacavari kina na yatuvosa. Eda na vakatorocaketaka vakacava na ivakarau oqo?

• Na veisureti me da yalo savasava e vaka me vakabekataki tu. Ena rawa me veivuke ke ra kila vinaka na lewe ni kalasi ni tarai cake ni yalo savasava e taura na gauna ka gadrevi kina meda “uasivi cake vakalevu sara” ni toso tiko na gauna (1 Cesalonaika 4:10). Vakamacalataki na ka me caka, gadrevi mo sureta e dua na lewe ni kalasi me vakamacalataka e dua na taledi se rawaka a yaco ka gadrevi kina na gugumatua tiko ga ena veigauna, me vakataka na cula lacadrau se vakatagitaka e dua na iyaya ni ivakatagi. E tautauvata vakacava oqo ki na sasaga mo yalo savasava? Sureta na lewe ni kalasi mera taleva lesu na 1 Cesalonaika 3:9–13; 4:1–12 ka veivakararamataki me baleta na sasaga ena taura me yaco kina na yalo savasava ena sala a vakamacalataka o Paula. Na cava e sa vukei keda kina meda toro cake yani meda yalo savasava?

1 Cesalonaika 4:11–12; 2 Cesalonaika 3:7–13

E dodonu meda cakacaka meda na qaravi keda vakai keda kei ira era tiko leqa.

• Na taro vakaoqo ena rawa me vakauqeta na kena veivosakitaki na ivakasala nei Paula me baleta na cakacaka: Na cava ena salamuria mai na vakawelewele? Na cava eso na veivakalougatataki ni cakacaka? Na cava o nanuma e tukuna tiko o Paula baleta na vosa “tiko malua” kei na “tiko vakamalua”? (1 Cesalonaika 4:11; 2 Cesalonaika 3:12). Sa rawa mo vola na taro vakaoqo ena papa mera tugana ka veivosakitaka na lewe ni kalasi ni ra wilika na 1 Cesalonaika 4:11–12 kei na 2 Cesalonaika 3:7–13. Na ivolanikalou cava tale e vukei keda meda kila vinaka na bibi ni cakacaka kei na ca ni vakawelewele? (raica na vakatutu ena “iKuri ni iVurevure”).

2 Cesalonaika 2

E dodonu me yaco taumada na vukitani ni bera na iKarua ni Lako Mai i Jisu Karisito.

• Ena rawa me veivuke na kena veivosakitaki e vica na vosa vakaibalebale era vakayagataka na parofita me vakamacalataki kina na Vukitani, me vaka na vukitani (raica na 2 Cesalonaika 2:3), na dausiga (raica na Emosi 8:11–12), curuma na qelenisipi na wolifa ca sara (raica na Cakacaka 20:28–30), kei na daliga milamila (raica na 2 Timoci 4:3–4). Sa rawa mo wasea na lewe ni kalasi vakayarurua ka kerea mera wilika e dua se rua na ivolanikalou oqo (se so tale o sa digitaka) ka vakamacalataka na veika era vakavulica na veitikina oqo baleta na Vukitani Levu. Na cava era a vakavulica na parofita baleta na Vukitani kei na veika ena salamuria mai?

• E dina ga ni na sega ni sotava na Lotu e dua tale na “lutu tani” (2 Cesalonaika 2:3)me vaka a yaco ena gauna makawa, e se rawa tikoga ni da lutu tani vakayadudua. Na cava e vakatura na 2 Cesalonaika 2 me baleta na kena rawa ni yaco na lutu oqo (raica na tikina 9–10) kei na sala cava eda rawa ni levea kina? (raica na tikina e 15–17).

iKuri ni iVurevure

Na ivolanikalou e baleta na cakacaka kei na vakawelewele.

• Nai Vakatekivu 3:19

• Maciu 21:28–32

• Mosaia 2:10–16

• Vunau kei Veiyalayalati 42:42; 58:27; 60:13; 75:29

Vakatorocaketaki Noda Veivakavulici

Vakayagataka na veimataqali iwalewale eso Ena rawarawa me vakamatautaki e dua ga na ivakarau ni veivakavulici, ia na duidui ivakarau ni veivakavulici e curumi ira yadua yani na lewe ni kalasi. Vakasaqara na sala me dau veisau na imoimoi ni nomu veivakavulici, me vaka na vakayagataki ni vidio, droini, se ivakatagi se solia vei ira na lewe ni kalasi na madigi mera veivakavulici (raica na Veivakavulici ena iVakarau ni iVakabula, 22).