2–8 ni Okotova

Efeso

“Me Vakavinakataki Kina ko Ira sa Lotu”

Ena yaco mai na vakasama kei na veivakauqeti baleta na cava kei na sala mo veivakavulici kina ni ko vulica ena masumasu na Efeso, na vosa ni koniferedi raraba sa oti, na ituvatuva oqo, kei na Lako Mai, Mo Muri Au—Baleta na Tamata Yadua kei na Matavuvale.

Sureta na Veiwasei

Vakasamataka mo sureti ira na lewe ni kalasi me ra vola ena vava ni volavola e dua na iyatuvosa lekaleka ni dua na ka era vulica ena macawa oqo. Digitaka e vica na isoqoni oqo, ka sureta na lewe ni kalasi era vola mera wasea na nodra nanuma.

Vakavulica na iVunau

Efeso 2:19–22; 4:4–8, 11–16

O ira na parofita kei na apositolo—kei keda taucoko—eda vaqaqacotaka ka vakaduavatataka na Lotu.

• E rawa beka mo tara cake vata kei nomu kalasi e dua na ka me vakaraitaka ni Lotu sa “tara cake e na nodra yavu nai apositolo kei na parofita” ka sa “kenai vakadei e na tutu ni vale” na iVakabula? (Efeso 2:20). Sa rawa talega kina lewe ni kalasi mera dregata vata na buloko se bilo pepa ka tuvanaki ira me dua na valececere se piramidi, kei Jisu Karisito kei ira na parofita mera kena yavu. Mo qai vakaraitaka na cava ena yaco ke sa kau tani na Karisito se ira na apositolo kei na parofita. Na cava e vakaibalebale vinaka kina na ivakadei ena tutu ni vale me baleti Jisu Karisito kei na Nona ilesilesi ena Lotu? (Me baleta na ivakamacala ni ivakadei ena tutu ni vale, raica na “iKuri ni iVurevure.”) Mera vakasaqara na kalasi ena Efeso 2:19–22; 4:11–16 na veivakalougatataki eda sa ciqoma baleti ira na apositolo, parofita, kei na iliuliu tale eso ni Lotu. Na cava eda rawa ni cakava meda tara cake kina na noda bula ena nodra ivakavuvuli?

Sa vatu ivakadei ni Lotu o Jisu Karisito.

• Kera a vakarorogo na nomu lewe ni kalasi kina koniferedi raraba ena iotioti ni gauna nia sota kina, sureti ira mera wasea na kena a veivuke na veika a vakavulici ena koniferedi me vakayacori kina na inaki e tukuni tiko ena Efeso 4:11–16.

• Solia e dua na gauna vei ira na lewe ni kalasi mera vola eso na “cakacaka” se noda itavi vaka lewe ni Lotu i Karisito (raica na Efeso 4:1)—me ivakaraitaki, na dauveituberi se dauveisiko ni vuvale, dua na itubutubu, dua na tisaipeli i Karisito, kei na so tale. Mera na qai veisau ivola vaka-lewe ni kalasi, wilika na Efeso 4:4–8, 11–16, ka wasea na sala sa veivuke kina na veikacivi kei na ilesilesi ena nodra ivola me vakatataki kina na yagoi Karisito. Eda na cakacaka vata vakacava meda sa duabau ni “sa dua bauga na Turaga, sa dua bauga na vakabauta, sa dua bauga na veipapitaisotaki”?

Efeso 5:25–6:4

Ni da muria na ivakaraitaki ni iVakabula ena vaqaqacotaka na noda veiwekani vakamatavuvale.

• Me vukei ira na lewe ni kalasi mera vakayagataka na ivakasala i Paula me baleta na veimaliwai vakamatavuvale, sa rawa mo vola na taro oqo ena vava ni volavola: Eda na muria vakacava na ivakaraitaki ni iVakabula ena ivakarau eda qaravi ira kina na lewe ni noda matavuvale? (raica na Efeso 5:25). Na cava na kena ibalebale vei iko mo “vakarokorokotaki rau na tamamu kei na tinamu”? (Efeso 6:1–3). Eda susugi ira vakacava na gone ena “ivunau kei na ivakavuvuli ni Turaga”? (Efeso 6:4). Sa rawa kina lewe ni kalasi mera veivosakitaka na taro oqo, vakailawalawa se vakalasi, ni ra wilika na ivolanikalou e veisemati. Sureti ira na lewe ni kalasi mera wasea na ivakaraitaki era sa raica vei ira na tamata era bula tiko ena sala e vakamacalataka o Paula.

Efeso 6:10–18

Na iyaragi ni Kalou ena taqomaki keda mai na veika butobuto.

• Na cava ena vakauqeta na lewe ni kalasi mera saga mera daramaka na iyaragi taucoko ni Kalou ena veisiga? Sa rawa mo vakarautaka e dua na itaviqaravi era na semata donu kina na kalasi na veitiki ni iyaragi ki na ivakavuvuli se bula savasava era matataka, me vaka e vakamacalataki ena Efeso 6:14–17. Ena veivuke vakacava na veitiki yadua ni yaragi me taqomaki keda mai na veika butobuto? (Ena vuku ni veivuke, raica na “iKuri ni iVurevure.”) Eda na tokara vakacava na yaragi oqo? Na cava eda rawa ni cakava meda kila ka vaqaqacotaka na malumalumu e tiko ena noda yaragi?

iKuri ni iVurevure

Na cava na vatu ivakadei?

Na vatu ivakadei sai koya na isevu ni vatu e vakadavori ena yavu. Sa kena inaki me idusidusi kina levu kei na vakatikori ni vatu tale eso, ni sa dodonu mera veidonui kei na vatu ivakadei. Baleta ni taura tu na bibi ni vale, na vatu ivakadei e dodonu me kaukauwa, tudei, ka nuitaki (raica na “The Cornerstone,” Ensign, Janu. 2016, 74–75).

Na yaragi ni Kalou.

Vauci na tolomudou ena lomadina:Na tiki ni iyaragi sa vaka na beleti e vesuki ena tolo. Na vosa vauci e kena ibalebale talega na vaqaqacotaki, vakaukauwataki, se vakatokonitaki.

Peleti ni sere ni buladodonu:Na peleti ni sereda e taqomaka na uto kei na gacagaca bibi tale eso.

Yava sa vakaivava e na cakacaka ni tukutuku vinaka ni veivinakati:Oqo e tukuna tiko na iubi e taqomak na yavadra na sotia.

iSasabai ni vakabautaNa isasabai ena rawa me taqomaka na tiki ni yago cava ga mai na veimataqali ravuravu cava ga.

iVakaruru ni ulu ni veivakabulai:Na isala e taqomaka na uluda.

iSeleiwau ni YaloNa seleiwau eda na valuta kina na meca.

Vakatorocaketaki Noda Veivakavulici

Saga na loloma sa Vakarisito. Na nomu veimaliwai kei ira na tamata o vakavulica e dodonu me mua ga ena loloma. O iko kei ira na vuli tiko oni na vakalougatataki nio masulaka mo ni tara cake na loloma sa Vakarisito ka vakasaqara na sala mo ni vakaraitaka kina (raica na Veivakavulici ena iVakarau ni iVakabula,, 6; Moronai 7:48).