9–15 ni Okotova

Filipai; Kolosa

“Au sa Rawata na Ka Kecega ena Vuku i Karisito o Koya sa Vakaukauwataki Au”

Tekivu ena nomu wilika na Filipai kei na Kolosa, ka tugana ena masumasu na vunau e gadreva na Turaga mo vakavulica. Me dusimaki iko na Yalo ni ko vakasamataka na taro kei na ivurevure o na vakayagataka mo vakavulica kina na vunau oqo.

Sureta na Veiwasei

Sureta na lewe ni kalasi mera wasea e dua na vosa se malanivosa e vakalekalekataka na veika era sa vulica mai na Filipai kei na Kolosa ka qai vakamacalataka na vuna era digitaka kina na vosa se malanivosa oya. Vakayaloqaqataki ira mera wasea na tiki ni ivolanikalou me tiki ni nodra ivakamacala.

Vakavulica na iVunau

Filipai 2:1–5, 14–18; 4:1–9; Kolosa 3:1–17

E yaco meda “vou” ni da bulataka na kosipeli i Jisu Karisito.

• Sa rawa mo vukea na nomu lewe ni kalasi mera raitayaloyalotaka na ibalebale ni “luvata tu na tamata makawa” ka “dou sa vakasuluma oqori sa vou” mai vei Jisu Karisito (Kolosa 3:9–10). Me caka oqo, e rawa nio vakaraitaka ni se bera vakakina ni sa oti na iyaloyalo ni dua na ka makawa sa veisautaki ki na dua na ka vou (me vaka e dua na tiki ni iyaya ni lomanivale, dua na itikotiko, se dua na basikeli). Sa rawa kina lewe ni kalasi mera veivosakitaka na sala eda rawa ni tamata “vou” kina ni da vakabauti Jisu Karisito ka sa lomada meda bula voli ena Nona kosipeli. Me tiki ni veivosaki oqo, sa rawa mo kerea e veimama ni kalasi me ra vulica na Filipai 2:1–5, 14–18; 4:1–9 kei na ikarua ni veimama me ra vulica na Kolosa 3:1–17, ka raica kina na ivakarau ni “tamata makawa” kei na “tamata vou.” Sa rawa mo sureta e vica na lewe ni kalasi mera wasea na sala a vukei ira kina na vakabauti Jisu Karisito kei na bulataka na Nona kosipeli mera tamata vou kina.

Filipai 4:1–13

Eda rawa ni kune reki vei Karisito, se cava ga na ituvaki ni noda bula.

• E dina ga ni duidui na noda bula mai vei Paula, sa rawa meda vuli taucoko mai na nona gadreva me tiko vakacegu ka reki tiko ena ituvaki kece ni nona bula. Me tekivu na veivosakitaki ni ulutaga oqo, sa rawa mo taleva lesu eso na veivakatovolei a sotava o Paula (raica, me vakataka, na 2 Korinica 11:23–28). Mo qai kerea na lewe ni kalasi mera taleva lesu na Filipai 4:1–13 mera raica na ivakasala i Paula a solia ena rawa me vukei keda meda reki, ena gauna mada ga ni veivakatovolei.

• E rawa mera wasea talega na gauna era a vakila kina “na vakacegu ni Kalou, sa uasivia na ka kece ga e kilai rawa” (Filipai 4:7) se ena gauna era a vakila ni ra sa vakaukauwataki “ena vuku i Karisito” (tikina 13) mera rawata kina e dua na ka era na sega ni rawata kevaka e sega.

• Kevaka o gadreva mo tosoya nomu vakadikeva na ulutaga oqo, sa rawa mo kerea e dua na lewe ni kalasi me wasea eso na itukutuku veivakauqeti se itukutuku mai na vosa nei Peresitedi Russell M. Nelson “Reki kei na Bula Vakayalo” (Liaona,, Nove. 2016, 81–84). Se rawa ni sarava na kalasi na vidio “Trial of Adversity” (ChurchofJesusChrist.org). Era kunea vakacava na reki vakacava na tamata era tukuni tiko ena vosa nei Peresitedi Nelson se na marama ena vidio, se cava ga na dredre ni nodra bula?

• Ena vuku ni sa tubu cake tikoga na veika tawakilikilia e vuravura nikua, O ira na leweni kalasi na ivakasala nei Paula o ya mera “nanuma” na veika sa savasava, e daulomani, rogorogo vinaka, dodonu, se na ka me dokai (Filipai 4:8). Sa rawa mo lesia kina lewe yadua ni kalasi (se ilawalawa lalai ni lewe ni kalasi) e dua na itovonibula vinaka era tiko ena Filipai 4:8 se Yavu ni Vakabauta 1:13. Sa rawa mera vakayagataka na iDusidusi Vakaiulutaga mera raica kina na ivolanikalou me baleta na nodra ilesilesi ni itovonibula vinaka ka wasea kina kalasi na ka era kunea. Sa rawa mera wasea talega na ivakaraitaki ni yavubula ena nodra bula na tamata. Eda na “vakasaqara vakacava na veika vakaoqo”?

Kolosa 1:12–23; 2:3–8

Ni sa “tudei” na noda vakabauta vua na gone turaga ko Jisu Karisito , eda sa vaqaqacotaki meda vorata na veivakayarayarataki vakavuravura.

• Na ivakadinadina i Paula baleta na iVakabula e tiko ena Kolosa 1:12–23; 2:3–8 sa madigi vinaka vei ira na lewe ni kalasi mera tugana ka vaqaqacotaka na nodra dui vakabauta. Sa rawa kina lewe ni kalasi mera vakasaqara na veitiki ivolanikalou oqo me kunei kina na veika ena vaqaqacotaka na nodra vakabauti Jisu Karisito. Na cava na ibalebale me da “tauyavutaki ka tarai cake vei [Jisu Karisito]”? (Kolosa 2:7). Na itaba ni dua na vunikau ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale kei na vidio “Spiritual Whirlwinds” (ChurchofJesusChrist.org) ena rawa ni vukei ira na lewe ni kalasi mera veivosakitaka na tikina oqo. Na cava e rawa ni vakaukauwataka se vakamalumalumutaka na waka ni vunikau? E vaqaqacotaki keda vakacava na noda “tauyavutaki ka tara cake vei [Jisu Karisito]” me saqata na veivakayarayarataki vakavuravura? (raica na Kolosa 2:7–8; raica talega na Ilamani 5:12; Ica 12:4).

• Sa rawa mo sureti ira na lewe ni kalasi mera vola na veika e vakatavulici ena Kolosa 1:12–23; 2:2–8 ni rawa ni da cakava me da levea kina na “ilawaki ca” e rawa ni “vakacacana” na noda vakabauti Karisito (Kolosa 2:8). Eda na veitokoni vakacava vakai keda meda sasaga meda muria na iVakabula ka drotani mai na ilawaki i Setani?

Vakatorocaketaki Noda Veivakavulici

Vakayagataka na sere ivakatagi. Na ivakatagi vakalou sa dau sureta na veivakauqeti ni Yalo Tabu. Ena rawa me tauyavutaka e dua na yalo ni vakarokoroko ka vakauqeta na yalodina kei na cakacaka. Mo raica na sala ni “veivakavulici kei na veituberi vakai keda ena same kei na serenilotu” me sa tiki ni nomu kalasi (Kolosa 3:16; raica talega na Veivakavulici ena iVakarau ni iVakabula, 22).