“Tebetembwa 11–17. 2 I-Korinto 1–7: ‘Kam Na Raoi Ma te Atua,’” Nakomai, Iriirai—Ibukin te Reirei n Tabati: Te Nu Tetemanti 2023 (2022)
“Tebetembwa 11–17. 2 I-Korinto 1–7,” Nakomai, Iriirai—Ibukin te Reirei n Tabati 2023
Tebetembwa 11–17
2 I-Korinto 1–7
“Kam Na Raoi Ma te Atua”
Ngkana ko wareka 2 I-Korinto 1–7 n te wiiki aei, iangoia kaain te kiraati aika—a roko n te kiraati ao naake aki. A na kanga reirei inanon mwakoro aikai ni kakabwaiaia?
Kaunga te Tibwatibwa
A kona kaain te kiraati n tekeraoi man ongoraeakinan iango imarenaia n aron kanakoraoan aia kamatebwai ni booki aika tabu. Karekei tabeua miniti ibukin aei n te tai teuana ma teuana.
Reirei te Reirei
2 I-Korinto 1:3–7; 4:6–10, 17–18; 7:4–7
A kona n riki katakira bwa te kakabwaia.
-
Taneiai aika e kabwarabwarai Bauro ao te reirei ae anga inanon 2 I-Korinto e kona ni buokiia kaain te kiraati n iangoi taekan kakabwaia aika kona n roko man katakiia. Ni moana te marooro, ko kona n tuanga temanna kaain te kiraati bwa e na roko n tauraoi n taetae bwa e na kanga te kataaki ni kakabwaia maiun teuanne ke neienne ke tera ae reiakinna teuanne ke neienne mairoun temanna ae e a tia n rotaki n te kataaki. Ngkanne ko kona n anganiia kaain te kiraati tabeua te miniti bwa a na rinanon 2 I-Korinto 1:3–7; 4:6–10, 17–18; ao 7:4–7, ni kakaei bwaai aika e reirei Bauro iaon kaantaninga ao kakabwaia aika irekereke ma kataaki. Tuangiia kain te kiraati bwa a na tibwaua te bwai ae a kunea. Ko na butia bwa a na warekia ni kabaibati te kibu are a kunea iai te aeka n reirei anne ao imwiina tibwaua te taneiai ke te koaua ae irekereke ma te reirei anne.
-
N reitia nakon am marooro, iangoia bwa a na bootaki kaain te kiraati n anenea aia anene ae a tatangiria are e kakoaua te mweraoi ao kakabwaia aika a anganiira Tamara are i Karawa ao te Tia Kamaiu n taai ni kataaki—n aron “Ai Matoara Nanoia Aika Raraoi” (Boki n Anene, nambwa. 85). Imwiin aia bootaki n anene, kaoa te membwa n te kiraati bwa e na tara te kibuntaeka inanon 2 I-Korinto 1 ao 4 are a namakinna bwa a tau ma taekan te anene.
Te kakabwarabure bon te kakabwaia aika ti anga ao ni karekei.
-
Ti a tia ni bane ni karekei taneiai ngkana e a tia temanna ni “karika te rawawata” ibukira ke ara utu (te kibu 5). A kona kaain te kiraati ni kamatebwaia 2 I-Korinto 2:5–11, ao n tarai reirei mairoun Bauro bwa ti na kanga n tabeakina temanna ae e a tia ni bure nakoira. Iangoia ni kaoia kaain te kiraati bwa a na rinanon Mataio 5:43–48 ao Ruka 15:11–32 bwa a na reiakinna riki bwa ti na kanga n tabe ma naake a tia ni bure nakoira. Ti kanga ni kamarakira ao tabeman ngkana ti rineia bwa ti na aki kabwara te bure?
Rinanon Ana Mwakuri ni Kamaiu Iesu Kristo, ti kona n raoiakinaki iroun te Atua.
-
A mwaiti aomata aika a roko nakon te taromauri ma te nano ni kani kaniia riki nakon te Atua, ao maroroakinan 2 I-Korinto 5:14–21 e kona ni buokiia. Ni moanakina, a kona kaain te kiraati n ukoukora nanon te taeka raoiakinaki, ni moanna man tarakin nanon te taeka man te rikitinare. Tera nonoori ae reke man te bwai aei ibukin raoiakinana ma te Atua? Tera nonoori irarikin anne aika ti karekei man te tabo n rin “Atonement” inanon te Bible Dictionary? A kanga nonoori aikai ni buokiira ni kaotaiara n 2 I-Korinto 5:14–21? Ko kona ni kaoia kaain te kiraati bwa a na tibwauai aia namakin ibukin te Tia Kamaiu, are ti a kona ni manga katiteuanaki iai ma te Atua n Ana mwakuri ni kamaiu.
Te nanokawaki ae kaota te karinerine nakon te Atua e kairiiri nakon te rairannano.
-
2 I-Korinto 7:8–11 e anga te kamataata ae ibuobuoki n te rawawata are tangiria te atua ao tabena n te rairannano. Tera ae ti reiakinna man te rawawata are tangiria te atua man 2 I-Korinto 7:8–11 ao ana taeka Beretitenti Dieter F. Uchtdorf’s inanon “Bwaai n Ibuobuoki Riki Tabeua”? Bukin tera te rawawata are tangiria te atua e kakawaki nakon te rairannano?
-
Ko bae n namakina anakin nanom ni kaunga te marooro iaon te rairannano. Ngkana ngaia anne, ko kona ni karaoa te bwai n aron aei: Koroia iaon te burakibooti Te rairannano e . Tuangiia kaain te kiraati bwa a na kakaai kawai ni katabwanina te kibuntaeka aei man 2 I-Korinto 7:8–11, n raonaki ma booki aika tabu ao bwaai n ibuobuoki riki tabeua aika kuneaki inanon te Gospel Topics article “Repentance” (topics.ChurchofJesusChrist.org). Ti na kanga ni kabonganai reirei aikai ni buokia ni kaotaa temanna n aron te rairannano ni koaua?
Bwaai n Ibuobuoki Riki Tabeua
Te rawawata are tangiria te atua e kaunga te bitaki ao te kantaninga.
Beretitenti Dieter F. Uchtdorf e kabwarabwara:
“Te Rawawata Are Tangiria te Atua e kaungai bitaki ao kaantaninga rinanon ana Mwakuri ni Kamaiu Iesu Kristo. Te Rawawata ni Bwain te Aonaaba e kabwarai nanora, e katoka te kantaninga, ao e anai nanora bwa ti aonga ni karekea riki te kataaki.
“Te rawawata are tangiria te Atua e kairiira nakon te rairaki ao te bitaki n nano. E karikiira bwa ti na riba te bure ao n tangira te raoiroi. E kaungaira bwa ti na teirake ao n nakonako n otan ana tangira Kristo. Te rairannano ni koaua bon taekan te onikaki, tiaki te tiringaki ke te kamarakaki” (“You Can Do It Now!,” Liahona, Nob. 2013, 56).
Kanakoraoan Ara Anga reirei
Kairekerekeia te koraki ake a rinanon te kangaanga. N tabetai kaain te kiraati ake a rinanon te kangaanga a ti kainnanoa namakinan ae a tangiraki. Iangoia n anganiia tabeia bwa a na ira te reirei are imwaira. Tai kabwara nanom ngkana aki butimwaei am kekeiaki n te moan tai. (Taraa Anga Reirei n Ana Kawai te Tia Kamaiu, 8–9.)