Tebetembwa 4–10

1 I-Korinto 14–16

“Tiaki te Tia Karika te Kiriwe te Atua, ma te Tia Karika te Raoi”

Imwain rinanoan te kibuntaeka aei, wareka 1 I-Korinto 14–16. Korea am moan namakin ibukin te koaua are ko karekea iaon te koaua e na buokiia kain am kiraati, ao n reitinako ni kakaei rakan kairiri mairoun te Tamnei ngkai ko katauraoi n angareirei.

Kaunga te Tibwatibwa

Anga tabeua te miniti ibukin te kiraati bwa e na rinanon 1 I-Korinto 14–16 ao kakaea te kibu ae a namakinna bwa e rang kakaawaki. Kaoia bwa a na kakaea temanna n te kiraati are e na tibwa aia kibu ao ni kabwarabwara bwa bukin tera a rineia.

Reirei te Reirei

1 I-Korinto 14

Ngkana ti ikotaki, ti riai ni kaotaira imarenara.

• Iangoia ni kabongana ana reirei Bauro n 1 I-Korinto 14 ni kauringiia kain te kiraati bwa a kona ni bane ni kaotaaki—ke ni boutoka ao n tabekakirake—imarenaia n te taromauri. Te kawai ae beebete n rinanon te mwakoro aei e kona ni korea te titiraki iaon te burakibooti, n aron Tera ae e riai n riki bwa ara kouru ngkana ti ikotaki ni kabane? Kaoia kain te kiraati bwa a na kakaei kaeka aika a kona n reke n 1 I-Korinto 14. Iango tabeua a kona n reke n Moronaai 6:4–5 ao Reirei ao Berita aika Tabu 50:17–23. Ngkai kain te kiraati a tibwai bwaai ake a kunei, iangoia n titirakiniia bwa tera aia namakin imwiin katiaan kouru aikai. A kona naba n tibwai taneiai ake a namakina iai bwa a kaotaki man tibwauan te bwai teuana irouia kain te kiraati.

1 I-Korinto 15

Ibukina bwa Iesu Kristo e mangauti, ngaira ni kabane tina bane ni manga kautaki.

• Ko na kanga ni kabongana ana koaua Bauro n 1 I-Korinto 15 ni kakorakora aia koaua kain am kiraati n te Mangauti? Teuana te kawai ko kona tibwaia kain te kiraati inanon uoua kurubu ao n tuanga te kurubu teuana bwa a na taratara 1 I-Korinto 15 ibukin bwaai ake a na riki are ti na kaitarai ngkana e aki mangauti Iesu Kristo. Te kurubu are teuana a kona n taratarai kakabwaia ake ti karekei ibukin Mangautina. Kurubu nako a kona ni korei iaon te burakibooti bwaai ake a reiakini. Tera ae a kona ni karini n aia rinan imwiin warekan ana taeka Unimwaane D. Todd Christofferson n “Bwaai ni Ibuobuoki riki Tabeua”? Ni buokaia kain te kiraati n namakina te Tamnei n tain te maroro aei, iangoia ni kaoti tamnein mangautin te Tia Kamaiu (taraa kamatata n te wiiki aei inanon Nakomai, Iriirai—Ibukiia Aomata n Tatabemaniia ao Utu) ke katangan ke anenean te kuna n taromauti iaon te Mangauti.

• Ibukina bwa Bwauro e kaekaia aomata ake a aki kakoaua n te mangauti, am kiraati a kona n reke tibwangaia man karaoan te kaotioti n te bwai are aekakin anne. Te katoto, a na kanga ni kona ni kakorakora ana onimaki temanna ae a tangiria n te Mangauti? Tera ae ti kunea n 1 I-Korinto 15 are e na buokiira ni kabwarabwara kainnanoan bwaai ni kakoaua ni Mangautin Iesu Kristo? Tera koroboki aika a tabu tabeua aika ti kona ni kabonganai? (Taraa, ibukin te katoto, Ruka 24:1–12, 36–46; Aramwa 11:42–45.)

  

  Bauro e angareirei iaon te Mangauti n arana “tamaroani bwaini karawa” kanga ai aron taai (1 I-Korinto 15:40).

• 1 I-Korinto 15 bon teuana tabo aika karako n koroboki aika a tabu are e taekinaki iai te bwabetito ibukiia mate (taraa kibu 29; taraa naba Reirei ao Berita aika Tabu 128:18). Tao a kona kain te kiraati n tibwa te kimwareirei are a tia n rinanona ngkai a karaoi bwabetito ke otenanti tabeua ibukiia aia bakatibu. Bukin tera e na kona Bauro ni kabotaua te bwabetito ibukia mate bwa te bwai ni kakoaua n te Mangauti? Ngkana e kona n ibuobuoki ni maroroakina bwa bukin tera te bwabetito ibukiia mate e kakaawaki, taraa atuun rongorongo n te Euangkerio “Baptisms for the Dead” (topics.ChurchofJesusChrist.org). Te witeo “Glad Tidings: The History of Baptisms for the Dead” (ChurchofJesusChrist.org) kabwarabwara bwa e kanga te reirei aei nin kaokaki n ara bong.

Bwaai n Ibuobuoki Riki Tabeua

Bonganan te Mangauti.

E reirei Unimwaane D. Todd Christofferson:

“Iangoia teutana te tai kakawakin te Mangauti n iangoakin teuana riki n te kabanea n tai kinaakin raoi Iesu Kristo are te I-Natareta ao taian kakauntaeka ao titiraki n te maiu. Ngkana arona bwa e mangauti Iesu, ngkanne E bon riai bwa bon kain karawa. Akea te aomata ae mamate ae iai irouna te mwaaka ni manga maiu riki imwiin ae e a tia ni mate. Ibukina bwa E a mangauti, e na aki kona Iesu n riki bwa te kabenta, te tia reirei, te rabi, ke te burabeti. Bukina bwa E a mangauti, Iesu e na riai n tia n riki bwa te Atua, riki Ana Rikitemanna te Tama.

“Ngaia ae, tera ae E taekin e boni koaua; e aki kona ni kewe te Atua.

“Ngaia ae, Ngaia bon te tia Karika te aonaaba, E taku.

“Ngaia ae, karawa ao mone a bon koaua, n aron are E reirei.

“Ngaia ae, iai te aonaaba n tamnei, are E kawaria imwiin Matena.

“Ngaia ae, E na manga oki, n aron are a taekinna anera, ‘ao e na tautaeka i aon te aonaaba.’

“Mangaia are, e na iai te mangauti ao te kabanea ni motikitaeka ibukiia ni kabane” (“Mangautin Iesu Kristo,” Riaona, Meei 2014, 113).

Kanakoraoan Ara Anga reirei

Kinaia naake ko reireiniia. Akea aomata aika uoman ae a na bon titebo raoi; aomata nako ake ko reireiniia iai aroia ae onoti, taratara, ao rinanin aia tarena. Tataro bwa kona ata arom ni kona ni kabonganaia bwa a na kabaeia naake ko reireinia. Ngkai ko uringiia raoi naake koreireiniia, ko kona ni karaoi taai n reirei aika kakaawaki aika ana ururingaki ibukiia (taraa Teaching in the Savior’s Way, 7).