bootaki n toa

Aokati 28–Tebetembwa 3

1 I-Korinto 8–13

“Ao Rabatani Kristo Ngkami”

Unimwaane Richard G. Scott e reirei bwa ti “kona ni kitana kawain te Tia Kamaiu ae moan te kakawaki ae tuai ongoraeaki” ngkana ti aki raweia ao ni kaeka nakon “moan wirikiriki ake a roko [nakoira]” (“To Acquire Spiritual Guidance,” Liahona, Nob. 2009, 8).

te aikaon ibukin te tibwatibwa

Kaunga te Tibwatibwa

Inanon 1 I-Korinto 8–13, Bauro e reirei koaua n te euangkerio man kabonganakin taian kabotau bwa taan ni kaboo n te biri, rabwatan te aomata, ao “te timbara ae tangitang” (taraa 1 I-Korinto 9:24–25; 12:13–26; 13:1). Ko kona n titirakiniia kaain te kiraati te bwai ae a reiakinna man taian kabotau aikai. A kanga kabotau ni buokiira ni kaotaira n ana koaua te euangkerio?

te aikaon ibukin te anga reirei

Reirei te Reirei

1 I-Korinto 10:1–13

E katauraoa te kawai te Atua ae ti na tokanikai iai man te kataaki.

• Ko na kanga ni buokiia kaain te kiraati ni kunei koaua aika korakora inanon 1 I-Korinto 10:13? Teuana te iango bwa ko na tibwaua te kibu n taekana aika bebete, angan temanna ma temanna kaain te kiraati te kibu aika kakaokoro bwa a na manga taekinna n oin aia taeka. Te katooto, tera aron taekinan “E kakaonimaki te Atua” n te kawai teuana ke “ni kaririaki n te aro ae kam aki kona n teimatoa iai”? Kam kona ngkanne ni manga wareka te kibu, ni kabonganai aia rongorongo tabeman kaain te kiraati. A kona kaain te kiraati n tibwauai aia nonoori are a kunei iai berita n te kibu aei bwa a koaua. Tera nonoori aika ti kona ni karekei man kiibu aikai Aramwa 13:27–28?

• Irarikin kabanean ara tai n taekin kaririakiia tabeman, kabanea riki ami iango iaon maroroakinan 1 I-Korinto 10:13 iaon kataaki ake, inanon ana taeka Bauro, “are e aki kona te aomata n rawa nako iai.” A kona kaain te kiraati ni moanna man kinakin kariiri aika e kauringiira iai Bauro inanon kiibu 1–12. A kona naba n iangoi katooto iaon kariiri n taai aikai, n aron kataaki n te aki kokoaua, te winnanti, ke ni motikan taekaia tabeman. E kanga te aomata, ma a na ibuobuoki te Atua, “ni kamaiuia” man kangaanga aikai?

1 I-Korinto 10:16–17; 11:23–30

E katiteuanaira te toa bwa kaain ana Ekaretia Kristo.

• A kona kiibu aikai ni kaunga te marooro bwa e na kanga te toa ni katiteuana am uoote n am kekeiaki n riki n aron te Tia Kamaiu. Ko kona ni moanna man warekan 1 I-Korinto 10:16–17 ao kakaea nanon te taeka reitaki n te kibu aei (e kona temanna ni kakaea kabwarabwaraana n te rikitinare). E kanga te bootaki n tauakin te toa ni buokiira n namakina te katiteuanaaki? E kanga ana reirei Bauro n “tirotiroa nanona te aomata” ni kaineti nakon te kouru aei? (1 I-Korinto 11:28).

1 I-Korinto 12

Bwaintituaraoi n tamnei a anganaki bwa a na kakabwaia natin Tamara are i Karawa ni kabane.

• Ni buokiia kaain te kiraati n tarai banna ni katooto bwa e kanga aron karikirakean aia bwai n tituaraoi ake bwain te tamnei n ibuobuoki ni karikirakea te Ekaretia, iangoia ni kaoia bwa a na iangoi bwaai n tituaraoi ake bwain te tamnei aika iai irouia aomata inanon booki aika tabu. Ibukin iango, ko kona ni mwiokoia bwa a na ukora teuana te kibu man booki aika tabu inanon “Bwaai n Ibuobuoki Riki Tabeua” ao n arana teuana te bwai n tituaraoi ake bwain te tamnei ae a taku bwa iai iroun te aomata anne. A kona naba n taetae iaon bwaai n tituaraoi ake bwain te tamnei aika a noori bon irouia n tatabemaniia. A kanga aia bwai n tituaraoi ake bwain te tamnei aomata aikai n riki bwa kakabwaia nakoira ni kabane? Ti na kanga ni kabonganai ara bwai n tituaraoi ake bwain te tamnei aikai ni kakabwaiaia tabeman ao ni kakorakora rabwatan Kristo, ke te Ekaretia? (taraa 1 I-Korinto 12:12–31; taraa naba 1 I-Korinto 14:12).

• Ni buokiia kaain te kiraati ni kaotaia bwa a na kanga ni karikirakei bwaai n tituaraoi ake bwain te tamnei, ni kaoia bwa a na wareka 1 I-Korinto 12:27–31; Moronaai 7:48; 10:23, 30; Reirei ao Berita aika Tabu 46:8. Tera ae a reireiniira koroboki aika tabu aikai n aron karekean bwaai n tituaraoi ake bwain te tamnei? E kanga karikirakean bwaai n tituaraoi ake bwain te tamnei ni karaoira n aron Kristo? Tuangiia kaain te kiraati bwa a na rinea te bwai n tituaraoi ae a tangiria ni karekea ao n ukoukora ana ibuobuoki te Uea ni karekean te bwai n tituaraoi anne.

1 I-Korinto 13

Te tangira ae kororaoi bon te kabanea ni korakora ni bwai n tituaraoi ake bwain te tamnei.

• Ko kona n tuangiia kaain te kiraati bwa a na karaurau n iangoa 1 I-Korinto 13 ao n iangoa temanna ae a ataia ae tebanna ni katooto ae raoiroi n teuana ke e mwaiti riki iaon te tangira ae kororaoi are e taekinna Bauro. Tabeman kaain te kiraati a kona ni kabwarabwara te aomata ae a iangoia ao te taneiai are e kabwarabwara te tangira ae kororaoi te aomata aei. Ko kona ni koroi mwakoron ana kabwarabwara Bauro iaon te burakibooti ao kaoia kaain te kiraati bwa a na tibwauai aia iango n aron nanon te aomata ae iai irouna te tangira ae kororaoi “e taotaona nanona” ke “e aki kakaiun” (1 I-Korinto 13:4–5). E kanga te Tia Kamaiu ni katotoong katein te tangira ae kororaoi aikai? Tera tabeua koaua ae reirei Moronaai 7:46–48 ibukin te tangira ae kororaoi?

te aikaon ibukin bwaai n ibuobuoki

Bwaai n Ibuobuoki Riki Tabeua

Katooto n te tamnei n ana bwai n tituaraoi te tamnei.

• Karikani Bwaai 40–41

• Ruta 1

• 1 Uea 3:5–15

• Mataio 1:18–24; 2:13–15, 19–22

• Ruka 1:26–38

• Ioane 11:20-27

• Mwakuri 3:1–8; 5:12–16

• Moomon 1:1–5

• Ita 2:14–25; 3:1–20

• Reirei ao Berita aika Tabu 6:5, 10–12

• Mote 6:22–27, 31–43; 7:2–4, 13, 17–21

Kanakoraoan Ara Anga reirei

Maiuakin reirei aika ko angareirei iaona. Maiuakinan reirei aika ko anga e na buokiko ni kaoti koauaia n te aro ae moan te korakora. E reirei Bauro, “Ao ai aron naba ana taeka te Uea ba E tua ba akana kaota te euangkerio ao a na kareke rooia n te euangkerio” (1 I-Korinto 9:14).