Korinto, Erene Maiaki, the Forum and Civic Center, korobanna iroun Balage Balogh/www.ArchaeologyIllustrated.com

Aokati 21–27

1 I-Korinto 1–7

“A na manga Bo Raoi n Te Nano ae Ti te Arona”

Unimwaane Jeffrey R. Holland e reirei bwa angina aomata a “roko [nakon te taromauri] n ukoukora te namakin n tamnei” (“A Teacher Come from God,” Ensign, May 1998, 26). Ngkai ko wareka 1 I-Korinto 1–7, tataro mwaaka n iangoia bwa tera ae ko kona ni buokiia ni karekea te namakin n tamnei n am kiraati.

Kaunga te Tibwatibwa

Iangoia ni kaoiia kain te kiraati bwa a na korei bwa a kanga ni karaoi bwaai are a tia n reiakini man koroboki aika a tabu. Tuangiia tabeman kaain te kiraati bwa a kona n tibwauai bwaai ake a korei.

Reirei te Reirei

1 I-Korinto 1:10–17; 3

Kain ana Ekaretia Kristo a kataia ni katiteuanaaki.

• Maroroakin tabeua moan mwakoro n 1 I-Korinto e na kona n reke bwa karekean te katiteuanaaki ae korakora riki irouia kain te uoote. Ko kona ni waaki man tuangakiia kain te kiraati bwa a na maroro ibukin te kirabu, kurubu, tiim, ke botaki tabeua ake a kaaini bwa a na karekea te namakin ni katiteuanaaki. Bukin tera te kurubu aei e namakina te katiteuanaaki? Ko kona ngkanne n rinanon tabeua ana reirei Bauro iaon te katiteuanaaki n 1 I-Korinto 1:10–13; 3:1–11. Tera ae a reirei iai kibu aikai, n raonaki ma taneiai, ibukin te bwai are e karekea te katiteuanaaki ao tera ae e na kona n rootaki iai? Tera anganano aika ti a tia ni karaoi bwa ti aonga ni katiteuanaaki? Tera kakabwaia aika a roko irouia naake a katiteuanaaki? Tara naba ana kabotau Titita Sharon Eubank n “Bwaai ni Ibuobuoki riki Tabeua.”

• Bauro e kabongana tamnein te kateitei ni kaunga te katiteuanaaki n 1 I-Korinto 3:9–17. E kanga te kabootau aei ni buoka am kiraati ni matata n te katiteuanaaki? Te katoto, imwiin warekan kibu aikai n ikotaki, ko kona n anganiia kain te kiraati n tatabemaniia te buraoki ao anganiia bwa a na ikotaki ni katea te bwai teuana. N te aro ra ae ti riki iai bwa “mwaneaban te Atua ngaira”? (1 I-Korinto 3:9). Ti kanga n riki ngaira bwa mwaneaban te Atua n tatabemaniira? Tera ae ti ikotaki ni kateia ngaira ma raora aika Itiaki? Tera ae ti kona ni karaoia ngkai ti katiteuanaaki n te uoote are ti aki kona ni karaoia ngkai temanna ma temanna?

1 I-Korinto 1:17–31; 2; 3:18–20

Ni katian ana mwakuri te Atua, ti kainnanoa wanawanan te Atua.

• Aio te iango ae na buokiia kain am kiraati ni katan iaon te Atua: Tibwaia kain te kiraati inanon aia kurubu ao tuangiia bwa a na rinanon 1 I-Korinto 1:17–31; 2; ke 3:18–20 ni kakaei taeka n aron rabakau ao nanobaba. Ngkanne a kona n tibwatibwa n aia kurubu bwaai ake a reirei iai kibu aikai ibukin ana mwakuri te Uea ae wanawana. Tera bwai n taekan te euangkerio aika a kona n tara n nanobaba irouia aomata tabeman? A kanga bwaai aikai ni kabwarabwara wanawanan te Atua? Tao kain te kiraati a kona naba n tibwai taneiai ake a onimakina iai wanawanan te Atua, nakon wanawanaia, ni katia Ana mwakuri.

1 I-Korinto 6:9–20

Rabwatara a bon tabu.

• Ni moana maroroakinan kibu aikai, kona bae ni korei titiraki iaon te burakibooti n aron aikai: E kanga ae tangiria te Uea ibukin taraakin rabwatara? E kanga ni kaokoro ma aron are e tangiria Tatan n iangoia ibukin rabwatara? Tera ae e nanonaki bwa rabwatara bon ana tembora te Tamnei ae Raoiroi? Kaoia kain te kiraati bwa a na kakaei kaekaan titiraki aikai n 1 I-Korinto 6:9–20 (tara naba Reirei ao Berita aika Tabu 88:15; Mote 6:8–9).

• Ami maroro ibukin kaitiakakin rabwatara e raonaki ma maroro ibukin tuan te itiaki. Tao ko kona n tuangiia kain te kiraati bwa tera ae a reiakinna mairoun Bauro—ai aron naba bwaai n ibuobuoki tabeua n te Ekaretia—are e kona ni buokiia ni kabwarabwara nakoia tabeman bwa bukin tera e kakaawaki te itiaki. Tabeua bwaai n ibuobuoki aikai a kona n reke rinanin “Bwaai ni Ibuobuoki riki Tabeua.”

Bwaai n Ibuobuoki Riki Tabeua

“Kakaokoro a kona ni bitaki nakon tamaroa.”

Titita Sharon Eubank e kabwarabwara bwa e kanga te kaingatoa n te tiim ni buru ni karekea te katiteuanaaki:

“A riai taan bweennarina ni tautaekini inaomataia ao ni kateimatoa te kakaonimaki nakoin oin aia konabwai n tatabemaniia. Aki tokanikai reeti man te kakaokoro. Kaimoa aika a tamaroa bon ikota aika a tamaroa—temanna are e na kaira te mwakuri, temanna are e na tauraoi n taua te bwai teuana, temanna are e buaka n te buaka, temanna are e na karekea te raoi. Akea te tia bwennarina ae e kakawaki riki nakon temanna, a bane ni kakawaki nakon te booti, ma ngkana a bwennarina n ti teuana, temanna e na riai ni karokoa nakon kainnanoia ma aia konabwai ake raona—teuare e uarereke baina e na kona teutana riki, teuare e abwabwaki baina e moamoa riki ana bwennarina.

“Kakaokoro a kona n oneaki nakon te tamaroa n onean mwiin te buakaka” (“By Union of Feeling We Obtain Power with God,” Riaona, Nov. 2020, 56; taraa Daniel James Brown, The Boys in the Boat: Nine Americans and Their Epic Quest for Gold at the 1936 Berlin Olympics [2013], 161, 179).

Kakabwaia n te wene n taanga ae itiaki.

Jeffrey R. Holland, “Personal Purity,” Ensign, Nov. 1998, 76.

David A. Bednar, “We Believe in Being Chaste,” Riaona, May 2013, 42.

“Chastity: What Are the Limits?,” “I Choose to Be Pure” (witeo), ChurchofJesusChrist.org

Kanakoraoan Ara Anga reirei

Kaota am kakoaua iroun Iesu Kristo. Bauro “ao I aki roko ma te rabakau n taetae ao te ataibwai, ni katanoata … ana taeka te Atua” (1 I-Korinto 2:1). Am koaua ae beebete iroun te Tia Kamaiu e kona ni karekea te bitaki ae tamaroa.