Bauro e korea te reta

Aokati 7–13

I-Rom 1–6

“Mwakan te Atua ni Karekea Maiun te Aomata ae Onimaki”

Tataro mwaaka ni wareka I-Rom 1–6 ma kaain am kiraati n am iango. E na buokiko aei ni kai namakina ana wirikriki te Tamnei ngkana ko katauraoiko n anga reirei.

te aikaon ibukin te tibwatibwa

Kaunga te Tibwatibwa

Iangoia n anganiia kaain te kiraati tabeua te miniti bwa a na kamatebwaia I-Rom 1–6 ibukin te kibu are e buokiia te Tamnei ae Raoiroi ni kaotaia. A kona n tibwaua te kibu are a rineia ma temanna are e tekateka irarikiia.

te aikaon ibukin te anga reirei

Reirei te Reirei

I-Rom 1:16–17

“I aki maama n ana euangkerio Kristo.”

• A mwaiti aomata aika a tia ni kamamaeaki ibukin aia koaua. Ni buokiia kaain te kiraati ngkana a tia n rinanon te aeka n taneiai anne, ko kona ni kaoia bwa a na wareka I-Rom 1:16–17 ao n iangoi bwaai aika tia n riki man ana boki Mwakuri are e kaotia iai Bauro bwa e aki maama n te euangkerio. A kona naba kaain te kiraati n tibwauai bukina ngkai a namakina te maama n ana euangkerio Iesu Kristo. Ke a kona n tibwauai aia nonoori are ngaia ke tabeman a kaotia bwa aki maama n te euangkerio.

  a katei baia kaain te kiraati

  Ti kona ni maama n tibwaua ara koaua n te euangkerio.

I-Rom 2:28–29

Te aro n riki bwa ana reirei ni koaua Iesu e kuneaki n ara motinnano mai inanora, tiaki ti n ara mwakuri.

• Ti na kanga n rinanon oin arora n riki bwa Ana reirei? Ana reirei Bauro nakoia I-Rom e kona ni buokiira n uringnga ni kabanei riki ara iango iaon “te nano [ao] n te tamnei” (I-Rom 2:29) nakon ara mwakuri itinaniku. Ni buoka am kiraati ni kaotaia n ana reirei Bauro, ko kona ni korea te taeka man I-Rom 2:28–29 iaon te burakibooti. Onea mwiin te taeka Iutaia ma Aika Itiaki ni Boong Aika Kaitira ao te taeka korotobibi ma te berita ae tabu. Tera te bitaki are e reitia Bauro nakon otara n ana reirei? Kam kona naba ni maroroakin banna ni katooto ni bwaai aika ti karaoi ngaira kaain te Ekaretia aika a uaana ao ni korakora riki ngke a karaoaki ni bwain “te nano, n te tamnei” (I-Rom 2:29).

I-Rom 3–6

“Ma ike e maiti iai te bure, ao e a manga maiti riki iai te akoaki.”

• Ko na kanga ni buokia ni kamatataia kaain te kiraati n ana reirei Bauro iaon te onimaki, te mwakuri, ao te akoaki? Iangoia n tibwauai tienario aika uoua aikai ni buokiia ni kaotaia ae ti riai n aki noori ara mwakuri aika raraoi bwa te kawai ni kakoauai kororaoira, ke ti na iangoa a na nanoanga Kristo bwa bukina n aon ara kairua ao ara bure. A kona kaain te kiraati ni karaoa aia ukeuke ibukin koaua inanon I-Rom 3:20–31; 5:1–2; 6:1–2, 21–23 are e kona ni buoka Gloria ao Justin. Tera koaua riki tabeua inanon “Bwaai n Ibuobuoki Riki Tabeua” aika a kona ni buokiia kaain te kiraati n ata kakawakin te mwakuri ae raoiroi ao ana nanoanga Kristo?

  Tienario 1

  Raoraou ae arana Gloria e korakora ana kekeiaki ni kan riki bwa ana reirei Iesu ae kakaonimaki. E mwakuri korakora ni karaoi bwaai ni kabane aika e namakin bwa e riai ni karaoi, ma e teimatoa n raraoma bwa irouna ao e aki tau ana konabwai. “E koaua bwa I bon raoiroi?” e titiraki. “E na kona te Uea ni butimwaeai?”

  Tienario 2

  Te rao ae arana Justin e aki rangi n raraoma ni karaoan rinerine aika raraoi. E kakoaua Iesu Kristo, e nanakon ana bootaki n taromauri, ao bon te karo ae tangira ao te neibwa ae raoiroi. E ngae n anne, e a tia n rineia bwa e na aki maiuakina te kainibaire are e na kona iai ni karekea ana beeba ni kariaia nakon te tembora. Ngkana ana utu ke raoraona a kataia ni kaunga bwa e na katauraoia ibukin te tembora, e kaeka, “Ngai te aomata ae raoiroi. Iai au onimaki iroun Kristo. E a kaman tia n anga maiuna ibukin au bure, ao akea au iango ae E na kona ni kaotinakoai man te aba n Uea ae te Tiretio iaon kangaanga aika uarereke aikanne.”

te aikaon ibukin bwaai n ibuobuoki

Bwaai n Ibuobuoki Riki Tabeua

Onimaki, nanoanga, ao mwakuri.

Tienario 1

• Ita 12:27

• Moronaai 10:32–33

• J. Devn Cornish, “Am I Good Enough? Will I Make It?,” Riaona, Nob. 2016, 32–34

• E reirei Beretitenti Dieter F. Uchtdorf: “E aki kona n reke te kamaiuaki rinanon te ongotaeka; e tauraoi nakoira ibukin raraan Natin te Atua. … Te akoi bon a na bwaintangira te Atua, ao nanora ni kan ongotaeka nakon a na tua nako te Atua bon te kawai are e na ataia iai Tamara are i Karawa” (“The Gift of Grace,” Liahona, Meei 2015, 109–10).

Tienario 2

• Iakobo 2:17–26

• Ereman 12:23–24

• D. Todd Christofferson, “Abide in My Love,” Liahona, Nob. 2016, 48–51

• E reirei Beretitenti Uchtdorf: “Ngkana te akoi a na bwaintangira te Atua, bukin tera ngkanne te ongotaeka nakon a na tua te Atua e rangi ni kakawaki? Bukin tera ti na tabe ma a na tua te Atua—ke n rairananora, ibukin te bwai anne? … Ara ongotaeka nakon a na tua te Atua e roko imwiin ara tangira ae akea tokina ao ara kakaitau ibukin raoiroin te Atua. Te aekaki n tangira ao ni kakaitau aei e na katiteuanai bwaai ake ti karaoi ma a na akoi te Atua n te aro ae kamiimi” (“The Gift of Grace,” 109).

Kanakoraoan Ara Anga Reire

Weteam e kairaki iroun te Tamnei. Ngkai te tia reirei ngkoe, ko a tia ni weteaki iroun te Uea ni kakabwaiaia Natina. E tangiria te Uea bwa a na koro bukin ami iango, ngaia ae ngkana e tau maiumi nakon Ana ibuobuoki, E na anganiko te kaotioti ae ko tangiria. (Taraa Anga Reirei n Ana Kawai te Tia Kamaiu, 5.)