Jeptōm̧ba 11–17

2 Korint 1–7

“Kōlaajrak Kom̧ n̄an Anij”

Ilo am̧ riiti 2 Korint 1–7 wiik in, ļōmņak kōn ro uwaan kūlaaj eo remakeļo̧k—ro me rej itok n̄an kūlaaj im ro me rejjab. Ekōjkan an pedped in katak ko ilo jepta kein maron̄ kōjeraam̧m̧an er?

Kajjitōk bwe ren Kwaļo̧k

Ro uwaan kūlaaj eo remaron̄ jeraam̧m̧an jān ron̄jake ļōmņak ko jān doon kōn ekōjkan aer kōm̧m̧an bwe ekkatak jeje ko rekwojarjar en ļapļo̧k an wejepedik. Leļo̧k jejjo minit n̄an menin jān iien n̄an iien.

Katakin Katak eo

2 Korint 1:3–7; 4:6–10, 17–18; 7:4–7

Mālijjon̄ ko ad remaron̄ in juon kōjeraam̧m̧an.

• En̄jake ko Paul ekar kōmeļeļeik im kapilōk eo ekar letok ilo 2 Korint emaron̄ in jipan̄ ro uwaan kūlaaj eo ļōmņak kōn kōjeraam̧m̧an ko me remaron̄ itok jān mālijjon̄ ko aer. N̄an jino juon iien ekōnono, kwomaron̄ kajjitōk ippān juon uwaan kūlaaj eo n̄an itok ilo an pojaktok n̄an kōnono kōn ekōjkan an mālijjon̄ kar kōjeraam̧m̧an mour eo an ak ta eo ekar ekkatak jān bar juon eo ekar niknik ilo juon mālijjon̄. Innām kwomaron̄ leļo̧k n̄an ro uwaan kūlaaj eo jejjo minit ko n̄an etale 2 Korint 1:3–7; 4:6–10, 17–18; im 7:4–7, kappukōt ta eo Paul ekar katakin kōn jibadbad ko im kōjeraam̧m̧an ko an mālijjon̄ ko. Kajjitōk ippān ro uwaan kūlaaj eo n̄an kwaļo̧k ta eo rej loe. Kwomaron̄ elmakote bwe ren kōļap anikien aer riiti eoon eo me raar loe juon katak emakeļo̧k innām kwaļo̧k juon en̄jake ak naan in kam̧ool eiookļo̧k katak jab eo.

• N̄an kakobaba n̄an iien ekōnono eo ami, ļōmņak in al ippān doon al ko rem̧m̧an tata ippān ro uwaan kūlaaj eo me rej kam̧ool kōn kaenōm̧m̧an eo im kōjeraam̧m̧an ko Jemedwōj Ilan̄ im Rilo̧mo̧o̧r eo rej litok n̄an kōj ilo iien mālijjon̄ ko—eo āinwōt “Bedbed Eo E Bin” (Al ko Al in Ajri, nō. 5). Ālkin al eo ippān doon, kwomaron̄ kajjitōk ippān ro uwaan kūlaaj eo n̄an kappukōt juon eoon ilo 2 Korint 1 im 4 me rej en̄jake ejetjet n̄an ennaan eo an al eo.

2 Korint 2:5–11

Jeorļo̧k bōd ej juon kōjeraam̧m̧an jej jim̧or leļo̧k im bōke.

• Jaar aolep wōr ad en̄jake ko n̄e juon ekar “kabūrom̧ōj” kōj ak baam̧le eo ad (eoon 5). Bōlen ro uwaan kūlaaj eo remaron̄ etale 2 Korint 2:5–11, kappukōt kapilōk eo jān Paul kōn ekōjkan ad aikuj kōm̧m̧an n̄an juon eo me ekar kōmetak kōj. Ļōmņak in kajjitōk ippān ro uwaan kūlaaj eo n̄an etale Matu 5:43–48 im Luk 15:11–32 n̄an ekkatak eļapļo̧k kōn ekōjkan ad aikuj kōm̧m̧an n̄an ro me raar kōmetak kōj. Ekōjkan ad kakkure kōj make im ro jet n̄e jej kāālet n̄an jab jeorļo̧k bōd?

2 Korint 5:14–21

Kōn Pinmuur eo an Jisōs Kraist, jemaron̄ kōllaajrak n̄an Anij.

• Elōn̄ amrej rej itok n̄an Kabun̄ in kōn juon ikdeelel n̄an en̄jake aer epakeļo̧k Anij, im juon iien ekōnono kōn 2 Korint 5:14–21 emaron̄ jipan̄ er. N̄an jinoe, ro uwaan kūlaaj eo remaron̄ etale meļeļe in naan eo kōllaajrak (reconcile), bōlen ijjino kōn lale nana eo ilo juon tikjinede. Ta kōļmenļo̧kjeņ ko menin ej letok kōn kōllaajrak ippān Anij? Ta kōļmenļo̧kjeņ ko jet jej bōk jān naan eo “Atonement” ilo Bible Dictionary eo? Ekōjkan an kōļmenļo̧kjeņ kein jipan̄ kōj meļeļe 2 Korint 5:14–21? Kwomaron̄ kōņaan kajjitōk ippān ro uwaan kūlaaj eo n̄an kwaļo̧k en̄jake ko aer kōn Rilo̧mo̧o̧r eo, eo Pinmuur eo an ekōm̧m̧an bwe en pidodo n̄an ad bar koba ippān Anij.

2 Korint 7:8–11

Būrom̧ōj in anij ej tōlļo̧k n̄an ukweļo̧k.

• 2 Korint 7:8–11 ej letok juon kōmeļeļe eo ejipan̄ kōn būrom̧ōj in anij im jerbal eo an ilo ukweļo̧k. Ta eo jej ekkatak kōn būrom̧ōj in anij jān 2 Korint 7:8–11 im naan ko an Būreejtōn Dieter F. Uchtdorf’ ilo “Kein Jipan̄ ko Jet”? Etke būrom̧ōj in anij ej menin aikuj n̄an ukweļo̧k?

• Kwomaron̄ en̄jake ketak n̄an kōllowetak juon iien ekōnono edepakpakļo̧k kōn ukweļo̧k. Eļan̄n̄e aindein, kwomaron̄ kajjieon̄e kain in: Je ioon boot eo Ukweļo̧k ej . Kajjitōk ippān ro uwaan kūlaaj eo n̄an pukōt wāween ko n̄an kadedeļok eoon eo, kōjerbal men ko rej ekkatak jān 2 Korint 7:8–11, barāinwōt jān jeje ko rekwojarjar im kein jipan̄ ko jet loe ilo Gospel Topics bwebwenato eo “Ukweļo̧k” (topics.ChurchofJesusChrist.org). Ekōjkan ad maron̄ kōjerbal katak kein n̄an jipan̄ juon meļeļe ekōjkan n̄an m̧ool in ukweļo̧k?

Kein Jipan̄ ko jet

Būrom̧ōj in Anij ej im̧we oktak im kōjatdikdik.

Būreejtōn Dieter F. Uchtdorf ekar kōmeļeļeik:

“Būrom̧ōj in Anij ej kōm̧akūt oktak eo im kōjatdikdik eo kōn Pinmuur eo an Jisōs Kraist. Būrom̧ōj in laļ ej kanōk laļļo̧k kōj, m̧anļo̧k kōjatdikdik, im kareel kōj n̄an leļo̧k kōj n̄an eļapļo̧k kapo.

“Būrom̧ōj in anij ej tōlļo̧k n̄an oktak im juon oktak in bōro. Ej kōm̧m̧an bwe jān dike jerawiwi im iakwe em̧m̧an. Ej kōketak kōj n̄an jutak im etetal ilo meram in iakwe eo an Kraist. Ukweļo̧k eo em̧ool ej kōn oktak, ejjab kakkure ak kaen̄taan ” (“You Can Do It Now!,” Liahona, Nob 2013, 56).

Kōkōm̧anm̧anļo̧k Ad Katakin

Kobaik ro rej apan̄. Jet iien ro uwaan kūlaaj eo rej en̄taan rej aikuj in kobatok n̄an en̄jake iakwe. Ļōmņak in leļo̧k n̄an er juon ijjitōn̄ n̄an bōk koņaer ilo katak eo tok juon. Jab ebweer eļan̄n̄e rej jab uwaake kijejeto ko am̧ ilo jinoin. (Lale Teaching in the Savior’s Way,; 8–9).