Sa masu vakalougatataki Eparama o Melikiseteki

Sa Vakalougatataki Eparama o Melikiseteki,, mai vei Walter Rane. iSolisoli ni daudroini

6–12 ni Noveba

Iperiu 7–13

“Sa Bete Levu ena Ka Vinaka ena Muri Mai”

Ni ko wilika na Iperiu 7–13, tugana na itukutuku ni Turaga a baleti ira na Yalododonu e Iperiu. Mo vakasaqara talega na Nona itukutuku vei iko kei ira o vakavulica tiko.

ivakatakilakila ni veiwasei

Sureta na Veiwasei

Ni bera na kalasi, sureta e vica na lewe ni kalasi mera na mai wasea eso na tikina mai na Iperiu 7–13 a vukei ira mera “toro voleka yani [vua na Kalou] e na yalodina kei na vakabauta dina sara” (Iperiu 10:22).

ivakatakilakila ni veivakavulici

Vakavulica na iVunau

Iperiu 7–10

Na cakacaka vakalotu makawa kei na kena ena gauna oqo e vakanamata vei Jisu Karisito.

• Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e vakatura na vakasaqaqara ena Iperiu 7 me baleta na malanivosa e vakavulica na Matabete i Melikiseteki ka vakadinadinataki Jisu Karisito. Kerei ira na lewe ni kalasi me ra wasea na veika era sa kunea. Se e rawa ni o solia vei ira na gauna ena kalasi me ra railesuva na wase 7 ka raica na tikina e vakavulica na matabete oqo ka vakadinadinataka na iVakabula. E vakataki Jisu Karisito vakacava o Melikiseteki? (raica na itutu i Melikiseteki ena tikina e 1–2). E vukei keda vakacava na Matabete i Melekisateki meda lako mai vei Karisito? Sa rawa vei ira na lewe ni kalasi mera raica na isaunitaro ena Ulutaga Vakosipeli, “Matabete i Melikiseteki” (topics. ChurchofJesusChrist.org).

• E dina ga ni da sega tale ni vakacabora na isoro manumanu, eda sa vakaitavi tikoga nikua ena cakacaka vakalotu, ena sala vata ga, sa dusia na yaloda vei Karisito ka vakarautaka na “sala vakadonui vakalawa e drodro mai kina na veivakalougatataki kei na kaukauwa mai lomalagi ki na noda dui bula yadua” (DavidA. Bednar, “Ka na Bokoci na Nomuni iValavala Ca,” Liaona, Me 2016, 60). Sa rawa nio dikeva vata na sala ni cakacaka vakalotu cava ena Iperiu 8–10 e vakatakarakarataka na veisorovaki ni iVakabula. Kena ivakaraitaki, na cava e matataki tiko ena dra ni bulumakau kei na me? (raica na Iperiu 9:13–14). E matataki cei tiko na bete levu? (raica na Iperiu 9:24–26). Ena rawa ni veivuke na vidio “Sacrifice and Sacrament” (ChurchofJesusChrist.org) Sa vakalougatataki keda vakacava na cakacaka vakalotu ena gauna oqo ka vukea meda vakanamata vei Jisu Karisito? Na cava eda rawa ni cakava me vakaibalebale cake na cakacaka vakalotu ka vakatabakidua vua na iVakabula?

Iperiu 10:34–38; 11

Na vakabauta e gadrevi kina mo nuitaka na nona iyakayala na Kalou.

• Ni gadrevi mera vukei na lewe ni kalasi mera kila vinaka na ivakavuvuli nei Paula baleta na vakabauta,kerei ira mera vakasamataka mera vakamacalataka na vakabauta ena dua na yatuvosa. Me qai wiliki ka veivosakitaki vakalasi na ibalebale e solia o Paula ena Iperiu 11:1. Mo qai lesia na tamata yadua me digitaka e dua vei ira na tamata e tukuni tiko ena Iperiu 11 me vulica. Sa rawa mera vakayagataka na lewe ni kalasi na ivakamacala e botona se na iDusidusi ki na iVolanikalou (scriptures.ChurchofJesusChrist.org) me ra taleva kina na ka sotava na tamata oya ena Veiyalayalati Makawa, me ratou qai wasea ki na kalasi na ka era sa kunea. Era vakaraitaka vakacava na tamata oqo nira vakila “sa vakadeitaki na veika sa vakanuinuitaki”? (iVakadewa ni Josefa Simici, Iperiu 11:1 [ena Iperiu 11:1, ivakamacala e botona b]). E rawa nira wasea na lewe ni kalasi eso tale na ivakaraitaki ni tamata yalodina. Ena gauna cava eda a vakabauta tikoga kina na yalayala se bera ni yaco?

• Na ivakasala vei ira na Yalododonu ni Iperiu era a temaki mera “suka tani tale” mai na nodra vakabauta sa rawa me yaga sara kina lewe ni kalasi era rairai sasagataka tiko na nodra ivakadinadina. E rawa talega ni vukei ira era tovolea tiko me ra vukei ira na nodra daulomani ena gauna e bolei kina na vakabauta. Me kunei na ivakasala oqo, sa rawa vei ira na lewe ni kalasi mera wilika na Iperiu 10:34–38 kei na vosa nei Elder Jeffrey R. Holland ena “iKuri ni iVurevure.” Na cava na vuna eda dau temaki kina ena so na gauna me da biuta laivi noda yalodei (raica na Iperiu 10:35) vua na Turaga kei na Nona kosipeli? Na cava eda rawa ni cakava meda tara cake ka tudei tikoga noda vakabauta ka yalonuidei tiko me “[noda] kina na ka ka yalataki [mai vua na Kalou]”? (Iperiu 10:36). Na vidio “Good Things to Come” kei na “An High Priest of Good Things to Come” (ChurchofJesusChrist.org) me vakaikuritaka na veivosaki oqo.

ivakatakilakila ni ivurevure

iKuri ni iVurevure

“Mo qai kakua kina ni kauta laivi na nomu yalodei.”

Ni vosa tiko ena Iperiu 10:32–39, vakatavulica o Elder Jeffrey R. Holland taught:

“E dina sara ni dau dredre—ni bera nio lewena na Lotu, nio saga tiko mo laki lewena, vakakina nio sa lewena oti. Sa dau vaka tu oqori na kena ivakarau, e kaya o Paula, ia kakua ni vakasukasuka. Kakua ni rere se yalolailai. Kakua ni yali nomu yalonuidei. Kakua ni guilecava na ka o vakila e liu. Kakua ni tawa vakabauta ena veika o sotava. …

“Ena vakatulewa lelevu eso sa gadrevi kina na qaqarauni kei na yalomatua, ia ni dau yaco na kena veivakararamataki, qarauna sara na veitemaki mo vakasuka mai na ka vinaka. Kevaka sa ka dodonu ni ko sa masulaka oti ka nuitaka ka bulataka, mo sa cakava sara ga oqo. Kakua ni guce ni sa veitaqataqai mai na veika dredre. … Mo vorata yani na nomu vakatitiqa. Mo vakatulewa qaqa ni ko sa rere. ‘Mo qai kakua ni kauta laivi na nomu yalonuidei.’ Mo tikoga ena kena salatu ka raica na totoka ni bula ni sa cereki vei iko” (“Cast Not Away Therefore Your Confidence,” Ensign,Maji 2000, 8–9).

Vakatorocaketaki Noda Veivakavulici

Gole i liu ki na ivolanikalou. Na ivolanikalou e dodonu me ivurevure taumada ni nomu vuli kei na vakavakarau. Na nodra vosa na parofita ena gauna oqo ena rawa me tokona na ivolanikalou vakarautaki (raica na Veivakavulici ena iVakarau ni iVakabula,, 17).