E vunautaka tiko na kosipeli o Jisu Karisito ena vuravura ni yalo

E Vunau tiko o Karisito ena Vuravura ni Yalo, mai vei Robert T. Barrett

20–26 ni Noveba

1 kei na 2 Pita

“Reki ena Reki e Sega ni Cavuti Rawa ka Vinaka Sara”

Nanuma tiko ni nomu inaki o ya mo vakavulici ira na tamata, sega walega nio vakaraitaka na lesoni. Nio wilika na iVola i Pita, nanumi ira yadua na lewe ni kalasi. Na ivakavuvuli cava ena vukea mera tara cake na nodra vakabauta?

ivakatakilakila ni veiwasei

Sureta na Veiwasei

Vola na ulutaga oqo 1 Pita kei na 2 Pita ena vava ni volavola. Solia na gauna vei ira na lewe ni kalasi mera taleva lesu na wase oqo, ka sureta mera vola ena ruku ni ulutaga oqo na vosa se malanivosa mai na wase era raica ni vakaibalebale cake. Mo qai vakayagataka na lisi oqori mera sureti kina na lewenikalasi mera wasea na nodra veivakararamataki.

ivakatakilakila ni veivakavulici

Vakavulica na iVunau

1 Pita 1:3–9; 2:19–24; 3:14–17; 4:12–19

Au rawa ni kune reki ena gauna ni veivakatovolei kei na rarawa.

• Dua tale na sala me talevi lesu kina na ivakasala i Pita ena 1 Pita 1:3–9; 2:19–24; 3:14–17; kei na 4:12–19 oya mo sureta na lewe ni kalasi mera vakasamataka e dua na tamata era kila ni sotava tiko na veivakatovolei. Solia na gauna ena kalasi mera vola e dua na ivola vua na tamata o ya, oka kina na veika dina mai na veitikina oqo ena vakayaloqaqataka na tamata o ya (raica talega na Vunau kei na Veiyalayalati 121:1–8; 123:17). Mera qai veivosakitaka na lewe ni kalasi na dina era digitaka.

1 Pita 1:13–20; 2:1–12

Eda sa kacivi meda sa “tamata sa taukena na Kalou.”

• Na ivakavuvuli nei Pita ena 1 Pita 1:13–20 kei na 2:1–12 e rawa ni dua na ivakananumi veivakauqeti ni ivakarau e raici keda kina na Turaga—Na Nona tamata—kei na veika e namaka vei keda o Koya. Sa rawa mo sureta na lewe ni kalasi mera vakasaqara na veitikina oqo ni ra vakasaqara na ivakamacala ni ibalebale ni “tamata sa taukena na Kalou” (1 Pita 2:10ka qai veivosakitaka na veika era sa kunea. Sa rawa mo vakamacalataka na vosa “taukena na Kalou” ena 1 Pita 2:9 sa kena ibalebale na “voli oti” se “maroroi” (raica na ivakamacala e botona f). Na cava e vakavulica vei keda na ka oqo baleta na sala sa dau nanumi keda kina na Kalou kei na sala e gadreva o Koya meda bula kina?

1 Pita 3:18–20; 4:6

Sa vunautaki yani na kosipeli vei ira sa mate tu me rawa ni ra lewai vakadodonu.

• Na iMatai ni iVola i Pita e tiko kina e dua vei ira na vica na itukutuku ena iVola Tabu ni nona veisiko o Jisu Karisito kina vuravura ni yalo ni oti na Nona mate—e dua na ka e vukei keda kina na ivakatakila ni gauna oqo me da kila vinaka cake. Me vukea nodra kila vakatitobu na lewe ni kalasi na vuravura ni yalo, mo sureti ira mera wilika na ivolanikalou oqo ka vola ena vava na veika era sa vulica: Joni 5:25; 1 Pita 3:18–20; 4:6; Alama 40:7–14,21; Vunau kei na Veiyalayalati 138:11–32 (raica talega na “iKuri ni iVurevure.”) Na cava na vuna e bibi kina meda kila na nona veisiko mai na iVakabula kina vuravura ni yalo? Ena vakayaco-ka vakacava na kila-ka oqo kina veika eda vakila baleta na Kalou kei na Nona ituvatuva ni veivakabulai?

2 Pita 1:1–11

Ena kaukauwa i Jisu Karisito, sa rawa meda tara cake na keda ituvaki vakalou.

• Ni gadrevi mera vakayaloqaqataki o ira o vakavulica ena nodra sasaga mera vakataki Jisu Karisito vakalevu cake, mo sureti ira mera raica na ivakarau Vakarisito e tukuni tiko ena 2 Pita 1:1-11. Sa rawa me volai na ivakarau oqo ena vava ka kerea na lewe ni kalasi mera vakamatatataka. Mera na qai veivosakitaka na lewe ni kalasi ni kena tarai cake na ivakarau oqo ena mua kina vakatorocaketaki na ivakarau tale eso. Solia na gauna mera vakananuma na ivakarau era gadreva mera vakatorocaketaka vakalevu cake.

e dua na talitali e caka vakamatau sara

Na ivakarau yadua Vakarisito eda vakatorocaketaka ena vukea meda talia e dua na isulu vakayalo ni bula vakatisaipeli.

ivakatakilakila ni ivurevure

iKuri ni iVurevure

Na cakacaka ni nodra vakabulai na mate sa vakadinadinataka tiko na ilesilesi i Karisito.

E vakavulica o Elder D. Todd Christofferson:

“Na cava na nodra icavacava na bilioni vakacaca ka ra a bula ka mate ka ra sega ni kilai Jisu? Ena Vakalesuimai ni kosipeli i Jisu Karisito sa lako talega mai na kena kilai na sala mera vakabulai kina o ira na mate ka sega ni papitaiso kei na sala me yaco na Kalou me Kalou vinaka sara, ‘lewa dodonu, ka Kalou dauloloma talega’ [Alama 42:15].

“Ia ni se bula tiko, a parofisaitaka o Jisu ni na lako talega me laki vunau vei ira sa mate tu [raica na Joni 5:25]. E kaya vei keda o Pita ni yaco oqo ena tadrua ni gauna a Lauvako kina na iVakabula kei na Tucaketale [raica na 1 Pita 3:18–19]. A vakadinadinataka o Peresitedi Joseph F. Smith ena dua na raivotu ni sikova na iVakabula na vuravura ni yalo [raica na V&V 138:30,33]. …

“Na noda rekitaka meda vakabulai ira sa mate tu, kei na gauna kei na ivurevure eda vakayagataka ena yalayala oqo, sa kena usutu taucoko kina, sa ivakaraitaki ni noda ivakadinadina baleti Jisu Karisito. Sa yaco kina me dua na ivakadinadina kaukauwa eda cakava rawa me baleta ni sa vakalou o Koya kei na Nona ilesilesi. Sa vakadinadinataka, taumada, na Karisito sa Tucaketale; ikarua, na loloma tawayalani ni Nona Veisorovaki; ikatolu, ni sai Koya na ivurevure duadua ga ni veivakabulai; ikava, ni sa mai tauyavutaka o Koya na ivakarau me rawa kina na veivakabulai; kei na ikalima, ni na lako tale mai o Koya” (The Redemption of the Dead and the Testimony of Jesus,”,” Ensign, Nove. 2000, 9–10).

Vakatoroicaketaki ni Noda Veivakavulici

Vakavulica na “vuna.” “Ena so na gauna era dau vakataroga o ira na vuli—vakabibi o ira na itabagone—se veiwekani vakacava vei ira na ivakavuvuli ni kosipeli kei na vuna me ra talairawarawa kina ena so na ivakaro. Ia, kevaka era kila na ituvatuva tawamudu nei Tamada Vakalomalagi me baleta nodra bulamarau na Luvena, sa yaco me makare cake na inaki ni ivakavuvuli ni kosipeli kei na ivakaro ka vakauqeti vakalevu cake na talairawarawa” (Veivakavulici ena iVakarau ni iVakabula, 20).