Na iBotani mai Kiliati, mai vei Annie Henrie

30 ni Okotova–5 Noveba

Iperiu 1–6

Jisu Karisito, “na Vu ni Bula Tawamudu”

Sa rawa mo wasea vei ira na nomu lewe ni kalasi eso na veivakauqeti o a ciqoma mai vua na Yalo Tabu me baleta na Iperiu 1–6. Ni ko cakava o na vakauqeti ira mera vakasaqara mera vakauqeti vakakina ni ra vulica na ivolanikalou.

Sureta na Veiwasei

Eso ena kalasi era na sega ni dau veiwasei vakawasoma era na gadreva beka mera sureti vakatabakidua kei na gauna mera vakavakarau kina. Sa rawa mo vosa vei ira e vica ni vo e dua se rua na siga ni kalasi ka kerea mera na mai wasea e dua na tikina mai na Iperiu 1–6 e vakaibalebale vei ira.

Vakavulica na iVunau

Iperiu 1–5

Jisu Karisito, “na Vu ni Bula Tawamudu”

• Ena rawa vakacava mo vakayaloqaqataka na lewe ni kalasi mera wasea na ivolanikalou e vakaibalebale baleti Jisu Karisito era kunea ni ra vulica vakai ira se vakamatavuvale ena macawa oqo? Sa rawa mo vola e lima na iyatu vakadodonu ena papa me baleta na imatai ni lima na wase ni Iperiu Iperiu. Sureta na lewe ni kalasi mera vola ena iyatu donu na malanivosa mai na wase oqo ka vakavulica vei ira baleti Jisu Karisito kei na naba ni tikina a laurai kina. E mana vakacava na noda kila na veika oqo baleta na iVakabula ki na noda vakabauti Koya ka guta meda muri Koya?

Iperiu 2:9–18; 4:12–16; 5:7–8

A vakararawataki o Jisu Karisito ena ka kecega me rawa Vua me kila vinaka ka vukei keda ni da vakararawataki.

• Ena rawa me veivuke talega naIperiu 2:9–18; 4:12–16; 5:7–8 vei ira sa raica tiko na veivakararawataki e vuravura ka vakataroga tiko se sa raica tiko oqo na Kalou se bau kauwai kina. Sa rawa talega mera vakasaqara na lewe ni kalasi na veitikina oqo mera kunea na dina ena sauma na vakatataro vakaoqo. Na cava era vakavulica na veitikina oqo baleta na sala sa dau cakacaka kina na iVakabula kina nodra vakararawataki na kawatamata? Ena veivuke talega mera sureti na lewe ni kalasi mera wasea na ivakaraitaki mai na ivolanikalou a veitokoni ka veivakacegui kina o Jisu Karisito ni ra kune rarawa na tamata (raica na “iKuri ni iVurevure”) se vakaraitaka na vidio “Mountains to Climb” (ChurchofJesusChrist.org). E rawa ni ra veivosakitaka na lewe ni kalasi na veika era sa vulica na sala e rawa ni vukei keda kina na iVakabula ni da sotava na bolebole dredre.

Iperiu 3:7–4:2

Na veivakalougatataki ni Kalou sa nodra o ira sa “kakua ni vakaukauwataka na [yalodra].”

• Iperiu 3 kei 4 e dua na vakatakekere vei ira na Yalododonu mera kakua ni vakaukauwataka na yalodra ka besetaka na veivakalougatataki e vinakata na Kalou me solia vei ira. Nio wilika vata kei na kalasi na Iperiu 3:7–4:2, me veivosakitaki na sala e rawa ni taurivaki kina vei keda nikua na veika era sotava na Isireli makawa, me vaka ga a taurivaki vei ira na Iperiu ena itekivu ni Lotu (sa rawa mo ni raica na lewenivuli me baleta na veitikina oqo ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Na cava eda rawa ni cakava me malumalumu tiko kina na yaloda ka da cakava na lewa ni Turaga? (raica na Vosa Vakaibalebale 3:5–6; Alama 5:14–15; Ica 4:15). Sa rawa vei ira na lewe ni kalasi mera wasea na sala era sa vakalougatataki kina o ira se so tale era kila baleta ni ra sa yalomalumalumu ka bibivoro.

Iperiu 5:1–5

O ira sa veiqaravi tiko ena matanitu ni Kalou sa dodonu mera kacivi mai vua na Kalou.

• Na itukutuku ena Iperiu 5 me baleti ira na matabete era sa kacivi mai vua na Kalou me vakatara vei ira kece sa vakatikori mai na lewa ni matabete mera veiqaravi ena veikacivi ni Lotu. Me vukei nomu lewe ni kalasi mera kila na ibalebale “sa kacivi mai vua na Kalou me vakataki Eroni,” sa rawa mo sureti ira mera taleva lesu na itukutuku kei Eroni ni sa ciqoma na nona veikacivi ena Lako Yani 4:10–16, 27–31; 28:1. Na veivakararamataki cava mai na itukutuku oqo ena vukea meda kila vinaka na Iperiu 5:1–5? Sa rawa vei ira na lewe ni kalasi mera wasea na sala era sa ciqoma kina na veivakadeitaki ni dua sa kacivi mai vua na Kalou me qarava e dua na veikacivi—oka kina, o ira vakai ira. E vukei ira vakacava na veivakadeitaki oya me ra tokona vakavinaka cake na tamata oya ena nona veikacivi?

“Sa sega e dua sa taura ​​​vakataki koya na cakacaka vakarokoroko oqo, o koya ga sa kacivi mai vua na Kalou, me vakataki Eroni” (Iperiu 5:4). Kacivi Eroni ki na Veiqaravi o Mosese, mai vei Harry Anderson

iKuri ni iVurevure

Na ivakaraitaki vakaivolanikalou ni tamata a vakaceguya o Jisu Karisito.

• Joni 8:1–11: A vakaceguya na Turaga na marama dautagane.

• Joni 11:1–46: A vakacegui Meri kei Marica na Turaga ni sa mate na ganedrau, Lasarusa.

• Inosi 1:4–6: A vosota na Turaga na ivalavala ca i Inosi ka vagalalataki koya mai kina.

• Mosaia 21:5–15: A vakamalumalumutaka na Turaga na yalodra na Lemanaiti mera vakamamadataka kina na nodra icolacola na Limiai.

• Mosaia 24:14–15: Sa vaqaqacotaki ira na tamata i Alama na Turaga me rawa ni ra colata na nodra icolacola.

• Ica 12:23–29A vakacegui Moronai na vosa ni Turaga.

• 3 Nifai 17:6–7: A vueta na iVakabula na nodra malumalumu na Nifai.

• Vunau kei na Veiyalayalati 121:7–10: Na Turaga a solia na vakacegu vei Josefa Simici (raica talega na Vunau kei na Veiyalayalati 123:17).

Vakatorocaketaki Noda Veivakavulici

Vakarautaka na vunua ni kalasi me vakilai kina na yalo tabu. Nio susuga cake e dua na yalo veivakacegui, dauloloma ena nomu kalasi, sa na rawarawa vua na Yalo Tabu me tara na yalodra o vakavulica tiko. Na cava o rawa ni cakava mo sureta kina na veivakauqeti ni Yalo Tabu ki na nomu kalasi? Ena rawa beka mo moica na ituvatuva ni dabedabe se vakayagataka na iyaloyalo se ivakatagi me sureta kina na Yalo Tabu? (Raica na Veivakavulici ena iVakarau ni iVakabula, 15.)